Мая в 3-й день Служба преподобным Иулиании и Евпраксии Московским НА ВЕЛИЦЕЙ ВЕЧЕРНИ На Господи, воззвах: стихиры на 8, глас 5: Подобен: Радуйся Живоносный Кресте: Приидите, благовернии людие,/ светло празднуим торжество Церковное/ во Обители преславныя Зачатиевския,/ в песнех возвеличим наставниц премудрых,/ преподобных Иулианию и Евпраксию,/ теплых предстательниц наших пред Господем,/ и с любовию вопием к ним:/ Христа Бога усердно молите// низпослати душам нашим велию милость. Мироносицы земли Российстей,/ сестры бысть по плоти Святителя Алексия,/ уневестившиися Христу Богу,/ преподобнии Иулиания и Евпраксия,/ умудри Господь вас мнозим быти во спасение,/ и собранием дев непорочных множества/ вслед Пречистыя Богородицы/ во обители Царя Небеснаго хождаху,/ Емуже непрестанно молитеся// даровати нам велию милость. Срадуйтеся нам вся верных множества:/ велий град Москва и вся Россие православная./ Днесь немолчными гласы воспеваем/ светоносную и пресветлую память/ Иулиании мати нашей преподобной,/ с неюже и сестры ея Евпраксии,/ поклоняяся прославльшему вас/ Христу Богу Иисусу Сладчайшему,// дарующему нам мир и велию милость. Наста бо светлый день празднества,/ красуется ныне Церковь с вопиющими:/ радуйтеся, предивнии угодницы Божии, преподобная мати наша Иулиания/ и Евпраксия блаженная,/ к лицезрению красоты Небесныя возшедшии./ Мы же во умилении припадаем/ с верою к многоцелебным мощем вашим,/ в нихже, чудеся удивляема,// дарова Господь нам велию милость. Ины стихиры, глас 8. Подобен: О, преславнаго чудесе: О, предивнии наставницы,/ Иулиания преблаженная/ и Евпраксия прехвальная,/ в пречистии души своя приявший/ дух кротости и разума Божественнаго,/ дух совета и велией крепости,/ имже благочестию и любве научаете/ всех смиренно притекающих к вам// и празднующих всечестную память вашу. Преподобная мати Иулиания,/ инокинь преславная наставнице,/ земли Московския первая игумения/ богомудрая явилася еси./ Ныне же вкупе с преподобней Евпраксией/ в Горняя со Ангелы вселилися есте,/ молите Христа Бога нашего/ оставление грехов нам даровати// чтущим любовию память вашу. К подвигом монашеским приведшая/ мнозии боголюбезныя жены,/ образ послушания и кротости/ и любве Божественней явила еси,/ преподобная мати Евпраксия,/ дивная голубица непорочная./ Ныне же со возлюбленней наставницей/ преблаженней Иулианией// молите Бога спастися душам нашим. Ублажают ныне верных множества/ память вашу всечестную, преподобнии,/ и веселия и радости духовней/ исполняются сердца вопиющих:/ О, предивнии заступницы,/ славнии молитвенницы к Богу,/ да усердными мольбами вашими/ избавление приимем грехов// и спасение душам нашим. Слава, глас 2: Торжества пресветлаго день наста,/ радостно ликующе и песни вопиюще,/ прославляем Христа Бога нашего,/ Дивнаго во святых своих,/ явившаго/ земле Российстей/ прехвальных и Богоносных жен/ преподобных Иулианию и Евпраксию./ Ныне же к ним радостно возопиим:/ О, преславнии угодницы,// молите спастися душам нашим. И ныне, Богородичен: Прейде сень законная,/ благодати пришедши:/ якоже бо купина не сгараше, опаляема,/ тако Дева родила еси/ и Дева пребыла еси./ Вместо столпа огненнаго/ праведное возсия Солнце,/ вместо Моисея — // Христос, спасение душ наших. Вход. Прокимен дне. Чтения 3. На литии стихира храма. И стихира, глас 1. Подобен: Небесных чинов: Ангельския силы Небесныя/ ныне вам сликовствуют/ преподобнии наставницы наши Богомудрии,/ Иулиания и Евпраксия прехвальныя./ Прославляя светлую память вашу,/ во умилении вопием днесь:// Радуйтеся, обители