Служба священномученику Петру, иерею Черевковскому, Красноборскому НА ВЕЧЕРНИ На Господи, воззвах: стихиры, глас 4. Подобен: Дал еси: Дал еси хваление / Церкви Российстей, Господи, / честнаго иерея Петра, / иже Жертву Безкровную совершая, / чистым сердцем и усты славляше Тя / и, паству свою непрестанно словом поучая, / делом утверждаше, / темже ныне во Царствии Небеснем Тебе предстоит, // Иисусе Всесильне, Спасе душ наших. Дал еси образ благочестия / людем Твоим, Господи, / иерея Божия Петра, / иже во вся дни жития своего / безкорыстие и нестяжание являше / и, паче всего нищия и убогия ублажая, / смирением себе огради, / темже благодать стяжа молитися Тебе, // Иисусе Всесильне, Спасе душ наших. Дал еси утверждение / людем Красноборския земли, Господи, / славнаго священномученика Петра, / иже во дни лихолетия на Руси / небоязненно враги Церкве и Отечества обличи / и, храм Божий от разорения ограждая, / страданий смертных не убояся, / темже присно ходатайствует о нас пред Тобою, // Иисусе Всесильне, Спасе душ наших. Дал еси знамение / Церкви Твоей, Господи, / дивнаго во иереех Петра, / иже по мнозех летех погребения своего, / яко благообразен старец / во одеяниих иерейских являшеся, / повелевая панихиды по себе служити, / темже, воистину знамение Божие преславно бысть, // Иисусе Всесильне, Спасе душ наших. Слава, глас 8: Кое прославление достойное / воздадим ти, Петре, пастырю наш добрый? / Ты бо, паству во благочестии и вере утверждая, / разорители храма Божия дерзновенно обличил еси / и страдания лютая за Христа приял еси, / сего ради ныне на Небесех радуешися и веселишися, / мзду многу приемля, // и молишися спастися нам. И ныне, Богородичен. Вход. Прокимен дне. Чтения три мученическа общая: Тако глаголет Господь: (Ис. 43), Праведных души в руце Божией: (Прем. 3), Праведник, аще постигнет скончатися: (Прем. 4). На литии стихира святому, глас 1. Подобен: О, дивное чудо: О, дивное чудо! / Святый Петр сединою и добродетельми украшен, / венец прияв победный от Христа, во гробе полагается, / и многия милости людем от гроба своего являет. / Веселися, Церковь Русская, / прославляющи днесь Христова угодника! / Возопиим, вернии, / иерея-мученика имуще ходатая и молитвенника ко Господу: / Радуйся, Петре, страстотерпцев купносельниче, / тобою Господь / подает мирови // велию и богатую милость. Ина стихира святому, глас 6. Подобен: Все отложше: Врачевство недугов неисцельных / явися всечестный и чудный гроб твой, / святый священномучениче Петре! / Ты бо, праведно и благочестно на земли пожив, / на Небеса страданьми за Христа возшел еси, / Духа Святаго сугубою Благодатию исполнився, / по кончине подаеши просящим с верою исцеления. / Ихже и нас сподоби улучити, святе, // молитвами твоими. Слава, святому, глас 6: Священномучениче Петре, достославне, / тя ни земля потаила есть, / ни гроб бысть ходатай забвения твоего, / но Дух Божий яви тя яко праведника, во веки живуща, / и чудодейственника непрестанна. / Сего ради моли Христа Бога // даровати нам велию милость. И ныне, Богородичен: Тебе вси роди человечестии / хвальныя дары приносят, Владычице, / и молятся яко Царице и Матери Божий. / Пророцы Тя премудро проповедаша, / левити благословиша, / апостоли и мученицы исповедаша, / священницы покланяются, архиереи проповедают, / монаси и простии благоговеют, / богатии и убозии, сироты и вдовы, / и всяк возраст, и всяко преспеяние, / старческое и младенческое, / под кров Твой державный с верою прибегаем: / покрый и соблюди, Госпоже, молитвами Твоими // и спаси от бед души наша. На стиховне стихиры, глас 2. Подобен: Доме Евфрафов: Земле Красноборская, / уделе северный Святыя Руси, / красуйся и ликуй, / се бо пастырь твой верный Петр // о нас усердно молится. Стих: Честна пред Господем / смерть преподобных Его. О, пастырю Петре, / каменю веры / и обличителю беззаконий, / Христу верен