Служба Преподобному и Богоносному отцу нашему Лаврентию, схиархимандриту и Чудотворцу Черниговскому НА МАЛОЙ ВЕЧЕРНИ На Господи, воззвах: стихиры на 4, глас 1: Днесь Небесныя Силы хвалят Христа Бога, и монаси на земли торжествуют ради обретения мощей преподобнаго Лаврентия. Радуются вернии людие Российстей Церкве, се бо в ней новый светильник является, утверждая веру Православную во Едину Церковь и искореняя вся безбожныя ереси и разделения лжеименнаго разума. Храни, Русь Святая, веру Православную, и буди верным стражем Единыя Церкви, по слову еже предрече преподобный Лаврентий, по глаголу Господню иже во Святем Евангелии. Помози ны, святе Лаврентие, пребыти в правоверии, благочестии и чистоте, яко же глаголал еси нам: стойте на камене изречения Христова. Слава, глас 6: Кто по достоинству изречет твоя, святе Лаврентие, пророчества, яже быша подобна праведному Иоанну Кронштадтскому, преподобному Серафиму и преподобномученику Алипию о богомерзком антихристе и последних судьбах мира, еже глаголал еси верным, предупреждая ны от соблазнов мира сего, подвигнув на беседу о сем преподобнаго Феофана, и оба горько плакасте со слезами, моляще Человеколюбца Бога избавити страну Русскую от безбожнаго ига и жидовскаго нечестия и спасти православныя люди. И ныне, глас тойже: Днесь радуется преподобный Геннадий, ради прославления чудесы от иконы Троице-Ильинския, юже сам написа, и Лаврентий святый ему сорадуется, видя лик Царицы Небесныя: темже, о богоноснии отцы наши, молитеся вкупе с Госпожею Пресвятою Владычицею, да Сын Ея и Бог наш милостив будет в день судный. На стиховне стихиры, глас 2: Ликуют Ангели на небеси и радуются монаси на земли, яко спасения человеческаго путевождь Лаврентий своими наставлениями и святым житием путь истины указует. Стих: Честна пред Господем смерть преподобных Его. Угодниче Спасов Лаврентие, земнородных помощниче, от неверия блюстителю и от антихриста хранителю, данною ти властию от Бога, моли вражия страха правоверным не убоятися. Стих: Хранит Господь вся кости их, ни едина от них сокрушится. Веселитеся, вернии, се бо торжество наста и возсия благочестие; ересем, расколам и разделениям церковным умножающимся, явися новый светильник богоносный Лаврентий, извествуя истину веры и Церкви Православныя во избежание греха и спасение душ наших. Слава, глас тойже: Торжествуйте, благочестивии людие, хваляще Пресвятую Троицу, прославльшаго вернаго Своего угодника нетлением святых мощей, преподобнаго Лаврентия, иже хранит ны от бед и молится о спасении душ наших. И ныне, Богородичен, глас тойже: Обитель Троице-Ильинская место свято, Богом Отцем избранное, Сыном возлюбленное и Духом Святым освящено есть, Деве Пречистей Марии во украшение зрака лица Ея, святителю Димитрию на хваление описанием чудес от икон бываемых и преподобным отцем нашим Геннадию, Лаврентию и Феофану на умилостивление Сына Ея и Бога нашего даровати боголюбивым людем нечаянную радость спасения душ наших. Ин тропарь, глас 8: Днесь светло красуется град Чернигов и торжествует обитель Пресвятыя Троицы, се бо в ней молитвою и постом пребывая, и яко солнце сияя, иночествующим и верным людем велий наставниче и скорый помощниче, и избранник пречудный Царицы Небесной явился еси, яко звезда лучезарная в стране Российстей, преподобне отче наш Лаврентие, моли Человеколюбца Бога спасти души наша. Слава, и ныне, Богородичен, глас тойже: Иже нас ради рождейся от Девы: НА ВЕЛИЦЕЙ ВЕЧЕРНИ Блажен муж: первый антифон. На Господи, воззвах: стихиры на 8, глас 8: Радуйся и веселися, Святая Церковь Православная, о тебе бо рече Господь: созижду Церковь Мою, и врата адова не одолеют ю: сия Церковь есть Бога жива, столп и утверждение истины: се бо новая звезда на тверди небесней явися, преподобный и богоносный отец наш Лаврентий, утверждая ны в Правоверии отцев наших, волны ересей и расколов бурю разгоняя и указуя путь во спасение душ наших. (дважды) Радуйся, богоспасаемый граде Чернигове, многими бо святыми издревле прославлен быв, и ныне новый чудотворец богоблаженный Лаврентий дивно является, темже ему с любовию зовем: радуйся, страны Русския похвало и утверждение; радуйся, града Чернигова слава и украшение, иже верным людем любовию послуживый и нетленными мощами с нами пребывая, духом Престолу Владычню