МЕСЯЦА МАЯ В 19 ДЕНЬ (СТАРЫЙ СТИЛЬ) СЛУЖБА СВЯЩЕННОМУЧЕНИКУ ОНУФРИЮ И иная служба священномучеником Александру и Константину со новомучениками, пострадавшими в дни репрессий 1920 – 1950 гг. Творение митрополита Никодима НА ВЕЧЕРНИ На Господи, воззвах: стихиры праздника на 4, священномученику Онуфрию на 4 и новомучеником на 4. Стихиры свящ. мч. Онуфрию, на 4. Глас 3: Яко отрока Самуила древле, / дивно призва тя Христос, состроителем Церкви Его быти / и Сию кровию своею украсити, Онуфрие богомудре, / егда Онуфрий Великий, в видении дивном / к иноческому подвигу тя призва. / Оттоле в жертву непорочную / Христу заклатися принеслся еси, / Его же нищетою обогатился еси премудро / и Сего Возлюбленного, / яко воин неустрашимый, славно исповедал еси, / евангельского благочестия веры сеятелю неутомимый. Волею нас ради обнищавшему Христу последовал еси, / сосуд благочестия Сего явился еси, Онуфрие всеблаженне, / и яко верный воин Владыке своего суще, / разрушение Церкви Святыя заграждал еси преславно, / безбожническую дерзость всячески пресекая. / Сице бо Крест Христов на рамена своя взем, / пастырь неустрашимый и светильник веры неугасимый, / пастве православной воистину явился еси, / Архипастырю стада Христова предивный. Церкве Зиждителя состроитель верный явился еси / Онуфрие, исповедниче Христов благоверный. / Со человекоубийцы, яко узник работая, / ради Евангелия Христова зноя и мраза не устрашился еси, / отеческою любовию таковыя утешая, / к покаянию подвигал еси я. / Сице бо, священномудренно волю Божию благословляя, / из уст разбойников и невинно зде страдавших хвалу Господеви возносил, / пленников утешителю теплейший, / прося им и нам прощения в день Судный. Иныя стихиры, священномученику Александру и Константину со новомученики земли Слободския. Глас 4: Неугасимые светильники веры носяще, / ко Господу восхождение славно совершившие, / нощь невежества претекли есте, / священномучениче Александре и Константине, со страстотерпцы земли Слободския. / Сего ради, люди православные, / имже предстатели теплыя являетися, / в юдоле лукавства и соблазнов изнемогающии, / надежду спасения имуще, радуются, / прославляя святые подвиги ваша. От славян боголюбивая возрасль явистися, достоблаженные священномученицы и страстотерпцы, / яко крины благоуханные и миродышущии, / зловоние богоборцев нечестивых / страданьми вашими изнурили есте, / Духа Святаго носителие суще. / Мы же, ублажая святую память вашу, / молим вас прилежно: / испросите народам нашим единомыслия веры, / да не поколеблется Церковь Христова, / грех ради наших злохулителями попираемая. Орудием Креста, им же Первозванный Андрей / веру Христову в сердца отцев наших насади / и Киевскую Русь в дом Божий утверди, / на недвижимом камене Христовых заповедей утвердившиися, / неистовство свирепейших богоборцев посрамили есте, / страстотерпцы земли нашея непобедимы. / Ныне в Вышния домы души ваша Христос прият, / идеже со всеми страстотерпцы святой Руси / молитися о нас в скорбех изнемогающих, / да спасет нас Господь от напастей лютых, / любовию совершающих святую память вашу. Слава, глас 5: Приидите, священных соборы / и православных исповедников песнословцы, / Онуфрия, архипастыря богомудреннаго, / на камене веры твердо стоявшего / кровьми своими Христу за всех и за вся священнодействовавшего, / радующеся, песньми похвальными почтим, / Сей бо, яко Моисей на Амалика иногда, / не в трубех рожаных, но в брацании стрел огненных руце воздеваше, / коленопреклонно слезно молящеся, / егда богоборцы пастырей Церкве Христовой истребляху: / Господи! помяни убиенных соузников моих, во царствии Твоем. / С ними же ныне победы венец носяще, / восхваляет Господа, Дивнаго во святых своих, / в земле нашей славно просиявших. И ныне, праздника, или Богородичен, глас тойже. На стиховне стихиры, глас 2. Подобен: Доме Евфрафов: Страстотерпче Богоносе, / нося в руках Чашу кровей твоих, / пролитую от беззаконных, / мученичества венец приял еси, / о всеблаженне Онуфрие. Стих: Священницы Твои облекутся в правду, / и преподобнии Твои возрадуются. Святителей похвало, / священномучеников славо, / монашествующих правило, / страстотерпче Онуфрие, / радуйся, Церкве утверждение. Стих: Блажен муж, бояйся Господа, / в заповедех Его восхощет зело. Услыши моление чад твоих, / люте страждущих, / и слез не презри, / святителю Христов Онуфрие, / подавай помощь любящим тя. Слава, глас и подобен тойже. Троицу Честную и Богоначальную, / Отца и Сына, и Святаго Духа, / доблесне исповедал страстотерпче, / кровьми своими священнодействуя, / Церковь Православную утверждающе. И ныне, праздника, или Богородицей, глас тойже: Обрадованная, радуйся, / яже радость миру рождшая, / Христа Жизнодавца, / печаль потребившаго, / воскресение всем даровавшего. Тропарь свящ. мч. Онуфрию, глас 2: Яко сосуд священный Духа Божественнаго, / столп и светильник Церкве Православныя воистину явился еси, Священномучениче Онуфрие, / егда вся спира богоборцев земли нашея, / злобою ада дышуща, / разорити Церковь Божию устремишася. / Ты же, со множеством исповедников Христовых / землю сибирскую костьми своими устилаху, демонскую дерзость гонителей беззаконных посрамил еси. / Ныне, о всеблаженне, / со всеми страстотерпцы Святой Руси, / в Церкве Небесней торжествующе, / Моли Вземлющего грехи мира / спастися душам нашим. Ин тропарь, новомучеником, глас 4: Якоже столп непоколебимый, / священномучениче Александре, / прещения мучителей не устрашился еси, / аще и в гноище низвержен суще, / Божественною ревностию со священномучеником Константином и всеми страстотерпцы края Слободскаго / богомерзкую прелесть посрамили есте. / Тем же вас, новомученицы предивнии, / Владыка Неба и земли / Божественною десницею венчает / и в Царствии Небесном священнодействовати дарует. / Егоже молите спастися душам нашим. Слава и ныне праздника, или Богородичен, глас тойже. НА УТРЕНИ На Бог Господь: тропарь празднику единожде, священномученику Онуфрию единожде, Слава, Мучеником, и Ныне, празднику, или Богородичен. По 1-м стихословии седален, глас 8: Дом чистоты и целомудрия, — дом Христова благодеяния явился еси, / священномучениче Онуфрие. / Сокровище некрадимое, спасения проповедание всем