даже до смерти пребыл еси, // сего ради ныне прославляешися. Стих: Священницы Твои облекутся в правду / и преподобнии Твои возрадуются. Священномучениче Петре, / чудодейственниче благодатию Божиею / и подателю благих, / благую часть подай нам ныне, // молитвами твоими ко Господу. Слава, глас 5: Что тя наречем, пастырю наш Петре? / Ратоборца ли, яко силы вражией не убоялся еси, / каменю веры, яко неверныя обличил еси, / мученика ли, яко смерть за веру православную приял еси, / или иерея Божия, яко велико имя Святыя Троицы / служением благоговейным прославил еси. / Сего ради, ныне на Небесех ликуя, // моли спастися душам нашим. И ныне, Богородичен, глас тойже: Воспоим, людие, светло давидскую песнь / Отроковице, Невесте Божий и Матери Царя Христа: / предста Царица одесную Тебе, Владыко, рясны златыми одеяна / и преукрашена Божественными благолепотами. / Сию убо, яко избранную и добрую в женах, / паче всего мира удобрив, / благоволил еси родитися из Нея, великия ради милости, / и Сию Помощницу людем Твоим даровал еси / спасати и покрывати от бед / всемогущею Твоею и Божественною силою, // Еяже молитвами, Христе Боже, помилуй нас. Тропарь, глас 4: Возсиял еси богодарованным тебе чудес действом, / исповедниче благочестия, Петре достоблаженне, / ибо благодерзновенно обличив законопреступных ляхов свирепонеистовство, / страдания многа претерпел еси даже до смерти. / Сего ради венцем священномученика / увенчался еси от Бога, // яко истинный поборник Церкве Христовы. Богородичен: Заступнице Усердная, / Мати Господа Вышняго, / за всех молиши Сына Твоего Христа Бога нашего / и всем твориши спастися, / в державный Твой покров прибегающим. / Всех нас заступи, о Госпоже Царице и Владычице, / иже в напастех и скорбех, и в болезнех, обремененных грехи многими, / предстоящих и молящихся Тебе умиленною душею / и сокрушенным сердцем, / пред пречистым Твоим образом со слезами, / и невозвратно надежду имущих на Тя / избавления всех зол. / Всем полезная даруй / и вся спаси, Богородице Дево: // Ты бо еси Божественный Покров рабом Твоим. НА УТРЕНИ На Бог Господь: тропарь святаго дважды. Слава и ныне, Богородичен. По 1-м стихословии седален, глас 3: Бысть персть от гроба твоего, священномучениче Петре, / благодати исполнена не от земных, но от небесных, / сего ради людие с радостию взимаху ю // на исцеление душ и телес. Слава и ныне, Богородичен: Людие благочестивии, правовернии собори христоименитии, / приступите верно вси, / Божественному припадающе Божия Матере образу: / Тая бо исцеление болящим радостно подает, / уязвляет же злославныя, яко стрела от лука, / нас всех веселит световидно // и благодатию озаряет, молитвами Своими. По 2-м стихословии седален, глас 4: Яко благообразный старец / в светлых ризах иерейских / многажды людем являлся еси, священномучениче Петре, / назидая тыя Богу молитися в недузех и скорбех, // знахари же отвращатися. Слава и ныне, Богородичен: Да ликовствует светло верных все множество, / рыдает же демонское воинство, / видяще многоименныя сияющия праздники Божия Матере, / ублажаему Божию Матерь Божественными песньми. / Идеже бо богоприятно славится / Преблагословенная Богородица Владычица, Богоизбранная Отроковица, / неприязни падение, // христианом же крепкое утверждение. По Хвалите имя Господне: величание: Величаем тя, священномучениче Петре, / и чтим святую память твою, / ты бо молиши за нас / Христа Бога нашего. Псалом избранный: Услышите сия, вси языцы: По полиелеи седален, глас 1: Радуйся, Красноборская земле, / красно украшенная пастырем дивным, священномучеником Петром, / иже во времена смуты, нестроения и разорения Российския державы, / яко камень веры и образ благочестия пастве явися / и небоязненно противоста врагом Церкве и отечества. / Сего ради и ныне нам с Небесе, яко истинный наставник, вопиет: / Русь Святая, храни веру православную, // в