Канон святому праведному Петру Чагринскому Тропарь, глас 5: Христа Бога всем сердцем возлюбил еси и за Ним ревностно последовал еси, все же мирское и суетное оставив, постом и молитвою плоть свою духови покорил, верных поучал еси стезям спасительным и вел их путем, указанным преподобным Серафимом, праведне отче Петре, моли Христа Бога спастися душам нашим. Величание Величаем тя, святый праведный отче Петре, и чтим святую память твою, ты бо молиши о нас Христа Бога нашего. Канон праведному Петру, глас 2. Песнь 1 Ирмос: Во глубине постла иногда фараонитское всевоинство преоруженная сила, воплощшееся же Слово всезлобный грех потребило есть: препрославленный Господь, славно бо прославися. Припев: Святый праведный отче Петре, моли Бога о нас. Кую похвалу принесем ти святый отче Петре, жизнь свою посвятил еси Богови, плоть покорил еси духови, к Небесному граду шествовав невозвратно, ибо управлялся еси Духом Святым. Путь тебе отче желаемый, поведали отцы от Серафима Саровскаго и ты последовал еси прилежно путем, вводящим ко Граду Небесному. Слава: На землю добру пали зерна спасения и Божественным просвещением озарився премудре, тем и нас страстьми омраченных озари, просвещением благодати и моли получит нам спасение. И ныне: Труждает мя буря немощного и окаяннаго и привлекает к пучине страстей, но Ты, о Мати Бога Вышняго, исцели страсти душевныя моя. Песнь 3 Ирмос: На камени мя веры утвердив, расширил еси уста моя на враги моя, возвесели бо ся дух мой, внегда пети: несть свят яко же Бог наш, и несть праведен паче Тебе Господи. Плоти своея восстания, крепким воздержанием в пище и питии умертвил еси блаженне, постоянно творя молитву Иисусову. Моли же Господа Вышняго обрести нам прегрешений разрешение. Закону Божественному поучал еси, не имея грамоты, и не ведый даже единыя буквы, был Духом Святым озарен свыше и Господь управлял еси твоим разумом, Его же умоли подати и нам просвещение Святаго Духа. Слава: Яко весть Господь путь праведных, и путь нечестивых погибнет, глаголал еси тако отче Петре, темже молимся ти, не остави нас в своих молитвах, дабы и нам не погибнути. И ныне: Мати Божия, Ты бо слышала еси искренния молитвы праведнаго, услыши же и нас и помолися о просящих и подаждь руку помощи погибающим. Седален, глас 4: Небесное стяжав жительство блаженнне, с юности, выну повинуяся Богу, страсти греховныя победил еси, и собранное тобою стадо Христово твердо вел еси путем, указанным Серафимом Саровским, строго храня заповеди Господни, дабы угодити Христу Богу. Слава и ныне, Богородичен: Предстательнице наша, Безневестная Дево, на Тя бо уповаем, непрестанно моли спастися душам нашим. Песнь 4 Ирмос: Пришел еси от Девы, не ходатай, ни ангел, но Сам, Господи, воплощся и спасл еси всего мя человека. Тем зову Ти: слава силе Твоей Господи. Возжелал еси отче Петре храм Божий построити, и намерение сие исполнил еси, ибо имел еси во всем, Единаго Благодетеля и Всещедраго Господа. Пребывающу ти в мире, яко на свещнице светильник, всех и всегда поучал еси истине и строго чтил еси святыя дни и воскресныя, и Господь дарова ти благодать свыше, тем же тя вернии славим. Слава: Болезни тяжции постигоша мя и телом немощен лежу, о отче Петре, верою зову ти, болезни сердца моего утоли. И ныне: Со благоговением ныне поклонимся, Пречистей Божией Матери, молящися со блаженным Петром просяще, ниспослати нам велия милости. Песнь 5 Ирмос: Просвещение во тьме лежащих, спасение отчаянных, Христе Спасе мой, к Тебе утреннюю, Царю мира, просвети мя сиянием Твоим: иного бо разве Тебе Бога не знаю. Мнози верние людие