возвещая, / в жертву непорочную Христу заклатися принеслся еси, / безбоязненно, аки на пир идуще, / каторжником в страданиих приобщивыйся, / да прославиши силу Божию / в немощи Твоей изобиловавшую. Слава, и ныне, праздника, или Богородичен, глас тойже: Иже во искушениих, и напастех сущим, / укрепи, Благосердная Владычице, славящая Тя люди на противная враги, / ищущия истребити род православный в земле нашей, / издревле упование твердо на Тя имуще, / вся бо можеши Преблагословенная, / нетление и жизнь всем источающая Рождеством Твоим. По 2-м стихословии седален, глас 1: Священноначальник и мученик непобедим, / утверждение верных, нечестия противоборец, / возсияли есте Александре и Константине в подвизех ваших, / со новомучениками святыми. / Вас бо, якоже Павла иногда: / ни огонь, ни стрелы огненныя, ниже смерть, / не возмогоша отлучити от любви Божией, / распаляемых Духом Святым даже до крови. Слава, и ныне, праздника, или Богородичен, глас тойже: Оружие пламенное ныне / не хранит врат едемских, / зане Крест Сына Твоего, Пренепорочная, / врага губителя славно низложи, / и Сим ограждаемых в Рая паки введе. / Темже и мы, спасение улучивше, / благодарно взываем Ти Чистая: / благословен Плод чрева Твоего, / Мати Света неизреченнаго Сущая. По полиелеи седален, глас 2: Весь любовию Христовою укреплься, / от града к граду узы темничныя прошел еси, преблаженне Онуфрие, / апостольски Евангелие Христово благовествуя, / в Нем же узницы свет любви Божией познавша, / в вере Христовой утверждахуся. / Тако тя позна земля Хабаровская, / кровьми твоими орошенная, / со тьмами исповедников земли нашея восприявшая тело твое, / яко многоценный бисер Христов. Слава, и ныне, праздника, или Богородичен, глас тойже: Украсилася еси, яко невеста, / девственными добротами, / обрадованная Дево Мати Неневестная, / с Тобою Господь и Тобою с нами Бог, / покрый, сохрани и спаси чад Церкви Православныя, / многими напастьми обуреваемые, / ересьми и расколы терзаемые, / молитвами святых страстотерпцев наших, / их же память ныне светло празднуем. Тоже степенна, 1-й антифон 4-го гласа. Прокимен, глас 4-й: Священницы Твои облекутся в правду, / и преподобнии Твои возрадуются. Стих: Услышите сия вси язьщы, внушите все живущии по вселенней. Всякое дыхание: Евангелие от Луки, зачало 67. По 50-м псалме стихира, глас 6: Силою Пожершагося на Кресте укреплен, / яко Давид на Голиафа / каменем веры зверя богоборца низложити устремился еси, / Онуфрие страстотерпче, / копием мужества и терпения твоего / силу вражию низложил преславно, / убити души твоея невозмогшей. / Сице, Церковь Христова чашу кровей твоих стяжа, / боголепно прославляет подвиги твоя, / со всеми исповедники веры земли Слободския, / с ними же Александр и Константин паствы харьковския похвала, / прославившими Православия непобедимое торжество, / в горниле испытаний очищаемое. Канон праздника, или Богородичен, со ирмосом на 6, и святых два канона, на 8. Канон священномученику Онуфрию, глас 8. Песнь 1 Ирмос: Колесницегонителя Фараона погрузи, / чудотворяй иногда / Моисейский жезл крестообразно порази и разделив море, / Израиля же беглеца, пешеходца спасе, / песнь Богови воспевающа. Припев: Святый священномучениче Онуфрие, моли Бога о нас. Божественная благодать, немощная врачующие и оскудевающая восполняюще, от юности избра тя, Онуфрие предивне, якоже отрока Самуила древле, во еже пожретися за Церковь Христову, духом злобы поднебесной терзаемую. Сердце глубоко, любви и сострадания исполнено дарова ти Господь, Онуфрие боголюбиве, и благодатию провидца показа тя. Ею же, еще младенец суще, матерь свою скорбящую утешая, прорекл еси епископом Церкви Христовой быти. Обрел еси Небесную премудрость, яко врученый ти талант, егоже подвигом веры умножая, Богоносне Онуфрие, от сокровищ богословия, умудрил еси люди Божественным учением, демонскую лесть всячески пресекая. Богородичен: Разумети, Чистая, рождества Твоего неизреченныя глубины недоумевает ум человеческий, Бог бо, Себе смирив щедроты ради во чреве Твоим, да обновит и спасет род человеческий. Ин канон, мучеников, глас 4. Песнь 1 Ирмос: Грядите, людие, / поем песнь Христу Богу, / раздельшему море и наставльшему люди, / яже изведе из работы египетския, / яко прославися. Припев: Святии мученицы земли Слободския, молите Бога о нас. Господи Сил с нами буди, молитвами святых мучеников и страстотерпцев земли Слободския, доблесне пострадавших, веру православную соблюдших, нечесть же богоборскую, кровьми своими посрамивших. Егда силы адовы пламя свое на Русь Святую низвергоша, сожжещи род православный тщашася, сонм же исповедников верных, кровьми своими озлобление сие утопиша, их же молитвами и священномученика Александра, Господи, пощади и спаси нас. Коль крати ненавидевший нас нападоша на нас, Господи? Ты же, щедрот Твоих .ради, спасл еси ны, молитвами святых отец наших, да не погибнем пред лицем Твоим. Богородичен: Пречисте руце Твои, Дево Мати, простерши, покрый уповающия на Тя и Сыну Твоему зовущия: подаждь нам, Христе, помощь на борющии ны. Песнь 3 Ирмос: Утверждей в начале небеса разумом / и землю на водах основавый, / на камени мя, Христе, заповедей Твоих утверди, / яко несть свят, паче Тебе, едине Человеколюбче. Глаголом Божественным последуя и сим вину поучаяся, исполнился еси вод благодатных, и источил еси потоки сладостныя учений твоих, Блаженне Онуфрие, имиже вернии в вере укрепляхуся, воспевающе Богу: несть свят паче Тебе, Человеколюбче. Богородичен: Святых Ангел сущи святейши, яже сих Содетеля во Твоей утробе носившая, и рождшая, Богоотроковице Чистая, Избавителя человеком. Темже Ти согласно вопием: несть святы и пречисты, разве Тебе, Владычице. Ин Песнь 3 Ирмос: Утверди в Тебе, Господи, / Древом умерщвлей грех, / и страх Твой всади / в сердца нас, поющих Тя. Утвердившиися благодатию и огнем распалаемии ревности о утверждении Церкви Православные, домы своя и чада, и благая мира сего остависте, святии мученицы Христовы, страдания тяжкия приявше, да посрамятся борющии на Сию. Радуется ныне земля Слободская, ликуют православных соборы, почитающии преславные подвиги исповедников предивных, мужественно победивших нечестия силу, во утверждение Церкви Христовой. К вам