Служба преподобномученикам Казанским: Сергию, Лаврентию, Серафиму, Феодосию, Леонтию, Стефану, Георгию, Иллариону, Иоанну и Сергию, в Свято-Успенском Зилантовом монастыре пострадавшим http://kazan.eparhia.ru/bogoslugenie/slugbi/slyjbaprepmyckaz/ на малой вечерни На Господи воззвах: стихиры на 4, глас 1. Подобен: Небесных чинов: Приидите, празднолюбцы и постников сословие, / отложив житейская попечения / и оставив злых дел рачение, / воспоим дивная во обители Зилантовой / и прославим Бога, прославляемаго во святых своих. Мученика Иоанна в чиноначальники призывающе / восприимем песнь в похвалу новых мучеников / кротко убиение от безумных богоборцев претерпевших, / нам образ веры и мужества оставивших / и Богоматере обитель прославивших. Слава, глас 1: И ты, горо Зилантова, / ничим же меньши еси во обителех русских, / чад своих для Небесного Царствия возрастивши, / окрестныя народы светом Святыя Троицы просветивши, / всем притекающим духовное утешение подающи, / память православных воинов сохраняющи, / Имя Божие в тебе прославляется, / град же Казань тобою величается. И ныне, Богородичен, глас той же: Радуйся, Радосте праотцев, апостолов и мучеников веселие, и Покров нас, Дево, Твоих рабов. На стиховне стихиры, глас 2. Подобен: Доме Евфрафов: Пение наше, / по силе приносимое, / не презрите, святии мученицы, / но благодать испросите певцам вашим. Стих: Честна пред Господем, смерть преподобных Его. Свыше приясте крепость, / достохвальнии мученицы, / побеждати враг видимых и невидимых / и благодать ходатайствовати / почитющим вас любовию. Стих: Блажен муж, бояйся Господа в заповедех Его восхощет зело. Грешником безответным, / покаяние нам приличнее есть, / но любовию подвизаемии, / простираемся на богословие, / благодарение и славословие. Слава, и ныне, Богородичен, глас той же: Все упование мое на Тя возлагаю, Мати Божия, сохрани мя под кровом Твоим. на велицей вечерни Блажен муж: 1-ый антифон. На Господи воззвах: стихиры на 8, глас 6: О новии мученицы Зилантовы, / страх смертный мужески поправшии / и место покаяния своего до конца не оставившии; / добрый пастырь архимандрит Сергий, / с верною дружиною: / Лаврентием, Серафимом, Феодосием, / Леонтием, Стефаном, Георгием, / Илларионом, Иоанном и Сергием, / телеса свои на убиение за любовь Христову предавшии / и монашеския обеты своею кровию запечатлевшии; / испросите нам у Бога грехов оставление и велию милость. Причастившеся веельфегору русстии людие, / не услышаша гласа Господня, / к любви призывающаго. / И пролияша кровь неповинную, / кровь сынов своих и дщерей, / яже пожроша истуканным богоборчества и блуда; / праведно же наказуеми от Бога суровостию смуты, / ожесточишася непокоривии; / но молитвами святых новомучеников / испросим у Бога покаяние, мир и велию милость. Слава, глас 6 Нам, работником единонадесятого часа, / простоявшим день жизни своея на торжище мира сего праздными от дел Евангелия, / не понесшим тяготы искушений / и вара гонений и мучений, / благость Божия посла небесных молитвенников / и приставников виноградника Христова / святых мучеников Зилантовых, / молящихся непрестанно о своем отечестве земном, / да безумие оставивше приимем от Бога динарий / — мир и велию милость. И ныне, глас той же: Кто Тебе не ублажит: Вход. Прокимен дне. И чтения 3 из службы новомученикам и исповедникам Российским: Деяний святых апостол (глава 4) К Тимофею послания святаго апостола Павла (глава 4) Ко Евреям послания святаго апостола Павла (глава 11) На литии стихира самогласна, глас 4: Преславная днесь совершаются во обители Зилантовой: / дружина иноков десяточисленная / до конца понесше восприятый крест Христов, / в жертву чистую Господеви приносится. Слава, глас 1 (из малой