Месяца Иулия 29 (13 Августа н.ст) Октобрия 5 (18 н.ст) ИЖЕ ВО СВЯТЫХ ОТЦА НАШЕГО ВАСИЛИЯ, ЕПИСКОПА КИНЕШЕМСКОГО, ИСПОВЕДНИКА Вечер tc "Вечер" Блажен муж: 1-й антифон. На Господи воззвах стихиры на 8, глас 1: Благочестия поборника теплейшего, писаний изъяснителя вдохновеннаго, исповедника же паче адаманта твердейша и любве Божественныя таинника известна, приидите людие, Василия премудрого восхвалим песньми, яко молитвенника крепка о душах наших. Приидите монашествующих собори, образ восприимите житейских отложения, приидите пастырие Христовы, любве Божественней поучитеся, приидите Писаний рачителие, словес послушайте живаго богослышания, всех ныне учреждает святитель Василий, земли Костромския украшение изрядное. Приидите во искушениих изнемогшии, приидите лестьми века сего омраченнии, ко святителю Василию исповеднику новому, припадем усердием вопиюще: даруй нам образ любве твоея совершенныя, еже ко Господу рачения теплаго, и о ближняго истинной пользе тщание, и духовное во всех преспеяние. глас 4: tc "глас 4\:" Истины водружение, Православия утверждение, Царства земнаго разрушения зрителю, никакоже Царствию Божию внутрь тебе бывшаго поколебатися дал еси, Царству тезоимените, сего ради тя ублажаем, исповедниче Христов адаманте Василие. Апостолов преемника, страдальцев единонравна, аще и зрел еси Церковь безбожными терзаему, никакоже дал еси Ризе Христовей растерзаеме быти, но сохранил ся еси в твердей вере, образ дав твоим учеником, бдя и моляся о чадех твоих, к нимже и нас сопричти, всехвальне Василие. Святителей удобрение и новомучеников красоту, о земли Российстей молебника велика, сошедшеся днесь, о празднолюбцы, песенными похвалами воспоем глаголюще: радуйся, чудный пастырю Василие, властителей тьмы не убоявыйся, но со ангелы ныне пребываяй, оттуду же лучами нам облистаяй, славне. Слава, глас 6: tc "Слава, глас 6\: " Днесь лжесловие яко паучина растерзается, днесь истины свидетельство красуется светло, днесь Церковь первородных паки ликовствует памятию исповедника новаго, вернии утешение в напастех обретаем, лжи же оправдателие студом покрываются, яко Престолу Небесному светло предстоит святитель Василий, и молится о душах наших. И ныне, глас тойже: tc "И ныне, глас тойже\:" Догмат, глас 6, Кто Тебе не ублажит: Вход. Прокимен дне. И чтения. Премудрости Соломони чтение. tc "Премудрости Соломони чтение." Праведных души в руце Божией, и не прикоснется их мука. Непщевани быша во очесех безумных умрети, и вменися озлобление исход их: и еже от нас шествие сокрушение, они же суть в мире. Ибо пред лицем человеческим, аще и муку приимут, упование их безсмертия исполнено, и вмале наказани бывше, великими благодетельствовани будут, яко Бог искуси я, и обрете их достойны себе. Яко злато в горниле искуси их, и яко всеплодие жертвенное прият я. И во время посещения их, возсияют, и яко искры по стеблию потекут. Судят языком, и обладают людьми, и воцарится Господь в них во веки. Надеющиеся Нань, разумеют истину, и вернии в любве пребудут Ему, яко благодать и милость в преподобных Его, и посещение во избранных Его. Премудрости Соломони чтение. tc "Премудрости Соломони чтение." Праведницы во веки живут, и в Господе мзда их, и попечение их у Вышняго: сего ради приимут царствие благолепия, и венец доброты от руки Господни, зане десницею покрыет я, и мышцею защитит их. Приимет всеоружие рвение свое, и вооружит тварь в месть врагом. Облечется в броня правды, и возложит шлем, суд нелицемерен. Приимет щит непобедимый, преподобие. Поострит же напрасный гнев, во оружие: споборет же с