святии сродницы наша, кровьми своими землю Слободскую освятивших, в скорбех и бедах прибегаем, молимся: вознесите молитвы ваша ко Господу, да не посмеются над нами ненавидящии нас. Богородичен: Небо Была еси словесное, Слово Небесное в Твоей утробе, Богомати, вместившая, Имже вся быша: Небо же и земля, и яже выше сих. Темже со дерзновением моли Сына Твоего и Бога нашего, спасти народ наш, Пречистая. Кондак мучеником, глас 3: Светло празднуя веселится Церковь Православная / багряницею кровей священномучеников Александра и Константина велелепствующе / с ним же сонм новомучеников земли Слободския, / Церковь Небесная венцы ангельскими украшает, / мы же всерадостно ликующе / прославляем над всеми сущаго Бога нашего, / Духом Святым укреплявшего отцев наших / своею кровию козни вражия низлагати, / да не подвижится Церковь Христова во веки. Седален, глас 4: Дал еси образ терпения и мужества / страданьми Твоими за Церковь Православную, / егда злочестивые богоборцы восташа разорити Ю, / и осквернити безверием боголюбивый народ наш, / Христу Богу возлюбленне Онуфрие. / Ты же серафимскою любовию ко Господу пламенея, / не устрашился еси умрети за достояние Его, / яко верный состроитель Церкви Зиждителя. Слава, и ныне, праздника, или Богородичен, глас 4: Моли из Тебя рождшагося Господа, / Дево Отроковице Богоневестная, / сохранити народы наша от сопротивных обстояний и соблазнов бесовских, / ярящихся разлучити ны от Всещедрого Бога. / Тя, воистину Божию Матерь исповедуем, / спасающую род Христианский от всяких лютых. Песнь 4 Ирмос: Ты моя крепость, Господи, / Ты моя и сила, / Ты мой Бог, Ты мое радование, / не оставль недра Отча / и нашу нищету посетив. / Тем с пророком / Аввакумом зову Ти: силе Твоей слава, Человеколюбче. Вместо земных и тленных, благ Небесных достигл еси, священномучениче Онуфрие, и ныне с праведными лики водворяешися, и поеши, и славиши всех Бога, Егоже умилосерди о нас, изнемогающих от соблазнов злочестивых. Якоже за соузников твоих иногда, ввергших ти в окно темничное прошение, егда на казнь ведоме быша, вознеси теплые молитвы ко Господу, да избавит нас от уз греховных и смерти лютыя, Онуфрие благосердне. Буря неистовствующих, якоже на тя иногда, злохулящей клеветой паству православную и пастырей ея, огнедышуще, мнят истребити, ты же страстотерпче святый, злобы сия огневицу смертию испытав, моли спастися нам от зубов их. Богородичен: Ко Твоему притекаем Покрову, Пречистая Дево, яко сильна в крепости предвари и всяких душевоюющих страданий избави, Тя бо Едину в скорбех и напастех надежду имамы. Ин Песнь 4 Ирмос: Услыша, Господи, / славное Твое смотрение / и прославих, Человеколюбче, / непостижимую Твою силу. Милостивые будете к нам немощным, вернии свидетели Евангелия Христова, и нашего малодушия не возгнушайтеся, прощения нам от Господа испросите, страданьми своими Сего славно прославившии. От напастей и различных бед и скорбей, наносимых верным от сеятелей раздоров в Церкве Христовой, избавите ны, вернии предстатели наши пред Богом, чтущих святые страдания ваша верно. Яко приятно кадило, принесся, боголюбиве Александре, всех Царю, яко заколение священное, яко предобра жертва приятная, яко миро благовонное, со страстотерпцы земли нашея, неба Церковнаго немеркнущее украшение. Богородичен: Светлыми сияньми, Пречистая Мати Божия, озари наш ум, тьмою лютых соблазнов одержимый, яко да, улучив Божественное просвещение, величия милости Твоя возвестим, надеждо нашего Спасения. Песнь 5 Ирмос: Вскую мя отринул еси / от Лица Твоего, Свете незаходимый, / и покрыла мя есть чуждая тьма, окаяннаго. / Но обрати мя и к свету заповедей Твоих / пути моя направи, молюся. Тесный путь со скорбьми и печальми прошел еси, боголюбиве Онуфрие, от младенчества до последнего твоего издыхания: гонения, поношения и темничные заточения, не имея где главы приклонити, до пота крови работая Христу прилежно. Кто исповесть труды твоя, Всеблаженне, видяще тя с соузники дровосека, во гладе и мразе, псалмех и пении духовном, беды превозмогая, яко же святой Златоуст, подвиг пастыря Христова облестал еси да имеем тя подражателя и молитвенника во изнеможениих. Сердца, помышления и души наша простираем к тебе, исповедниче Христа всеусерднейший, и молим тя прилежно: вознеси святыя молитвы твоя ко Господу, да оградит Церковь Свою Святую и нас от бед грядущих на ны. Богородичен: Призри ныне на нас с высоты славы Твоея, Владычице Пресвятая, благоговейно Тя почитающих и прошения исполни Божественных даров, и прегрешений даруй оставление, да познают люди силу и щедроты Твоя, Богоневесто. Ин Песнь 5 Ирмос: Света Подателю и Веков Творче, Господи, / во свете Твоих повелений настави нас: / разве бо Тебе, инаго Бога не знаем. Тело мукам предали есте за Христа усердно, священномученицы Александре и Константине, яко крины неувядающии паствы Харьковския, пожершиися Ему с любовию, яко агнцы, молитися всех Владыце, да спасет нас от грядущего гнева, грех ради наших. Венцы похвалы сплетше, ублажаем вас достохвальные страдальцы: архимандриты Варсонофие и Киприане, и благоверные пастыри: Якове, Николае, Петре и Иоанне, за Церковь Христову славно пострадавшии. Чтим и ублажаем вас священницы Бога Вышняго, души своя за стадо Христово положившии: Иларионе, Сергие и Антоние, Иоанне, Владимире и Николае, Викторе и Дионисие, прославившии Господа. Богородичен: Приведи, Пречистая, в горний Иерусалим заклавшихся за Церковь Сына Твоего агнцев, их же избра Господь пастырями стада Слободского: Стефана, Иоанна, Лукияна и Александра, и всех с ними пострадавших, да увенчаются венцами нетления. Песнь 6 Ирмос: Очисти мя, Спасе, / многа бо беззакония моя, / и из глубины возведи, молюся, / к Тебе бо возопих, и услыши мя, / Боже спасения моего. Всеосвященный Богоносец показался еси, страстотерпче Онуфрие, огнем Святаго Духа обложен, светло входил еси во Святая Святых. Темже, яко истинен святитель, притекающия к тебе, спасая день и нощь, на воле и в узах, от сетей лукавого. Мученическое дерзновение ко Христу имея, проси усердно спасения тя поющим, душевных недуг, уныния и отчаяния их избавляя, надежду спасения подающе, священномучениче, преблаженне Онуфрие. Видяще ныне Церковь Православную исчадами ада