Месяца октября в 23-й день Служба священномученику Владимиру, пресвитеру Московскому На вечерни На Господи, воззвах: стихиры, глас 2 на 8. Подобен: Егда от Древа: Егда ревности Божественныя сердце твое исполни Господь, / отче Владимире, / тогда всем житием твоим проповеди Евангельской послужити потщался еси, / и ничтоже возможе тя от сего отвратити, / ни скорби, ни гонения, // богоблаженне. Егда светом веры истинныя озари тя Господь, / отче Владимире, / тогда вся житейская уметы вменив, / священства образ непорочный явился еси, / и в тесноте и гладе правило добродетелей был еси чадом твоим, // богомудре. Егда любовь совершенную в души твоей уведе Господь, / отче Владимире, / тогда к подвигу мученическому призва тя, / ибо и смерть не возможе разлучити тя от любве Божия, / нас же ради Распятому последовал еси, // темже ныне прославляем тя, богоизбранне. Слава, глас 4: Приидите, чада Божия, / приидите, святых внуцы / в явление новаго священномученика. / Что обрящем в завете его; / что наследим от имения его; / не мягки ризы, но броню правды и меч глагола Божия, / и щит веры православныя. / Сия вся оружия и нам подаждь, / молим тя, отче Владимире, / с тобою снаследницы Христу явитися, // подающему тобою нам велию милость. И ныне, Богородичен, глас тойже: Иже Тебе ради Богоотец пророк Давид / песненно о Тебе провозгласи / величия Тебе Сотворшему, / предста Царица одесную Тебе, / Тя бо Матерь, Ходатаицу Живота показа, / без отца из Тебе вочеловечитися благоволивый Бог, / да свой паки обновит образ, истлевший страстьми, / и заблуждшее горохищное обрет овча, / на рамо восприим, ко Отцу принесет / и Своему хотению / с Небесными совокупит Силами, / и спасет, Богородице, мир // Христос, имеяй велию и богатую милость. Вход. Прокимен дне. И чтения 3 священномученику. На литии стихиры, глас 4: О великий страстотерпче, священномучениче Владимире, / с любовию припадающе к тебе, / прославляем твоя подвиги и молимся: / моли непрестанно Господа, // во еже спастися душам нашим. Просветися житие твое добродетельными светлостьми, / верныя просветил еси / и тьму нечестия разгнав, / истинное явился еси светозарное солнце, / священномучениче Владимире, / и ныне вселился еси, идеже сияет Свет невечерний, / и сын дне благодатию Духа Святаго быв, / темже светоносное твое прославление совершающе, // любовию тя почитаем. Слава, глас 6: Помяни, Господи, иже о Тебе пострадавшего, / новаго страстотерпца Владимира, / от рода нашего прозябшаго / и муки многоразличныя претерпевшаго, // и приими его моления о спасении нашем. И ныне, глас тойже: О Благодатная и Пречистая Дево Марие, / Ходатаице и Заступнице всех верных, / предстательством светильника Московскаго / священномученика Владимира // сохрани и защити землю Русскую. На стиховне стихиры, глас 5. Подобен: Радуйся, Живоносный Кресте: Радуйся, священномучениче Владимире, / крестителю Руси тезоименне, / радуйся, красный благовестниче, / имже мнози услышаша глаголы вечныя / и надежду улучиша спасения, / радуйся, апостоле житием и смертию, / доныне вере научаяй нас, // моли спастися душам нашим. Радуйся, священномучениче Владимире, / верою патриархом древним подобне, / радуйся, пророче неведущим Бога, / радуйся, тросте, Духом колеблема Святым, / ты во в безвожней пустыни всякий возраст ко Христу приводил еси, / и яко друг Женихов, сам Тому страданьми последовал еси, // моли спастися душам нашим. Радуйся, священномучениче Владимире, / образ нам являя Христов, / радуйся, любве Божественныя кимвале доброгласный, / еяже ради крещения Христова сподобился еси, / и чашу Того испити приял еси / и верныя из нея приобщати, / радуйся, трапезы Небесныя общниче / и соседателю праведных Престолу Христову, // моли спастися душам нашим. Слава, глас 8: В правду вера твоя вменися, избранниче Божий, / и многая чада твоя, якоже апостоли, просвещают земныя концы, / и чтущии тя, яко звезды, / и прославляющии тя, яко песок морский, / ибо Господь прославити тя восхоте и яви тя чадом твоим / душу свою за Него положившаго // и о отечестве своем молящагося. И ныне, Богородичен: Безневестная Дево, / яже Бога неизреченно заченши плотию, / Мати Бога Вышняго, / Твоих рабов мольбы приими, Всенепорочная, / всем подающи очищение прегрешений, / ныне наша моления приемлющи, // моли спастися всем нам. Тропарь, глас 3: Христовою верою издетска