райския наследовавшии. Слава, глас 8: Празднуют вся людие православнии/ память вашу, жены преподобнии,/ темже любовию и верою поим Христу,/ даровавшему велие множество чудес/ по молитвам вашим, преблажении,// Емуже возопиим: Господи, слава Тебе. И ныне, Богородичен: Безневестная Дево,/ яже Бога неизреченно заченши плотию,/ Мати Бога Вышняго,/ Твоих [рабов] мольбы приими, Всенепорочная,/ всем подающи очищение прегрешений,/ ныне наша моления приемлюще,/ моли спастися всем нам. На стиховне стихиры, глас 2. Подобен: Егда от древа: Красоты мира суетнаго пренебрегшии,/ на тесный путь стопы своя направивше,/ преподобнии Иулиания и Евпраксия,/ в постех и плаче житие претрудное/ яко древнии подвижницы проведшии,/ темже ныне утешения от Господа/ и непрестаннаго веселия сподобляяся,/ радуйтеся, претеплии предстательницы// и молитвенницы о душах наших. Стих: Дивен Бог во святых Своих,/ Бог Израилев. Присно взирая на Небесную славу,/ воздержанием распясте плоти ваша,/ лествицу желания обретшии,/ еюже взыдоша во обители Горняя,/ в нихже ныне со святыми веселяся,/ не оставите и нас в молитвах ко Господу,/ почитающих пресветлую память вашу,/ радуйтеся, жены преподобнии,// православным людям заступление. Стих: Честна пред Господем/ смерть преподобных Его. Взыскати потрудилися еста Христа Бога/ верою и любовию от всея души,/ всеблаженнии Иулиания и Евпраксия,/ прославляя пресвятую Троицу/ Пресущественную и Пребожественную./ Ейже ныне предстоя в веселии/ со святыми Ангельскими лики,/ радуйтеся, инокинь наставницы/ и молитвенницы о душах наших. Слава, глас 6: Боголюбивых жен восхвалим преподобных,/ многотрудныя подвиги понесших/, кротости рачителей, смирения учителей,/ благочестия подражателей,/ иноческаго жития насадителей,/ преподобных Иулианию и Евпраксию./ Вами бо, Богозванныя девы,/ сирые утешаются и недужные исцеляются,// и земля Российская славится. И ныне, Богородичен: Творец и Избавитель мой, Пречистая,/ Христос Господь, из Твоих ложесн прошед,/ в мя оболкийся,/ первыя клятвы Адама свободы./ Темже Ти, Всечистая,/ яко Божией Матери же и Деве,/ воистину вопием немолчно:/ радуйся ангельски, радуйся, Владычице,/ предстательство и покрове/ и спасение душ наших. Тропарь, глас 1 Христу Жениху уневеститеся возжелавшыя/ и подвиги иноческия Того ради понесшыя,/ добродетельным житием и любовию ко всем/ себе украсившыя, преподобныя Иулиание и Евпраксие./ Во граде Москве первыя обители девическия/ устроительницы явистеся/ и трудов и подвигов брата вашего святителя Алексия/ ревнительницы показастеся./ Сего ради, ныне на Небесех вкупе с ним торжествующе,/ молите граду Москве в Православии утвердитися,/ обители вашей сохранитися// и спастися душам нашим. НА УТРЕНИ На Бог Господь: тропарь тойже, дважды, Слава, и ныне, Богородичен. По 1-м стихословии седален, глас 8: Яко заря Божественнаго сияния просветишася, преподобнии Иулиания и Евпраксия, оставивше вся жития мирскаго суетная попечения, и возложит всю надежду на Бога Вышняго, житие невещественно восприяша со безплотными Ангелы. Темже взываем к вам: молите Господа спастися душам нашим. Слава, и ныне, Богородичен: Буди нам покров и заступление, Премилостивая Владычице наша Богородице, яко Ты еси сила необоримая, всем немощным и безнадежным твердое упование. По 2-м стихословии седален, глас 2: Вси вернии, собравшеся ныне, возрадуемся празднеству великому, памяти преподобной Иулиании и сестры ея Евпраксии возлюбленней. Восхваляем Господа, прославльшаго вас и дарующаго утешение душам и велию милость. Слава, и ныне, Богородичен: Бога от