Митрополит Никодим (Руснак) СБОРНИК СЛУЖБ И АКАФИСТОВ Харьков: Прапор, 1996. 336 с., ил. ПО БЛАГОСЛОВЕНИЮ БЛАЖЕННЕЙШЕГО ВЛАДИМИРА, МИТРОПОЛИТА КИЕВСКОГО И ВСЕЯ УКРАИНЫ Служба святителю Петру (Могиле), митрополиту Киевскому Священная дань великому Иерарху, Просветителю и Защитнику Святого Православия, богомудрому песнословцу в день его 400-летия со дня рождения от Митрополита Харьковского и Богодуховского Никодима, 1996 год. НА МАЛОЙ ВЕЧЕРНИ На Господи, возвах: стихиры на 4, глас 4. Подобен: Званый свыше: Священнейший храм Святаго Духа был еси, / достохвальне святителю Петре, / рабе верный и прилежный Господа Твоего, / от Негоже преизобильно благодать приял и силу, / Божественными Писаньми верныя утвердил еси, / Силою Духа Святаго, духи лукавыя неизлагаеши, / не терпящия твоего запрещения, Всеблаженне. Яко грозд зрел, в точилех богословия достойно сокровиществовал еси, достоблаженне Петре отче наш / сице днесветлую звезду Святая Церковь тя стяжа, / неведущим неудобопостижная премудро уяснил еси, / мечем веры еретичествующих отражая зломыслие, / оживотворяя стадо свое у источницех Духа Святаго. Умножив талант, его же от всех Творца приял еси, / богатство сего расточил премудро, / сего ради, в радость Господа твоего вшел еси преславно. / Ныне же моли Всемилостивого, от тли и бед избавитися, / верою совершающим всечестную память твою. Слава, глас той же: Просияша добрая дела твоя, яко солнце, / в Церкве земной и Небесной, / угодниче Христов Петре, трудолюбиво, / православно бо проповедал еси истину и непорочную веру, / юже, подвигом пастыря вернаго насаждал, / и росою молитв слезных орошал изрядно, / да прославляется Имя Божие в народе нашем во веки. И ныне: глас той же: Тя, Богомати, предстательство имуще, / не убоимся врагов ополчения, / сопротивляющихся славящим из Тебе Рожденнаго, / Христа Бога и Спаса нашего. / Его же моли, Всеблагая, мир вселенней даровати / и спастися душам нашим. НА СТИХОВНЕ СТИХИРЫ, ГЛАС 2: Подобен: Доме Евфрафов: Дом и селение Пресвятыя Троицы был еси, / богодухновенне святителю Петре, / яко солнце вселенную обходя, / благодатию просвещая люди, / в вере Православной утверждатися. Стих: Уста моя возглаголют премудрость, / и поучение сердца моего разум. Дом премудрости Божия, / еяже присно наслаждаемся, / и веры истинный учитель, / возвыси рог православных, / чтущих память Твою преславно. Стих: Блажен муж, бояйся Господа, / в заповедях Его восхощет зело. Святителей преизрядная похвало, / священником славо, / монашествующим правило. / Церкви кормчий Богом даный, / явился еси, достоблаженне Петре. Слава, глас, подобен той же: Лести лукавых / демонов посрамив / Креста силою, / уяснил еси славу Христову, / Святителю Петре. Ныне, Богородичен, глас той же: Приими ныне пение / людей Твоих, Преблагословенная Мати, / и молящимся Тебе, пречистая, / у Христа испроси от врагов избавления, / еси бо Заступница народа нашего. ТРОПАРЬ, ГЛАС 5 / зри на велицей вечерни /. НА ВЕЛИЦЕЙ ВЕЧЕРНИ Блажен муж: 1-й антифон. На Господи, возвах, стихиры на 8. Праздника 4, глас 8. Стихиры Святаго на 6. СТИХИРЫ СВЯТАГО, ГЛАС 5: Троица Безначальная и Единосущная / избра тя от мятеж суетных воевод Молдавских, / быти кормчем избранному стаду Христову, / Андреем Первозванным провозвещенного / и благоверным Крестителем Владимиром облагодатственнаго, / Священноначальниче, Петре