Служба Святого и Преподобного отца нашего Иоанна Кронштадтского Творение священномученика Андрея, архиепископа Уфимского (†1937) Вечер, Блажен муж. На Господи воззвах: стихиры, глас 1-й. Отче Иоанне преблаженне, всех святых подражатель был еси: святую веру патриархов стяжав, пророков и апостолов ревность, святителей же преподобие и богомыслие, исповедников дерзновение, безсребреников безмездную помощь, преподобных подвижников непрестанную молитву, сего ради святую твою память светлую празднуем. Преподобие отче Иоанне, глас Евангелия Господня послушав и богатство и славу, яко прах, вменив, ближних твоих, яко отец истинный возлюбил еси, нищия и убогия питавый, всем же непрестанно вопия: возлюбите Господа и обрящете жизнь вечную, ничто же предпочтите паче любве Его, да егда приидет во славе, обрящете радость со святыми, с ними же и нас поминай, молитвенниче наш неусыпный. Отче наш Иоанне богомудре, страхом утвердився Божиим, начало премудрости разумел еси, паки же страх любовию изгнал еси, яко страх муку имать, якоже апостол любве научил есть нас, любовию же Христу сраспявся, свойственнейший Ему быв; темже отче наш, верных украшал еси разумы и Бога любити стадо твое научил еси. Христа Бога моли даровати и нам благодать сию и велию милость. Господь сила сердца моего, Господь мой свет ума моего, Господь покой мой и радость моя, моя вера, надежда и любовь, сей есть пища моя и питие мое, одежда моя и покров. Вразуми убо и нас, отче святый, сия словеса твоя разумети и во Господе полагати спасение наше, подаждь и нам духа твоего, якоже Илия Елисею, да будет во Господе надежда наша, все упование наше. Слава, глас 8-й. Жива будет душа моя, Господи, и восхвалит Тя, сице глагола Давид пророк. Такожде и ты, святе, от стражи утренния до нощи пел еси. Научи убо и нас, заблудшее твое стадо, познати тя, пастыря доброго, и вслед гласа твоего ходити и непрестанно купно с тобою взывати: пою Богу моему, дондеже есмь. И ныне: предпразднеству или Богородичен. Чтения 3 из Притчей, из общей Минеи. Стихиры на литии — храму: на Слава глас 1-й. Молящеся Духом Святым молимся, сего ради вся молитвы церковныя дыхание Духа Святаго суть и вси христиане рождение Его есми. Прииди убо и вселися в ны, Душе Святый, помилуй и созижди вся ны, да будем вси едино Тело Христово. Такова бысть непрестанная молитва твоя, предивный Иоанне отче наш, и послуша тя Бог и помаза тя елеем радости вечныя. И ныне: предпразднеству или Богородичен. На стиховны, стихиры гл. 4-й. От пелен Господу присвоился еси, издетска смысл мужа совершенна стяжав и премудрости Божией возжелев весь Божия обитель был еси, отче наш Иоанне благодатне. Стих: Честна пред Господом смерть преподобных Его. Умом благодатию освященным святей Троице предстоя, блаженне Иоанне отче наш, небесными зарями сущия во тме греховней просвещал еси, освети и нас светом твоего боговедения. Стих: Блажен муж, бояйся Господа, в заповедех Его восхощет зело. Непостижимый свет ночи в тебе, преподобне отче, и свещу пресветлу постави тя Господь среди тьмы греховныя. Темже и мы тобою научени благодатную память твою поем, Иоанне. Слава, глас 6-й Союзом любви апостолы Твоя связавый, Господи, и отца нашего Иоанна, яко новаго благовестника любве Твоея поставивый, утверди и ныне, Спасителю наш, союз любве церковныя, да совокуплени поем Тя и неизреченную Твою благость. И ныне — предпразднеству или Богородичен. Тропарь, глас 8-й: Любовию Христовою уязвися, преподобне Иоанне, многи чада церковныя, яко отец ко Христу привел еси, сего ради память твою совершающее, Спасово утешение приемлем и благодать Его исповедует. На утрени, по 1-м стихословии седален, глас 4-й. Не презрел еси, отче Иоанне, ни странна, ни пришельца, но всем был еси благ и милости глубина, сирот отец и вдовам защита, нагих одеяние и алчущих пища. Помяни и нас, убогих чад твоих, и не отрини от благодатныя любви твоея. Слава и ныне, предпразднеству или Богородичен. По 2-м стихословии — седален, глас 5-й: Божественною силою укрепляем, победил еси невидимых врагов искушения и к свету невечернему