предстоя, молися еже умирити мир и даровати душам нашим велию милость. (дважды) Радуйтеся, христоименитии людие, и торжествуйте, яко дивен Бог во святых Своих, яви Церкви Православней новое знамение Своего благоволения прославлением великаго аввы Лаврентия, иже ангельски на земли пожив, со безплотными водворился на небеси, славословити непрестанно Пресвятую Троицу, и молится еже разгнати мрак тьмы ересей и расколов и сохранити Едину, Святую, Соборную и Апостольскую Церковь во спасение душ наших. Небо и земля радуются и веселятся, се бо Ангел во плоти, небесный человек, богомудрый пастырь Лаврентий, с лики Небесных Сил Бога славословит и о верных тепле молится, да и мы сердца в горний мир присно возводяще, Ангели храними и молитвами святых укрепляеми в добро делании, совершивше многотрудный путь жития временнаго, достойни будем воспевати Пресвятую Троицу во вся веки. Ликовствуйте, иноцы и вси вернии, молитвой и постом Богу благоугождающии, яко игумен наш всеблаженный Лаврентий во обители Отца Небеснаго вселился, еже собрати тамо вся любящия Бога, ихже на земли, яко птица птенцы своя под криле собираше: молися, святе, помиловати души наша. Богомудре отче Лаврентие, Бога дивно песнословив, лики иноческие собрав и наставив славити Господа не точию гласы, но и добрыми делы благочестия, темже в вечных обителех с горними чинми Творца всяческих славословиши, молися о чтущих память твою, во еже с тобою прославити Бога во Царствии Небеснем. Слава, глас 6: Иго Христово, благое и легкое, радостно и усердно понесл еси, воли своея совлекся, сосуд чистоты быв, добродетелей сокровище, с преподобными преподобен явися, христианския кончины честныя достоин быв, добродетельное житие скончав, еже бысть тебе прехождение от трудов на покой вечный, идеже венец славы от Царя Славы Христа восприяв, молися, боголюбиве Лаврентие, о чтущих любовию память твою, от душетленнаго зла избавитися и спасти души наша. И ныне, Богородичен Догматик, глас 6: Кто Тебе не ублажит, Пресвятая: Вход. Прокимен дне и чтение три преподобническая. Премудрости Соломоновы чтение (главы 5 и 6): Праведницы же во веки живут, / и во Господе мзда их, и попечение их у Вышняго. / Сего ради приимут царствие благолепия / и венец доброты от руки Господни, / яко десницею покрыет их и мышцею защитит их. / Приимет всеоружие рвение свое / и вооружит тварь в месть врагом. / Облечется в броня правды / и возложит шлем суд нелицемерен. / Приимет щит непобедимый преподобие, / поострит же напрасный гнев во оружие, / споборет же с ним мир на безумныя. / Пойдут праволучныя стрелы молниины, / и яко от благокругла лука облаков, на намерение полетят: / и от каменометныя ярости исполнь падут грады: / вознегодует на них вода морская, / реки же потопят нагло. / Сопротив станет им дух силы, / и яко вихор развеет их, и опустошит всю землю беззаконие, / и злодейство прекратит престолы сильных. / Слышите, убо, царие, и разумейте: / навыкните, судии концев земли, / внушите, содержащии множества и гордящиися о народех языков: / яко дана есть от Господа держава вам / и сила от Вышняго. Премудрости Соломоновы чтение (глава 3): Праведных же души в руце Божией, / и не прикоснется их мука. / Непщевани быша во очесех безумных умрети, / и вменися озлобление исход их. / И еже от нас шествие сокрушение: / они же суть в мире. / Ибо пред лицем человеческим аще и муку приимут, / упование их безсмертия исполнено. / И вмале наказани, бывше, великими благодетельствовани будут. / Яко Бог искуси я / и обрете их достойны Себе. / Яко злато в горниле, искуси их, и яко всеплодие жертвенное прият я. / И во время посещения их возсияют, / и яко искры по стеблию потекут. / Судят языком и обладают людьми, / и воцарится Господь в них во веки. / Надеющиися Нань уразумеют истину, / и вернии в любви пребудут Ему: / яко благодать и милость в преподобных Его / и посещение во избранных Его. Премудрости Соломоновы чтение (глава 4): Праведник аще постигнет скончатися, в покои будет. / Старость бо честна не многолетна. Седина же есть мудрость человеком, / и возраст старости — житие нескверное. / Благоугоден Богови быв, возлюблен бысть / и живый посреде грешник преставлен бысть. / Восхищен бысть, да не злоба изменит разум его, / или лесть прельстит душу его. / Рачение бо злобы помрачает добрая, / и парение похоти пременяет ум незлобив. / Скончався вмале, исполни лета долга, / угодна бо бе Господеви душа его, / сего ради потщася от среды лукавствия: / людие же видевше и не разумевше, / ниже положше в промышлении таковое, / яко благодать и милость в преподобных Его / и посещение во избранных Его. На литии стихиры, глас 1: Приидите, боголюбцы вернии, ублажим наставника добраго преподобнаго Лаврентия, егоже память светло празднуем, ревнуя вере и житию богоугодному, просяще его молитвы и заступления о стране Российстей, даровати мир и велию милость душам нашим. 