Богомудре, во еже просветити и спасти достояние Его, / наследию вечнаго торжества: / Ангелов и святых, Божиих избранных, / в них же церковь земная, веселящеся, ликовствует. Веселися Киевская, Богом избранная Митрополие, / Божия Матери вертограде предивный, / псаломски взыграйте, вернии Матери градов Святой Руси, / воспойте песнь хвалебную подвижницы Печерстии / и все вверившиеся всеблагому Промыслу Божию, / яко незабвена сотвори Господь пред Лицем Своим, / пастыря и просветителя мудраго, спасшего народы наша православныя, / от пленения и порабощения духовнаго, / Святителя Петра, благодати Духа Святаго преисполненнаго. Сошедшеся днесь вернии людие, / глубину четыресталетия, аки день вчерашний, воспоминающе, / восхвалим стража стада православнаго недремлюща, / мужа песнословца Богомудрого, / светильника веры и ритора богословия неумолкающаго, / Дамаскину и Роману песнопевцем подобна, / Петра, — могилу сокровища некрадимаго. Богомудре Святителю Христов Петре, / сияньми Божественными делы твоими, / светильник явился еси лучезарнейший, / в нихже восхождения, яко лествицу, утвердил еси, / худшее покоряя лучшему, / аки пчела, сот сладости Божественной верным собирая, / медоварницы богословия неистощимаго созидал еси, / просветителю неутомимый, Отче наш! / Темже, по успению Незаходимый Свет тя прият, / имже просвети братолюбием стези наша, пред Лицем Господним. Слава, глас той же: Река, дарований духовных преисполненная, / душ жаждущих — Божественное и пресладостное питие, / излияся из уст твоих, Святителю Боголюбиве Петре, / имже верныя, аки земля безводная, изрядно напаяются, / Троицу Нераздельную, Едино Божество, благохвалити научаются; / пламенем огненным святых молитв твоих, / демонские силы от создания Божия отступают, / храмы словесныя, в жилище Духа Святаго очищаются. Ты же, небоявленному Василию Великому по Бозе ревнуя, / к селениям Небесным, в день кончины Его, призван был еси, / отонюду же, яко страж Церкви Христовой верный, / огради и спаси нас от жаждущих поглотити души наши. И ныне, Праздника: или Богородичен, глас 5. Огнь Божества Христова, во утробе носила еси, / Его же ныне моли Пречистая, / распри в народе нашем угасити, / на стези мира и Боголюбия направити, / и, яко Божие предначертание, / огня неугасимаго нас избавити, / и светлости дня незаходимаго сподобити, / егда приидет судити всяческая. Вход, Свете тихий. Прокимен дня и чтение Святительская 3. На стиховне стихиры, глас 5: Подобен: Радуйся: Радуйся, священная главо, / Петре Преблаженнейший, / Киевския Руси Богом избранный печальниче, / в дни страшныя и ужасныя народа ея, / судеб Церкви Православныя крестоносителем избравшего тя. / Юже, Христу тезоименитую, зрел еси: / мечем нечестивых посекаемую, / иноверными всячески духовно истребляемую, / помощи же ни единыя, нигдеже. / Ты же на помощь Божию уповающе, / кротостию голубиной и мудростию змииной / Церковь Православную победоносно, утверждаеши, / в нейже имя твое препрославлено во веки. Стих: Священницы Твоя облекутся в правду, / и преподобнии Твои возрадуются. Радуйся, священная главо, / светлость мудрости Господь в сердце твое вложи, / безвестная и тайная Своя тебе яви, / еще на поле брани сущу, / от меча агарянского тя спасе. / Оружием архиерейской благодати облече тя, / воина Церкве Своей Святей изрядно утверди, / да посрамятся пред лицем всех