Служба сщмч. Сергию (Мечеву)
месяца декабря в 24 день
На велицей вечерни
На Господи воззвах: стихиры предпразнства и святаго, глас 1.
Подобен: Всехвальнии мученицы:
Прехвальнии новомученицы / и исповедницы Российстии,/ вас бо не потопила
ни вода безверия,/ ни буря ярости беззакония,/ ни ветры ересей
церковных,/ но Духом Святым просвещеннии,/ яко жертвы непорочныя Царю
Славы принесостеся./ Емуже молитеся о душах наших.
Сергие священномучениче,/ в лике новомученик прославленный,/ гласом
немолчным паству наставлял еси,/ от волков хищных и наемник лукавых
защищал еси,/ душу твою полагая за овцы, / яко пастырю добрый./ И ныне
молися Христу,/ даровати душам нашим / мир и велию милость.
Всехвальне Сергие новомучениче,/ за чистоту души твоея,/ увенча тя
Владыка венцем славы вечныя,/ прияв твоя страдания и смерть,/ яко жертву
всесовершенну./ Темже и во светлостех небесных / ныне ликовствуеши,/
Христу молящеся,/ о спасении тя призывающих.
Слава, глас 4:
Отрасли святии благочестиваго рода,/ Дарами Святаго Духа преизобильно
украшеннии,/ служителие Христовы Алексие и Сергие,/ на ниве Господней
потрудистеся,/ плод сторицею во ученицех принесли есте./ Старче Алексие,
утешителю и чудотворче,/ ты бо молитвою недуги душевныя и телесныя
исцелял еси;/ и Сергие, исповедниче,/ богодухновенными бо ты возгреме
глаголы сораспятися призывая Христу,/ и яве образ тебе самаго
предлагая./ Различна дарования, но Дух един./ Водительством вашим чаем
спасительных обителей достигнути.
И ныне предпразднства:
Паремии:
Тако глаголет Господь:
Праведных души в руце Божией:
Праведницы во веки живут:
На литии стихиры, глас 1:
Сергия священномученика,/ приидите вернии вси почтим,/ пеньми и песньми
духовными,/ сей бо мужеством препоясася,/ исповедник был еси крепок;/ и
мучения венец светел восприим благодатию,/ Христа прославил еси.
Цвете прекрасный, Сергие богомудре,/ егда старец Алексий паству тебе
препоручи,/ во ограде церковной тую соблюл еси,/ храмы душевныя чад
созидая;/ егда же время приспе, душу твою, за овцы положи,/ яко пастырю
добрый и исповедник, кровь твою честную за Христа излиял еси;/ темже от
Вседержителевы руки подвигов почесть прият,/ украсися неувядаемаго цвета
сиянием.
Слава: глас 5:
В небесный вшед Чертог багряницею украшен,/ и Троице с велием сонмом
новомучеников и исповедников ныне предстоиши,/ Сергие многострадальне,/
мы же днесь, память твою светоносную совершающе,/ прославльшаго тя
Господа величаем.
И ныне, предпразднства.
На стиховне, глас 4, подобен: Яко добля:
Исповедник и священномученик явился еси,/ Сергие славне,/ во изгнании и
темнице паству твою наставлял еси,/ и мучением сияя, ангелом уподобился
еси./ Тем тя чтим и любовию празднуем / светоносную память твою.
Стих: Праведник яко финикс процветет, яко кедр, иже в Ливане, умножится.
Православныя веры ревнителю,/ богословия догматов и святоотеческаго
учения проповедниче и исполнителю,/ и Божественныя службы пламенный
служителю,/ плоды трудов твоих Христу принесл еси,/ Емуже и до смерти
последовал еси./ Егоже ныне зриши / в сиянии славы вечныя,/
священномучениче Сергие.
Стих: Насаждени в дому Господни, во дворех Бога нашего процветут.