2-я стихира на литии: Приидите, архиереи и священницы, со трепетом и страхом предстояще раце мощей преподобнаго, твердаго исполнителя поста и молитвы, строгаго хранителя церковных преданий и устава, кающеся о своих согрешениих, устав церковный и псалтирь возлюбивше, молитву и пост восприимше, не забывая грозныя слова святаго Лаврентия, иже ведут в вечная мучения яже взыщет Праведный Судия, и просите со слезами, да помиловани будете в день Страшнаго Суда. Приидите, священномонаси и иноцы, и вси вернии соберитеся, чтуще память пастыря добраго Лаврентия, иже душу полагаше за овцы своя, и навыкнем житию праведному, пекущеся о ближних своих, собирая и взыскуя расточенныя и заблудшия, наставляя вся во спасение, Пастыреначальнику Христу в оный день глаголя: се аз и дети, яже ми дал еси, Боже. Приидите, вси вернии, сошедшеся во обитель Пресвятыя Троицы, чтуще велия подвижника благочестия Лаврентия, и прославим новаго светильника Церкве Православныя: иже на свещнице церковней верою и любовию горяще, согревая вся притекающия раце мощей твоих, и указуя путь во спасение душ наших. Слава, глас 8: Сей день, егоже сотвори Господь, воньже наста велие и священное торжество, возрадуемся вси и возвеселимся, яко новый молитвенник и предстатель пред Богом явися, богоблаженный авва Лаврентий, иже всем вся быв, и всех любовию объемля, помощь благодатную просящим дарует, утверждая в Законе Божий и праведнем житии, во еже помиловати души наша. И ныне, Богородичен, глас той же: Пресвятая Владычице Богородице, Яже в Черниговстей иконе, возлюбившая преподобнаго Лаврентия, молитвами Твоими вкупе с ним, матернее дерзновение имущи, помози верным преплыти волнующееся житейское море, и вселитися во обители Царствия Христова. На стиховне стихиры, глас 5: Радуйся, Преподобне отче Лаврентие, житие твое славно и успение со святыми, от смерти избавлен быв, живот вечный наследовав, телом нетленным с нами пребывая, и вся любовию согревая: молися о чтущих святую память твою, предстоя Престолу Пресвятыя Троицы, получити велию милость. Стих: Честна пред Господем смерть преподобных Его. Радуйся, богоносне Лаврентие, воистину пред Господем блаженна кончина твоя: глава твоя не виде тления, в нейже обита разум Христов, сердце же бе храм Духа Святаго, руце полагавшии истово крест Господень и прогонявшии враги и супостаты, и верныя люди благословляющия к молитве и доброделании быв, нозе ходившии стопами заповедей Божиих: молися, святе, избавите ны смерти лютыя и сподобити живота вечнаго. Стих: Восхвалятся преподобныя во славе, и возрадуются на ложах своих. Радуйся, блаженне Лаврентие, сосуд избран Святаго Духа быв, иже претвори состав плоти твоея, еже не видети тления: о чудесе! Побеждаются естества уставы, телом с нами пребываеши, духом Престолу Божию предстоя, и о Дусе Божии свидетельствуеши, в Церкве Христови вся освящающем: Егоже моли спасти и помиловати души наша. Слава, глас 8: Отче боголюбиве Лаврентие, Господу всего себе отдавый, взем благое Его иго на себе, и ближним любовию послуживый, о святей Руси с мученики ея скорбевый и молитвеннник усерден о ней быв: помози молитвами твоими верным в добром исповедании и добрых делех пребыти, и в день Страшный услышати глас Христа Бога: приидите, благословеннии Отца Моего, и наследуйте Царствие Небесное, уготованное вам от создания мира. И ныне, Богородичен, глас той же: Мати Божия, Пресвятая Дево Богородице, благословившая преподобнаго Лаврентия на духовныя подвиги во граде Чернигове, во обители Троице-Ильинстей, сподбои ны Твоего благословения и утешения и благодатныя помощи преподобнаго, да Твоим предстательством Сын Твой и Бог наш явит нам милосердие на Страшнем Суде услышати Его