и лжепророки зле терзаемую, слезно молим тя, о Всеблаженне, не примолчи за ны ко Господу, да пощадит стадо Свое от пагубы сея. Богородичен: Просвети и умиротвори, Пречистая Дево, сетующии сердца наша житейскими многими молвами и не остави нас врагом быти в радость, яко да славим Тя и яко да Тя любовию поем, Пречистая. Ин Песнь 6 Ирмос: В бездне греховней валяяся, / неизследимую милосердия Твоего призывая бездну: / от тли, Боже, мя возведи. Человецы суще, сверхчеловеческая достигли есте, святые мученицы: Якове, Паисие, Симеоне, Николае и Гаврииле, источники крови в страданиях о Христе излиявши, и укрепите немощи наша, ублажающих подвиги ваша. Победители, одолевшии козни лукавого, явистеся святые мученицы Спиридоне, Иоанне, Филиппе и Андрее, и многии мирстии сподвижники ваша, кровьми своими землю Харьковскую освятившии преславно. В пламене огненном сожжены, и в рецех утопленныя, на древех увешенныя и в ровех скверных умерщвлены, яко злато в горниле искусистеся, святии страстотерпцы наша, воистину Ангелом радость явистеся. Богородичен: Спаси нас, Мати Божия, Виновника спасения мирови рождшая, и избави от бури нечистых страстей, ловления диавола и всякия скорби, да славим Тя, Богородицу. Кондак, глас 8: Святительскою благодатию светло облечен, / яко Исаак целомудренный, / священнодействовати своею кровию Пастыреначальнику Христу славно предтекл еси, / Онуфрие богомудре, / Церковь Святую, злобою ересей и расколов злочестивых снедаемую, / и богоборцами разоряему, яко Невесту Христову, страданьми доблесне защищая, / путь верным к Божественному богомудрию ученьми твоими облистал еси, / яко страж недремлющий и верный друг Христов. Икос: Вышняго светом озарився, / стезю апостольского делания скоро потекл еси, / священномучениче Онуфрие, / огнем Божественнаго слова и пастырской любовию / гонимую паству православную укрепляя премудро. / Идеже бо бяху узы твоя, тамо умножашася чада Церкви Христовой, / тщавшиися же Русь Святую в сатанинское сборище претворити, / посрамляхуся благодатию исходящей из уст твоих / и опаляхуся огнем святыя молитвы твоя. / Ныне, о всеблаженне, / Церковь Христова ублажает тя, / яко стража недремлюща и вернаго друга Христова. Песнь 7 Ирмос: От Иудеи дошедше отроцы, / в Вавилоне иногда / верою Троическою пламень пещный попраша, поюще: / отцев Боже, благословен еси. Стезями праведными ходяй, лесть бесовскую низвергл еси, радосте Церкви Святыя, Онуфрие, Юже, яко невесту преизрядную возлюбил даже до крови, вопия Церкве Зиждителю: отцев Боже, благословен еси. Яко священнодейственник чист, яко мученик добль, яко чудодейственник чуден, яко Божественных словописец, яко веры непоколебим столп, с обагрившими кровию Русь Православную, вопиял еси, Онуфрие, Сраспеншемуся за нас: отцев Боже, благословен еси. Райския доброты желая, пламенный молитвенниче за нас Онуфрие, ея же ради в слезах и воздыханиих, и скорбех многих пребывая, аки Иов многострадальный, усты Твоя от роптания ограждая, смиренномудренно взывал еси: отцев Боже, благословен еси. Богородичен: Лютых мук избави нас, Богоневестная Мати, Твоими бо Пречистыми молитвами вся спасаются, возсияй нам зарею милости Твоя, во тьме прегрешений блуждающих и слезно вопиющих: отцев Боже, благословен еси. Ин Песнь 7 Ирмос: Образу златому, на поле Деире служиму, / трие Твои отроцы небрегоша безбожнаго веления, / посреде же огня ввержени, орошаеми, пояху: / благословен еси, Боже отец наших. Ярости князей мира сего не убоястеся, доблестные воины Христовы, яко овцы посреди волков терзаемые, в горении любви вашей ко Господу не оскудесте в сем богомудром стоянии и нас утвердите, да купно с вами вопием: благословен еси, Боже отец наших. Горнее Царство, вышний град, Божий рай, праведных наслаждение и свет незаходимый обретосте, богомудрии мученицы, идеже нас в скорбех сущих помяните, во еже вопити и нам: благословен еси, Боже отец наших. Молитвы теплые состворите о нас ко Господу, святителю Александре, со святыми многострадальными венценосцы Христовы, да не отступит от нас Господь в тяжких испытаниях наших, со слезами зовуще: благословен еси, Боже отец наших. Богородичен: Спасительное пристанище, Богородице Дево, Тя имуще, житейских бед и напастей избегаем, к пристанищу тишины Твоея приходяще и Сыну Твоему вопиюще: благословен еси, Боже отец наших. Песнь 8 Ирмос: Царя небеснаго / Егоже поют вои Ангельстии, / хвалите и превозносите во вся веки. Видяще боголюбивый народ наш, аки скот на заколение гонимый, из уз темничных увещевал еси я: ради любви Христовой домов, сродников и жизни своя не рыдайте, да внидете в радость любви Божией. Не убойтеся убивающих тело, заповедал Господь, бойтеся и тело, и душу могущаго убити. Сему внемлюще, вся претерпел еси, святе Онуфрие, даже до смерти, ища Христа, и себя в любви Его. Весь любовию ко Христу распалаем, аки меда и сота Сего обрести жаждал еси, боголюбиве Онуфрие, сего ради веселыми ногами на смерть потекл еси, принося Ему капли крови сердца твоего теплейшия. Богородичен: Щитом неусыпных Твоих молитв, Пресвятая Дево, невредимо стадо православное от наветов вражиих сохрани и грехов наших рукописания раздери, да Тя яко Богородицу поём и превозносим во веки. Ин Песнь 8 Ирмос: В купине Моисею Девы чудо / на Синайстей горе Преобразившаго иногда / пойте, благословите / и превозносите во вся веки. Яко роса аермонская на горе Сионстей, облагодатствоваша землю нашу струи кровей ваших, достоблаженнии страдальцы Христовы, молитеся о нас, да непостыдно явимся в день судный пред Лицем Господнем. Помышляя день Судный и Судию нелицеприятнаго на Престоле седяща, зело устрашаемся, но видяще вас, венценосцы Христовы, у ног Его за ны молящихся, утешаемся надеждой на великую милость Его. Владыко Неба и земли, взывающих к Тебе мольбою, Десницею Твоей святою осени и огради Церковь Твою Православную, и нас недостойных рабов Твоих, от ищущих постыдно погубити ны. Богородичен: Владычице Пресвятая, приими мольбы страстотерпцев земли нашея, кровию своею предстательствующих за нас у ног Сына Твоего и Спасителя мира, во еже ущедрити мир и утвердити Церковь Святую. Песнь 9 Ирмос: Чистую славно почтим, Богородицу, / Огнь Божества приимшую во чреве неопально, / песньми величаем. Носителя