нейже тебе утверждение. И ныне, Богородичен: Правоверно чтущия Тя людие, к Тебе прибегающия / и иконе Твоей святей любезно покланяющияся, / о Божия Мати, спаси и не даждь в расхищение супостатом, / ниже найдут на ны вся злая, / яже грехи наша уготоваша нам, / ниже беззакония наша превзыдут на главы наша, / но да Твоя Матерняя к Богу преодолеет // за ны богоприятная молитва. Степенна, 1-й антифон 4-го гласа. Прокимен, глас 4: Честна пред Господем / смерть преподобных Его. Стих: Что воздам Господеви о всех, яже воздаде ми. Всякое дыхание: Евангелие от Луки, зачало 67. По 50-м псалме стихира, глас 6 Пастырю наш добрый, / священномучениче Петре, / положивый душу твою за чада твоя, / Христу верен даже до смерти пребыл еси, / сего ради ныне во Царствии Небеснем / блаженство наследуеши // и молишися о душах наших. Канон от службы Пресвятей Богородицы ради Ея иконы Казанския, со ирмосом на 6, и канон священномученика Петра на 8, глас 2. Канон священномученику Петру, глас 2: Песнь 1 Ирмос: Грядите, людие, / поим песнь Христу Богу, / раздельшему море и наставльшему люди, / яже изведе из работы египетския, / яко прославися. Господи Боже, / силу подай нам достойно воспети / подвиги и чудеса пастыря дивнаго, священномученика Петра, / земли Красноборския прозябение. Апостолу Петру воистину тезоименит быв, священномучениче Петре, / житием бо, дерзновенною верою и страданием тому подражал еси / и ныне во Царствии Небеснем с ним славиши Христа. Дивно украшенный от юности / сединою мудрости и житием нескверным, священномучениче Петре, / благоугоден Богу был еси и в старости многолетней. Богородичен: Под кров Твой, Дево Госпоже, прибегаем, вси роди человечестии: / просвети ны светом Рождества Твоего, грешныя рабы Твоя, / молящияся прилежно и кланяющияся пречистей Твоей иконе, / просяще от Тебе прияти великия милости. Песнь 3 Ирмос: Утверди нас в Тебе, Господи, / Древом умерщвлей грех, / и страх Твой всади / в сердца нас, поющих Тя. Яко истинный пастырь верен был еси Христу, священномучениче Петре, / словом, делом, житием и любовию, / от Негоже приял еси благодать / паству твою в православней вере и благочестии хранити. Пресвятую Троицу яко образ жития имея, священномучениче Петре, / тричастно прибыток от служения употреблял еси: / на храм, нищия и на дом твой. О разорении и умалении Российския державы скорбя, / молился еси со усердием, священномучениче Петре, / о еже низложитися под нозе ея всякому врагу и супостату. / Сего ради Бог дарова ти благодать противостати безбожным разорителем храма. Богорбдичен: Покланяемся, Богородице, Твоему пречистому образу и пресладкому Твоему Младенцу, / превечному и незаходимому Свету, Христу, / Имже спасла еси от лютых зол и тления смертнаго все человеческое естество. Седален, глас 8: Яко древний мученик, пострадал еси, священномучениче Петре, / жестоко влачимь безсловесным конем, / сего ради в память вечную, яко праведник просиял еси; / мучителей же твоих, воистину безсловесия исполненных // память с шумом погибе. И ныне, Богородичен: Божественнии Слова апостоли, / Евангелия Христова велегласнии вселенныя благовестницы, / Божественную церковь создавше в пресвятое Твое имя, Богородице, / и к Тебе, Госпоже, приходят, моляще Тя прийти на тоя освящение. / Ты же, о Богомати, рекла еси: / идите с миром и Аз с вами тамо есмь. / Они же, шедше, обретают тамо на стене церкве Твоего, Владычице, образа подобие, / Божественною писано силою шаровными подобии, / и, видевше, поклонишася Ти и прославиша Бога. / С нимиже и мы Божественней Твоей покланяемся иконе, / просяще от Тебе великия милости: / даруй согрешений оставление рабом Твоим, Едина Благословенная. Песнь 4 Ирмос: Услышах, Господи, / славное Твое смотрение / и прославих, Человеколюбче, / непостижимую Твою силу. Яко предстоятель Российския Церкве святитель Ермоген, / во дни лихолетия и смуты истинный