глас, призывающий во Царствие Небесное. Тропарь, глас 4: От юности Христа возлюбил еси, и Тому тесным путем последуя, сосуд избран Святаго Духа быв, дар чудотворения и прозрения восприим: сего ради в невечернем свете Пресвятыя Троицы радуяся, поминай чад твоих, Лаврентие преподобне, отче наш. Ин тропарь, глас 8: Днесь светло красуется град Чернигов и торжествует обитель Пресвятыя Троицы, се бо в ней молитвою и постом пребывая, и яко солнце сияя, иночествующим и верным людем велий наставниче и скорый помощниче, и избранник пречудный Царицы Небесныя явился еси, яко звезда лучезарная в стране Российстей, преподобне отче наш Лаврентие, моли Человеколюбца Бога спасти души наша. НА УТРЕНИ По 1-й кафисме седален, глас 5: Храм Божий, отче Лаврентие, зело любил еси, службы по уставу совершая и чинно пением украшая, и себе храм украшен содела: научи ны покаянием очиститися, да храм Святаго Духа будем и вселимся в Царствие Небесное. (дважды) Слава, и ныне, Богородичен, глас тойже: Всемилостивая Царице Небесная, три дни Сына Твоего искавшая, и в храме Его обретшая, преподобнаго Лаврентия призвавшая в дому Пресвятыя Троицы славити Тя, идеже Твоя чудотворная икона бе, Всепетая: помози и нам храм яко небо возлюбити, и Господа не точию устнами, но и сердцем славословите достойно ко спасению душ наших. По 2-й кафисме седален, глас 4: Дивно Бога воспевая, житием нескверным благоухая, отче Лаврентие, устроив хвалебныя лики Господа славити, своя таланты зело умножив, и в радость Господа своего вшел еси: сия радости не лиши ны, священную твою память светло празднующих. (дважды) Слава, и ныне, Богородичен, глас тойже: К кому возопиим, Владычице, к кому притецем в горестех и напастех, аще не к Тебе, всех скорбящих радосте и утешение, Ты веси наша нужды, скорби и болезни мнози, о Благая, поспеши на помощь пред Твоею иконою во обители Троице-Ильинстей молящимся, и даруй нечаянную радость душам нашим. Величание общее преподобному Ублажаем тя, / преподобне отче Лаврентие, / и чтем святую память твою, / наставниче монахов и собеседниче Ангелов. По полиелеи седален, глас 1: В вере, надежде и любы непрестанно Пресвятей Троице работая, и сими добродетельми храм пречестен себе устроив, во дворех заповедей Господних пребывая, пещеру ископав, воздержанием, постом и молитвою плоть и страсти умертвив и душу твою добродетельми оживив: помози нам, святе Лаврентие, покаянием очиститися и спастися душам нашим. Слава, и ныне, Богородичен, глас тойже: Царице, Мати Царя царствующих, Пресвятая Дево Владычице, на спасения стези настави ны и сподоби принести плоды достойны покаяния, во еже вместо гнездящихся грехов и страстей, воцарится Христос Царь Славы, и явимся наследницы Царствия Его во веки. Прокимен, глас 4: Честна пред Господем смерть преподобных Его. Стих: Что воздам Господеви о всех, яже воздаде ми? Евангелие от Матфея, зачало 43. По 50-м псалме стихира, глас 6: Образ быв верным словом, житием, любовию, духом, верою и чистотою, преподобне Лаврентие, богоносец молитвою Иисусовою быв, всех любовию согревая и прошения коегождо исполняя: сего ради имамы тя правило веры Православныя, Церкве Христовы защитниче и победоносче, верных хранителю от богомерзких враг видимых и невидимых, благочестия поборниче, церковнаго устава исполнителю, и онаго нарушителей строгий наказателю; учителя чистоты душевныя и телесныя, богомудраго наставника и молитвенника изрядна, во еже спасти души наша. Канон Пресвятей Богородице молебный иный в конце Октоиха, глас 8 со ирмосы: Колесницегонителя… Аще в попразднство Богоявления или Сретения, тогда канон празднества в тот день на 6, и преподобнаго Лаврентия, на 8. Канон Преподобнаго и Богоноснаго отца нашего Лаврентия, глас 8, на 8, егоже краегранесие: Лаврентия венцами из лавров увенчаем. Песнь 1 Ирмос: Воду прошед, яко сушу… Припев: Преподобне отче Лаврентие, моли Бога о нас. Любовию Богу от юности пламенея, труды послушания и молитвенные подвиги совершав, Богопознание с предведением имея, и хваление песненное от Господа ти дадеся, житием девственным неоскверненно благоугождая, Тому достойно поработал еси. Ангельское житие возлюбив, мир и дом отчий веси Карыльския оставив, во обитель святителя Николая в Рыхлы вшед, идеже послушанием в посте и молитве страх Божий стяжал. Велия твоя