людей, / готовивший сети уловления стаду твоему, / сечением премудростию уст твоих, / поборниче Христов Петре. Стих: Моисей и Аарон во иереех Его / и Самуил в призывающих Имя Его. Радуйся, священная главо, / на острии меча хитромудренно шествовав, / Церковь Православную, возлюбленную свою, / целомудренно пред нею хождше, / не дремлюще, от лжеобольстителей прилежно ограждал, / сокровище благодатного Апостольского и Святоотеческого учения, / посрамити и осквернити не попустил еси, / мечем веры, бессмертной славой Сию увенчал, / во иерарсех похвало непостыдная, / твердый адаманте Христов, святителю Петре. Слава, глас 8: Богом предопределен / и мудрому Павлу ревнуя, Церковь Христову всемудрыми твоими Богонаставлении украсил еси, / светильниче веры, Петре, отче наш. / Писаньми твоими вся просветил еси, / и яко плод зрел трудов твоих, ко Христу привел еси. / Его же моли прегрешений дати оставление, / любовию празднующим святую память твою. И ныне, Праздника, или Богородичен: Безневестная Дево: ТРОПАРЬ, ГЛАС 5: Богословия Божественных глубин / и учителей Церкви Православны ревнитель богодухновенный явился еси, / просветителю народов наших, Петре Богомудре: / сподвижника в ограждении Святаго Православия преподобнаго Иова имея, / торжество Церкви земныя Небесней уподобил еси. / Сице бо, силою благодати Христовой укреплен, / противу козни диавола вооружился еси безбоязненно, / Ныне же, не премолчи ко Господу: / благостоянию Церкви Православной не поколебатися / и спастися Боголюбиву народу нашему. И ныне, Праздника, или Богородичен: глас той же: НА УТРЕНИ На Бог Господь: Тропарь Праздника дважды, Слава Святому: и ныне: Праздника, или Богородичен, глас той же: По 1-м стихословии, седален, глас 2: Ко Господу пламенной любовию распаляяся, / многия труды во утверждение Церкви Православныя подъял еси, / якоже горлица гнездо птенцам своим устилает, / Храмы Божия и алтари святыя воздвизал еси, / в нихже жертву Безкровную, в молитве слезной, приносил еси, / мира и безмятежия пастве своей у Владыки мира ходатайствовал, / яко верный делатель винограда Христова, Петре, отче наш. Слава, и ныне, Праздника, или Богородичен, глас той же: Скорый Твой Покров и всеблагую помощь покажи на рабех Твоих, / и обуреваемые волны воздвигшийся на ны, укроти, Пречистая, / и подаждь мир Боголюбивому народу нашему, / да ублажим Тя, спасающую от бед, род христианский. По 2-м стихословии, седален, глас 4: Якоже жезл Ааронов, процветши, священство утверди, / тако бо, богатством благодати Духа Святаго, / просияша добрая дела твоя, всеблаженне Петре, / имиже древо Киевския и Галицкия Руси, неувядаемо, / четыресталетний плод жизни приносит. / Ты же, назабвенно вознеси молитвы ко Господу, / во еже избавити нас озлобления лютаго, / да не падше, посрамимся в день грознаго испытания. Слава, и ныне, Праздника, или Богородичен: Глаголом Твоим Богодухновенным, Отроковице, последующе, / Тя блажим вси роди, Дево, / яко Бога Блаженнаго Блаженную бывшую Родительницу, / песнословно величаем. Полиелей. Величание святительское: По полиелеи, седален, глас 1: Подобен: Гроб Твой: Веселися граде Киеве, / торжествуйте все православные люди, / днесь бо, яко светлоблистательная звезда, / память святителя Петра — ратоборца Христова, / на тверди Церкви Христовой просия, / юже мы всерадостно совершающе, вопием: / утверди, Святе, Святую