вечерни): И ты обитель Зилантова: И ныне, глас той же, Богородичен: Се исполнися: На стиховне стихиры новомучеников, глас 2. Творение святителя Афанасия (Ковровского) Подобен: Доме Евфрафов: Земле Русская, / граде святый, / украшай свой дом / в немже Божественный / велий сонм святых прослави. Стих: Господи, Господь наш, / яко чудно Имя Твое по всей земли. Церковь Русская / красуйся и ликуй / се бо чада твоя / престолу Владычню / во славе предстоят, радующеся. Стих: Святым, иже суть на земли Его, / удиви Господь вся хотения Своя в них. Соборе святых русских / полче Божественный / молитеся ко Господу / о земном отечестве вашем / и о почитающих вас любовию. Слава, глас и подобен той же: Новый доме Евфрафов, / уделе избранный, / Русь святая / храни веру православную / в нейже тебе утверждение. И ныне, Богородичен, глас 8. Подобен: О преславнаго чудесе: О, преславного чудесе! / Небеси и земли Царица, / от святых сродников наших умоляемая, / до ныне землю Русскую покрывает / и лика Своего изображеннии милостивно обогащает. / О, Владычице державная! Не престани и на будущее время / во утверждение на Руси Православия, / милости и чудеса изливати до века. Аминь. Тропарь (общий), глас 1: Верныя ученицы Христа даже до смерти быша, / преподобномученицы Зилантовы приснопамятныя, / подвиги бо поста и кровию мучений / землю Русскую освятили есте. / Темже и мы, чада ваша, любовию вопием вам: / слава Давшему вам крепость, / слава Венчавшему вас, / слава Прославльшему вас с новомученики Российскими. на утрени На Бог Господь: тропарь преподобномучеников дважды. Слава, и ныне, Богородичен. По 1-ом стихословии седален, гл 4: Яко царское сокровищное хранилище, / хранит святая Зилантова гора / многоценныя мощи новых мучеников, / ихже память светло празднуем. Слава, и ныне, Богородичен: Святая Гора, / от Неяже Камень нерукосечный Христос отсечеся, / Матерь Божия, храни Зилантову гору, / на нейже обитель Твоя устроися, / благомощными Своими к Богу молитвами. По 2-ом стихословии седален, глас 3 Преподобнии новомученицы Зилантовы, / молите милостиваго Бога / о почитающих святая страдания ваша / и совершающих вашу память светло. Слава, и ныне, Богородичен: Не остави, Пречистая Дево, / обитель Зилантову, / Твоему Успению посвященную. Псалом избранный: Бог нам прибежище и сила, Помощник в скорбех обретших ны зело. Сего ради не убоимся, внегда смущается земля. Боже, кто уподобится Тебе, да не премолчиши, ниже укротиши, Боже. Яко се врази Твои возшумеша, и ненавидящии Тя воздвигоша главу. На люди Твоя лукавноваша волею и совещаша на святыя Твоя. Слава, и ныне: Аллилуиа (трижды) По полиелее седален, глас 6: Творение святителя Афанасия Ковровскаго Мужайся, Христова церковь, и державствуй над всуе борющими, Христовы бо друзи о тебе пекутся, и предстояще, и обстояще, ихже общий праздник ныне совершаем светло. Слава, и ныне, Богородичен: Мученику Иоанну в подвизе споспешествовавшую / и новомучеников Зилантовых на враги укрепившую / Матерь Божию, / просим и нам с небесе подати / помощь и укрепление. Степенна, 1-ый антифон 4 гласа. Прокимен, глас 4: Проидохом сквозе огнь и воду, / и извел еси ны в покой. Стих: Разжегл ны еси, якоже разжижается сребро. Евангелие от Матфеа, зачало 36. По 50-м псалме стихира, глас 6: Преподобнии новомученицы Зилантовы, / поты проливше трудов постнических, / украсистеся и пролитием крове своея, / свидетельствовавшее о Христе даже до смерти. / Ныне же дерзновение имуще ко Святей Троице, / молите о душах наших. Ирмосы канона умилительнаго ко Господу нашему Иисусу Христу, глас 2: Во глубине постла: Песнь 1 Новый Моисей архимандрит Сергий явися, немокренно провед дружину Христову чрез пучину мучения в Небесное Царствие. Соглядавше