утвержденный, / и живот свой проповеданию Слова Божия посвятивый, / истину в Церкви Православней обретший / и к пастырскому служению Божиим смотрением призванный, / во дни гонений верных окормлял еси, / прещений от безбожных не убоявся. / Темже и пострадал еси даже до крове, / отче священномучениче Владимире, / моли Милостиваго Бога // спастися душам нашим. Ин тропарь, глас 1: От юности ученик Христов быв, / апостольски проповедати слово Божие потщался еси, / и якоже о тебе рече другом Христос: / иже бо несть на вы по вас есть, / темже верен Господу до конца пребыв, / Христовым крещением крестился еси, / сего ради и нам подаеши благодать твою, // священномучениче Владимире. Слава, и ныне, Богородичен. На утрени По 1-й стихологии седален Духом Евангелия просветився, любве Божественныя исполнился еси, еюже познаются Христови ученицы, поприща ближних шествующии усердно. С нимиже и ты, безмездно словом и имением всем послужив, прославляешися достойно. Слава, и ныне, Богородичен: Благовестия гласом, о Безневестнля Дево, Мати Христа Бога позналася еси, Тому послуживши плотию и душею Пречистою Твоею, от всех родов прославляешися достойно. По 2-й стихологии седален Деяний апостол святых последователь явился еси, проповедуя Христа ревностно, и духом на всяцем месте моляся, рукама своима работая, скитаяся и беды терпя, ныне на Небесех воздаяние праведных приемлеши достойно. Слава, и ныне, Богородичен: Проповедует весь мир Тебе, Матерь Божию, апостольский лик покланяется, пророцы Ангелы покрывающияся зрят, праведницы воспевают Тя дерзновенно. По полиелеи седален Мучениче святе Владимире, от юности Христа возжадал еси и юн пребыв душею, житием нескверным возраст старости и мудрость приобрел еси, юныя наставник и вся чада твоя, яко душу свою возлюбив, злобою младенствовати научая, яко дети Христу тех привел еси. Слава, и ныне, Богородичен: Дево Богоизбранная, величаем Тя непрестанно аще и скверными усты и нечистым сердцем, но Матерь Божию Тя ведуще, дети себе представляем, якоже заповеда Христос, не остави чада Твоя, Владычице. Таже степенна, 1-й антифон 4-го гласа. Прокимен, глас 4: Честна пред Господем смерть преподобных Его. Стих: Что воздам Господеви о всех, яже воздаде ми? Всякое дыхание: Евангелие от Луки, зачало 67 По 50-м псалме стихира, глас 6: Верою, праведниче, жив был еси, / делы сию животворив, / священномучениче Владимире, / алчущим бо и крова лишенным послужил еси, / и в гонении непреклонен пребыв, якоже стена, / за неюже други от гонителей, яко Раав, сокрыл еси, / тоюже верою победил еси бесов полки / и заградил еси уста львов безбожных, // молися нам с тобою совершенство прияти. Канон Богородице, со ирмосом на 6, и священномученику на 8, глас 2 Песнь 1 Ирмос: Грядите, людие, поим песнь Христу Богу, раздельшему море и наставльшему люди, яже изведе из работы египетския, яко прославися. Грядите, людие, поим песнь Христу Богу, раздельшему неведения нашего море и наставльшему ны пети святаго мученика Своего Владимира, в немже прославися. Ревности Моисеовы исполнен быв, отче Владимире, в пустыни безбожия веру умножил еси, и достигл еси обетованныя земли Православныя Церкве. Заповеди Господни присно хранящаго, не устрашиша тя полчища супостат, и яко во Иорданских струях крещся, достигл еси обетованныя земли Православныя Церкве. Богородичен: Ковчеже святый и Скиние Божественная, путевожствуй и ныне нас, от Бога присно отпадающия в Горний Иерусалим, сущая в Обетованней Земли. Песнь 3 Ирмос: На камени мя веры утвердив, разширил еси уста моя на враги моя, возвесели бо ся дух мой, внегда пети: несть свят, якоже Бог наш и несть праведен паче Тебе, Господи. Верою укрепляемь, праведне, не закрыл еси уст твоих, пришедшей године безбожия, но паче разширил еси я, проповедуя Христа, и якоже Ной верою обличил еси нечестивыя. Темницы и врачебницы посещавый, приял еси Христа Авраамлим страннолюбием, и, якоже онаго, веры ради изведе тя Господь в неведомую ти дотоле православия страну, во еже пети: несть праведен паче Тебе, Господи. Проповедь твоя возсия во отечестве нашем, егда мнозии законнии Церкве сынове отпадоша за нечестие, ты же благословение Иаковле веры ради наследовал еси, темже с новомученики взываеши: несть свят, яко Господь. Богородичен: Призри на ны, окамененныя сердцем и умом, Пресвятая Дево, и моли Сына Твоего, да и сия