ним мир на безумныя. Пойдут праволучныя стрелы молниины, и яко от благокругла лука облаков, на намерение полетят. И от каменометныя ярости, исполнь падут грады, вознегодует на них вода морская: реки же потопят я нагло. Сопротив станет им дух силы, и яко вихорь развеет их, и опустошит всю землю беззаконие, и злодейство превратит престолы сильных. Слышите убо, царие, и уразумейте: навыкните, судии концев земли. Внушите держащии множества, и гордящиися о народех языков: яко дана есть от Господа держава вам, и сила от Вышняго. Премудрости Соломони чтение. tc "Премудрости Соломони чтение." Праведник аще постигнет скончатися, в покои будет: осудит же праведник умираяй, живущие нечестивыя. Узрят бо кончину праведного, и не разумеют, что совещаша о нем: яко повержет Господь нечестивыя безгласны ниц, и поколеблет их от оснований, и до последнего исчезнут в болезни, и память их погибнет. Приидут бо в помышление согрешений своих ужасни, и обличит их сопротив беззакония их. Тогда станет в дерзновении мнозе праведник пред лицем оскорбивших его, и отметающих труды его. Видевше же его смятутся страхом многим, и ужаснутся о преславном спасении его. Рекут бо в себе кающеся, и в тесноте духа воздохнут, и рекут: сей бе, егоже имехом некогда в посмех, и в притчу поношения безумнии. Житие его вменихом неистово, и кончину его безчестну. Како вменися в сынех Божиих, и во святых жребий его есть; убо заблудихом от пути истиннаго, и правды свет не облиста нам, и солнце не возсия нам. Беззаконных исполнихомся стезь и погибели, и ходихом стези непроходны, пути же Господня не разумехом. На стиховне: стихиры, глас 8: tc "На стиховне\: стихиры, глас 8\:" Светильниче Василие, еще отрок сый от потопления чувственнаго, десницею Божиею спасенный, в сем узревый образ, спасения от многомятежнаго моря житейскаго, сердцем же чистым от юности, мудрость века сего презревый, по отцу тезоименит преображению бывый, образ преображения Евангелием Христовым, в житии твоем показавый, славу являя святыя веры и твердость ея, якоже можаху человецы вместити, сего ради почитаем тя. Честна пред Господем смерть преподобных Его. Святителю предобрый, аще и мирския отступль мятежныя молвы, но паству твою до конца возлюбивый, неленостно поучая людие в законе Господни, пешеходяще апостольски, в молитвах теплых предстоя со слезами, чтуще Страстем Христовым акафистное пение часто, и тем, блаже, урепляемь, положил душу свою за овцы твоя, от нихже инии оставиша тя, друзии же предаша врагом, инии же в сердце слагаше словеса уст твоих, сего ради молимся, моли спастися всем нам. Блажен муж бояйся Господа, в заповедех его восхощет зело. Земле Русская, кровми новомученик удобренная, радуйся, яко стяжала еси предстателя теплаго, града Кинешмы всеславное украшение, церкве Вознесения, увы, поруганныя, славо; блажен еси, исповедниче непобедиме, Василие, на земле не искавый пребывающаго града, но грядущаго взыскавый, сего ради святителю Кириллу сопричтенный, и край зырянский просветивый скорбми, не остави нас, восхваляющих тя. Слава, глас 5: tc "Слава, глас 5\: " Аще и руганием и ранами искусиша тя, иже лжи отца служителие усерднии, но ничтоже на тя возмогоша, святче Василие, Богу от соблазна греховного тя покрывающу, темже и ныне поприще скончавше страдания, о нас молися непрестанно, пути уклонитися широкаго, на теснем же пути не поползнутися, но в радости невозбранно достигнути, идеже ныне пред Господем ликуеши. И ныне: по гласу Тропарь, глас 4. tc "Тропарь, глас 4." Днесь колена расслаблена укрепляются, изнемогшия руце на молитву