труды восхвали архиепископ Антоний, провиде тя, Лаврентие, сосуд избран Пресвятыя Животворящия Троицы, в Чернигов тя призвав во обитель на службу Богу и ближним. Богородичен: Радость велию во сне получив от Царицы Небесныя, и благослови тя, Лаврентие, на утешение верным, ты же повинуяся Ея святому гласу и зову архиерейскому, радостно в Чернигов пришед, и во иконе святыя обители Матерь Божию познав, Архангельское приветствие Всепетой воспел еси. Песнь 3 Ирмос: Небеснаго круга… Еще от юности молитве Иисусовы навыкнув, ейже и иных научая, дабы именем Господа Иисуса Христа враги души и плоти побеждая, наследуем спасение и помиловани будем Его милосердием. На поклонении святых мест горы Афона и града Иерусалима быв, благодать сих святынь верным повествуя, нас же всею душею поклонятися Богу в Троице Единому и чтити Царицу Небесную научаеши. Толикую благодать име лице твое, Лаврентие, светом невещественным сияя, любы и радость верным даруя, Благодатию Святаго Духа вси вернии к тебе притекаху, утешения и радости исполняхуся. Богородичен: Иго Христово и бремя благое и легкое избрав, узкий и тернистый путь жития шествовав, беды и скорби до конца претерпевая, Благаго Царя Благую Матерь, Госпожу Владычицу на помощь призывая, все упование на Ню возложи, под кровом милосердия Ея враги побеждая, спасен быв. Ин кондак, глас 4: Возсияв яко светильник светозарный, услышав глас Царицы Небесныя, и последовав невозвратно зову Ея, пришед во обитель Пресвятыя Троицы, идеже Владычицы Богородицы чудотворная икона, целомудренно собра стадо словесных овец. Не забуди последовавшия ти, и молися Господу помиловати ны от наветов вражиих и избавити геенны вечныя души наша, совершающих святую память твою, преподобне отче наш Лаврентие. Седален, глас 2: Егда буря и волны лихолетия постиже страну Русскую, тогда богоотступницы и богоборцы вкупе и жидовствуюшия умыслиша Церковь Христову погубити и православныя Христианы в нечестие и беззаконие обратити: храмы Истиннаго Бога и святые обители закрыша, оскверниша и разориша; архиереи, священницы, монаси и правовернии людие на горькия и непосильныя работы, в темницы и на мучения уводимы быша, от нихже безчисленное множество мучения и смерть за Бога и веру православную прияша и явишася исповедницы и мученицы Христовы: ты же, святе Лаврентие, Богом охраняем, противу церкве пророка Илии и пещер преподобнаго Антония в дому вдовы благоговейныя монахини Евлампии тайно пребывая и исповедник быв, многия от бедственных тюрем и смертей избавив Божиим указанием, постом, молитвою и слезами, призывая в ходатайство благоверныя страстотерпцы со всеми святыми новомученицы и исповедницы Церкве Русския, о иноцех и верных чадех и о мире всего мира и возобновлении святых обителей и церквей Господа умилостивляя о спасении душ наших. Слава, и ныне, Богородичен, глас тойже: Пресвятая Владычице Богородице, во время безбожнаго гонения преподобнаго Лаврентия Твоим омофором покрывая, хранила его на пользу веры и Церкви Православныя. Мы же на Тя все упование возлагаем Тебе зовуще: Мати Божия, сохрани Святую Русь под кровом Твоим. Песнь 4 Ирмос: Услышах, Господи… Яко пророк, будущая прозрев, брань велию, гонение и мучение предсказал еси, яже аки бич за неверие и отступление от Бога поругани быша святыни, таже победу над враги благочестия и открытие церквей на покаяние людей Святыя Руси предвозвестив, по сих сам церкви и обители обновляя, иночествующих собрал и наставил еси. Велия радость возвращением многоцелебных мощей святителя Феодосия во граде Чернигове бысть, егда преподобный Лаврентий вкупе с сестрами святыя обители и верными нощию во сретение изыде, воскресша Христа воспевая. Егда во обитель Пресвятыя Троицы преселился, тогда кончину свою прорекл еси, яко пожити тебе, Лаврентие треблаженне, зде осмь лет: ты же Бога Животворящаго в Троице Пресвятей житием святым, Отца возлюбившаго, Сына искупившаго и Святаго Духа освящающаго всех прославил еси. Богородичен: На открытии обители Троице-Ильинския Сама Царица Небесная повеле преподобному Лаврентию рещи, яко и Елецкую обитель Ея Успения мужескую возобновити. О Всечестнейшая Игумения Пресвятая Богородице, сохрани обители и церкви и спаси души наша. Песнь 5 Ирмос: Просвети нас повелении… Церкви Христовы со страхом Божиим любовию