Самарския земли, текоша к тебе отче Петре, ты же целил еси их болезни и язвы, и бесы изгонял еси силою Христовою, темже песнословим твое милосердие. Поучал еси жительству истинному и просвещал еси сущия во тьме неверия, обличал еси нечестие, твердо стоял еси за веру православную, во всем примером был еси отче Петре, моли о нас Единаго Бога. Слава: Увлекаеми страстьми различными, с верою и надеждою притекаем к твоему заступлению отче Петре, твоими ходатайствами всех нас посети моляся Вседержителю. И ныне: Тя Благословенная Владычице, скорая наша Заступнице и ходатаице пред Богом, молю недостойный, спаси мя от бед и скорбей и лютых прегрешений, верою воспевающего Тя. Песнь 6 Ирмос: В бездне греховной валяяся, неизследную милосердия Твоего призываю бездну: от тли, Боже мя возведи. Луч Божественнаго Света возсия нам, приидите чада вернии, да озаримся им, да возгоримся духом, величающе песньми блаженнаго Петра. Славу, честь, богатство и чревоугодие ты отче презрел ееи, устремляяся в Горния обители, угождая и работая Богови. Слава: Всегда смирял еси плоть твою терпением блаженне, путем тесным шел еси в жизнь вечную, благоугождая Единому Богу и Владыке. И ныне: Пристанище нам буди Мати Божия, волнуемым житейскою бурею, и отишие в пучине скорбей, Владычице помози нам, да не погибнем. Кондак, глас 8: Земли Самарския учителю, с высоты прием благодать Святаго Духа, целил еси болезни и изгонял еси бесов, и церкви Христовой до конца предан был еси, сего ради молим тя, (праведне) отче Петре, моли Бога о духовных чадах своих. Икос Возсиял еси зарею пресветлою озаряя концы России, сошедшееся вернии воспоим праведнаго, того бо молитвами избавляемся от лютых обстояний, да прославим Христа даровавшаго нам сего источника исцелений, и блаженному Петру возопиим, моли Того о духовных чадах своих. Песнь 7 Ирмос: Богопротивное веление беззаконнующаго мучителя высок пламень вознесло есть; Христос же простре богочестивым отроком росу духовную, сый благословен и препрославлен. Преславная чудеса Божия милости, в нашей земли Самарстей содеяшася: Господь яви нам угодника, праведнаго отца Петра, придите вси песньми почтим зовуще: Отец наших Боже, благословен еси. Ликуют людии вернии, в сей радостный праздник, перенесение твоих честных мощей, отче Петре, в ограду Архангельского храма, в селение Красные Ключи, и радостно с веселием сердца вопиют: Отец наших Боже, благословен еси. Слава: Избави мя болезней и скорбей и различных недугов молитвами твоими, блаженне отче Петре, яко от Бога прием благодать, врачевати страсти, да с веселием поем ти: Отец наших Боже благословен еси. И ныне: Пречистая Богородице, в страшный час суда моего защити мя и геенны избави. Яко да чту и воспеваю Тя во веки. Песнь 8 Ирмос: Пещь иногда огненная в Вавилоне действа разделяше, Божиим велением халдеи опаляющая, верныя же орошающая поющия: благословите вся дела Господня, Господа. Обретоша, отче, твои мощи нетленнии и по сей день от них исходят токи исцелений, темже молим тя и нас теплым твоим предстательством спаси поющих: благословите вся дела Господня, Господа. Христов угодниче праведный отче Петре, не забуди и нас призывающих тя истинно и поющих: благословите вся дела Господня, Господа. Слава: Ты о преблаженне, нищим питатель и убогим заступник и всем приходящим к тебе скорый помощник и защититель был еси, защити и нас твоим предстательством поющих: благословите вся дела Господня, Господа. И ныне: Богородице Пресвятая, избави на Тя надеющихся от бед, и спаси от всякаго зла, сохрани в нощи и во дни, от враг видимых и невидимых, да славлю