простираются, очеса умилением орошаются, слухи же псалмы и песньми оглашаются, се бо к нам во славе приходит Христов свидетель верный, Василий Царственный и Всеблаженный, лжи и злобы победитель, Златоустов подражатель и веры ревнитель, темже образ подает верным спасения, и молится о иже верою и любовию чтущих память его. Слава, и ныне, Богородичен. На утрени: На Бог Господь, Тропарь святаго, Слава, и ныне Богородичен. По 1 стихослогии седален: tc "По 1 стихослогии седален\:" Реками веры, исповедания прелести угасил еси злославие, во еже не мнити со адом завет заключити, славне, молитвою и словом люди исцеляя, чудотворением и любовию просвещая концы, сего ради венча тя Христос, отче небошественне Василие. Слава, и ныне: Небесную дверь и кивот, и пресвятую гору, светлый Облак воспоим, купину неопалиму и словесный рай, греха прародительскаго избавление и земли Русския Державную Заступницу. По 2 стихослогии седален: tc "По 2 стихослогии седален\:" Возсияв якоже светило великое, якоже крин райский процвел еси, небоявленне Василие, аще и всеми оставлен был еси, обаче Христос прият тя, и ничтоже тя разлучи от Его любве, сего ради молися, да и мы причастницы явимся Царствия Его. Слава: И ныне: В напасти многоплетенныя впадохом, Владычице, бурею одержими безчисленных грехов, темже притекаем Твоей благости: просвети нас Светом Сына Твоего, и не остави нас, Благая, безпомощны. Величание святительское Псалом избранный: Услышите сия вся языцы: По полиелеи седален, глас 4: tc "По полиелеи седален, глас 4\:" Божественным Духом просвщен, проповедал еси пред безбожными Православия светлость со дерзновением, всеблаженне Василие, приснопамятне, и мучителей тем посрамил еси, гонения же от чуждих и присных претерпевая, темже моли Жизнодавца, о еже дароватися твердости и прощению грехов, верою кланяющихся раце мощей твоих. Слава: И ныне: tc "Слава\: И ныне\:" Кийждо идеже спасается, тамо праведно и притекает, кое же прибежище обрящем паче Тебе, или кую надежду взыщем в напастех, Безневестная Пречистая Марие. Степенна, 1 антифон, Прокимен, глас 4: Честна пред Господем смерть преподобных Его. Стих: Что воздам Господеви о всех, яже воздаде ми. Евангелие от Луки, зач. 64, по 50 псалме: глас 6; Святителю Василие исповедниче Христов, во всю страну Российскую, изыде твердости твоея сияние, темже возрыдаше лукавое собрание беззаконнующих, людие же Христовы колена укрепиша, руце на молитву подвигнуша, и образ смиреномудрия и любве твоея зряще, припадают ти прилежно: помолися усерднейше, о чтущих память твою верно. Канон, глас 2, егоже краестрочие разумно чтется. tc "Канон, глас 2, егоже краестрочие разумно чтется." Песнь 1. Ирмос: Грядите, людие. tc "Песнь 1. Ирмос\: Грядите, людие." Радостию соберитеся мучениколюбцы вси, в памяти святителя Василия новаго исповедника торжествуем светло, врага поправшаго, веру соблюдшаго и ко Христу многи приведшаго. Евангельским словесем измладенства навык и благодатиею Божиею покрываем, семя жизни нетленныя в души твоей возрастил еси, последи же сеятель добрый на ниве Христове быв, Вышняго благим устроением. Шествие твое ко Иерусалиму горнему от младенства предуведено бысть, яко славное и добропобедное, ты же воле Господней повинуяся, тщанием всемерным благословение Сего утвердил еси. Богородичен: Едина в женах благословенная, моли, Богородице Дево, Егоже родила еси от чистых кровей Твоих спасти благочестно поющия Тя. Песнь 3. Ирмос: Утверди нас в Тебе, Господи. tc "Песнь 3. Ирмос\: Утверди нас в Тебе, Господи." Милость богатую на тебе Господь показа, егда