Не скорбети, но радоватися повеле чадом твоим,/ Сергие блаженне,/ егда
призва тя Господь последовати Ему страданием;/ аще гоним и истязуем
бе,/ всего себе в руце Владычни предаде,/ телесныя раны превозможе /
силою вседетельною Духа.
Слава, глас 6:
Кровию обагрив твою священну одежду,/ вшел еси во святая святых,/ свят
ты быв, Сергие славне,/ мужественно страдания и смерть за Христа приял
еси,/ лесть и неистовство богоборческое поправше, врага победил еси;/
темже тя молим:/ укрепи молитвами твоими души наша.
И ныне, предпразднства:
Тропарь, глас 4:
От корене праведнаго прозябл еси,/ православия наставниче и ревнителю,/
пред Богом во узах и до смерти предстоя,/ гласом немолчным паству
наставлял еси,/ священномучениче Сергие,/ моли Христа Бога / спастися
душам нашим.
На утрени
По 1-м стихословии седален:
Отвергнувся себе, ярем делания пастырскаго мужественно подъял еси, не
убоявся прещения власти богоборческия, чадолюбиве отче и исповедниче
Христов; ни гонения бо, ни темница не возможе отлучити тя от служения
сего.
Слава и ныне предпразднства.
По 2-м стихословии седален:
О благолепии храма и Божественныя службы благоговейнаго совершения
ревнуя, иконописанию и пению помощниче благославный явился еси, Сергие
достохвальне, к познанию неизреченныя сладости жизни вечныя возводя
послушная чада твоя.
Слава и ныне предпразднства.
По полиелеи седален:
Светло торжествующе празднуем память твою, отче Сергие священномучениче,
и верою исполняемся, яко не оставляеши паствы твоея своим попечением;
предстояще незримо со старцем Алексием и святыми покровители храма сего,
моление сие приемлеши, предстательствуя о спасении поющих тя.
Слава и ныне Предпразднства.
Прокимен, глас 4: Восхвалятся преподобнии во славе, и возрадуются на
ложах своих.
Стих: Воспойте Господеви песнь нову, хваление Его в церкви преподобных.
Всякое дыхание: Евангелие от Луки, зачало 67.
по 50 псалме стихира, глас 4:
Сосуд священ Духа Святаго ты был еси,/ от корене праведнаго плод
совершен,/ Сергие священномучениче,/ чада твоя любовию Христовою
возлюби,/ за тех душу свою положи, взывая:/ Господи, ихже дал еси мне,
сохрани,/ да не погибнут.
Канон предпразднства и святаго, глас 2:
Песнь 1
Ирмос: Грядите людие:
Престолу ныне предстоя Христову, яко иерей и мученик преславный, Сергие
всечестне, приими молитвы наша с любовию тебе возсылаемыя.
Плод благославен древа праведнаго прозябл еси, избранниче Божий, от
источника святости отеческия питаемь, подвигом исповедническим достойно
трапезе райския принеслся еси.
Дар Богу, всеблаженне, тебе самаго принесл еси, житием многотрудным и
честным страданием, священномучениче.
Богородичен: Бога без семени рождшая, паче ума человеча, Дево Пречистая
и Мати; Егоже моли помиловати поющих Тя.
Песнь 3
Ирмос: Утверди нас в Тебе Господи:
Миром помазания духовнаго украшен, Сергие славне, добре священствовал
еси, жезлом веры отгоняя ересей ловитвы, сохрани стадо словесное от
волков губящих е.
Нощь отгнал еси суетства, богоглаголиве отче, блистании премудраго
проповедания, и верных мысли просветил еси.
Возносимую презрел еси зиму безбожия, возлюби учения святых отец
догматы, теплотою Божественнаго Духа невредимо сердца чад твоих соблюл
еси.
Богородичен: Утверждение буди и прибежище, и покров Дево Пречистая,
верою к Тебе прибегающим, и любовию воспевающих Рождшагося из Тебе.