Тя Владычице. Песнь 9 Ирмос: Безначальна Родителя Сын Бог и Господь, воплощен от Девы, нам явися, омраченная просветити, собрати расточенная, тем Всепетую Богородицу величаем. Святостию твоих дел и поучению словес Твоих насладишися преблаженне, и к мощем твоим искаху прикоснутися вернии, прославляют в дивных делах Своих Господа. Како достойно возвеличим тя, отче Петре, храм Божий поставив ради верных и до кончины своея предан делами Христу Богу, почитаем вси труды и болезни твоя и чтим тя, путеводителя ко спасению. Слава: Благодаряще Бога, славим тя, отче Петре, Чагринский чудотворче, за твой великий подвиг, его же совершил еси хранения ради веры православной на Руси, и за единение всех православных христиан. И ныне: Богородице Дево, свыше Твоим благоутробием нас немощных посети, и от тли и бед избави нас почитающих Тя. Молитва О, пречудне отче Петре, смиренно к тебе припадаем чада твоя духовныя. И молимтися, не остави нас грешных и недостойных, не отступи от нас духом твоим и ко Господу Иисусу Христу молися в прилежных твоих молитвах. Да простит нам Господь прегрешения наша и покрыет нас Своею благодатию. И пошлет нам любовь нелицемерную, дабы неотступно идти нам по пути заповедей Его, указанным самим преподобным Серафимом Саровским, якоже ты, отче, сам сохранил еси. И моли Христа Бога о нас, припадающих к твоим святым мощам, во истинней вере и покаянии пожити. И получити конец благий и наследовати Царствие Небесное, славящих пресвятое имя Его, во веки веков. Аминь. Акафист святому праведному Петру Чагринскому Кондак 1 Возбранный чудотворче и угодниче Христов, скорый помощниче и заступниче наш, праведный отче Петре, яко имея дерзновение ко Господу, от всяких нас бед свободи, да зовем ти: Радуйся, праведне отче Петре, скорый помощниче в бедах наших. Икос 1 Ангелов Творец избра тя измлада и указа ти путь, ведущий ко спасению, его же поведал еси миряном сам преподобный Серафим. Мы же, воспомииающе добродетельное житие твое, восхваляем тя сице: Радуйся, яко измлада пребывавый во глубоком смирении; радуйся, благочестивых родителей утешение. Радуйся, образе послушания; радуйся, наученный искреннему покаянию. Радуйся, в сердце от юности Бога имевый; радуйся, ради Христа насмешки терпевый. Радуйся, образе кротости и смирения; радуйся, с Богом всегда пребывавый во уединении. Радуйся, праведне отче Петре, скорый помощниче в бедах наших. Кондак 2 Видящи мати твоя теплую любовь твою ко Господу, возжелала всем сердцем привести тебя к истинней христианской жизни. И более пеклася о том, дабы имети тебе друзи духовнии, кои творят волю Божию и Ему непрестанно со умилением взывают: Аллилуиа. Икос 2 Разум небесный тебе даровася, праведне отче, от самой бо юности всегда ты стремился еси ходити во храм Божий в селении Старый Буян. И молился прилежно со умилением и стоял еси аки свеща, даже вернии дивляхуся, како научен воздавати молитвы ко Господу. Сего ради и мы вопием ти сице: Радуйся, земли Самарския богоизбранное чадо; радуйся, житию праведных поревновав измлада. Радуйся, матери своея приявый добрая наставления; радуйся, получивый от нея к чистому житию благословение. Радуйся, молитвенное правило строго соблюдавый; радуйся, воздержание в пищи и питии такожде не нарушавый. Радуйся, понедельник, среду и пяток постными днями хранивый; радуйся, к чистыя жизни мнозе ревнивый. Радуйся, праведне отче Петре, скорый помощниче в бедах наших. Кондак 3 Сила Вышняго даде тебе, отче Петре, в глубокой нощи жития сего освещати светом разума. Ты же, Духом Божиим просвещенный, всегда пребывал еси в молитве