СЛУЖБА святой мученице Людмиле, еяже память творим 16 сентября На вечерне: на Господи, воззвах: стихиры на 10, глас 6. Днесь благодать Святаго Духа нас собра, и вси составивши Христову Церковь, прославляюще Бога нашего, помянем Его святую мученицу, пресветлую Людмилу, пострадавшую за Христа от диавола. На святой твой праздник днесь собрались мы, мученице Людмило славне, вопиюще едиными устнами ти: ходатайствуй пред Господом за мир сей, помоги всем скорбящим, утеши печальных, спаси отчаянных и исполни всякое прошение, к тебе восходящее. В любви Божией пребывая присно, не забуди ближних твоих, наша заступнице верная, Людмило пресветлая, мученице крепкая, и всем болящим помоги, разобщенных вновь соедини, скорбящих же утеши, сердца злых умягчи и сочетай всех со Троицей, да вопиют вси Христу: Свят еси, наш Господи. Любовь превечную стяжавши в сердце своем, Людмило святая мученице, явила Царствие Христово в мире, освятила ближних своих, прославила еси жизнью Христа Бога нашего, убита была еси от врагов Господа, вознеслась же ко Троице яко столп огненный и ныне за весь мир предстательствуеши. Приявши в сердце свое веру, и надежду не оставивши, возсияла великой любовию, просвещая мир и ближних научающи, мученице Людмило, просвети и ныне всех ослепленных. Царствие Божие есть любовь и единство в Господе, Свята Духа общение, всех соединение, радость неизреченная, доброта великая, благодарение, праведность и мир, наипаче же Христова Любовь, Еяже приявши, Людмило, моли за мир сей. Помощнице наша светлая, заступнице неотступная, душе любящая, святая мученице, помолися за всех, да все приидут ко Господу, да все войдут во Царствие, да все познают радость Евхаристии. Днесь праздник твой, Людмило, совершаем мы, согласно тя поюще, за Христа пострадавшую, и в страстях Его не оставльшую, всех же возлюбившую, мучителей своих благословившую, и, в смерть сходящу, сретившую Христа, и ныне за весь мир ходатайствующую и всем людям помогающую. Причащаяся ныне Христова Царствия, и зрящи Бога во всей полноте, и в Духе Святом пребывающи, не покидаеши нас, Людмило мученице, но присно с нами предстоиши Господу и подаеши помощь всем, тоя требующим, Просветившая мир учением Христовым, сочетавшая с Господом своих сродников, утешавшая скорбящих и нищим помогавшая, во браке честно пожившая, явившая людям благодать Божию Людмило, Христова агнице, защити от диавола всех и вся. Слава: праздника Воздвижения, стихира Кресте пречестный, егоже обстоят чины ангельстии:, зри в службе праздника. И ныне: Богородичен догматик шестого гласа: Кто Тебе не ублажит, Пресвятая Дево: Вход с кадилом. Прокимен дня. Паримии мученические, зри в Минее. На стиховне стихиры 4, глас 5. Совершивши течение жизни добре, исполнивши Христовы заповеди, воспитавши чад своих во истине, затворилася еси в Тетинском замке, Людмило, княгине Чешская, идеже и мученицей соделалася. Стих: Возведох очи мои в горы, отонудуже приидет помощь моя. Драгомира, Людмилина сродница, ослепленная силой сатанинскою, возненавидевши Господа, убила еси святую мученицу. Она же, убийц простивши, воэнеслася ко Троице, и прияла еси венец неувядаемый, Стих: Помощь моя от Господа, Сотворшаго небо и землю. Радуйся, Людмило мученице, светозарная праведнице, ты бо была еси христианкой истинной, и во браке с мужем своим Боривоем жила еси в святости, научила же детей своих истине, и к ближним была еси доброю, темже вси тя согласно величаем. Стих: Господь сохранит тя, Господь покров твой на руку десную твою. Радуйся и веселися, Церковь Божия в пресветлые и красные сии дни! Днесь бо празднество творим велие: Воздвижение Креста Христова славим и величаем мученицу Людмилу с мученицей Евфимией. Днесь мир нерукотворный собою славит Господа, земля же красуется небесной славою, мы же, люди, прославляем Господа и молимся Ему о всех и за вся! Слава: стихира мученице Евфимие, зри в Минее месячной. И ныне: праздника, стихира: Радуйся, Господень