внят молитве твоей от потопления воднаго спасе тя, ты же, отче, обет исполняя, от мирскаго погружения душу изъяти потщался еси. Слова Божия проповедника неустанна почитаем тя, отче, и сказателя Писаний изрядна, како люди притекшия в вере наставляеши и ко скорбям находящим за имя Христово преславно уготовляеши. Богородичен: Кую Ти похвалу достойную от нечистых устен принесу, о Владычице, точию, якоже осужденник предстоя пред Тобою вопию умиленно: милостива буди ми и спаси мя, Едина Благословенная. Седален, гл.4. tc "Седален, гл.4." Веры правыя утверждение и смирения образ, дарований духовных сокровище и словес Божественных цевницу немолчно восхвалим ныне Василия Кинешемскую похвалу, к немуже притекающе вопием умиленною душею: исправление даруй нам, малодушным и от пропасти погибели возстави унывающия ны, да стопам твоим последующе терпеливно, улучим грехов оставление. Слава: И ныне: В напасти многоплетенныя впад, погубих талант, вверенный мне от Господа, сего ради молю Тя, Пречистая, не попусти конечне погибнути верою и любовию чтущия Тя. Песнь 4. Ирмос: Услышах, Господи, славное Твое смотрение. tc "Песнь 4. Ирмос\: Услышах, Господи, славное Твое смотрение." Иерейства саном почтився и епископскую харизму прияв, на служение Церкви гонимыя приходиши, отче, яко добрый пастырь, оградити овчарню Христову от волков лютых. Монашеского подвига образ явил еси, отче Василие, в келлии тесней всенощно моляся, днем же в храме Дары Священныя Господеви принося и люди твоя наставляя, яко пастырь изрядный. Богоборцы лукавии запяти тя помышляху, якоже саддукее древле со иродианы Христа искушающе, твое же утверждено слово пребысть, козни злоначальника до конца низлагающе. Богородичен: Рабски ныне припадаю Ти, Богомати, оставления просяще злых моих всех, что же воздам Ти, не вем, за яже даров Твоих насладихся, точию песнь древлеангельскую сердцем сокрушенным воспеваю Ти: радуйся, Благодатная. Песнь 5. Ирмос: Света Подателю и веков Творче, Господи. tc "Песнь 5. Ирмос\: Света Подателю и веков Творче, Господи." Агнца Божия нас ради распятаго всенощным славословием воспевал еси, кийждо пяток неседальное пение приносяще, темже и сам себе непорочное заколение Тому уготовляеши, и верныя в крестном подвиге укрепляеши. Твоему, Василие, дару ведения духовнаго, како вернии не дивимся, вражии бо козни прозреваеши и судьбы Господни истинныя верным сказуеши, всех же ко спасению душ наставляюще. Исцелений благаго подателя и молитвенника о недужных дерзновенна вернии тя обретоша, отче Василие, тем же дар сей еще в жизни временней стяжавый, источи ныне богатно чтущим любовию память твою. Богородичен: Ярости суднаго дне трепещу аз окаянный, благодатию Сына Твоего ущедрен сый, заповеди же Его Божественныя презрех и верен Тому не пребых, но молю Тя, Владычице, в день страшный последний изми мя огня негасимого. Песнь 6. Ирмос: В бездне греховней валяяся. tc "Песнь 6. Ирмос\: В бездне греховней валяяся." Мутные лести потоки и наваждений бесовских множества словом твердым твоим воспятил еси и молитвою твоею в конец изсушил еси, верные же от обольщения злаго премудро покрыл еси. Утверждение веры крепкое и бесовския лжи обличителя тя светло почитаем, отче Василие, прилоги бо враг невидимых зряще и служителей их земных посрамляеши. Богородичен: Твоему еже о нас промышлению како не дивимся, Владычице, гнев бо праведно на ны движимый утоляеши, темже и от смерти напрасныя покрый нас и даруй нам прежде конца покаяние. Кондак, гл.3 tc "Кондак, гл.3" Мужество твое, святителю Христов Василие, возславим, и чистоту веры