защитник Православия явился еси, священномучениче Петре, / подражая тому и словом, и делом. Не терпя, священномучениче Петре, разорение храма зрети / и ругательство над верою Православною, / дерзновенно обличил еси ляхов, яко беззаконных разбойников. Крепость даде ти, священномучениче Петре, Христос Подвигоположник Истинный, / испытати лютая мучения и посрамити врагов, / хвалившихся безразсудно силою воинскою. Богородичен: Ты еси похвало и венец святым всем, о Царице! / Ты упование наше и Помощница по Бозе, / и на Тя надежду спасения нашего возложихом вси. / Тебе молимся, яко Божии Матери: / одожди грешным рабом Твоим богатыя Твоя душеспасительныя милости. Песнь 5 Ирмос: Света Подателю и веков Творче, Господи, / во свете Твоих повелений настави нас: / разве бо Тебе иного бога не знаем. Законно, яко истинный священник, пожив, / законно, яко истинный мученик, пострадал еси, святе Петре, / и ныне во Царствии Божии благодать имаши сугубую молитися о нас. По мнозех летех преставления твоего, священномучениче Петре, / показася гроб твой от земли одесную олтаря Никольския церкве, / ты же сам, яко благообразный старец в ризах священных, являлся еси людем. В огненном пламени гроб твой, священномучениче Петре, сохранися, / знаменуя, яко Божиим Промыслом людем на исцеление дарован бысть. Богородичен: Не умолчим никогдаже, Богородице, псалмы и песньми воспевати величия Твоя, Обрадованная: / Бога бо воистинну воплотившагося родила еси, / во спасение наше всемирное и избавление. Песнь 6 Ирмос: В бездне греховней валялся, / неизследную милосердия Твоего призываю бездну: / от тли, Боже, мя возведи. Людем, трясавичною болезнию страждущим, / многажды являлся еси, священномучениче Петре, / повелевая к твоему гробу припасти и молитися, / да воистинну исцеление приимут. Иерея черевковскаго Бориса, / хулившаго чудеса Божия, от гроба твоего бывшая, / устрашив, укорил еси, священномучениче Петре, да покается. Благодать стяжал еси, священномучениче Петре, / духов лукавых прогоняти и целити черную болезнь, / сего ради мнози страждущия ко гробу твоему притекаху и злаго недуга свобождахуся. Богородичен: К Тебе, Госпоже, прибегают роди правоверных, просят великия милости / и приемлют неоскудно сущия в недузех исцеление, в страстех пременение, в печалех утешение. / Источи и мне, Владычице, каплю душеспасительную, / да со всеми и аз пою Твое величие. Кондак, глас 8: Апостолу верховному тезоименитый / и чудес действом знаменит явился еси, Петре преблаженне, / священства бо одежду кровию мучения испещрив, / на Небеса преселился еси, исцелений струи источая притекающим к тебе с верою. / Сего ради вопием ти: / радуйся, священномучеников купносельниче // и молитвенниче о чтущих память твою. Икос: Аще и в дальнем северном конце страны нашея / и в малей веси Черевково, / яко истинный пастырь потрудился еси, слово Евангелия в душах верных утверждая, / и тамо, яко мученик преславный, страдания претерпел еси, святе Петре, / но ныне вся Российская Церковь тебе от души вопиет: / радуйся, священномучеников купносельниче / и молитвенниче о чтущих память твою. Песнь 7 Ирмос: Образу златому на поле Деире служиму, / трие Твои отроцы небрегоша безбожнаго веления, / посреде же огня, ввержени, орошаеми пояху: / благословен еси, Боже отец наших. Даровал еси, священномучениче Петре, / глухим — слух, немым — речь, слепым — зрение, разслабленным — силу, / повелевая овым милостыню творити, овым — во гресех покаятися. Посрамил еси знахарей, священномучениче Петре, / тщащихся лечити страждущия. / Сие бысть, да познают людие, яко един есть Целитель душ и телес — Христос, истинный Бог наш. Людем, отступльшим обета своего по исцелении, / паки являлся еси с укорением, священномучениче Петре, / желая тыя к вящщему покаянию и исполнению обета призвати. Богородицей: Неиспытана глубина, недоведомо таинство, непостижим