приближился еси. Уврачуй и душ наших страсти и светом твоим облистай ны, яко врач и утешитель всем от Бога дан еси, Иоанне отче наш. Слава и ныне, предпразднеству или Богородичен. Седален по полиелеи, глас 8-й: Слова Божия пламенный служителю, Иоанне 6огодухновенне, ты вместилище веры Христовой был еси, сего ради Господь, якоже нового Авраама отца многих постави тя. Моли убо, отче святый, всем нам, чадом Божиим быти и душам нашим спастися. Слава и ныне, предпразднеству или Богородичен. По 50-м псалме — самогласен, глас 6-й. Преподобне отче Иоанне, во всю землю изыде вещание управлений твоих: тем па небесех обрел еси мзду трудов твоих, демонские погубил еси полки и ангельския достигл еси чины, ихже житию без порока и поревновал еси, дерзновение имея ко Христу Богу, мир испроси душам нашим. КАНОН Святаго, глас 4-й — По Уставу, его же краестрочие: Моя жизнь во Христе, Ему же пою во вся веки. Песнь 1-я. Ирмос: Моря Чермнаго пучину немокренными стопами древле шествовал Израиль крестообразно Моисеовыма рукама Амаликову силу в пустыни победил есть. Моя чувствования в Тебе утверди, Спасителю мой, да возмогу достойне воспети молитвы и подвиги Тя возлюбльшаго и Тобою возлюбленнаго служителя Твоего, отца нашего Иоанна. От юности первозванному апостолу последуя и Его светосиянным Крестом озарився, неведения мглы избегл еси, Христу хвалебную песнь воспевая блаженне. Якоже Илия колесницею огненною, тако и ты колесницею добродетелей на небо взошел еси. Отнюду же ниспослати и нам жития исправление Господа умоли. Богородичен: Жезл прорасте, Дево, от корене Иессеова, цветоносяй всеблаженный плод спасения верою воспевающим Тя. Песнь 3-я. Ирмос: Веселится о Тебе Церковь Твоя, Христе, зовущи, Ты ми крепость, Господи, и прибежище и утверждение. И нравом причастник, и житием подражатель апостолом быв, богодухновенне, слово истины до конца исправил еси. Зрительно царства небесного душевное око твое, яко чисто, имея жизнь твою святе управил еси, отче предивный, сего ради о Бозе тя прославляем. Не трудящийся да не яст, сию апостольскую истину всей братии твоей вещал еси и дом трудолюбия нищим и болящим воздвигл еси, да ся питают трудами рук своих, аще и немощны суть. Богородичен: Вся свет еси, Владычице, вся святыня, вся благость, вся — премудрость, вся можеши, яко Мати всемогущего, Едина и Та же всесовершенная, яко Мати всесовершеннаго Царя славы. Песнь 4-я. Ирмос: Воздвижена Тя видевши Церковь па Кресте солнца праведнаго ста в чину своем, достойно взывающи, слава силе Твоей, Господи. Основание твердо — Христа имея, вторый Авраам был еси, приемля от всех стран приходящия к тебе, и тех ко Господу приводил еси, и теми угодная Богу творил еси. Храм Богу сердце твое хотяй устроити, в дому Божием непрестанно служити возжелел еси и тамо небесныя доброты зрел еси. Росою подвигов твоих вся страсти телесныя угасив, возжегл еси просвещение безстрастия и сын вечнаго дне был еси, отче блаженне. Богородичен: И нам подаждь, Владычице, чистоту сердечную, сыновнюю доверчивость и любовь, яже к Тебе, — всегда, и ныне, и присно, и во веки. Песнь 5-я. Ирмос: Ты, Господи, ми свет, в мир пришел еси, Свет святый, обращаяй из мрачна неведения воспевающия Тя. Сподобился еси вышних дарований, отче, Господу твоему непрестанно служа и апостольские труды присно подражая. Тленныя твоея плоти сладострастие умертвив, душу нетленную благочестием оживил еси, и сию дом Духа Божественна сотворил еси. Евангелие Христово всем усердно проповедуя, трапезы Господней причастник повседневный был еси, сам себе и паству твою, яко жертву живу, и святу Богови устрояя. Богородичен: Едина от Троицы родила еси Пречистая, милосердия ради на земли явльшагося во двою естеству, Егоже непрестанно моли спасти души наша. Песнь 6-я. Ирмос: Пожру ти со гласом хваления, Господи, Церковь вопиет Ти, от бесовския крове очистившися милостию от ребр истекшею Ти кровию. Маслина плодовита в дому Господа твоего был еси, Иоанне богоявление, яко ведение божественное Господь дарова ти и в делании аностольстем укрепи тя. Уди тела