Седален:
В незлобии Христу подражавый, истязания и раны от татей кротко претерпе,
Саровскаго чудотворца гласом моляся за обидящих тя, Сергие
многострадальне.
Слава и ныне, предпразднства.
Песнь 4
Ирмос: Услышах, Господи, славное Твое смотрение:
Паству твою премудро наставляя, богословия поборник явился еси,
священнодейственне путеводящь добродетельных, Сергие, деяний.
Тайны горняго мира чрез участие в богослужении познавати учил еси,
богомудре отче, прилеплятися же всем сердцем небесным покровителем
нашим, приуготовитися вечности.
Утеснил еси нечестие, святче, пространством истиннаго благочестия, и
пути в сие ведущия, показал еси, спасая души, потопляемыя прелести
богоборчества водами.
Богородичен: Просвети, Пречистая, омраченную душу мою светом Твоим, яже
Свет рождшая Един Ипостасный.
Песнь 5
Ирмос: Света Подателю:
На Древе Простершемуся волею подобяся, Егоже милосердию подражая,
Евангельски молил еси: Отче Благий, ихже дал еси мне, сохрани, да
никтоже от них погибе.
Смиряяся оскорбляемь, темницы и изгнания горечь претерпел еси, темже
блаженную улучил еси, многострадальне, славу и светлость.
Душа твоя крепкая козни вражеская низложи, мрак неверия и лукавствия
разгнася твердейшею верою твоею, Сергие всехвальне, священномучеников
похвало.
Богородичен: Иже образ Ипостаси Отчи, из Тебе прият смешение
Богородительнице, и истлевший образ прослави, и сего нова сотвори.
Песнь 6
Ирмос: В бездне греховней:
Падшаго естества возношение, Духом укрепляемь, поправ, мужественно
облеклся еси багряницею нетления, Сергие священномучениче: темже
прославляемь ангели и человеки.
Кровию страдания, блаженне, освятил еси землю, духом же на Небеса
возшед, присовокупися гласу святых новомучеников, воспевающих Святую
Троицу.
Молитва святыя души твоея прията бысть, яко кадило, отче: в воню
благоухания духовнаго, Возсиявшаго от Девы исповедуя.
Богородичен: Вземлющаго грехи всего мира, Христа заченши, Пречистая, не
престай просящи грехов прощения воспевающим Тя.
Кондак, глас 8
Великою любовию к тайне богослужения прилежал еси,/ паству свою призывая
последовати житию святых отцев / и познавати писания их своими деяньми;/
за Христа страдания во узах и смерть приял еси;/ темже взываем ти:
Радуйся Сергие священномучениче.
Икос
Восприемниче быв отеческих трудов, к высшему подвигу мученичества
устремися, Сергие преславне, яко всесожжение Божественное и жива жертва
принеслся еси Спасу всех. Темже вопием ти: Радуйся, исповедническаго
подвига сияние прославивый; радуйся, священнический крест во дни гонений
на Церковь избравый. Радуйся, Христа распинаемаго паче жизни временныя
возлюбивый; радуйся, темницу, страдания и смерть за Него претерпевый.
Радуйся, паству Христову, вверенную тебе, от расхищения соблюдый;
радуйся, и во изгнании сирых чад твоих не оставивый, пламенною молитвою
от звероуловления тех огради. Радуйся, пророчествие старческое о тебе
исполнивый; радуйся, собору новопрославленных святых Русских причтенный.
Радуйся, Сергие, пастырю богомудрый и священномучениче.
Песнь 7
Ирмос: Образу златому:
Не поклонився, страстоносче, делом рук беззаконных, претерпе поношения,
и заточение, и раны, чистоту веры Православныя непоколебимо исповедал
еси.
Святых жития не токмо умом познавати учил еси, житием бо твоим и деяньми
тех подвиги проповедуя, Божественным разумом души пасомых просвети.