умы вашими землю обтования с радостью труды постническия понесли есте, и убиение претерпели есте, не на скорби бо взирасте, но на Жениха Христа возлюбленнаго. Утверждашеся завет Ветхий кроплением крови козлей и телчей, вы же обещание Богу утвердисте своею кровию. Богородичен: Всю жизнь мою в лености издив, ужасаюся о теплохладных изречения; темже к Твоему притекаю, Пречистая, заступлению. Песнь 3 Кротких и смиренных иноков Зилантовых Господь прослави, преоруженное же безбожное воинство посрами. Силен Бог святых Своих избавляти, обаче благоволи всему миру явити мужество и доблесть новомучеников. Священством украшеннии архимандрит Сергий с Лаврентием и Серафимом, первее безкровную Жертву Подвигоположнику приношаху, ныне же яко жертву сами себя священнодействуют. Богородичен: Всему миру спасения виновная, и мене грешнаго спаси, Пречистая Дево. Седален: Сугубо просиявшии преподобием и мученичеством, всехвальный архимандрит Сергий с верною братиею: Лавренитем, Серафимом, Феодосием, Леонтием, Стефаном, Георгием, Илларионом, Иоанном и Сергием, молите Святую Троицу, благодать низпослати совершающим вашу память светло. Слава, и ныне, Богородичен: Афонскую гору уделом Своим избравшая, Мати Дево, и Зилантовой горе буди Игумения и Хранительница. Песнь 4 От святыя горы, покровом Божией Матери приосенненыя, миру воссияли новомученицы, пети нас подвизающе: «Слава силе Твоей, Господи». Назирают с небесе святии мученицы на подражающих им самоотверженною верою и братскою любовию, скорую помощь подающе своими молитвами. Добрый пастырь показался еси, отче Сергие, стадо свое привед Пастыреначальнику. Богородичен: Тебе многажды явлением Своим землю русскую спасавшую, Пречистая Дево, молим: буди нам покров непреоборимый от врага хотящаго пожрети ны раздорами и суетою. Песнь 5 Возсияйте свет разума, всехвальнии новомученицы, утренюющим к вам и совершающим вашу память верно. Твердым помыслом и упованием на Бога противостали есте врагом видимым и невидимым, прехвальнии. Людие русстии смутою безбожною помрачении и на единоплеменники злобою воскипевшии, иноков беззаконии убийцы явишася, Каину братоубийце уподобившеся; вы же мученицы святии, образ смирения Христова восприявшии, будете нам наставницы веры непоколебимыя. Богородичен: Сердце мое мраком омраченное просвети, Пречистая, святыми Твоими молитвами. Песнь 6 Не возможе буря душетленная поколебати произволения иноков богомудрых, любовию ко Христу пламенеющих, и жизнь свою в Нем полагающих. Посреди всеобщего смятения и страха ум к Богу, славнии мученицы, утвердисте. Яко гора, неподвижими в добром исповедании, пребысте святии мученицы. Богородичен: Крестом Сына Твоего, Мати Дево, из глубины греха изведи мя. Кондак, глас 5: От Бога избрани есте, достохвальнии преподобномученицы, / заступати и утешати на горе Зилантовой подвизающихся о Господе, / всю землю Казанскую ограждати от врагов видимых и невидимых, / и спасати на всяком месте к вам прибегающих. Икос Радоватися повеле апостол Петр приобщившимся страстем Христовым, и мы, зряще страдания ваша и небесной славе вашей ужасающеся, зовем таковая: радуйтеся, обители Зилантовы украшение, радуйтеся, земли Казанския ограждение, радуйтеся, куплю добрую совершившии, радуйтеся, излиянием кровей ваших, Христа стяжавшии, радуйтеся, богоборцев посрамление, радуйтеся, Святыя Троицы прославление. Песнь 7 Убиение от беззаконных человек приемлюще Христу взывасте, преподобнии мученицы, благословен еси в храме славы Твоея, Господи. Христу Подвигоположнику, любовь вашу приемлющу, в Новем Иерусалиме ныне воспеваете: благословен еси в храме славы Твоея, Господи. На Зилантовой горе, кровию вашею освященной, монаси и мирстии, священницы и простии взывают: благословен