Тебе воплотившагося познахом, Пречистая Дево, едина Благословенная, едину имамы Тя Богородицу, темже благодаряще вопием Ти: Радуйся, Благодатная, Господь с Тобою. Величание Ублажаем вас, преподобнии Иулиание и Евпраксие, и чтим святую память вашу, наставницы монахов и собеседницы Ангелов. По полиелеи седален, глас 1: Преподобнии Иулиания и Евпраксия/, другини Христовы кротости и зерцало целомудрия,/ милости от Бога просящим раздаятельницы,/ православныя веры истинныя хранительницы,/ болезни душевныя и телесныя исцеляющии,/ тех молитвами, Господи, излей на нас Твою велию милость. Слава, и ныне, Богородичен: Избавление от бед Ты еси, Пречистая Богородице, Тобою к нам сшел еси Христос Бог наш, Егоже непрестанно моли помиловати и спасти души наши. Степенна, 1-й антифон 4-го гласа. Прокимен: Дивен Бог во святых Своих,/ Бог Израилев. Стих: В церквах благословите Бога,/ Господа от источник Израилевых. Всякое дыхание: Евангелие от Матфея, зачало 104. По 50-м псалме стихира, глас 6: Благоухание песней духовных/ приносяще и вопиюще вам:/ угодницы Христовы Иулиания и Евпраксия,/ Христа Бога возлюбившии,/ молитеся к Нему преусердно,/ да Царствия Его будем наследницы. КАНОН, глас 8. Песнь 1 Ирмос: Колесницегонителя фараона погрузи, чудотворяй иногда Моисейский жезл, крестообразно поразив, и разделив море: Израиля же беглеца, пешеходца спасе, песнь Богови воспевающа. Сподобите воспети постнические ваша подвиги и преславныя чудеса, имиже прославляется Господь наш Иисус Христос, возсиявый яко Солнце пресветлое в душах ваших. Возлюбившии от юности всемилостиваго Бога, зане оставили вся утехи земныя и прилепишася к Нему всею душею своею, желая токмо иноческаго жития, и непрестанною молитвою и чтением Божественных Писаний умиленнии стяжали сердца. Положили бо вы в сердце своем устроите обитель девичию во славном граде Москве для спасения многих душ православных. И услыша Господь пламенныя молитвы ваша и дарова преславный монастырь всем ищущим спасения. Христа Бога невесты возлюбленнии, смиренномудрием и кротостию от Него украшеннии, молитеся, да дарует нам Господь оставление прегрешений заступления вашего ради. Богородичен: Тебе, Премилостивая Владычице, усердно молимся и всю надежду возлагаем на Твое милосердие. Спаси от всякия скорби и нужды вся веси и грады страны Российския. Песнь 3 Ирмос: Утверждей в начале небеса разумом, и землю на водах основавый, на камени мя, Христе, заповедей Твоих утверди, яко несть свят паче Тебе, Едине Человеколюбче. Мнозии знатнии женихи желаша имати вас невесты себе красоты и доброты вашея ради. Но вы уневестилися Единому Жениху Небесному, с Нимже ныне обрели вечную радость и веселие. Велиим воздержанием плотские страсти умертвившии, древних пустынножительных жен преемницы явилися есте, с нимиже ныне сликовствуете вкупе с Небесными Ангелы во обителех райских. Яко жены-мироносицы некогда служили Христу и учеником Его, тако и вы, блаженнии, обрели наставника себе в брате своем по плоти Святителе Алексии, с нимже ныне возносите теплые молитвы за землю Русскую. Две свещи горящие на свещнице Российстей постави вас Господь, дабы сияли вы миру многоразличными исцелении и чудесы, прославляя Христа Бога нашего, Егоже молите., да исцелит от мрака греховнаго очеса наша. Богородичен: Тебе, Пречистая Владычице, честь и поклонение приносим, якоже узрят небеса дела перст Бога нашего, Емуже слава в Троице Единому во веки. Седален, глас 4 Лик собравшии богопокорливых жен/ последующих вашему преизрядному житию,/ возжелавших Ангельскаго образа/ и иночески