Духа Святаго нескверна яви тя стаду твоему, молитвенниче теплый за мир Онуфрие. Мы же усты и сердцем осквернены, молим тя прилежно: помоги не лишитися нам любви Божией. Херувимскою любовию ко Господу пламенея, весь растворился еси в любви Его, сего ради, веселящеся на смерть потекл еси, да пожрешися с Ним во спасение наше, боголюбче требогате. Како не удивимся и не восхвалим любовь твою ко Господу и ближнему твоему, Онуфрие богомудре, в ней же весь еси Христов, нас не оставляюще, да Царствия Небеснаго наследницы будем. Богородичен: Веселитися, людие, воспой земля Слободская, в скорбех и печалех непостижимое благоволение Божие к нам, в них же Пречистая со святыми земли нашей, предстателие наши теплейшии. Ин Песнь 9 Ирмос: От Бога Бога Слова, неизреченною мудростию пришедшаго обновити Адама, / ядию в тление падшаго люте, / от Святыя Девы неизреченно воплотившагося нас ради, / вернии единомудренно песньми величаем. Силою молитвы твоея, страстотерпче Христов Александре, укрепи нас немощных на брань духовную со духом злобы поднебесной, устремившагося души народа нашего поглотити и погубити, молим тя прилежно. Яко звезды небесныя и песок морский, не исчесть святых имен ваших, вси святии земли нашея, тысящьми реки крови пролившии, грехи праотец наших омывшии, нам и грядущим стези ко спасению освятившии. Троичен: Троице Святая, Единосущная и Нераздельная, приими от нас убогую похвалу страстотерпцем земли нашея, в них же святится Трисвятое Имя Твое, мира спасение. Богородичен: Возсияй нам, Владычице мира, зарю милости Твоея, во тьме прегрешений сущих, и к свету настави покаяния, да грядущая взыскуем и сынови Вышняго будем. Светилен: Немеркнущий свет возсия в душах ваших, святители Христовы Онуфрие, Александре и Константине, и всю поднебесную просвети, Ангелом собеседницы, мучеников вернии сострадальцы, постников веселие, нам же честь и отрада, облеставших стезю, возводящей верных к Невечернему свету, где Господь Бог Вседержитель — храм Его и Агнец. Слава, и ныне, Богородичен: Светом Божественным, возсиявшем из Девственной утробы Твоей, озари, Пречистая Дево Мати, стези хождения нашего пред Лицем Господнем, Матерне молящеся о народе православном нашем, ересьми и расколы обуреваемом, Светодавцу Спасу, Сыну Твоему, да ниспошлет мир Свой, во спасение наше. На хвалитех стихиры на 4, глас 4: Удивишася, адаманте веры, / Онуфрие непобедиме, / Небесная воинства и силы, / дарование, свыше в тебе явленному, / не в духе страха и боязни, / но в страсе Господнем утвердил еси себе. / Благостию и правдою облекся бо еси, / в страданиях вера твоя утвердися, яко злато в горниле огненном, / и любовь Божественную явил еси ко всем людем, яко же повеле Христос, / Ему же спожерлся еси преславно. Онуфрию пустыннолюбцу тезоименит, / сораспятися Христу, зову сего последовал еси, / священномучениче Онуфрие, / чистоту сердца и телесе соблюл еси даже до смерти. / Видяще тя благочестия ревнителя / и Церкве Святыя служителя верна, / дух злобы поднебесныя вся стрелы ада низверже на тя. / Ты же смирением, терпением и молитвой слезной, / козни вражия сего сокрушил, / священнодействуя Христу за народ православный / своею святою кровию. Образ Божий, живый в вас, / явили есте, Онуфрие досточудне, Александре и Константине, / во всем Христу последуя прилежно, / лику избранником Божиим сочетаетеся кровию, / во многом терпении пожив, / ангельскою небесною славою облестастеся. / Сеяв на земли кровию со слезами многими, / собираете на небеси неизглаголанною радостию. / Темже, молите Христа Бога спастися душам нашим. Слава, глас 6 Днесь мучениколюбцы составляют соборы, / исповедницы и вернии друзи Христовы, / Онуфрие, Александре и Константине, прославляюще страдания и деяния ваша / и веры вашея равноангельския пламень любви горящей, / еюже исполнишася сердца ваша от купели Крещения. / Вы же соединившиеся кровию в союз любви Христовой / со страстотерпцы земли Слободския / и исповедники лозы славянския, / молите Вземшаго грехи Мира — Агнца Божия, / во еже непоколебимой быти Церкве Православной, / миру мир даровати / и Божественную милость роду христианскому. И ныне, праздника, или Богородичен, глас тойже: Тя оружие в бедах и напастех, / престанище и стену в скорбех, / и щит во бранех лютых, / великое очистилище в безмерных прегрешениих / и в час смерти от рук диавола душ избавление имамы. / Тем Тя, Богородицу, всеусердно чтим / и величаем, Пречистая. Славословие великое, тропарь священномученику Онуфрию, Слава и ныне, праздника, ектении и отпуст. НА ЛИТУРГИИ Блаженны от канона, праздника и святых, песни 3-я и 6-я. Прокимен, глас 4: Святым, иже суть на земли Его, удиви Господь вся хотения Своя в них. Стих: Предзрех Господа предо мною выну. Апостол ко Евреем, зачало 330. Аллилуиа, глас 4: Воззваша праведнии, и Господь услыша их. Евангелие от Луки, зачало 77. Молитва священномучеником Онуфрию, Александру и Константину со новомученики земли Слободския, зри по Акафисте. АКАФИСТ священномучеником Онуфрию, Александру и Константину со новомученики земли Слободской КОНДАК 1 Избранным носителем Духа Божественнаго, / Исповедников Церкви Православныя адаманта твердейших, / похвальная приносим святым священномучеником Онуфрию, Александру и Константину, разумом истинного богопознания веру христолюбцев лозы славянския, / ересьми и расколы терзаемыя, утвердивших, / и с сонмом новомучеников земли Слободския, кровию своею за мертвых, живых и грядущих Христу священнодействующих. Мы ж предстательством их от всех зол ограждаемые, со умилением взываем: Радуйтеся, священномученицы Онуфрие, Александре и Константине, со всеми новомученики земли нашея. ИКОС 1 Архангельскии силы на Небесе и Боголюбивые люди на земли ликовствующе, всерадостно прославляют Церкви Зиждителя — Христа Бога нашего, славно воздвигшаго новые светила веры: Священномучеников Онуфрия, Александра и Константина, с сонмом новомучеников земли Слободския, страданьми и исповедническою кровию своею, ада богоборческое нашествие посрамивших и многии из тьмы неведения ко Христу приведшия. Мы же многострадальном подвигом их в вере и любви к Богу утверждаемся, зовем таковая: Радуйтеся, Церкве Православныя немеркнущие светильницы; Радуйтеся, Евангелия