образ, Дево, зачатия Твоего, / зачатия без Семене, без мужа рождество. / Безплотный воплотися, Превечный младенствует, / Сын Божий, Сын Тебе, Девы, бывает, Емуже вопием: / Боже, благословен еси. Песнь 8 Ирмос: В пещь огненную ко отроком еврейским снизшедшаго / и пламень в росу преложшаго Бога, / пойте, дела, яко Господа / и превозносите во вся веки. Жену кровоточивую, еле живу сущу, / от смертныя болезни исцелил еси, священномучениче Петре, / знахаря же, врачевавшаго ю, во гресех и лжи обличил еси. Жена некая, в родах изнемогши, / призва тя на помощь, священномучениче Петре, яко угодника Христова, / и абие роди чадо и здрава бысть. Страждущему недугом падучия болезни, священномучениче Петре, / дал еси повеление совершити молебное пение ти и образ твой написати, / да ведают людие, яко Бог прослави тя на Небеси. Богорбдичен: Ты похвала христианом еси, Владычице, / Ты оружие на враги и стена, / к Тебе прибегающим. / Тя и ныне на помощь призываем, Госпоже, / не даждь врагом вознестися на люди Твоя, / иже Тебе не хвалят, ни Сына Твоего, Богородице, и Твоей иконе не кланяются: / сих победи и души наша спаси. Песнь 9 Ирмос: От Бога Бога Слова, / неизреченною мудростию пришедшаго обновити Адама, / ядию в тление падшаго люте, / от Святыя Девы неизреченно воплотившагося нас ради, / вернии, единомудренно песньми величаем. Людие, суще самовидцы множества исцелений, / у гроба твоего бываемых, священномучениче Петре, / яко новоявленнаго чудотворца почитаху тя. Яко столп непоколебим, / бысть часовня твоя, священномучениче Петре, / озаряющи вся концы чудес действом. / Сего ради во храм ныне созидается, / да приносится тамо Жертва благодарения и хваления. Се время благоприятно, се ныне день спасения, / твоя бо икона, священномучениче Петре, яже многи леты сокровенна бысть, / обретеся во утверждение на Руси Православия. Богородичен: О Всемилостивая христианом Помощнице, / не может Тя воспети достойно ум человеческий и ангельский, / яко всея твари честнейши, Небесных и земных славнейши: / родила бо еси Творца всех и Бога, / но, о Владычице, / приими милостивно юже Тебе от сердца возложихом песнь, / спасай нас всегда, на Тя бо надеемся. Светилен: Людем, сомнящимся, аще Божиею волею явися гроб твой, священномучениче Петре, / столп светоносный явися возвестити, / яко сие есть чудо преславно. И ныне, Богородичен: Да почтится Всепетая Мати Божия, / Жизнь Сущую рождши, Христа Бога нашего, / райских дверей отверзение и всего мира очищение, к Животу возведение: / Сей есть пророки глаголавый, / Тому поклонимся, Богу и Спасу душ наших. На хвалитех стихиры на 4, глас 5. Подобен: Радуйся: Радуйся, священномучениче Петре, / ты бо, любовию ко Христу уязвився, / вся чуждая Церкве отвергл еси / и во священный сан облеклся еси, / Жертву Безкровную благоговейно многая лета совершая, / сам себе в жертву живу Христу послежде принесл еси, / и на Небеса, яко ходатай о нас, возшел еси, // темже ныне моли спасти души наша. Радуйся, добрый пастырю Петре, / ты бо, по вся дни имевый сугубое попечение о людех твоих, / усердно молился еси о них, / да тихое и безгрешное житие поживут во всяцем благочестии и чистоте, / избавльшеся от всякия нужды и печали, / и Ангела мирна, верна наставника, Хранителя душ и телес обретше, / христианския кончины живота сподобятся, / и добрый ответ на Страшном Судище Христу, Богу нашему, дадут, // дарующему всем велию милость. Радуйся, священный отче Петре, / ты бо по вся дни усердно молился еси Богу / о свышнем мире и спасении душ сродников наших, / о мире всего мира, благостоянии Святых Божиих Церквей, / о святем храме твоем и входящих в онь, / и о богохранимей державе Российстей, властех и воинстве ея, / о еже избавитися людем российстим иновернаго пленения / и пожити им во временех мирных, / живот же весь Христу, Богу нашему, предати, // подающему всем мир и безмерную