Христова есте вы, тако со апостолом проповедал еси и Христа единаго любити учил еси, да вси едино будут. Житие твое свято, слово твое, богомудре, благодати Божией исполнено, сердце твое молитвы благодатныя сосуд бысть, сего ради верою и любовию тя почитаем. Богородичен: Единая благая Владычице, яви владычество твое на нас, избавляющи нас от всякия скверны лукавых помышлений, от всяких бед и зол и козней демонских, яко благая Мати Божия. Кондак, глас 3-й. Божественныя веры проповеданием и любве Евангельския исполнением Церковь Христова тя отца нарече, преподобне Иоанне, и яко истинный отец чадом всем, и ныне зовеши со апостолом: приидите, обретохом желаемаго. Песнь 7-я. Ирмос: В пещи персидстей авраамстии отроци любовию благоверия паче, нежели пламенем опаляемы взываху: благословен еси в Церкви славы Твоея, Господи. Промыслом Божиим свет благочестия среди тьмы тяжкия безбожия и неверия ты явился еси, отче, вся призывая звати: благословен еси в Церкви славы Твоея, Господи. Образ Божий человек есть, ты же, отче Иоанне, и зерцало любве Божией пресветло был еси и дом Святыя Троицы, Юже и мы грешнии прославляем. Юже от Господа благодать приял еси недуги и страсти исцеляти человеком, да вси с тобою единомудренне поют: благословен еси, Господи Боже, во веки. Богородичен: Владычице, спаси род Твой, спаси единокровные Твоя. Спаси ны, Мати Живота и всего рода человеча, аще и недостойни есмы Тя Матерь себе нарещи, освяти, утверди и спаси нас молитвами Твоими. Песнь 8-я. Ирмос: Руце распростер Даниил львова зияния в рове затче огненную силу угасиша, добродетелию поясавшеся иже благочестия рачители отроци зовуще: благословите все дела Господня Господа. Очисти сердца и мысли наши молитвами твоими и, яко землю плодоносну покажи я, да добродетелию препоясавшеся, зовем: благословите вся дела Господня Господа. Венцем благодатных даров венчался еси, премудрость высшую почитая и присно зовый: благословите вся дела Господня Господа. Слава Тебе, всесвятый Животворящий Душе, от Отца исходяй и в Сыне присно почиваяй, слава Тебе, Сыне Божий, Святым Духом освещаяй, укрепляяй и умудряяй нас, слава Тебе, Отче, благоволяй о нас присно Духом Святым, нераздельная Троице Единице, — помилуй нас. Богородичен: Яже миру рождши спасение, еяже ради от земли на высоту взяти быхом, радуйся Благословенная, Покрове и Державо, Стено и Утверждение, поющим чистая: Господа воспевайте дела и превозносите Его во веки. Песнь 9-я. Ирмос: Камень нерукосечныя горы от несекомыя Тя, Дево, краеугольный отсечеся Христос, иже совокупив расстояшаяся естества, тем веселящеся Тя, Богородице, величаем. Воистину свет миру явился еси, добродетелию украшен и пастырь изряден православныя Церкве был еси, Христа прославляя, тем веселящеся тя, отче святый, ублажаем. Едино тело, Един Господь, едина вера, едино крещение, темже истинствующе в любви да возрастим в Него всяческая, иже есть глава Христос, яко же со апостолом преподобный отец наш заповеда. Князи людстии и царие воспеша тя и восхвалиша тя, ты же славу земную всю презрел еси и токмо с народом Божиим возжелал еси купно быти и прославляти Господа во веки. Богородичен: Иже во утробу всельшася Девыя и от Сея страшно и выше слова наздавша древнего Адама, Господа поем и славословим во веки. Светилен, глас 4-й. Первозванному ученику Христову подражав, пастырь добрый воистину был еси и плод мног верный Господу твоему привел еси и до последняго твоего издыхания взывал еси: моя жизнь во Христе есть. Слава и ныне предпразднеству или Богородичен. На хвалитех стихиры, глас 6-й. О, крепосте моя, Иисусе, Сыне Божий! О, свете ума моего и мире, и радосте сердца моего, слава Тебе, слава Тебе избавителю от невидимых враг моих; тако, отче наш, вопиял еси ко Господу Твоему, тако и нас вразуми воспети всем сердцем, Господи, Спасителю наш, слава Тебе. Образ Божий есте вы, сего ради храните великий образ сей, образ красоты Божией, образ безмерный любве Его, да будете чада Отца вашего, иже на небесех, да будете святы, якоже и Отец ваш свят есть. Тако пастырю богомудрый, паству