послужив, священнодействуя и таинства по уставу совершая, и иным строго возбраняя и запрещая сокращение церковных служб и таинств святых, установленных уставы преподобных и богоносных отец Феодора Студита и Саввы Освященнаго; Ангели сослужащии ти бяху, молитвы благовонное кадило вознося и руце непорочнии Господеви возвышая, амалика мысленнаго победил еси. Ангелом житием богоугодным поревновав, светильник сосуда полон имея добрых дел: любы, радость, мир, долготерпение, благость, милосердие, веру, кротость, воздержание, сего ради с мудрыми девами Христос срете тя. Мир душевный и премудрость стяжав, множество верных себе привлекая, спасатися им способствуя, отче Лаврентие, велий наставник богомудрия быв, всех любовию объемля, и никтоже от тебе изыде не услышан, даром провидения и чудесы богат быв. Богородичен: Иаков Тя лествицу виде, Богородице: Тобою Бог на земли нам явися, и вернии на небо Тобою восходят, аще с верою и любовию Тя, Госпоже, призывают, якоже преподобный Лаврентий Деву Пресвятую Марию достойне воспевая, в небесныя обители вниде. Песнь 6 Ирмос: Молитву пролию ко Господу… Иже в скорбех и болезнех к тебе, праведне Лаврентие, верою прихождаху, врач душ и телес быв, скорбящия утешая, заблудшия вразумляя и недужныя именем Христовым врачуя. Зла всяческих удалятися верным наказуя и непрестанно молитися Богови повелевая: добрый делатель винограда Христова быв, яко лоза плодовита и финикс процветший, в радость Господа Твоего внити сподобился еси. Любы и усердие службы Божии и уставу церковному являя и строго заповедав хранити и соблюдати я, в сем подражая древним отцем Феодору Студиту и Савве Освященному, да Всесвятое имя Пресвятыя Троицы достойно восхваляется вкупе со Ангелы. Богородичен: Архангел Гавриил радость от Бога с небесе принесе ти, Благодатная, яже бысть радость небесным и земным и преисподним: еяже не лиши ны, молитвами Твоими и преподобнаго Лаврентия, Радосте всех радостей, Пресвятая Богородице, да спасшеся возрадуемся во Царствии Небеснем. Кондак, глас 4: Мир оставив, чистоту ангельскую стяжал еси, и ближним любовию послужил, отче наш Лаврентие, помощь благодатную с верою приходящим обильно даруя: темже в премирная селения достойно вселився, плотию с нами пребываеши, утверждая ны в православней вере отец наших, душею светозарною Подателю мира Царю царствующих молишися даровати Православней Церкви мир и душам нашим велию милость. Икос: Ангел во плоти и человек небесный быв, святе, обеты ангельскаго образа ревностно исполняя, чистотою душевною божественно вооружився, и непрестанныя молитвы яко копие вручив крепко, дальняя же яко настоящая зря, и дар чудотворения приходящим с верою к тебе даруя, явился еси пастырь добрый: добродетельми яко колесницею на небо возшел еси, идеже неизреченныя радости наслаждаешися, молися с Богородицею и всеми святыми даровати нам мир и велию милость. Песнь 7 Ирмос: От Иудеи дошедше отроцы… В храме Божии, яко на небеси пред Господем пребывая, лик Безплотных Сил и всех святых слышати сподобився, святе Лаврентие, и сему подражати дерзая, лики иноческия научил Всепетое имя Пресвятыя Троицы славословити: отец наших Боже, благословен еси. От смерти вечныя многия грешницы наставил на покаяние, отступницы богопознанию привед, неверы в веру обратив и заблуждающим путь истины в Православней Церкви указал, да вси вкупе спасшияся тобою вопиют: отец наших Боже, благословен еси. Богородичен: Вразумляя лики пети чинно, учил я, поучая, яко пение церковное приятно есть Господу и Царица Небесная любит поющих и глаголющих Сыну Ея и Богу нашему со Отцем и Святым Духом: отец наших Боже, благословен еси. Песнь 8 Ирмос: Царя Небеснаго… Увещевая кающияся любвеобильно, якоже отец чадолюбивый, наставляя стати на правый путь и шествовати по словеси глаголов вечнаго живота иже во Святем Евангелии, поучая хранити пост и привыкати непрестанно к молитве, блюсти добрая дела и жити в законе Бога Жива, Егоже поют Ангели и люди превозносят во веки. Времена судеб будущих предвозвещая, о антихристе поучав верныя, яко мнози увидят то страшное событие, ободряя же не унывати, ибо не оставит Господь благочестивыя поющия Его во веки. Енох праведный и Илия пророк с небесе снидут на обличение богомерзскаго антихриста, иже умертвит я, ониже воскреснут, глаголал