Иисусовой, мня себе хуже и ниже всех, и вел велию борьбу со страстьми и похотьми. И вернии людие, видяще сия, почитаху тя, яко праведника, ибо по твоему совету все в точности совершахуся, и за сие благодарными усты вопияху ко Господу: Аллилуиа. Икос 3 Имея в душе и сердце веру в Единого Бога и силу Его, шествовал с радостию непоколеблемо, по старческому преданию жизни святой, строго исполняя все обычаи Святой Соборной Апостольской Церкви. Вернии людие за твое богоугодное житие прилепляхуся к тебе, аки к путеводителю, и ты указывал еси другим сия же заповеди, коим учили тя святии отцы и Церковь. И дивляхуся таковому о тебе промышлению возносим и мы к Богу о тебе сия похвалы: Радуйся, Христа Спасителя всей душей возлюбивый; радуйся, сердце и ум в молитве крепко к Нему утвердивый. Радуйся, духовного отца никогдаже ослушатися дерзнувый; радуйся, мир и его суету всю презревый. Радуйся, никогдаже нарушил еси ни праздничных дней, ни воскресных; радуйся, никогдаже для других не жалел еси сил телесных. Радуйся, предан ты быв до кончины своея токмо Богови; радуйся, вземше свой крест, шествовал еси тою же дорогою. Радуйся, праведне отче Петре, скорый помощниче в бедах наших. Кондак 4 Бурю мирскаго жития утишая, сам шел еси узким путем, неленостно работая Богови, во мнозе долготерпении и смирении, ведуще за собою духовные чада своя, кои к тебе прилепляхуся по Бозе. Ты же, утверждая братию свою в истинной православной вере, наставлял шествовати крепце и исполняли свято вся ея заповеди по совести, и едиными усты и сердцем пети Богови: Аллилуиа. Икос 4 Слышаще и внимающе, како наставлял еси ты, отче, жити, вернии человецы Самарския земли, следоваху за тобою и поучахуся о твоих словесех и подвизех. Людие бо бяху разного возраста и звания к тебе притекаху и аки медом услаждахуся, како глаголал еси о Бозе, сего ради и мы с любовию вопием ти тако: Радуйся, чистоты душевныя и телесныя усердный хранителю; радуйся, в наставлениях по Бозе неутомимый учителю. Радуйся, к Богу о нас неусыпный молитвенниче; радуйся, паствы твоея истинный и добрый наставниче. Радуйся, яко всех, призывающих тя, от напастей избавляеши; радуйся, и нам искушений диавольских избегнути помогаеши. Радуйся, святоотеческим правилом усердно подражающий; радуйся, любовь Божию к верным привлекающий. Радуйся, праведне отче Петре, скорый помощниче в бедах наших. Кондак 5 Божественный свет просвети тя, отче, и Духом Святым озарен быв свыше пути спасительному поучал еси. И восходя благодатию Божиею от силы в силу, вел еси за собою всех тех, кои жаждущи душевного спасения, внимали твоему душеполезному учению, ведая образ твоего чистаго жития. Молитвенно к тебе припадающе, со благодарением вопием дивному во святых Своих Богу: Аллилуиа. Икос 5 Видя в тебе, отче Петре, пастыря добраго, из мнозех селениих, ближних и дальних, к тебе текоша за добрым советом и помощию. Ты же усердно внимал еси сим людям, пася их прилежно и нужды их исполняя, и за все повелевая благодарити Творца всея твари. Тем же и мы, тя почитающе, ублажаем зовуще: Радуйся, своею жизнию путь ко спасению нам открывающий; радуйся, своими молитвами верных с Богом всегда примиряющий. Радуйся, общее житие не имеющим крова в миру устрояющий; радуйся, вдов и сирот в них вселяющий. Радуйся, подвизающимся на диавола и просящим тебя помогающий; радуйся, крепким оружием их ограждающий. Радуйся, земли Самарския ты покровителю; радуйся, идущих за тобою по Бозе ты всех окормителю. Радуйся, праведне отче Петре, скорый помощниче в бедах наших. Кондак 6 Проповедуют людие сие богоугодное житие, кое