твою учил еси, тако и сам свято пожил еси. Христос вочеловечися, призвав к покаянию разбойники и блудницы, и ты, пастырю многомилостивый, заповедь Пастыреначальника исполняя с мытари ядяше и со грешники беседоваше, вся к покаянию призывая и вся научая молитися: Боже, милостив буди мне, грешному, Боже милостиве, слава Тебе. Якоже пророци святии о пастырех израилевых, тако и ты, отче наш, о пастырех слезы проливал еси, сице глаголя: пастыри и паства согрешиша пред Тобою, Господи, все уклонишася вкупе непотребна быша, и что сотвориши нам, Господи; кровь завета Твоего вопиет от земли, обаче глас Твой не услышан есть, и что сотвориши нам, Господи; прежде даже до конца не погибнем, спаси ны. Слава, глас 7-й. Поклоняйся иконам святым, воспеваю Бога воплощеннаго, образ славы Отчия, воспеваю и Отца безначально Сына родившаго, прославляю богоподобие человеков, иже храмы Духа Святаго суть, такожде и в чувстве имею силу Креста Животворящаго. Таково бысть славное богословие твое, отче святый, имже великим учителем древним уподобился еси, образ Бога воплотившегося восхваляя. И ныне, предпразднеству или Богородичен. Славословие великое. Отпуст. * * * Публикуемая Служба святому отцу нашему Иоанну Кронштадтскому была составлена в среде петроградских почитателей св. Иоанна (возможно, даже иоаннитами) и в 1928 г. была представлена на рассмотрение «Кочующему» Собору Истинно-Православной Церкви. Она была детально проверена и, по согласованию, было предложено отослать ее архиепископу Андрею Уфимскому в Кзыл-Орду для исправления и улучшения. Известно, что в 1928 г. он сделал исправления и первую редакцию службы, изъятую при его аресте. Окончательный вариант службы был им создан в Алма-Ате в 1933 г. ко дню 25-летия со дня кончины св. Иоанна и переправлен в Эстонию для публикации. 17 июля 1938 г. святой Иоанн (Максимович) получил из Ревеля брошюру, содержащую текст этой Службы и по его благословению она была опубликована Я. Б. Ильяшевичем во втором томе составленного им сборника «Отец Иоанн Кронштадтский». Именно сей текст принят как канонический в 1964 г. Архиерейским Собором РПЦЗ при прославлении св. Иоанна Кронштадтского. Особенностями текста, утвержденного к употреблению в РПЦЗ, являются следующие: Чтения на вечерни: (1) Иоиль II, 12 – 27 (2) Иоиль II, 27 – 32 (3) 1-е Иоанна IV,20 – V,5. На утрени Евангелие от Луки, зачало 24. Чтения на Литургии: Апостол, Соборного послания Иоаннова зачало 73, от полу: Возлюбленнии, возлюбим друг друга: Евангелие от Луки, зачало 36. Тропарь, глас 4: Со апостолы изыде вещание твое в концы вселенныя, с исповедниками страдания за Христа претерпел еси, святителям уподобился еси слова проповеданием, с преподобными во благодати Божией просиял еси. Сего ради вознесе Господь бездну смирения твоего превыше небес и дарова нам имя твое во источник предивных чудес. Темже во Христе во веки живый, чудотворче, любовию милуяй сущия в бедах, слыши чада твоя, верою тя призывающия, Иоанне праведне, возлюбленный пастырю наш. Ин тропарь, глас тойже: Во Христе во веки живый, чудотворче, любовию милуяй сущия в бедах, слыши чада твоя, верою тя призывающия, щедрыя помощи от тебе чающия, Иоанне Кронштадтский, возлюбленный пастырю наш. Кондак, глас 4. Творение иже во святых отца нашего Иоанна Шанхайского, чудотворца От младенчества Богом избранный, и в отрочестве дар учения чудесно от Него приемый, и к пресвитерству в сонном видении преславно призван быв, пастырь дивный Церкве Христовы явился еси, отче Иоанне, благодати тезоимените. Моли Христа Бога всем нам с тобою в Царствии Божием быти. Аще служба творится 20-го числа декабря. «Кочующий» Собор своим 14-м каноном определил: «Отец Иоанн Сергиев-Кронштадтский, чья жизнь, дела, чудеса и пророчества посланы России на вразумление, вчинится в лик Святых праведников». Служба святого и преподобного отца нашего Иоанна Кронштадского. Нарва. 1938. И. К. Сурский. Отец Иоанн Кронштадтский. Том I. Белград, 1938. Том II. Белград, 1941. (книга была издана под псевдонимом). Репринт: М., «Паломник», 1994. PAGE PAGE 4