еси в храме славы Твоея, Господи. Богородичен: Ничтоже благо сотворихом во дни жизни нашея, но заступи ны, Пречистая Дево, внегда звати к Сыну Твоему: благословен еси в храме славы Твоея, Господи. Песнь 8 Верою, послушанием и любовию изящно соединени, единеми усты мученицы пояху: благословите, вся дела Господня, Господа. Страданьми просветившеся и светлее солнца чувственнаго сияюще, ныне со ангелы вкупе преподобнии новомученицы вопиют: благословите, вся дела Господня, Господа. В день страдания вашего гора Зилантова, кровию мученическою удобренная, ликует с человеки и взывает: благословите, вся дела Господня, Господа. Богородчен: Пречистая Дево, безумство злоумышляющих на Церковь Божию посрами, верных же, поющих Тя, возвесели. Песнь 9 Не возмогает язык достойно восхвалити ваш подвиг, святии мученицы, но сами умудрите ны, на сие простирающихся. Ин суд Божий, и ин человеческий. Скорый и неправый вас на смерть осуждает, небесный же и божественный почестями победными венчает. Блажени правды ради пострадавшии мученицы. Тогда общницы явишася страстей Христовых, ныне же приобщаетеся божественных светлостей, обожаеми. Богородичен: Пресвятая Троице, Боже отец наших, молитвами Богородицы помилуй и спаси нас. Светилен, глас 8. В памяти святых новомученик Зилантовых Бог прославляется и Казанская земля просвещается. (Дважды) Слава, и ныне, Богородичен: Светом Лица Твоего, Господи, просвети нас, молитвами Богородицы, и спаси нас. На хвалитех стихиры, глас 8. Подобен: О преславнаго чудесе: О, преславнаго чудесе! / Сродницы наши / и сограждане земного отечества нашего, / посреде сынов Божиих предстоят престолу Владычню / песнь нову воспевающе; / славословят Творца всяческих, / и молятся о почитающих их любовию. Ины стихиры, из службы новомученикам и исповедникам Российским, глас тойже: Веры бронями / и щитом благодати / и креста копием вооружившеся / сопротивным силам непобедими бысте / и, яко божественнии храборницы / демонская ополчения победивше / со ангелы ликуете / верныя же заступаете и освящаете, / и спасаете, призываемии. О, преславнаго чудесе! / Чудес светлостьми / солнца светлейше / присно святии сродницы наши / светят концем русския земли, / от невечерняго света облистаеми / ихже сиянии / облацы от страны нашея отгоняются варварстии / и демоны побеждаются. Слава, глас 6: Новоявленные звезды днесь / на церковной показавшеся тверди, / во мнозех местех бывши мученицы тверди, / во мнозех местех бывшии мученицы Христовы, / ихже ублажающе, мучениколюбцы / по долгу им прирцем, глаголюще: / радуйтеся благочестия утверждение и нечестия обуздание: / радуйтеся, российския церкве славо и безбожных посрамление: / радуйтеся, образи терпения и за Христа страдания. / Станите, непобедимии, посреде нас умне, / от бед и искушений избавляюще, / и молитеся о спасении душ наших. И ныне, Богородичен, глас той же: Богородице, Ты еси лоза: на литургии Прокимен, апостол, евангелие, причастен из службы новомучеников. Прокимен, глас 7: Бог нам прибежище и сила. Стих: Помощник в скорбех, обретших ны зело. Апостол к Римляном (зачало 99) Евангелие от Луки (зачало 105 и 106) Причастен: Радуйтеся, праведнии, о Господе, правым подобает похвала. Молитва О непреоборимии воини Христовы, добропобеднии мученицы, преподобнии отцы наши: Сергие, Лаврентие, Серафиме, Феодосие, Леонтие, Стефане, Георгие, Илларионе, Иоанне и Сергие! Взирающее на веру вашу и на доброе скончание жизни временныя, молимся. Испросите нам у Господа с любовию вашу память чтущим, исправления жития, в вере утверждение и мужество в брани на ны воздвизаемой духами злобы поднебесныя. Сохраните ны вашими молитвами в мире и любви, да единомыслием исповемы Отца и Сына и Святаго Духа, аминь! PAGE PAGE 1