благословил еси для мирских человек сам Саровский чудотворец. Тако и ты, отче Петре, шел еси, ревнуя о благочестии. Плоть твою духови поработил еси постом, молитвою и добрым деланием. От малого до велика поучая, како грех рождается и како его победити. О сем и мы, надеющиеся на твое заступление, святе Петре, благодарственно взываем Богови: Аллилуиа. Икос 6 Возсиял еси, блаже, добротою души твоея к людем. Во твоем бо селении, идеже ты пребывал еси, отче, тамо бо не бе близ Божественного храма, дабы ходити верным и молитися Богу. Ты же, отче, возжелал еси построити православную церковь в Чаграх. И Господь дарова ти велий разум, како и что подобает ти делати. Ты же многажды сам, даже нощию, ускорял своею помощию ея строение. Сего ради со умилением взываем ти сице: Радуйся, делателям святаго храма помогающий; радуйся, и другия верныя к сему труду сподвизающий. Радуйся, Бога всегда призывающий; радуйся, от Него невидимую помощь получающий. Радуйся, по построении храма иконы приобретающий; радуйся, чтецами и певцами чад духовных утверждающий. Радуйся, храм Божий всегда посещающий; радуйся, во время богослужения ум свой с Богом соединяющий. Радуйся, праведне отче Петре, скорый помощниче в бедах наших. Кондак 7 Хотя всемилостивый Господь явити в тебе, блаженне, благодать Свою, яко избраннику Своему, дарова тебе благоугождати Ему. Ты же, отче, возлюбил еси Господа твоего паче всего мира и ближняго своего, аки и себе. И бе писано, яко ты, отче, единожды, видя сироту на поле сеюща семя, с трудом носившаго лукошко и неумело рассеявшаго своею детскою рукою, ты же, оставив загон свой, поспешествовал еси ему на помощь, и, с молитвой на устах поработав ему до полудня, затем возвратился еси на свое делание. Отрок сей с любовию, в благодарности воспел еси Богу: Аллилуиа. Икос 7 Видяще тя пастыря и учителя Истины, в мире страстном среди всех живуща и ведущаго путь спасительный, течаху к тебе, отче, благоразумнии людие. Ты же, ни единаго отринув, всех с радостию и любовию принимал еси, тем помоществуя. И мы, радующеся таковому промышлению Божию о тебе, взываем ти тако: Радуйся, столпе православия непоколебимый; радуйся, уставы церковные строго хранивый. Радуйся, маловерных людей в храм Божий направляющий; радуйся, все сомнения с пастырем разрешающий. Радуйся, помощниче в немощи лежащих; радуйся, посетителю скорбных и болящих. Радуйся, мудрый к Богу путеводителю; радуйся, заповедей Господних верный исполнителю. Радуйся, праведне отче Петре, скорый помощнице в бедах наших. Кондак 8 Дивное чудо видим на тебе, праведне отче. Облече бо тя Господь силою Своею свыше и даде ти дар пророчества и исцеления. Целил бо еси язи и недуги, и беснование различное. Сила же Божия управляла еси тобою, и мнозии людие чрез тебе улучаху от Бога велию милость. Молитвами твоими и наша сердца любовию к Богу просвети, да и мы воспоем Ему с тобою: Аллилуиа. Икос 8 Благодатию Божественною просвещаем, праведне Петре, име бо пасомое стадо верных, крепко отревал их от путей погибельных и зорко бдел еси над своими овцами, яко истинный пастырь, и кормил еси хлебом душевным и телесным вся приходящая к тебе и врученное тебе стадо. С ними же и мы, во гресех житие свое иждивше, вопием ко Господу таковая: Радуйся, о нас усердный молитвенниче; радуйся, мудрый по Бозе наставниче. Радуйся, ходатаю о нашем спасении; радуйся, наставляяй грешных ко исправлению. Радуйся, нощному бдению в молитве нас научивый; радуйся, пустословити и празднословити верным воспретивый. Радуйся, любовь к Богу и веру в нас насаждающий; радуйся, темный мрак наших