Христова неустрашимии проповедницы. Радуйтеся, доблеснии искоренители лжепророческих гаданий; Радуйтеся, пламеннии ревнителие Апостольских преданий. Радуйтеся, подвигом вашим сатана посрамися; Радуйтеся, в терпении вашем Христос прославился; Радуйтеся, заклатися за Церковь Христову Богом избранные; Радуйтеся, в терпении многострадальном Агнцем Божиим увенчанные. Радуйтеся, священномученицы Онуфрие, Александре и Константине, со всеми новомученики земли нашея. КОНДАК 2 Видя страшную гибель родителя своего и бедственность матери родной, всеблаженне Онуфрие, утешающе ю, отрочески прорекл еси: не рыдай, мати моя, епископом Церкви Христовой буду, всячески облегчу страдания твоя. О сем дивящеся, како Святой Дух из млада, не токмо к матери своей, но и ко страждущей Церкви Христовой, состраданием исполни сердце твое, вопием Богу: Аллилуиа. ИКОС 2 Разум познания всеблагой воли Божией объят душу твою, боголюбиве Онуфрие, егда в дивном явлении пустыножителей начальник — Авва Онуфрий повели ти образ иноческого жития прияти и жертвенной любовью за Церковь Христову сораспятися, яже, яко юный Самуил древле глагол Божий, с любовию восприял, иго благое и бремя легкое Христа Спаса взем, сему последовал еси прилежно. Тем же похваляюще послушание и любовь твою ко Господу, зовем ти: Радуйся, иноческого подвига ревнителю; Радуйся, ангельския чистоты стяжателю. Радуйся, нищету Христову с радостию восприявый; Радуйся, жребий исповедника Христова облобызавый. Радуйся, клеветы злолукавые неповинных избавителю; Радуйся, узников по Бозе усердный защитителю. Радуйся, верных в терпении непоколебимое утверждение; Радуйся, мучеников пречестных неувядаемое украшение. Радуйтеся, священномученицы Онуфрие, Александре и Константине, со всеми новомученики земли нашея. КОНДАК 3 Сила Вышняго, немощная врачующе и оскудевающая восполняюще, излияся на вас, новомученицы земли Слободския, егда вся силы ада воздвигошеся огнем и мечем Русь Святую опустошити, род же наш боголюбивый истребити. Вы же, аки агнцы на заколение гонимые суще, узы темничныя прохождаша и костьми своими дебри Сибирские устилающе, яко столпы веры непоколебимые, Имя Божие прославили есте, да купно с вами все роди родов наших поют победную песнь Богу: Аллилуиа. ИКОС 3 Имеюще ревность о гонимой Церкви Христовой и ненавистию богоборцев терзаемой пастве православной, уз темничных, мучений и изуверских умерщвлений не убоястеся святии иерарси, пастыри и мирстии Боголюбцы, яко же три отроцы с Даниилом в Вавилоне иногда, пламень злобы гонителей зверонравных притупили есте, доблестно воздвигше несокрушимое Знамя Христово в земле нашей. Уязвленны подвига сего величием, вопием вам сицевая: Радуйтеся, преславнии страстотерпцы земли Слободския; Радуйтеся, превозмогшии верою силы адския. Радуйтеся, неистовства мучителей изобличители; Радуйтеся, злонравия лжеучителей низложители. Радуйтеся, верные иерарси Христовы пресветлии; Радуйтеся, священницы, монаси и мирстии, Христу любовию сораспеншиися. Радуйтеся, отцы и матери, церквей домашних священное утверждение; Радуйтеся, вдовы и сироты, мучеников-крестоносителей неувядаемое украшение. Радуйтеся, священномученицы Онуфрие, Александре и Константине, со всеми новомученики земли нашея. КОНДАК 4 Бурю ярости и злобнаго неистовства воздвигоша на тя, священномучениче Онуфрие, сыны беззакония и лжепастыри, разорявшии единство Церкви Христовой Православной, — овы же лжеученьми и прорецаниями, овы же клеветою и лжесвидетельством сомкнути уста медоточного богословия твоего в узах темничных тщахуся. Ты же, ярость таковых превозмогая, не токмо христолюбивую паству, но соузников своих наставлял еси воспевати Богу: Аллилуиа. ИКОС 4 Слышаша и ведеша людие православнии равноангельское стояние ваша, на страже апостольской чистоты веры и незыблемого единства Церкви Христовой, достоблаженные Онуфрие, Александре и Константине, веру непорочную соблюдше и мнози заклатися за Церковь Божию пойдоша, и крови своею священные олтари веры народов славянских от осквернения сохраньше, Имя Христово прославившии. Мы же ныне, бурею расколов тлетворных терзаемые, зовем к вам прилежно: Радуйтеся, Христа возлюбившии — с Ним за мир заклавшиися; Радуйтеся, Христу спогребшиися, смерти жало славно поправшии. Радуйтеся, теплотою Божественной любви души наша согревающии; Радуйтеся, в скорбех и болезнех терпению Христову нас научающии. Радуйтеся, стада Христова пастыри вернии; Радуйтеся, молитвенницы за народ наш неутомимые. Радуйтеся, обуреваемым тихое пристанище; Радуйтеся, заблудших благостные наставницы. Радуйтеся, священномученицы Онуфрие, Александре и Константине, со всеми новомученики земли нашея. КОНДАК 5 Богосветлая светила, Духом святым возженная, воспламени Господь сердца новомучеников земли Слободския, да упасут и избавят боголюбивые народы наша от вражды с Богом и попрания святых заповедей Его, их же дух злобы поднебесной низвергнути на сие тщашеся. Бурею безбожия испытуемые, овы многовидная мучения восприяша, а инии обезглавлении быша, да неумолкнет песнь Богови в земле нашей: Аллилуиа. ИКОС 5 Видевше гонители злочестивые, яко твердо упование ваше на Господа и любовь к Нему, злобою распехахуся, страдания люта измышляху, мняху всячески: гладом и мразом и изнуреньми каторжными веру вашу попрати, посмеяние диаволу явити, святии крестоносители Онуфрие, Александре и Константине и вси исповедницы земли Слободския, вы же, новыя весны прозябение Христово явистеся, вся козни бесовския поправши, о сем приносим вам таковая: Радуйтеся, трем отрокам в Вавилоне верою благонравнии; Радуйтеся, Даниилу в рове львином в мужестве преславнии. Радуйтеся, Церкви Христовой славнии поборницы; Радуйтеся, православного вероучения неисчерпаемые источницы. Радуйтеся, славу мира сего, яко суетную призревшии: Радуйтеся, блага временныя нивочтоже вменившии. Радуйтеся, к Богу велие дерзновение имущии; Радуйтеся, пламенной любовию к Богу присно горящии. Радуйтеся, священномученицы Онуфрие, Александре и Константине, со всеми новомученики земли нашея. КОНДАК 6 Проповедание медоточных уст твоих, яко же мука и елей в Сарепте Сидонской, никогдаже истощашеся, ниже заграждашеся, преславне исповедниче Христов Онуфрие. Видим бо тя