камни чада Авраамля соделает и в вере нас утвердит, предстательством Твоим. Седален, глас 1: Не достанет ми времене, повествующу о вере твоей, юже явил еси кроме Церкве, отче Владимире, но послушествован сею верою быв, достигл еси и града православия, на начальника же веры Иисуса взирая, крестом, якоже лествицею, возшел еси к Церкви написанных на Небесех, идеже молишися, да и мы с тобою совершенство приимем. Слава, и ныне, Богородичен: Не достанет ми времене воспети чудеса Твоя, Владычице, не достанет ми словес прославити таинства, бывшая на Тебе, паче же дерзновения не имам, во гресех сый и во осуждение уста своя отверзаяй, но ты язык ми очисти, Чистейшая ангел. Песнь 4 Ирмос: Услышах, Господи, слух Твой и убояхся, разумех дела твоя и дивихся и возопих: слава силе Твоей, Господи. Услышав Господа, призывающаго тя, апостольски вся оставил еси и крестом Христу последовал еси. Нозе во благовествование веры обув, от силы в силу восходя, священства одежду приял еси, послежде же и мученический венец. Молитвы делание возлюбившаго, службы святыя совершителя тя постави Господь, Емуже, и в темницу ввержен абие воспел еси: слава силе Твоей, Господи. Богородичен: Слух Господень ны услышавшия и дела Господня уразумевшия просвети, Дево, и сподоби силою Сына Твоего дела Божия творити. Песнь 5 Ирмос: Света подателю и веков творче, Господи, во свете Твоих повелений настави нас, разве во Тебе иного Бога не знаем. Света исполнено бысть священное служение твое, Невесному Огню, сходящу в домы душ людских, и являющу злато поучений твоих. Любовию отрока всыновив, святе, благодатию же духовная чада, якоже родная прием, ныне мученическим дерзновением вся ны ко спасению направи. Повелением Христовым дети с радостию приял еси, и всем добрый отец быв, со креста твоего вся ны единей матери Церкви вручаеши. Богородичен: Угаси раздоры Церковныя, Христе, молитвами Матере Твоея, и настави ны не человеком следовати, но Тебе, Владыко, разве во Тебе иного Бога не знаем. Песнь 6 Ирмос: Ко Господу от кита Иона возопи: Ты мя возведи из глубины ада, молюся, да яко Избавителю во гласе хваления, истины же духом пожру Тебе. Погребение жены твоея единаго к вере приведе, паче же мученическая смерть твоя вся ны из глубины мертвых дел возставляет. Во единонадесятом часе призван, кровь свою излиял еси на точиле Христове, темже полученный динарь подаждь нам, молимся, якоже всегда требующим творил еси. Духом жена твоя гонения тебе возвести, священномучениче, ты же в сих мученическим венцем украсився, приими и сию в воскресение. Богородичен: Духом и истиною поклонники Богу покажи ны, Богородице, в лености, яко в китове чреве, привычно дремлющия, да гласы хваления Тя величаем. Кондак, глас 7: Оружием веры огражденный, / яко истинный воин Христов мучителем противустал еси: / привременно есть господство ваше, свидетельствуя, / и страдания за Христа приял еси мужески, / темже вопием ти: / радуйся, священномучениче Владимире, // во Царствии Небесном венцем нетленным увенчанный. Икос Верою приял еси странствия на земли, Отечествия Небеснаго взыскуя, темже Бог уготова ти град, верою поношение Христово богатство вменив, египет мысленный оставил еси, темже Бог на гору Боговидения тя возведе, верою кровь свою пролиял еси, на мздовоздаяние взирая, темже пальмовыя ветви в руце прияв, Богу предстоиши и славиши Троицу Единую во веки. Песнь 7 Ирмос: Образу златому на поле Деире служиму, трие Твои отроцы небрегоша безбожнаго веления. Посреде же огня ввержени, орошаеми пояху: благословен еси, Боже отец наших. Безвестно, яко агня незлобивое пострадав, священномучениче Владимире, ныне в белых одеждах на Небесех Агнцу предстоя поеши: благословение и честь и слава Тебе во веки. Яко отроцы, безбожных веления небрегл еси, темже по убиении ангел, тебе представ, отведе тя невозбранно Небесным, идеже со старцы и ангелы покланяешися Владычню Престолу. Под землю скрыти свое беззаконие мняху убийцы от сродников твоих, душу же твою под жертвенник Богу возложиша, отонудуже их тщету свидетельствуеши, всем нам воспети: благословен еси, Боже отец наших Богородичен: Образу златому ны присно служащия, ороси милостию Твоею, Богородице, Поле во Ты еси неоранное, орошенное же Духом Святым и прозябшее Единого от Троицы, Бога отец наших Песнь 8 Ирмос: В пещь огненную ко отроком еврейским снизшедшаго и пламень