жительствующих в славном граде Москве,/ темже вам радостно вопием:/ не оставьте нас, недостойных чад своих,/ всеблаженную память вашу празднующих. Слава, и ныне, Богородичен: Спаси нас, Пречистая Богородице, мнозими бо обремененних грехми и страстьми лютыми, да тобою избавимся от всякия нечистоты, Ты бо едина Всечистая. Песнь 4 Ирмос: Ты моя крепость Господи, Ты моя и сила, Ты мой Бог, Ты мое радование, не оставль недра Отча, и нашу нищету посетив. Тем с пророком Аввакумом зову Ти: силе Твоей слава, Человеколюбче. Отвергосте вся блага мира сего и многоискусныя утехи земная, обретосте вы Небесных благ сладость превечную. Ныне радуетеся со Ангелы в чертогах Царя Небеснаго, прославляя Его неизреченную милость. Прияша бо светильники своя и изыдоша в сретение Жениху Христу, преподобнии, елеем Духа Святаго исполняете души непорочнии свои, славя Господа сил в претрудном житии вашем. Не дали сна очима своима, ни дремания веждам, но во всех стяжаша мудрость Божественную, благодаряще и призывающе всемогущаго Бога. Украсиша светильники своя добродетельми мнозими, девы премудрыя показастеся, и чистотою сердечною возлюбили Христа Бога, сладчайшаго всех Жениха. Богородичен: Дево, Мати Пречистая, подаждь нам прощение множества прегрешений и исполни умиления Божественнаго души наша, молим Тя. Песнь 5 Ирмос: Вскую мя отринул еси от лица Твоего, Свете незаходимый, и покрыла мя есть чуждая тьма окаяннаго; но обрати мя и к свету заповедей Твоих пути моя направи, молюся. Святым житием украшеннии, удалившися славы земныя, возлюбили вы слезы умиленнаго покаяния и воздержание предивное, такожде обрели славу Превечнаго Бога и радость неизреченную. Яко кадило благоухающее приятны быша молитвы ваша, преблаженнии, имиже облагоухаете вся приходящая к вам верою и любовию и на путь спасения наставляете. Православныя веры твердыя хранительницы явилися есте в лютую годину нашествия варварскаго, сирым и убогим прибежище даруя, страждущим и немощным утешение и заступление. Сокровище драгоценнейшее евангельскаго купца, яко жемчужину предивной красоты воздвигли и возлюбили обитель вашу, преподобнии, о нейже попечение имуще велие присно. Богородичен: Всех Творец из Тебе явися, Пречистая Владычице, избавивший нас от зол велиих, и возлюбивший нас безмерною Своею милостию. Песнь 6 Ирмос: Очисти мя Спасе, многа бо беззакония моя, и из глубины зол возведи, молюся: к Тебе бо возопих, и услыши мя, Боже спасения моего. Иже на добрей земли возрастили плод в терпении, благим и добрым сердцем сеющи слово Божие. Не прельсти вас лукавый богатством и сластьми житейскими, но в терпении стяжали души ваша. Устроив обитель для инокинь в сердце страны Российстей, прославили ея мнозими чудесы и исцелении, такожде и ныне возводите в сердцах верных обители Духа Всесвятаго, наставницы премудрии. Огнь Божественной любви возгореся в ваших пречистых душах, о, молитвенницы чуднии, и пламень неопалимый ревности духовней объят вы, имже возжигаются души притекающих с верою и любовию к заступлению вашему. Яко купина неопалимая, любовь ваша несгораемая ко Господу нашему Иисусу Христу и всякому творению Его Премудрости, сего ради Господь воздвиже храм Пречистыя Богородицы в честь образа Ея «Неопалимая Купина» на месте погребения вашего. Богородичен: Купина Неопалимая явилася еси, о, Пречистая Богородице, укрепи веру нашу Православную и спаси страну Российскую и сотвори ея неопалиму от всякаго зла. Кондак, глас 2: Что вас наречем, богомудрыя Иулиание и Евпраксие?