благовествующа на воле и в заточениих: Одесском, Харьковском и Старо-Оскольском, Курском, Кудымкарском, Тюменьском и Тобольском, и впоследствии в Хабаровском крае, идеже в пламене стрел огненных, со многими соузники предал еси душу твою, вопиюще Богу: Аллилуиа. ИКОС 6. Возсияша подвиги ваша, снятии новомученицы Христовы, в созвездии тысящ исповедников Святой Руси, кровию своею омывших грехи, не токмо отцев и праотцев наших, но и грядущих по них, страданьми своими жало греховное сокрушающе, во еже освятити землю нашу в дом Божий — жилище Духа Святаго. Сему преславному подвигу удивляющеся, вопием немолчно: Радуйтеся, Константине, Иннокентие, Варсонофие и Киприане; Радуйтеся, Иннокентие, Николае, Петре и Иоанне. Радуйтеся, Сергие, Антоние, Иоанне и Иларионе; Радуйтеся, Владимире, Николае, Викторе и Симеоне. Радуйтеся, Дионисие, Иакове, Паисие, Гаврииле и Спиридоне; Радуйтеся, Николае, Андрее, Филиппе и Иоанне. Радуйтеся, страданьми своими волю Божию сильным мира сего благовестившии; Радуйтеся, верой пламенной, силу безбожия охладившии. Радуйтеся, священномученицы Онуфрие, Александре и Константине, со всеми новомученики земли нашея. КОНДАК 7 Ходатай пред Богом преизряден явился еси, священномучениче Онуфрие, аще и сам в каторжных нуждах пребывая, обаче, егда соузников твоих на смерть ведоша и сии тайно ввергоша ти прошение молитися за них, долу поверглся еси, со слезами многими взывая: Господи, помяни убиенных соузников моих во Царствии Твоем, рыданьми вопия Богу: Аллилуиа. ИКОС 7. Новые и немеркнущие светильницы явистеся, многострадальни страстотерпцы Христовы, по всей земле нашей, в лесах непроходных и рудех подземельных, гладом и хладом томимы, в поте кровавом изнуряемы суще. Но идеже умножашася страдания ваша, тамо преизобиловаша чада Христовы, из злодеев и убийц кающихся. Тако бо от беззакония к повиновению Божиему многих приведосте, о сем восхваляем вас сицевыми похвалы: Радуйтеся, лесорубы, козни вражии стенающии; Радуйтеся, дровосеки, всякую лесть бесовскую пресекающии. Радуйтеся, в подземелии светом Христовым сияющии; Радуйтеся, зачерствелую совесть к покаянию побуждающии. Радуйтеся, алчущих правды питателие; Радуйтеся, нищих духом утешителие. Радуйтеся, нераскаянных грешников ко Христу приведшии; Радуйтеся, с ними же в Царствие Небесное вшедшии. Радуйтеся, священномученицы Онуфрие, Александре и Константине, со всеми новомученики земли нашея. КОНДАК 8 Странно бе видети тя нага и обнаженна, и во гноищи поверженна суще, священномучениче Александре, верным чадам твоим, в темнице стражу державших, идеже в истязаниих лютех житие твое скончал еси, всеблаженне. Но и отрада велия бе их, егда в гноищи нощью тело твое извезоша, облекоша, и во псалмех и песнех, со слезами многими погребоша тя благочестно, вопиюще Богу: Аллилуиа. ИКОС 8 Весь мир ужасом многим содрогашеся слышаше, киими истязаньми и мученьми изнуряемы бысте, достославнии новомученицы Христовы, егда в морях севера дальнего, в водах хлада лютого потопляху вы, веры же вашея охладити не можаху, якоже сорока мучеников в Севастии иногда. В сем стоянии адамантовом за веру православную видяще вас, умиляемся сердцем и сокрушаемся душою, зовуще: Радуйтеся, исповедницы новые и преславнии; Радуйтеся, кораблицы веры непотопляемии. Радуйтеся, молитвенницы о нас пред Богом теплейшии; Радуйтеся, в скорбех грядущих на нас, помощницы вернейшии. Радуйтеся, во бранех со диаволом терпению нас научающии; Радуйтеся, в стоянии за веру православную нас укрепляющии. Радуйтеся, богомудрых умов услаждение; Радуйтеся, боголюбивых душ увеселение. Радуйтеся, священномученицы Онуфрие, Александре и Константине, со всеми новомученики земли нашея. КОНДАК 9 Вся, елика имаше: дом, имение, славу и жизнь твою отдай, аще истяжут от тебе, рекл еси, всеблаженне Онуфрие, веры святыя православныя, яко же бисера драгоценнаго, не отрекайся, аще и в пещь огненную ввержен будеши, ибо в ней наше вечное пребывание в Бозе нашем, чрез Отрока и Христа Его. Тако проповедуя и тако славно на смерть пошел еси, бисер веры храня, поя Трисвятую песнь Богу: Аллилуиа. ИКОС 9 Витии избраннии явистеся, достославнии страстотерпцы, всяку лесть бесовскую заграждающе и посрамляюще, ею же дух злобы поднебесныя мняше народы наша на путь нечестия совратити: овых ересьми и расколы, овых же всякаго нечестия насадителями, да хулится Имя Трисвятыя Троицы. Вы же, крест Христов вземши, нечестия сего силу, яко непотребную, ученьми вашими попрасте, верным путь ко Христу просветили есте. О сем, в вере отцев наших спасаемые, поем вам таковая: Радуйтеся, огонь и воду славно прошедшии; Радуйтеся, веру свою печатию крови утвердившии. Радуйтеся, Христа возлюбившии, к Нему прилепистеся; Радуйтеся, погубившии временное, вечное обретшии. Радуйтеся, вдов и сирот усерднии попечителие; Радуйтеся, гонимых за веру православную от бед избавители. Радуйтеся, дольняго мира мудрейшии узницы; Радуйтеся, мира горняго вернейшии союзницы. Радуйтеся, священномученицы Онуфрие, Александре и Константине, со всеми новомученики земли нашея. КОНДАК 10 Спасти хотя многия, попусти Господь беды велия на народы наша, да якоже кукиль от пшеницы злыя изымет и сожжет, верныя же, яко пшеницу соберет в житницы Своя и прославит их, яко верных рабов Своих. Мы же волю Божию приемлюща, терпению и злостраданию их научимся, егда к испытаниям призовет нас Господь, да ублажая подвиги их, поем неложно песнь Богу: Аллилуиа. ИКОС 10 Стена тверда и крепкое ограждение явистеся, многострадальнии исповедницы, к вам прибегающим и молитвеннаго предстательства вашего просящих, в новых испытаниих веры сущих. Вы же, славно вся сия препобедившии и торжество Церкви Христовой принесшии, помогите и нам немощным нечестия силу новую посрамити и победителями злонравия явитися, да ублажаем вас сицевыми похвалы: Радуйтеся, врагом веры Христовой необоримая преграда; Радуйтеся, храмов Божиих от разорителей несокрушимая оградо. Радуйтеся, омраченных зловерием, светом веры Христовой просвещающии; Радуйтеся, лжемудрием объюродевших к покаянию наставляющии. Радуйтеся, учителие кротости и воздержания; Радуйтеся, столпы непоколебимии Святаго Православия. Радуйтеся, от сетей вражиих верныя избавляющии; Радуйтеся, ходити