душ освещающий. Радуйся, праведне отче Петре, скорый помощниче в бедах наших. Кондак 9 Все естество небесных сил радовашеся, како в земли Самарской явился еси, праведне Петре, светяще своею жизнию, направляюще верных к Церкви Божией и пастырям ея. И научаше жити в чистоте и правде и прославляше Господа Бога своими добрыми делами и пети Ему взывая: Аллилуиа. Икос 9 Витии многовещанные не довлеют, отче, к достойной тебе похвале, всего себе предал еси на служение Богу и людем, живущим по заповедям Божиим, и хранил еси верных под Господним покровом, дабы лукавый не совратил с истиннаго пути и не внушил коего сомнения в жизни по Бозе. Сего ради благодарственно зовем ти: Радуйся, благ временных и вечных пред Богом ходатаю усердный; радуйся, болящим врач милосердный. Радуйся, над духовными чадами строго бдящий; радуйся, к Божией жизни их приводящий. Радуйся, многие людие в духовном разуме просветивший; радуйся, добродетелями себе украсивший. Радуйся, молитвенниче пред Богом чудный; радуйся, провидец дивный и мудрый. Радуйся, праведне отче Петре, скорый помощниче в бедах наших. Кондак 10 Спасения душевнаго ты всем желая еси, отче, и даже пред самою кончиною своею глаголал еси верным: «Любите друг друга и соблюдайте вся заповеди Господни; людие бо, видяще вашу добрую жизнь, прославят вас и Отца вашего, сущаго на небесех, и воспоют Ему песнь: Аллилуиа». Икос 10 Стены? каменныя крепльше бе любовь твоя, святе, к Богу. До последняго твоего воздыхания сокрушался о своих делех, причащался бо и соборовался еси, прося слезно прощения у Бога, и, скончавше свое житие тихо, почил еси от сей временной жизни. Мы же, видяще сие, вопием ти: Радуйся, до последняго воздыхания Имя Божие тобою призывашеся; радуйся, праведною кончиною скончевашеся. Радуйся, в послушании Церкви поживший; радуйся, верным ты людям всю жизнь послуживший. Радуйся, грешником кающимся пред Богом предстателю; радуйся, душ и телес скорый врачевателю. Радуйся, людям просящим ты скорый помощниче; радуйся, всем ты заблудшим по вере наставниче. Радуйся, праведне отче Петре, скорый помощниче в бедах наших. Кондак 11 Пение непрестанное возносим ко Господу за добраго наставника и учителя Истины, за ревностного хранителя православия и строителя Божиего храма. По кончине бо его тело погребоша в ограде церкви, кую сам построил в селении Чагры. Благодарни бо Господеви за таковую Его милость к нам недостойным, выну зовем Ему: Аллилуиа. Икос 11 Светозарным светом просияша мощи твоя у храма Покрова Божия Матери. Егда же сгореша церковь, и мощи твои нетлении принесени быша на ино место в сем же селении, и по тридесятичетырех летех принесени и селение Красные Ключи в ограду Архангельского храма. Тем же благодаря Бога за сие, воспеваем ти сице: Радуйся, от святых мощей твоих многая чудесная исцеления болящим источаяй; радуйся, от страстей благодатию, данною ти от Бога, души наша свобождаяй. Радуйся, праведне отче Петре, престолу Царя Небеснаго предстояй; радуйся, о грешнем роде человечестем молитву пред Ним возносяй. Радуйся, слезы и воздыхания скорбящих с любовию утоляющий; радуйся, прошения труждающихся и обремененных скоро исполняющий. Радуйся, яко всем помощь посылающий; радуйся, из людей страждущих бесы изгоняющий. Радуйся, праведне отче Петре, скорый помощниче в бедах наших. Кондак 12 Благодать Божию, оставление грехов и исправление жития испроси нам, святе отче, у Господа, яко имея бо к Нему дерзновение, да не бесплодно будет семя духовное, кое ты в нас сеял еси. Но да прозябнет и даст добрый плод. И молися за нас ко Всевышнему, дабы до