милость. Радуйся, святый иерее Петре, / тя бо ходатая и молитвенника за ны к Богу, / вси вернии людие стяжахом, / подвиги и страдания твоя за Христа прославляюще. / Темже, память твою днесь светло совершающе, / с верою и любовию тепле вопием: / в Небесных обителех ликуя, / молися Господеви о прославляющих тя, / да дарует нам грехов оставление, / душам нашим спасение, // мир и велию милость. Слава, глас 8: О пастырю дивный, священномучениче Петре, / правило веры и образ милосердия в житии твоем явил еси, / в хвалении Господа неумолкавый, / немощныя в вере укреплявый, / унылыя ободрявый, / в подвизех живущия назидавый, / беззаконныя небоязненно обличивый, / и даже в смертнем мучении прославлявый Христа, Бога нашего, // подающаго мир душам нашим. И ныне, Богородичен, глас тойже: Святая Твоя и сообразная икона, Богородице Дево, / благодатию Твоею пребогатый сущий источник, / кипящий всей подсолнечней / и светящий всему миру / светолучными Святаго Духа сияньми и исцелений светлостьми. / Ты бо Бога Слова плотию несказанно родила еси, / от Архангела Гавриила сицевая слышавши: / радуйся, Обрадованная, Господь с Тобою, / и Дух Святый осенит Тя к зачатию. / Такожде рекла еси к первописанной Твоей иконе, на ту зрящи: / с тою Моя благодать, / и слово Твое со властию иконе бысть. / И образ, и глас, и сила, и дело, / и всяк ум превосходящая Божественная благодать, спребывающи вечно, / знамения и чудеса непрестанно содевает, / и душеполезное исцеление всем верно приходящим подает // Твоими Богоматерними непрестанными к Богу молитвами. На литургии служба священномученика. Апостол ко Евреем, зачало 334. Евангелие от Луки, зачало 67. Молитва О священномучениче Петре, пастырю наш добрый, Черевковская похвало, земли Красноборския и всея России украшение! Ты от юности твоея, очистив себе от мирскаго пристрастия и сердце удобрив благодатию Святаго Духа, во священный сан иерея Божия облеклся еси и многая лета, попечение духовное, таже и телесное, о пастве твоей имея, Жертву Безкровную достойно совершал еси. Егда же прииде на землю Российскую нашествие беззаконных и иноверных людей, яко пастырь истинный, сам себе в жертву живу Христу, Богу нашему, принесл еси. Сего ради ныне, на Небесех ликуя с сонмы священномучеников Российстих, молися, яко имеяй дерзновение, о державе Российстей, да избегнет варварскаго и иновернаго пленения, да любовию ко Господу озарятся сердца людей православных во святых храмах и обителях ея молящихся. И нас, твоими молитвами, да сподобит Господь принести достойные плоды покаяния и неосужденно причащатися Святых Христовых Тайн. Ходатайством твоим да укрепится вера наша, недуги и болезни да исцелеют, напасти и враги, видимыя и невидимыя, да расточатся. Аще же постигнет нас искушение огненное за грехи наша, да устоим пред беззаконным мучительством, якоже некогда ты, пастырю наш Петре, и прославим Триединаго Бога, Отца и Сына и Святаго Духа, во веки веков. Аминь. Древние тропарь и кондак священномученику Петру Тропарь, глас 4: Возсиял еси богодарованным ти чудес действом, / Петре достоблаженне, / ибо благодерзновенно обличил еси законопреступных ляхов свирепонеистовство, / сего ради истомления многа претерпел еси / за благочестия исповедание даже до крове / и венцем мученика увенчался еси от Бога, // яко истинный поборник Церкве Христовы. Кондак, глас 8: Апостола верховнаго тезоименитый, / и чудес действом знаменит явился еси, Петре преблаженне, / священства бо одежду кровию мучения испещрив, / на Небеса преселился еси, исцелений струи источая / притекающым с верою к раце мощей твоих. / Тем вси вопием ти: / Радуйся, страстотерпцев купносельниче // и молитвенниче о чтущих память твою. Память 9 июля и 16 января по старому стилю. Служба составлена игуменом Андроником (Трубачевым), совершается в Архангельской епархии по благословению правящего архиерея с 2007 года. PAGE PAGE 9