Глагол твоих вещание и святоотеческих преданий сила обтече,
богодухновенне отче, землю Русскую, иссохшую от зноя гонений и нечестия,
напаяя сию Божественною благодатию.
Богородичен: Радосте скорбящих и отчаянных, Ты еси Мати Преблагая, Спаса
рождшая рода нашего.
Песнь 8
Ирмос: В пещь огненную:
Ни темница, ни ярость мучителей, ни страдания, ни даже смерть не
возмогли разлучити тебе от любве Божией, тою укрепляяся, воспевал еси:
благословен Бог отец наших.
Возмогл еси Божиею вседетельною силою богоборческия прелести вселукавое
мудрование, страстотерпче, победити, и венец нетленный от всех Владыки
прияти, поя: благословен Бог отец наших.
Воистину блажен ты, Сергие многострадальне, ибо сподобился еси
соделаться общником страстей Христовых, себе самаго в дар Зиждителю
принося, вопиял еси: благословен Бог отец наших.
Богородичен: Столп крепости тверд, и степень, и Хранительницу, и
Заступницу стяжавше Тя верою поюще: благословен Бог отец наших.
Песнь 9
Ирмос: От Бога Бога Слова:
Возвышен явился еси страдании честными, приял еси венцы победы,
священномучениче, и ныне в лике новомученик и исповедник Российских
предстояще Божественному Престолу, радуешися вечною радостию.
Наставниче и молитвениче наш, отче Сергие, с родителем твоим, старцем
Алексием и новомученики прииди, стани с нами; днесь бо праздуем честную
память твою.
Верою просящия тя спасай от всякия беды, Сергие блаженне, во Отечествии
Небеснем пребываеши присно, яко мученик непобедим.
Богородичен: Ты Едина Богу всяческая мудростию создавшему, Мати
позналася еси Неискусобрачная, Дево Пречистая. Темже Тя ангели и
человецы песньми величают.
Светилен:
Одежды твоя, Сергие досточудне, кровию обагришася, страданием светло
просветися лик твой, темже Христос венцем мученическим увенча тя.
Слава и ныне, предпразднства.
На хвалитех, глас 4, подобен: Дал еси знамение:
Отче всемудре Сергие,/ сквозе бурю безумнаго неистовства / к тихому
пристанищу таинств церковных / всепобеждающею Божественною силою /
Христово стадо, вверенное ти,/ направил еси./ Темже воспевающе, молим
тя:/ помози и нам не погибнути / во страстей пучине.
Благодать духовная,/ Сергие преблаженне,/ в тебе возсиявши,/ светло
просвети тя;/ егда готовишася мучения за Христа / и церковь Его святую
прияти,/ тогда Божественную литургию / четыредесятодневную исправи,/
приуготовляя ся ко заколению.
Кто изглаголет страдания твоя,/ егда виде Церковь Святую попираему,/
чада же ея расхищаемии,/ тогда яко светильник Божественный и подражателю
святых, / на крове проповеда,/ еже слыша в сердце Духом глаголему;/
страдальческое избрал еси житие,/ священства одежду обагрив кровию,/
мучениче непобедиме Сергие.
Слава, глас 6:
Срадуйтеся нам ангельские чины и святии вси,/ днесь бо празднуем память
священномученика Сергия,/ кровию Царствия вечнаго достигшаго,/ веруем,
яко духом вкупе с нами пребывая,/ моление сие приимет и Христу
принесет,/ ходатайствуя о спасении нашем.
И ныне, предпразднства.
На Литургии
Прокимен, глас 7: Восхвалятся преподобнии во славе и возрадуются на
ложах своих. Стих: Воспойте Господеви песнь нову, хваление его в церкви
преподобных. Апостол ко евреем, зачало 334. Аллилуиа, глас 2: Священницы
Твои облекутся в правду, и преподобнии Твои возрадуются. Евангелие от
Луки, зачало 67. Причастен: В память вечную:
PAGE 6