кончины нашея в истинней христианской вере пребыли есмы, денно и нощно пребывая с Богом и в сердце поюще Ему: Аллилуиа. Икос 12 Поюще твое прославление, ублажаем тя, праведне Петре, яко молитвенника о нас пред Господем и, благодаряще Бога, славим тя, отче, за твой великий подвиг, его же совершил еси ради сохранения веры православной на Руси. Сего ради и мы восхваляем тя и взываем тако: Радуйся, воздержанной жизнию своею ты верным светивый; радуйся, во всем и всегда им примером бывый. Радуйся, преподобного Серафима наставления хранящий; радуйся, целителю недужных и болящих. Радуйся, яко вся концы земли Самарския своею любовию объявый; радуйся, в глаголах своих Творца величавый. Радуйся, временныя наши скорби облегчающий; радуйся, и на Страшнем Судище за надеющихся на тебе заступающий. Радуйся, праведне отче Петре, скорый помощниче в бедах наших. Кондак 13 О, предивный наставниче и учителю, святый праведный отче Петре, приими малое сие моление наше, с любовию тебе приносимое, и избави нас от скорбей и болезней и от всяких бед. И умоли Господа нашего Иисуса Христа, да помилует нас в день судный. Да выну поем Ему: Аллилуиа. Этот кондак читается трижды, затем икос 1 и кондак 1. МОЛИТВА О, великий угодниче Божий, праведный отче Петре, всю свою жизнь Господеви послуживый, трудом, молитвою, постом и всеми другими добродетелями. Твердо и строго шел еси, выполняя Божии заповеди, церковь Христову воздвигл еси, заботился о ней и предан был ей до последняго своего издыхания. Колико ты верных и заблудших людей привел еси ко спасению! Молимся и мы тебе, отче, и просим, внемли нашим сердечным прошениям, и помози нам заповеди Господни сохранити. Бороться со своими страстьми и похотьми и нелицемерно предстати пред судом Божиим. От поношения огради народ. Страну нашу в мире и безмятежии сохрани. Испроси у Господа избавитися всем нам от горьких мытарств и вечныя муки, и быти наследниками Небесного Царствия со всеми святыми, от века угодившими Богу. Ему же подобает честь и слава ныне и присно и во веки веков. Аминь. По благословению Высокопреосвященнейшего СЕРГИЯ, архиепископа Самарского и Сызранского Святой праведный Петр Чагринский (1856 – 1925) хранил жизнь, указанную мирянам для спасения души св. прп. Серафимом Саровским. Строго подвизался в выполнении заповедей Божиих, молился, постился, трудился. Пищу вкушал два раза в день. Мяса не вкушал, вина не употреблял. Постными днями были понедельник, среда и пятница. Постоянно посещал храм Божий. В своем родном селе Чагры построил церковь, освященную в честь Покрова Божией Матери. Многих привел он ко спасению своей примерной жизнью. Был прозорлив, исцелял недуги и болезни, изгонял бесов из людей, мучимых ими, 14 лет нес подвиг старчества. Похоронен был в ограде построенной им церкви. Мощи старца, как показали перезахоронения в 1965 и 1999 гг., оказались нетленными. В декабре 1999 года Синодальная Комиссии по канонизации приняла решение канонизировать праведного Петра в лике местночтимых святых земли Самарской. 24 июня 2000 г. Высокопреосвященный Сергий, архиепископ Самарский и Сызранский, торжественно совершил чин его прославления. В настоящее время мощи святого праведного Петра Чагринского находятся в раке в Михаило-Архангельской церкви с. Красные Ключи Похвистненского района Самарской области. Поклониться им едут православные верующие не только из Самары, но и многих городов России. Засвидетельствовано множество случаев душевного и телесного исцеления людей, обчищающихся к нему в молитве за помощью. Такие свидетельств продолжают поступать. PAGE PAGE 11