превозносим и дару словес твоих удивляемся, яко от небес приял еси Божественную благодать наставляти и защищати стадо Христово. Икос: Мудрование плотское отринув, все упование твое в небесных заключив, Церковь Христову спасти посрамлением не мечтал еси, и под чуждое ярмо не преклонился еси, темже в мире лукавом сем душу целу соблюл еси, двоедушные же посрамил еси и ныне молим тя, отче Василие, пастырем нашим ревность святую по Бозе испроси, во еже наставляти и защищати стадо Христово. Песнь 7. Ирмос: Образу златому на поле Деире служиму. tc "Песнь 7. Ирмос\: Образу златому на поле Деире служиму." Егда добродетельми иноческими преславно украсился еси, егда стадо твое ко страданию за веру предуготовал еси, тогда повелением Зиждителевым сам к Голгофе твоей преславно восходиши, победным шествием верныя назидая, поющия: препетый отцев Господь и Бог благословен еси. Широких путей уклонився, врагом Христовым не поклонився, ниже сорадоватися тем глаголал еси, радость бо и утешение на Небесех имуще, скорби и изгнания и заточения подъял еси, вопия: препетый отцев Господи и Боже, благословен еси. Евангельскому словеси последуя до конца себе отвергся, крест Господень на рамо взем, сего ради и разумение Писания истинное приял еси от Владыки, талант тебе вверившаго и за делание верное паки приложившаго. Богородичен: Не послужиша богоборцем нечестивым все множество новых страдальцев Российских, ниже злым делом их благоволиша, упованием бо на Тя, Владычице, препоясашеся, Ты же и нас от всякия напасти покрый и от искушения лютаго избави. Песнь 8. Ирмос: В пещь огненную ко отроком. tc "Песнь 8. Ирмос\: В пещь огненную ко отроком." Иудиным не прельстився соблазном, правду Христову до конца возлюбив, лести безбожник лютых ни на иоту же уступил еси, и от братий, во истине не устоявших, уклонился еси, Единаго Господа поя во вся веки. Единожды ко лжи благоволившия восхождение не удобь обретают, аще и многими слезами покаяния взыщут, ты же и в малом и в великом пребыл еси, верен, отче Василие, темже и ныне со ангелы Господа превозносим во вся веки. Богородичен: Быша слезы наша нам хлеб день и нощь, о Благая Владычице, яко путь праведный и заповеди Сына Твоего презрехом и врагу Его плещи своя дахом, темже и в Вавилоне новем плененнии, како песнь Господеви воспоем во исповедании правом? Песнь 9. Ирмос: Безначальна Родителя. tc "Песнь 9. ИрмосБезначальна Родителя." Воистину всяк язык изнеможет болезни твоя и узы и изгнания воспети, о святителю Василие, кая бо темница не име тя узника, ты же крепчае всех сопротивных пребыл еси, Господу преславно покрывающу тя. Аще и оставиша тя вся присные твоя, волею же и неволею отлучаеми, но Помощника и Покровителя твоего благодатию покровен, неотлучен от Того пребыл еси, Емуже и ныне на небесех предстоиши во славе. Еже ко Господу отшествия твоего час ощутив, исходное пение просил еси пети, сам же конец сего совершив, душу твою добльственную ангелом светло предстоящим предаеши, яко сокровище многоценное и брани невидимыя корысть благую. Богородичен: Твоих щедрот потоку обильному присно радуемся и хвалу воздаем, Богородице, аще и заграждаем и грехами своими, но Сама исправления нрава злаго даруй нам, о Благая. Светилен: tc "Светилен\: " Возсия яко заря пресветлая память твоя, о святителю Евангельского слова, светильник ногам нашим показующая и к невечернему свету верныя вся возводящая. Слава: И ныне: Аще и поругани быша храми Твои, Владычице, и вменишася яко овощная хранилища и места непотребная, обаче десница Господня наказа хульники и гонителие, людие