еси, треблаженне Лаврентие: и тогда явится Сын Человеческий во всей славе Своей, совершити Страшный суд живым и мертвым, да избраннии Им хвалят и превозносят Его во веки. Богородичен: На Тя все упование возлагая, Мати Божия и Заступнице усердная рода христианскаго, преподобный Лаврентий молит Твоего Сына и Бога нашего, в час страшнаго испытания даровати силу исповедания веры правоверным, претерпети вся до конца во еже спасти ны милосердием Твоим, да хвалим и превозносим Троицу Пресвятую и Тя, Деву Марию, Пречистую Матерь во веки. Песнь 9 Ирмос: Воистину Богородицу Тя исповедуем… Чистое житие провождая во благочестии, Церковь Божию яко Царство Небесное любя, ежедневно причастник быв Пречистых Тела и Крове Христовых, в праздник Крещения Его от Иоанна Предтечи, душею предстал престолу Пресвятыя Троицы и свет Богоявления узрел. Агнца Божия Спасителя мира возлюбив, и Ему последователь быв, возшел в небесныя обители, прославляя Его со Отцем и Святым Духом, и моляся о чтущих тя. Есть вечный живот, глаголал еси верным, и будет суд Божий живым и мертвым, у гроба твоего не умолкаша четыренадесять деннонощныя молитвы и слезы, и по сих архиерей Иаков со множеством велиим верных со слезами погребе тя, вернии же, видевше твою плоть не предавшуюся тлению, увероваша воскресению мертвых и прославиша Бога дивнаго во святых Своих. Милосердия Своего и велия радости сподоби ны Бог, егда обретошася твоя честныя и чудотворящия мощи по четыренадесять трех летех, и правовернии людие глаголаху: сей день, егоже сотвори Господь, и благочестне покланяхуся, лобызающе я. Богородичен: Милосердия двери, Всемилостивая Госпоже, Благодатная Владычице, отверзи роду христианскому и вознеси наша молитвы с аввою Лаврентием Пресвятей Троице, Отцу и Сыну и Святому Духу, Единому Богу, о спасении душ наших. Светилен: Светильник велий быв, святе Лаврентие, не токмо в Руси просветися свет добрых дел твоих, но и во вся концы земли просия твое святое житие и твоя златословесная вещания о последних событиях, имущих совершитися, проидоша по всей земли, и вернии прославляху Отца Небеснаго, даровавшаго нам неизреченную радость во обретении многоцелебнаго источника честных мощей твоих. (дважды) Слава, и ныне, Богородичен: Богородице, всех Царице, православных похвало, еретиков шатания разори, лжеименнаго разума расколы угаси, и лица их посрами, не кланяющихся, ниже чтущих, Пречистая, честный Твой образ и святых угодников Сына Твоего Христа Бога нашего, Иже претерпевших до конца вселит во обители Отца Своего Небеснаго и Дух Святый осияет я. Всякое дыхание… На хвалитех стихиры на 4, глас 3: Блажен еси и добро ти есть, святе Лаврентие преподобне, светом Божества просвещен: нищету духа возлюбив, огнь искушений победив, и пещь страстей угасив, о всем мире Милостивому Богу моляся и миротворец быв: и ныне в небесных обителех радуяся, молися о чтущих любовию память твою, от всякаго злаго обстояния избавити и помиловати души наша. Ничтоже не разлучит тя, треблаженне Лаврентие, от любы Божия, егда правды ради гоним от безбожных властителей быв, поношения и ругательства претерпел и всяк зол глагол слышал: за исповедание Христос Бог исповеда тя пред Отцем Своим, и Святый Дух тя освяти: темже твоими молитвами утверди ны во благочестии, сохранити Церковь Православную во век века, яже есть столп и утверждение истины, яко чада ею наставляеми, сподобимся живота вечнаго наследия. Радуйся и веселися, всеблаженне Лаврентие, добродетельми яко миром благоухающий, мзда твоя велия на небесех, и сияеши во Царствии Небеснем яко свет: подвигом бо добрым подвизался, течение совершил, и веру сохранил, и приим от Бога венец правды. Мы же, вернии твоим заветам, похвальными песньми ублажаем тя и величаем, ты же молися Пресвятей Троице в мире избавити ны злокозненнаго антихриста хитрости и коварства, и душам нашим даровати велию милость. Глас 8: О всечестне и священне Лаврентие, заповеди Христа Царя царствующих исполнив, узким и тесным путем шествовал, в посте и молитве пребывая, крестом и смирением лукаваго победив: темже Владыку всея твари и Содетеля моли, во еже обновити нам в себе образ Божий покаянием, явитися победителями греха и противитися темным силам мировластителей тмы века сего, пожити в правоверии и благочестии, чистоте и святости, в