Кресте: Тропарь: Агница Твоя, Иисусе, Людмила: дважды (зри в Минее общей), и праздника Спаси, Боже, люди Твоя:, единожды. На утрени. На Бог Господь: тропарь мученице дважды. Слава: праздника. И ныне: Богородичен. Седален по 1-й стихологии, глас 6. Воспоминаем ныне Людмилы святой честныя страдания, иже прияла еси от южиков своих, не ведящих Бога Истиннаго, за Бога нашего, Христа, Емуже служила еси всю жизнь свою, Емуже уневеститися жаждала, Емуже молилася еси непрестанно и в Немже все упование свое полагала, воспоминая глаголы светлыя, иже рек Христос: возьмите иго Мое себе и научитесь от Мене; и якоже агница пред стригущим ю безгласна бывша, егда заклана бысть от неверных. Темже молися с Богородицею, во еже спастися нам. По 2-й стихологии седален, глас тойже: Молишися о нас Богу нощеденно, и призираеши на ны с горних высот, о Людмило милостивая, принесшая светлое учение Православное во страну твою Чехию, не остави нас окамененных, но даруй нам умиление, да воззовем с тобою купно во Царствии Небеснем: Слава Ти, Господи, Создавшему нас; Слава Ти, Господи, не отвергшему нас; Слава Ти, Господи, Спасшему нас; Слава Ти, Господи, Обожившему нас; Слава Ти, Господи, Милующему нас; Слава Ти, Боже, во веки. Полиелей. Величание: Величаем тя, святая мученице Людмило, и чтим честная страдания твоя, яже за Христа претерпела еси. Псалом избранный: Предзрех Господа предо мною выну, яко одесную мене есть, да не подвижуся. Сего ради вознесеся сердце мое и возрадовался язык мой. Сказал ми еси пути живота, исполниши мя веселия с лицем Твоим. Господь мне Помощник, и не убоюся, что сотворит мне человек. Слава, и ныне: Аллилуиа, аллилуиа, аллилуиа, слава Тебе, Боже (трижды) Степенна, антифон 4-ого гласа. Прокимен: Дивен Бог во святых Своих, Бог Израилев. Стих: В церквах благословите Бога, Господа от источник Израилевых. Всякое дыхание: Евангелие от Марка, зачало 21 По 50-м псалме стихира, глас 6. Славим днесь святую мученицу, агницу Христову закланную, сестру нашу Людмилу светлую, просиявшую светом Царствия, появшую Любовь вечную, осветившую, яко свеча, ею ближних, вопия с ней ко Господу: Господи, хорошо нам здесь быти. Канон, глас 8, мученице, и канон Кресту. Егоже краегранесие: Святая мученице Людмило, моли Бога о нас. Песнь 1 Ирмос: Колесницегонителя фараона погрузи, чудотворяй иногда Моисейский жезл, крестообразно поразив, и разделив море, Израиля же беглеца, пешеходца спасе, песнь Богови воспевающа. Припев: Святая мученице, Людмило, моли Бога о нас. Слове Божий, Христе, слова ми подаждь дар, да пою Тя, Животе Неисчерпаемый, и да славлю мученицу Твою Людмилу, песнь Ти поюще: поим Господеви, славно бо прославися. Венец нетленный приявши во страдании своем, моли, Людмило, Бога Славного венцы светлии даровати нам, да, приявше я, воспоим: поим Господеви, славно бо прославися. Слава: Яко агница непорочная ведена была ты на заклание, ни едино же слово вопреки рекше; обаче воспела еси песнь Богови: поим Господеви, славно бо прославися. И ныне: Тя, Пречистая, вси роди ублажают, яко носила еси во чреве Превечного Бога, к Немуже молися за мир, купно с Людмилою мученицей, поющей: поим Господеви, славно бо прославися. Катавасия: Крест начертав Моисей: Песнь 3 Ирмос: Утверждей вначале Небеса разумом, и землю на водах основавый, на камени мя,. Христе, заповедей Твоих утверди, яко несть свят, паче Тебе, Едине Человеколюбче. Ангели светлии сретили на воздусе душу твою пресветлую, страданием невинным убеленную, молитвою преукрашенную, любовию озаренную, песнь Богови поющею: свят еси, Господи, и поет Тя дух мой. Яко звезда огненная, яко Ангел пресветлий вознеслася еси душа твоя на Небеса, Людмило, преозаренная благодатию Святаго Духа, поющая: Свят еси, Господи, и поет Тя дух мой. Слава: Молимся ти, Людмило славне, помолися за мир ко Владыке, и помоги всем, помощи чающим, утеши скорбящих, возрадуй унывающих, да вопиют и они ко Господу: Свят еси, Господи, и поет