в заповедях Божиих нас научающии. Радуйтеся, священномученицы Онуфрие, Александре и Константине, со всеми новомученики земли нашея. КОНДАК 11 Пение еже приносим вам, несть довольно к похвалению преславных подвигов и трудов ваших, достоблаженнии Онуфрие, Константине и Александре, и все новомученицы земли Слободския. Обаче, ведуще доброе намерение и любовь нашу к вам, внемлите мольбам нашим и избавите нас и народ наш православный от прелести еретического зловерия и языческого злонравия, да утреннююще, чистым сердцем приносим песнь Христу Богу: Аллилуиа. ИКОС 11 Светом Божественной любви объят был еси, Онуфрие досточудне, егда призывал еси соузников своих кающихся, радоватися, понеже благодать Божия изобильно пребывает со всеми очистившими совесть свою покаянием сердечным, яко чрез страдания временная, готовится верным радость вечная, юже уготова Бог любящим Его. Ублажая сея радости тайну велию, молим вас прилежно, страдальцы преславнии: в унынии и скорбех мнозех утешьте нас немощных, да спасаемы, зовем вам немолчно: Радуйтеся, Духа Святаго священное жилище; Радуйтеся, благодати Христовой славное вместилище. Радуйтеся, яко орли к Солнцу Правды воспарившии; Радуйтеся, к Свету Невечернему из юдоли плача возвысившиися. Радуйтеся, Царствия Небеснаго наследницы; Радуйтеся, вечныя славы сопричастницы. Радуйтеся, в селениях праведных упокоение обретшии; Радуйтеся, у Престола Божия присно пребывающии. Радуйтеся, священномученицы Онуфрие, Александре и Константине, со всеми новомученики земли нашей. КОНДАК 12 Благодать Божия изобильно излияся на вы, священномученицы Онуфрие, Александре и Константине, со многими страстотерпцы земли нашея, егда пресечена бысть земная жизнь ваша во угождение лжебратий, предавших вас, юже за Христа благочестно положили есте. Благодати сея силою укрепите и нас немощных, да вашими молитвами, всякия козни вражия препобеждая, вопием Всеблагому Богу нашему: Аллилуиа. ИКОС 12 Поюще многострадальная подвиги ваша и пламенную любовь яже ко Господу, священнострадальцы Онуфрие, Александре и Константине, и все новомученицы славно Христу сораспявшиися и от земных в небесная венценосно водворившиися, идеже Ангелом сликовствующе, нас немощных, напастьми испытуемых, поминайте прилежно. Мы же, надежду велию на вас имуще, волю Божию, яко всеблагую приемлем и скорбьми утешающеся, зовем вам таковая: Радуйтеся, венценосные крестоносители; Радуйтеся, тайн Божиих премудрии строители. Радуйтеся, всяких добродетелей пресветлое зерцало; Радуйтеся, Церкви Святыя непреодолимыя забрала. Радуйтеся, церковная светила, от Трисолнечного Света возженная; Радуйтеся, крины благовонии райского прозябения. Радуйтеся, выну в молитвах Богу предстоящии; Радуйтеся, непрестанно за мир Христу молящиися. Радуйтеся, вся прекрасная в душе вашей Богу принесшии; Радуйтеся, всей силой любви сердец ваших Бога возлюбившии. Радуйтеся, священномученицы Онуфрие, Александре и Константине, со всеми новомученики земли нашея. КОНДАК 13 О многострадальные и всехвальные страстотерпцы Христовы, священномученицы Онуфрие, Александре и Константине, Варсонофие и Киприане, и все святии земли Слободския, славно сораспеншиися за Церковь Святую Православную и кровьми своими в небеснех со Христом священнодействовати сподобльшиися. Нынешнее наше моление приемше, от всех бед, скорбей и напастей нас избавите, наипаче же Церковь Святую, юже до крови возлюбисте, расколы и тлетворными ересьми снедаемую, миром оградите, да купно с вами вопием победную песнь Богу: Аллилуиа. Сей кондак глаголи трижды. И паки чтется 1-й икос: Архангельские силы: и паки кондак 1-й: Избранным носителем: МОЛИТВА СВЯТЫМ СВЯЩЕННОМУЧЕНИКОМ ОНУФРИЮ, АЛЕКСАНДРУ И КОНСТАНТИНУ СО НОВОМУЧЕНИКИ ЗЕМЛИ СЛОБОДСКИЯ, ЗА ИМЯ БОЖИЕ И ЦЕРКОВЬ ПРАВОСЛАВНУЮ ПОСТРАДАВШИМ О многострадальне священномучениче и верный исповедниче Христов Онуфрие! Имея веру адамантову и любовь серафимскую ко Господу, и ревность ко Храму Божию Давидову, попечение же Павлово о благостоянии Церкви Христовой, вся беды и скорби, гонение и поношение, и узы темничнии всеусерднейше понесл еси, всеблаженне. Ныне же, со всеми страстотерпцы земли Слободския, славно пострадавших и веру православную соблюдших, принеси молитву сердечную за нас ко всех Владыце, якоже иногда за соузников своих темничных молился еси, егда за Имя Божие и веру святую православную истребляху их, да милосердствуя, оградит Господь Свою Святую Церковь и нас от злобы и лукавства сынов беззаконных, жаждущих крови нашея, от них же сам гоним был еси и лютую смерть претерпел преславно. Сии бо духом ада предводимы, храмы святыя и алтари их разоряюще и Имя Божие хуляще, овы же ересьми и расколы, иные клеветою и лжепрорицаниями, и чудесе ложными, насаждая пагубныя сборища свои, яко же волки хищнии, устремишася чад Церкви Православныя поглотити и погубити. Сего ради молим вас прилежно, святителие Христовы Онуфрие, Александре и Константине, священнодействовавших пред Лицем Божиим кровию своею и добродетельми новомучеников земли нашея возвеличившими Пресвятое Имя Его, молитися, да не погубит нас Господь грех ради наших и не предаст души наша в руки ангелов лютых. Да не поядет огонь юноши наша и девы не неосетованы будут, священницы же наша да не падут от меча лютаго, и вдовицы не оплаканы явятся, нас же в поношение и посрамление вечного пленения да не предаст Господь. Вы же, предстателие наша теплейшии, помяните нашу немощь, укрепите нас в любве вашей ко Господу и в мужественном стоянии, даже до крове за святую веру православную, и умолите Владыку мира, даровати нам и грядущим по нас мир и благоденствие, благорастворение воздухов и умножение плодов земных; от глада, труса, огня и междоусобныя брани, от всяких бед и напастей нас избавити, да непостыдно совершим хождение наше пред Лицем Божиим. Церкве же Святей, Православней благостояние и утверждение да дарует Господь, народу нашему и правителем его мудрость, согласие и страх Божий, союзом любви Христовой утверждаемый, нам же единомыслие веры, во еже утвердитися в любви и согласии, исполняюще волю Божию и его святые заповеди с благоговением и отрадою. Да тако прославляется в делах наших Имя Божие от рода в род и во веки. Аминь! Конец, и Богу слава!