законе истины и правде и сподобитися вкупе с тобою и всеми святыми Царствия Небеснаго. Слава, глас 6: Возвеличим днесь песньми велия угодника Спаса Христа Бога, победоносца противу темных сил ада, чудотворца известнаго и молитвенника славна, иже Пресвятую Троицу славя, Матерь Божию Царицу Небесную величая, и вся святыя с собою на молитву о мире подвизая, добрыми делы благочестия, постом и молитвою яко солнце сияя, егоже Церкви Своей Христос даде, указуя истину веры православныя, ко обличению суетная мудрствующих, инако мыслящих наставляюща, ереси и расколы разгоняюща, и заблудшия вразумляюща. Радуйся, отче наш, преподобне Лаврентие, неба церковнаго звездо светлая, радуйся, Святыя Руси похвало святая, радуйся, болящих и скорбящих скорый ходатаю и милостивый утешителю, радуйся, теплый молитвенниче о душах наших. И ныне, Богородичен, глас тойже: Архангела Гавриила гласом воззовем Деве Марии Богородице, вернии: радуйся, Благодатная, радуйся, Невесто Отца Небеснаго, радуйся, Сына Божия Мати, радуйся, Юже осени Дух Святый. Радуйся, Обрадованная, воскресением Спаса всех Христа и Жизнодавца и Бога, радуйся, Честнейшая Херувим, радуйся, славнейшая Серафим, радуйся, Преблагословенная, Господь с Тобою и Тобою с нами. Госпоже Владычице, низложи мучителей, безбожныя враги рукою Твоею, Пречистая, Отрадо и упокоение православных христиан. Славословие великое, и отпуст На Литургии Блаженны, от канона святаго песнь 3 и 6. Прокимен, глас 7: Честна пред Господем смерть преподобных Его. Стих: Восхвалятся преподобныя во славе и возрадуются на ложах своих. Апостол к Галатом, зачало 213. Евангелие от Луки, зачало 24. Причастен: В память вечную… Молитва О преподобне и богоблаженне, пречестная священная главо, отче наш Лаврентие, богомудре наставниче и преславный чудотворче, молитвою, верою и любовию к Богу, в чистоте и надежде воскресения, еже на земли во обитель пресвятыя Троицы душу твою устроивый, ангельскаго общения и Царицы Небесныя посещения, беседы пророка Илии и праведнаго Еноха сподобивыйся. Припадающе раце святых и честных мощей твоих, любовию целуем и молим тя, освященне: проси Пресвятую Троицу Животворящую, Единаго Бога, Господа господствующих и Царя царствующих, проливая теплыя твоя прошения о богохранимей Святей Руси и о воскресении ея, святых церквей и честных обителей возобновлении и строении, благоверным крепкий и нерушимый мир, благочиние, просвещение умов и сердец, земли плодоносие и изобилие, болящим исцеление, печальным утешение, скорбящим радование, слепым прозрение, хромым хождение, глухим слышание. Услыши, святче Божий, молящихся тебе и призывающих в помощь скорое предстательство и милостивое заступление твое. Виждь ны грешныя, в толицех обстояниих сущих: виждь ны немощныя, отвсюду уловляемых, и всякаго блага лишенных, и умом от малодушия помраченных. Потщися, угодниче Божий, и не остави ны в греховнем плену пребывати, да не умрем в лукавых деяниих наших. Моли, богоносне, не убоятися нам злохитраго и богомерзскаго антихриста и богоотступных нечестивых слуг его вкупе со всею силою ада и не убоятися никоегоже зла: да подаст Христос Бог молитвами Пречистыя Приснодевы Марии мирное жительство, оставление грехов, и душам нашим спасение и велию милость. Посещай, чудотворче святый, святую обитель твою, сохрани и соблюди ю молитвами твоими во век века. Избави от душепагубных учений и безверия, от льстивых и наглых нападений видимых и невидимых врагов нашего спасения, от прелести бесовския и козней диавольских. Даруй, отче милостиве, пастырем святыню, пастве о спасении ревность, старцем крепость и благое напутствие в живот вечный, средним лучшим быти, юныя уцеломудри и послушанию со смирением научи, нам же всем плоды покаяния принести и вселитися в небесныя обители вечныя. Устраши, преподобне отче, вся враги востающия на правоверие, благочестие и чистоту, Едину Святую Соборную и Апостольскую Церковь и Святую Русь, да распространяется непрестанно и укрепляется Вера Православная, и да истребится богоненавистное заблуждение лжеименнаго ума, зловредное нечестие и вся ереси и расколы душепагубнии, да везде славится всесвятое имя Господа нашего Иисуса Христа, со Безначальным Его Отцем, и Пресвятым и Благим и Животворящим Его Духом, во веки веков. Конец и Богу слава! PAGE PAGE 13