к росу преложшаго Бога пойте, дела, яко Господа и превозносите во вся веки. Власть мучителеву исповедав временную, в темницу ввержен был еси, юже ти росою Духа Господь храм сотвори, и ныне пред Престолом служиши день и нощь в храме Его во веки. Добромудр в разделениих Церковных быв, Христу Единому послужил еси верно и чада в послушании Тому сохранил еси, темже Седящий на Престоле обитает в тебе во веки. Божие промышление о себе благословил еси, скитаяся и лишения терпя, отче Владимире, ближним служения не оставил еси, темже не взалчеши по слову Того во веки. Богородичен: Огненныя пещи избави нас, Владычице, юже сами разжизаем, попаляюще свой тройственный состав, но милостию Твоею к нам сниди, да превозносим Бога во веки. Песнь 9 Ирмос: Безначальна Родителя Сын, Бог и Господь, воплощся от Девы нам явися, омраченныя просветити, собрати расточенныя, тем Всепетую Богородицу величаем. Земным родителем вере научен, от Отца Небеснаго печать Духа Святаго приял еси, и Сыну Божию последовав, на Небесех ликуеши, кровию запечатлен. Гонения от предшествующих зверю приял еси, не женою предреченная ти, но Духом Святым, и Воплощенному от Жены и Девы послужив, вселился еси во Отчих Обителех. С Богом сообитая, просвети ны, омраченныя грехми, и всегда, якоже днесь, собирай ны расточенныя в церковь святую, славити Троицу Единую. Богородичен: Безконечно имам в бездне мучитися, омраченный страстьми, аще не Ты предстанеши, Дево, Сыну Твоему, и помилует мя, тем Всепетую Богородицу, Тя величаем. Светилен: Днесь в светлый облак свидетелей Божиих вшедше и, яко глас грома, аллилуия слышаще, вся новомученики Российския умолим, да и нас облистает свет Солнца Христа, и одежды наша убелит, да Царствия Небеснаго сподобимся. Богородичен: Днесь облак обстоит нас праздников Твоих, о Богомати, сиянием бо образов Твоих ограждаеши и осеняеши нас, Заступнице усердная и всех скорбящих Радосте. На хвалитех стихиры на 4, глас 1. Подобен: Всехвальнии мученицы: О всехвальне священномучениче, / ты не мучительми в земли потаен был еси, / но ангели на Небо прияша тя, / отонудуже звездою сияеши / любящим тя и помнящим словеса и дела твоя, / и веры образ приимшим // и молитвою твоею спасаемым. О всехвальне священномучениче, / ты не славы земныя ныне требуеши, / но нас ради Господь тя нам яви помощника в нуждах житейских, / и о церковнем единстве молитвенника, / предстателя сродником и всем людем Российским похвалу, // юже имуще спасаемся. О всехвальне священномучениче, / тебе не сие хваление подобает, / но ангельское пение и величание святых, / ты же немощи наша и бездарие прием, / молений сих не презри, / но Богу предстояй, нас помяни, // да нас помилует и души наша спасет. Слава, глас 2: Сотника веру показав, / и во Израили неведомую, / и сторичный плод Христу принесый, / от западных учений прешел еси / и в Царствии Небеснем со Авраамом возлегл еси, / моли с ним Господа, / да ны от юности сущия царствия сыны, / не извержет во тьму кромешную, // но да спасет души наша. И ныне, глас тойже: Все упование мое на Тя возлагаю, / Мати Божия, // сохрани мя под кровом Твоим. Молитва священномученику Владимиру О святый священномучениче Владимире, избранный учениче и последователю Христов, верою, яко светильником, озаривый весь путь жития твоего, наипаче же в темную годину гонений, егда и смерть за веру претерпел еси и возшел еси к свету Богообщения, идеже лицем зриши Бога, Емуже послужил еси. Благодать возприял еси, веру убо, в нейже бе воспитан умножив, крещением истинным крестился еси, и крест священнический на перси восприяв, на крест Голгофский возшел еси, от силы веры выну в силу любве восходя, ближним убо послужил еси, узники и больныя утешив, верныя от раскола сохранив и други твоя от безбожных гонителей сокрыв. Темже приими и нашу молитву, чад твоих, Бога о тебе благодарящих, Господь бо не сокры подвига твоего от нас, и прославити тя благослови, и сродники твоя молитвами твоими Церкви всяко послужити сподоби. Темже молися и ныне Владыце Христу, священники умудрити и от разделений соблюсти, монашествующия в подвизе укрепити, дети от пагубных наветов бесовских сохранити и вся верныя в православии утвердити, и сию веру отцев непреложну до конца нам соблюсти, да прославим купно с тобою на Небесех Отца и Сына и Святаго Духа, ныне и присно и во веки веков. Аминь. PAGE PAGE 7