Православную веру, / и прощения грехов наших испроси, / да воцарится мир и благоденствие в державе нашей. Слава, и ныне, Праздника, или Богородичен: Безневестная Чистая Богородице Дево, / Едина верным Предстательнице и Божественный Покрове, / бед, и скорбей, и лютых обстояний свободи, / иже на Тя надежду, Отроковице, имущих, / всячески согрей и Матерне укрепи, / и спаси души наша Божественными Твоими молитвами. Степенна, 1-й антифон 4-го гласа. Прокимен, глас 4: Священницы Твоя облекутся в правду, / и преподобнии Твои возрадуются. Стих: Услышите сия вси язьщы, внушите вси, живущий по вселенней. Всякое дыхание: Евангелие Святительское. ПО 50-м ПСАЛМЕ СТИХИРА, ГЛАС 6: Духа Святаго благодать / в твоих устнах излияся, отче, / и был еси пастырь Христовы Церкве, / уча словесныя овцы, люди твоя, / веровати в Троицу, во Едино Божество. КАНОН ПРАЗДНИКА, ИЛИ БОГОРОДИЦЫ НА 6, И СВЯТИТЕЛЯ НА 6. КАНОН СВЯТИТЕЛЯ, ГЛАС 7. Песнь 1 Ирмос: Поспешествовавшему Богу во Египте Моисееви, / извести Израиля, / Тому Единому поим, яко прославися. Припев: Святителю отче Петре, моли Бога о нас. Егда, яко воин полков христианских, в граде Хотине, / веру Православную от орд бусурманских защищал еси, / Господь, видя твою ревность воином Церкви Своея Святыя тя избра, / Егоже моли, Всеблаженне, / сохранити Ю адовыми враты непреодолиму. Иго благое и бремя легкое подъял еси, Петре Богомудре, / егда славу бояр Молдавских отринув, / образ Ангельского жития, в вертограде обители Печерския восприял, / да облечешися во образ мужа Христова. Пламенем неугасимым Духа Святаго, / яко порфирою златотканою, ума красотою Божественною просиял еси, / воине Церкви Христовой, Петре, / тьму лжеверия в Киевской и Галицкой Руси, / паче луч солнечных, опалив премудро. Слава: К чаши Премудрости Божественныя уста твоя приложив, / источник пития спасительнаго в душе твоей отверзл еси, Святителю Петре, / от негоже напой струями любви Христовой сердца наша, / молим тя. И ныне: Богородичен: Подаждь, Владычице, свыше победу на борющия нас, / ищущих опустошения Церкви Православныя, / Тебе бо едину Заступницу имамы, / яко да, спасаемы Тобою, прославим Тя, / Христа Бога нашего, Пречистую Матерь. Песнь 3 Ирмос: Утвердися сердце мое в Господе, / вознесеся рог мой в Бозе Спасе моем, / расширишася на враги моя уста моя, / возвеселихся о спасении Твоим. От лозы доброплодныя, воевод молдавских, гроздь сладок произшел еси, Петре Богомудре, / иже из корене их, святитель Георгий доброе семя в сердце твое вложи, / преславно процветшее в вертограде гор Киево-Печерских. Искусен в житии земному воинству, / на супостаты победы многия совершив, / и во иноцех суше, смирением и молитвою полки бесовския победил еси, Петре прехвальне, / в обоих бранех непобедим явился еси, преславно. Всесветлую звезду показа тя, Церкви Зиждитель, / неугасимый светильниче Петре. / Светлостию добродетелей и златозарных учений твоих, просветишася народы словенским, / славно преумноживший делания твоя, чтущим память твою достохвально. Слава: Благодать Святаго Духа, / миро благоухания Божественнаго излия на тя, / егда возложением рук святителей Церкви на главу твою, архипастырем престольнаго златоглаваго Киева проручествовавше тя. И ныне: Богородичен: Неневестная Богородице, Госпоже и Владычице, молим Тя прилежно, / Твоими и Святителя Петра молитвами, / стадо