Тя дух мой. И ныне: Ублажаем Тя вси, о Богомати, яко Матерь Бога нашего, якоже прорекла еси, и поем Тя с Людмилою мученицей, и Господу зовем: Свят еси, Господи, и поет Тя дух мой. Песнь 4 Ирмос: Ты моя крепость, Господи, Ты моя и Сила, Ты мой Бог, Ты мое Радование, не оставль недра Отча, и нашу нищету посетив, тем с пророком Аввакумом зову Ти: силе Твоей слава, Человеколюбче. Честна пред Господем смерть твоя, мученице, бысть, за неяже венец прияла еси, венец нетленный, темже молися ко Господу, да подаст и нам венцы Царствия, да поем Ему присно: слава силе Твоей, Господи. Егда убивающие тя проклинали тя, ты их благословляла, якоже Христос, Емуже все житие твое посвятила еси; темже сподоби и нас, внегда скорбни будем, пети Владыце: слава силе Твоей, Господи. Слава: Несть бози идоли ваши, - рекла еси, Людмило, сродником твоим, жаждущим отвратити тя от веры истинная, за неяже и смерть прияла безвинную, - но Един Бог Есть, Бог Свят, Емуже Церковь Христова взывает: слава силе Твоей, Господи. И ныне: Исповедуем вси Тя, Пречистая Дево Марие, Истинною Богородицею, Носившею во чреве Бога Истиннаго, Приявшего плоть от Тебе и неложно воплощься на земли Жившаго, и Распятаго, и Воскресшаго, вопиюще Ему с Людмилою: слава силе Твоей, Господи. Песнь 5 Ирмос: Вскую мя отринул еси от лица Твоего, Свете Незаходимый, и покрыла мя есть чуждая тьма окаяннаго, но обрати мя, и к свету заповедей Твоих, пути мои направи, молюся. Царю Небесному, Егоже зриши ясно, помолися, Людмило, за всех, помощи чающих, и спаси из глубины отчаяния всех гибнущих, и подай покой всем зовущим: Господи Боже наш, мир даждь нам. Егоже всю жизнь свою пресветлую жаждала зрети, и служити Ему верно, ныне зриши ясно, Того моли, Людмило, спасти мир наш от злобы диаволи, от вражды и разделений, и даровати спасение поющим: Господи Боже наш, мир даждь нам. Слава: Людмило, Божия агнице, зря ныне Агнца лицем к лицу и наслаждаяся общением сим, не забуди нас грешных, заблуждших во вражде, не ведущих пети: Господи Боже наш, мир даждь нам. И ныне: Южики твои, Людмило, заклаша тя якоже агницу, незлобие и веру твою зря; темже молися о нас с Пречистой Девой Богородицей и всеми святыми, глаголющи: Господи Боже наш, мир даждь нам. Песнь б Ирмос: Очисти мя, Спасе, многа бо беззакония моя, и из глубины зол возведи, молюся: к Тебе бо возопих, и услыши мя, Боже спасения моего. Древо крестное спасе весь род человеческий силою Распятаго на нем Христа Бога нашего, темже, лобызающе и, вопием с Людмилою, крест свой смиренно понесшей: яко пророка Иону спаси нас, Господи. Молитву непрестанную стяжала еси к Богу, хождаше пред Ним, якоже Енох, нощеденно, темже научи нас молитве истинней, да, обратившись к покаянию, умолим Бога за мир, глаголюще: яко пророка Иону спаси нас, Господи. Слава: Исповедав Господа пред всеми, исповедана быв Господом пред Ангели, венец приявши радости светлый, уневестилася Господу, Егоже чаявши всю жизнь свою зрети, вопияла выну: яко пророка Иону спаси нас, Господи. И ныне: Людмило богославная, твою память праэднующе светло, воспоминаем страдания твоя, и дивимся кротости твоей, и молим ти ся: молися к Богородице, да простит нам беззакония наша, да молится ко Господу о нас, поющих: яко пророка Иону спаси нас, Господи. Кондак, глас 6. От небес прияла еси любовь Божию, темже убита была еси от сродников, о Людмило пресветлая, молися о всех нас, верно чтущих тя. Икос: Агницу непорочную, Людмилу, вернии, на небесех зряще, молящуюся за ны непрестанно, вси воспоим: Радуйся, себе в жертву Богу принесшая; радуйся, со Ангели на небеса вшедшая. Радуйся, мира Христова благоухание; радуйся, Божественными добродетельми осиянная. Радуйся, теплая предстательнице наша пред Богом; радуйся, вознесенная к Небесным чертогом. Радуйся, верных молитвам внимающая; радуйся, всякое желание благое исполняющая. Радуйся, праведнице, питавшая всех алчущих, радуйся, благой любовию утешавшая всех плачущих. Радуйся, яко