же Божии святии, предреченное праведными мужи зряще, восхвалиша Бога творящаго великая и дивная на земли. На хвалитех, глас 6. tc "На хвалитех, глас 6." О, Святителю Христов Василие, по имени твоему и житие твое, первее бо над страстьми воцарився, царь и епископ сердца своего был еси, душу бо и тело Царю царей непорочно представил еси, последи же долготерпением страдальческим всесожжение тучно себе самого привел еси, темже и ныне с Ним царствуеши, моли о душах наших. О, пречудне Святителю Василие, ты яко лев дерзновенно во истине ходил еси, упованием неколебимым и мучителей возношение студом покрыл еси, воистину царственное священство твое показав, Кротчайшаго Иисуса воевода изрядный, моли о душах наших. О, премудре Святителю Василие, по имени твоему и подвиги твоя, в правду бо яко в багряницу оболкся, лжи порфиру яко смрадныя рубы показал еси и яко плетение паучиное расторг, Царю Царей непорочно хваление приносиши, моли о душах наших. Слава: глас 8: tc "Слава\: глас 8\:" Врата адова Церкве Христовы не одолеют, аще бо и лепота храмов ея отымется, аще и оскудеют на земли Христовы воины, аще и иссякнет любы многих, аще и избраннии прельщени будут, аще и пророчества умолкнут, аще и истиннныя знамения Божественныя престанут, аще и лжехристы во множестве приидут, претерпевшие же до конца спасени будут, зане любы Твоя Господи николиже отпадают, и в Небесныя чертоги верным не заграждается восход, темже и к Тебе припадаем, Многомилостиве, со Святителем Василием, и новыми страстотерпцы Российскими сопричти и нас, зде молящихся Ти. И ныне: Владычице, приими молитвы раб Тових, и избави нас от всякия нужды и печали. Славословие, и отпуст, и час 1-й На Литургии tc "На Литургии" Блаженны на 8 от 3 и 6 песней канона. Прокимен, глас 4: Святым, иже суть на земли Его, удиви Господь вся хотения Своя в них. Стих: Предзрех Господа предо мною, яко одесную мене есть. Апостол к Коринфяном, зач. 153. Аллилуиа, глас 2: Сященницы Твои облекутся в правду, и преподобнии Твои возрадуются. Евангелие от Матфеа, зач. 34. Причастен: Радуйтеся праведнии о Господе, правым подобает похвала. МОЛИТВА СВЯТИТЕЛЮ ВАСИЛИЮ КИНЕШЕМСКОМУ, ИСПОВЕДНИКУ О пречудне отче Василие, святителю Христов, истины поборниче, пастырю добрый словесных овец, подвигом добрым подвизавыйся, дерзновенно гонителей веры правыя обличивый и никакоже делом христоборцев соблаговоливый! Праведен сый, яко лев уповая ходил еси, и на Господа надежду возложив, во век не постыделся еси. Вемы, яко воистину правда твоя от смерти тя избави: се бо на земли старости маститы достигнув, христианские кончины мирныя и славныя сподобился еси, и от вечные смерти избавлься, на небесех победою венчался еси. Вемы, святителю Христов, яко мудрование плотское посрамив, и пути живота вечнаго показав, ныне молишися о нас, любовию память твою почитающих и путем твоим последовати произволяющих, да не прельстимся и мы соблазном благ тленных, от лукавых миродержителейтнам обещаемых, да не приобщимся делом врагов Христовых, да некогда тьму светом, а свет тьмою нарекше, тьмою кромешною навеки покрыемся. Ей, молим тя, святителю, предстани нам в час искушения, и глас совести христианския да возгремит в сердцах наших, непщевания же лукавая да умолкнут. И подаждь нам твоими молитвами внимания и трезвения дар многоценный, во еже на всяк час исход из жизни сей помышляти и ко ответу благому пред Судиею Неумытным уготоватися, да неосужденно сподобимся купно с тобою и со всеми Новомученики Российскими воспевати Всесвятое Имя Отца и Сына и Святаго Духа во веки веков. Аминь.