/ Немощный сосуд естеством,/ но подвиги и труды мужески понесосте;/ преподобныя жены,/ но славы отцев воистину сподобистеся;/ от земных рода благаго,/ но Небеснаго отечества достигосте.// Молите усердно Владыку Христа спастися душам нашим. Икос: Христову Церковь возвеличивший житием вашим, преподобнии Иулиания и Евпраксия, дивнии наставницы черницом в подвизех иноческих и утешительницы всех притекающих к вам, жены богомудрии. Ныне вкупе со всеми верными восхваляем ваше иноческое житие, просиявшее миру благодатию добродетелей. Песнь 7 Ирмос: Божия снизхождения огнь устыдеся в Вавилоне иногда, сего ради отроцы в пещи радованною ногою, яко во цветнице ликующе, пояху: благословен еси Боже отец наших. Всем приходящим к вам были яко матери и сестры любезныя: алчущих напитавшии, жаждущих напоившии, душевную скорбь и тесноту ижденувшии и помазующие елеем радования. Видя Господь наш Иисус Христос веру вашу и усердие преизрядное дарова множество чудес молитв ради ваших, преблаженнии Иулиания и Евпраксия, имиже доныне прославляется славная обитель Зачатиевская. Общему житию женскому на Руси начальница бывши, премудрая мати наша Иулиания, собраша мнозии черницы во обитель свою, и с сестрою своею Евпраксией присно молитеся о душах наших. Благими делами прославляется имя твое, преблаженная Евпраксия, яко милостивая мати явилася еси всем имущим нужду и алчбу, тако во всем была для них помощь и отрада, кормительница и утешительница. Богородичен: Помилуй мя, Владычице, Мати Бога нашего Иисуса Христа, яко немощен есмь и мнозими страстьми обуреваема есть душа моя окаянная, но молитвами Твоими да спасет ю Сын Твой от всякия беды и напасти. Песнь 8 Ирмос: Седмерицею пещь халдейский мучитель богочестивым неистовно разже, силою же лучшею спасены сия видев, Творцу и Избавителю вопияше: отроцы благословите, священницы воспойте, людие превозносите во вся веки. Обрели веселие вечное и радость неизреченную прехвальнии наставницы жен боголюбивых, молитвами сугубую благодать восприяли есте, еюже добре послужили Христу Богу и Церкве Его святей. Зело богобоязлива бывши, преподобная Иулиания, научала ближния своя благоговению и Страху Божию, без него никтоже спастися может, но всяк ему научен обрящет премудрость и любовь Божию. Приидоша в пустыню сердца своего и тамо едина с Богом безмолвствуя, имела еси ты собеседники себе Ангелы Небесныя, преподобная мати Евпраксия, ныне с ними воспеваете славу Премилостивому Господу вкупе с сестрой твоей премудрой Иулианией. Лепота бо Церковная показалася еси обитель ваша, преподобнии, преходит от земли к Небесным, указуя путь ко спасению всем притекающим к вам в молитвах, и научая славословити: Господа пойте и превозносите во веки. Богородичен: Ты родила еси Превечнаго Бога, о Пресвятая Мати Дево, спаси нас от всякия напасти возносящих славу и благодарение Сыну Твоему, Егоже поем и превозносим во веки. Песнь 9 Ирмос: Ужасеся о сем небо, и земли удивишася концы, яко Бог явися человеком плотски, и чрево Твое бысть пространнейшее небес. Тем Тя Богородицу, Ангелов и человек чиноначалия величают. На пажить чисту воздержания пресладкаго и ко источнику прохладному безстрастия иноческаго приводили вы есте, о премудрии левы, агниц своих непорочных, соблюдая их от волка коварнаго. Две горлицы прекрасныя, две голубицы Небесныя, стоящии пред Богом земли, и принесшие в жертву живую и непорочную души пречистыя ваша Иисусу Христу Господу нашему, Емуже ныне со всеми святыми поете славу во веки. День празднственный днесь созывает монахов в лик духовный собиратися и воспевати песнь победную и славу Господу вопиюще: несть раб и несть