злато в горниле, очищенная; радуйся, Небесной славы причащенная. Радуйся, святая мученице Людмило, Богу и людем Его милая. Песнь 7 Ирмос: Превозносимый отцев Господь пламень угаси, отроки ороси, согласно поющия: Боже, благословен еси. Молящуюся тя зря к Богу ныне, Людмило, радуется Церковь Чешская, радуемся и мы, яко обретохом предстательницу верную, дарующую нам радость Небесную, и зовем вси к Богу, Давшему нам тя: Боже, благословен еси. Одеваяся днесь, яко ризою, светом; облачаяся днесь во Христову любовь, помяни, Людмило, мир твой, воспомяни о твоих сестрах и братиях, соедини их всех во едино и сподоби пети Господу: Боже, благословен еси. Слава: Лесть бесовскую отгнала еси, о Людмило непорочная, и служила еси Богу всею жизнию своею, и любила Его всем сердцем и душою всею, и Ему одному прилеплялася, темже сотвори, да деем то же и мы, всегда в себе вопиюще: Боже, благословен еси. И ныне: Изрядно же о Тебе, о Преблагословенная Марие, благодарим Бога нашего, Ты бо заступница есть всем нам, и земле Русской покров, спаси нас, Тебе зовем, яко Матерь всех Владыки, и научи нас пети Богу, с Людмилою купно: Боже, благословен еси. Песнь 8 Ирмос: Седмерицею пещь халдейский мучитель богочестивым неистовно разжже, силою же лучшею спасены сия видев, Творцу и Избавителю вопияше: отроцы, благословите, священницы, воспойте, людие, превозносите во вся веки. Божественный славы сподобилася еси, о Людмило мученице, и наслаждаешися днесь любовью Божией, ее же чаяла имети в себе; темже молися о нас, да возлюбим друг друга и, единомысленно исповедающе Отца и Сына и Святаго Духа, воспоем: Господа пойте, дела, и превозносите во вся веки. О Людмило, мученице светлая, имущая одежду брачную святу, благоухающая неизреченно, добродетельми Божественными осиянна, преукраси ими и нас, да от всего сердца воспоим: Господа пойте, дела, и превозносите во вся веки. Благословим Отца и Сына и Святаго Духа, Господа. Глаголы наша внуши, Господи, якоже внял еси древле званию триех отроцев в пещи Вавилонстей, и подаждь нам любовь и сострадание, мир и радость с кротостию, молитвами святой мученицы Людмилы, зовущей: Господа пойте, дела, и превозносите во вся веки. И ныне: Ангели служат Ти, Пресвятая, умы быстролетнии, песнь Трисвятую Богови воспевающие и славящие Тя непрестанно, яко Матерь Божию, Заступницу нашу, поющии: Господа пойте, дела, и превозносите во вся веки. Честнейшую: Песнь 9 Ирмос: Ужасеся о сем Небо, и земли удивишася концы, яко Бог явися человеком плотски, и чрево Твое бысть пространнейшее Небес. Тем Тя, Богородицу, Ангелов и человек чиноначалия величают. Окорми нас, Людмило, настави на путь истинный, научи нас оправданием Христовым, яже исполнив в житии своем, освященной соделалася; даждь нам мудрость и силу, да познаем Божию правду, да восславим Бога и Богородицу в песнех величаем. Не забуди нас, Людмило, людям бывшая милой в земной жизни твоей; предстоя престолу Божию, ходатайствуй о нас, да предстанем мы престолу сему страшному неосужденно, и да дерзнем воспети тамо Его Матери: Богородицу в песнех величаем. Слава: Ангельскую песнь воспевая днесь Богу на Небесех, научи и нас молитве истинней, не остави нас грешных, но в бедах заступи, в унынии посети, в болезни исцели, в беззакониях обрати, о Людмило, да поминающе житие твое выну, зовем Богоотроковице: Богородицу в песнех величаем. И ныне: Славим вси Бога, Создавшаго нас и Даровавшаго нам тя, Людмило, во предстательство, да спасены будем вси, да узрим лик Его, да будет на челах наших имя святое Его, и да поим со Ангелы Матери Его: Богородицу в песнех величаем. Светилен: Крест, хранитель всея вселенныя: дважды. Слава, и ныне: Крест воздвизается днесь: единожды. На хвалитех стихиры Честнаго Креста, две, и мученицы едина, глас 5: Радуйся, Людмило благодатная, ты бо всю страну Чешскую осветила светом Православия, прияла же смерть за Господа, вознеслася душою же на Небеса, и ныне нам помогаешь еси. * * *