свободь, несть мужеск пол, ни женский, но вся и во всех Христос. Светися, светися, обитель преславная Зачатиевская, в тебе бо две благовонныя отрасли насади Господь, из нихже древо бысть пространное и благоухающее, на всю Россию православную аромат свой духовно изливающее. Богородичен: Очисти нас от скверны сердечныя, Пресвятая Матерь Господа, и украси души наша умилением и избави муки вечныя. Светилен О, презревшии вся плотская мудрования, стяжавшии подвиги и сотворшии чудеса мнози, вашу пресветлую память ныне празднуют вся людие православныя, умиленно вопия вам: молитеся непрестанно о всех нас, Иулиания и Евпраксия досточуднии. Слава, и ныне, Богородичен: Исповедуем Тя, Владычице Богородице, Тобою бо обретшии спасение, ибо родила еси Бога неизреченно, даровавшаго нам многих угодников Своих и молитвенников о душах наших. На хвалитех стихиры, глас 2: В добродегелех измлада прилежно подвизавшиися,/ преподобнии Иулиания и Евпраксия,/ добре иноческаго жития возжелаша,/ к подвигам поста и бдения устремишася,/ темже обогати вас Бог даром исцеления,/ и множества чудес показа молитв ради ваших.// Емуже возопием: Господи слава Тебе. Возсия неизреченный свет яко светило красное/ чудесы ваша, девы преподобнии,/ и радостию и веселием озарилися сердца./ Ныне празднует Церковь Русская/ всечестную память Иулиании и Евпраксии,/ преподобных и богоносных матерей// и молитвенниц о душах наших. Преподобнии жены земли Российстей,/ Иулиания и Евпраксия богопослушливии,/ в Царские Чертоги Господа вшедшии/ и собою Церковь Русскую украсившии/ велиими своими .добротами/ молитеся спастися нам. Слава, глас 8: В песнех воспоим славу Христу Богу,/ даровавшему нам святых угодниц Своих,/ преподобных Иулианию и Евпраксию,/ усердных молитвенниц страны Российския./ О наставницы смиреннии,/ ангельски поживши на земли,/ ныне обрели радость вечную,/ темже, Богомудрии, вас ублажаем. И ныне, Богородичен: Владычице, приими молитвы раб Твоих и избави нас от всякия нужды и печали. Славословие великое. Отпуст. На литургии служба преподобническая. Молитва ко преподобным Иулиании и Евпраксии О, преподобнии Иулиание и Евпраксие, аще и скончали свою временную жизнь, но духом своим не отступайте от места сего святаго. Молим вы, имея дерзновение ко Всемилостивому Спасу и Пречистой Его Матери, принесите к престолу Царя всех наши недостойныя и грешныя моления о скорбех, нуждах и напастях наших; не оставьте вашею помощию. Укрепите нас шествовать по стезям заповедей Господних, и безропотно нести крест свой до конца. Сохраните нас от врагов видимых и невидимых. Даруйте нам христианскую кончину и на страшном суде Христовом явитесь нашими заступницами и ходатаицами. Да вашими молитвами соблюдаемы и сохраняемы пребудем, славяще Святую Троицу Отца и Сына и Святаго Духа. Аминь. Тропарь священномученику Владимиру (Амбарцумову), глас 3: Христовою верою из детска утвержденный / и живот свой проповедованию Слова Божия посвятивый, / истину в Церкви Православной обретший / и к пастырскому служению Божиим смотрением призванный, / в дни гонений семьи верных окормлял еси, / прещений от безбожных не убоявся. / Тем же и пострадал еси даже до крове, / отче священномучениче Владимире, / моли Милостиваго Бога // спастися душам нашим. Кондак, глас 7: Оружием веры огражденный, / яко истинный воин Христов мучителем противустал еси: / привременно есть господство ваше, свидетельствуя, / и страдания за Христа приял еси мужески, / тем же вопием ти: / Радуйся, священномучениче Владимире, // во Царствии Небесном венцем нетленным увенчанный.