православное умиротворите, / да славится Имя Божие непрестанно в земле нашей. СЕДАЛЕН. ГЛАС 3. Подобен: Божественныя веры: Делы твоими просиял еси, яко денница, / благочестие веры Православныя, знамением Андрея Первозваннаго утвердив, / кладязи словесных знаний, познавати величие дел Божиих, / яко пастырь недремлющий, юным отроком учредил, / сице бо, прославляти Бога во святых Своих, всяческая научил, / Темже, днесь память творяще, вопием ти: / Моли Всещедраго Бога, спастися душам нашим. Слава, и ныне, Праздника, или Богородичен: глас той же: Ты крепость наша, Похвала и Радование, / Заступление, и Прибежище, / и Предстательница непобедимая, / и Хранительница от лютых наветов диавола, Пресвятая Богородице, / помози нам в вере не поколебатися, Ангелам и Святым на утешение. Песнь 4 Ирмос: Небеса прорекла есть / добродетель Твоя, Господи, / и Твоего хваления вся исполнил еси. / Слава силе Твоей, Человеколюбче. Святителю преславный Петре, / ты оружие обрел истинное, суще благочестия первоначальник, / серпом учений твоих, плевелы злочестия, из корене посекл еси, / любоболезненно ограждая от бед возлюбленную паству свою. Поборниче веры явлься, / Христову Церковь, непленену борением лжеучителей сохранил еси, / стрелами словесными, учение нечестивых Богомудренно низложив. / Помози и нам, немощным, в вере непоколебатися. Умом очищенным предстоя пред Лицем Божиим, / пламенем молитв твоих, противу губителей душ человеческих ополчился еси, / и, якоже молния под небесем, демонския силы поражал еси неустрашимо. / От нихже защити души наша в день Судный. Слава: Не умом льстивым, но чистотою сердца и телесным воздержанием, приобрел еси благодать премудрости и силу противу козней диавольских стати, / якоже великий Архистратиг иногда, / да сокрушится сатана и клевреты его, под ногами на помощь тя призывающих. И ныне, Богородичен: Световиден столп, огненный и облак светел, / предводящ к Небесному наследию, Богородице Чистая, / буди народу нашему православному, Мати Божия, / в пустыни жития заблужденному. Песнь 5 Ирмос: Утренюет дух мой к Тебе, Боже, / зане Свет еси, / и Твоя повеления быша исцеления рабом Твоим, Человеколюбие. Яко воин на страже, утреневал еси святителю Христов, Петре, / и яко елень, стадо свое к источнику вод предводящий, / дремания веждома твоима не давал еси, / пекшися о спасении паствы своея, / в поте чела пития и пиши духовныя иский. Христова розга Богонасажденная, / на кафедре святителей Киевских плод мног оплодоносил еси, Петре, отче наш, / имже и ныне чада Божий питаются изобильно. / Сокровищу сему не попусти осквернитися, богомерзкими лжеученьми. Просвещение спасительнаго проповедания, / якоже струя из камене Моисеева, излияся из медоточных уст твоих, / Учителем Словенским подобяся, / како просветити народы наша, / имже, воистину, свет немеркнущий явился еси, Всеблаженне. Слава: Всецело, яко жертва живая, Христу сораспялся еси, / святителю Божий Петре, / со страждущими страждущь, с плачущими — плачущий был еси воистину. / Сего ради, яко жертва Илиина, быша прошения твоя ко Господу, за всех и за вся. И ныне, Богородичен: Услыши, Богородице, нас, вопиющих Ти и славящих Твое величие, / и избави нас от бед, грядущих на ны, / и настави нас творити волю Сына Твоего и Бога нашего, / и чаемых мук свободи нас, молим Тя. Песнь 6 Ирмос: Иона из чрева адова вопияще: / возведи от тли живот мой. / Мы же Тебе вопием: / Всесильне Спасе, помилуй нас. Препояса тя, Владыка Христос, мечем духовным / и научи тя подвизатися к одолению раздоров в Его Святей Церкви, / верный друже Христов и огненное слово вложи во уста твоя, / во еже посрамити пагубную лесть, сеятелей плевелов на ниве Христовой. Обрел еси неудобь обретаемое древле и ныне богатство, / в немже Христа, Божию Силу, и Божию Премудрость преобрел еси, Всеблаженне. / Богатством сим некрадомым, и нашу нищету обогати, / во еже не уподобитися нам смоковнице бесплодной. Святительства правило святителем показался, Воплощшагося Слова верный благовестниче, Петре Богоглаголиве, / многия люди и отроцы же безсловесия избавил еси, / богословия сладость вложил еси в сердца их, тя чтущих, / Имя Божие прославляюще. Слава: Светильника мысленно пресветла получивше тя, / веселимся, Божественною бо верою тобою просвещаемы, / сынови Света и истины наследницы, / твоими молитвами, отче преблаженнейше, тщимся удостоитися. Ныне: Богородичен: Лютыми грехми обуреваемые и напастей бедами потопляеми, / под Божественный покров Твой прибегаем, Мати Христа Бога нашего. / Молися, Благосердная, во еже спастися рабом Твоим. КОНДАК, ГЛАС 3. Яко вертоградарь трудолюбием уязвлен, / цветник святой Руси ученьми твоими облагоухал еси, / молитвами подвижников Печерских изрядно укрепляем, / алчущих и жаждущих правды, / от Источника воды живыя, обильно напаяяй; / Корабль Церкви Православныя, волнами житейского моря обуреваемый, / от порабощения и духовного потопления, спасл еси, сосуде Духа Святаго, священнотаинниче Петре. / Внемли ныне мольбам паствы твоея, / во еже не разоритеся ей ученьми еретическаго зловерия и неистовством расколов злочестивых, / молитвами твоими за ны ко Господу. ИКОС. Святительскою одеждою одеян / и благодатию Духа Святаго укрепляем, / жребий кормчего Церкви Христовой восприял еси, Всеблаженне, / весь Христу любовию сраспинаяся. / Крест, многострадальнаго народа нашего, на рамена своя возложив, святителю Христов Петре. / Сице, ревностию пастыря добраго утренююще, светом Боговедения верныя озаряя, / верою бдяще, ложная учения и хитросплетения, яко плевелы на ниве Христовой, евангельски попалил еси, / слово спасительныя Истины всему миру возвещая, / Просветителям Словенским последовал прилежно. / Ныне, о Всеблаженне, внемли горестем нашим, / в них же сам искушаемый был, молитвами Твоими за ны ко Господу. Песнь 7 . Ирмос: В пещи суще халдейстей, / Авраамстии отроцы, / ликоваху со Ангелом, глаголюще: Отец наших Боже, благословен еси. Якоже Соломону иногда, излияся благодать во устне твои свыше, / и расшири сердце твое, о священне Петре, / во еже возлюбити благолепия славы дому Божия, / в нем же песнословити Имя Господне возлюби душа Твоя. Воспламени, всеблаженне Петре, / сердца наша горением любви ко Господу, / и к подвигу благоразумия стопы наша направи. / Не имамы бо покаяния, ни жития непорочнаго, ниже молитвы чистыя, / сего ради помози нам. Призри человеколюбиво, Петре, / на люди твоя, прегрешеньми обуреваемых и злобою снедаемых, и потщися спасти, да непокаявшиися, опалит нас огонь содомский. Слава: Трудолюбный Богосажденнаго вертограда делателю, Петре преблаженне, / ороси теплыми слезами молитв твоих виноград, егоже всеусердно насаждал еси, / да тля греховная не растлит достояние, егоже Богу уготовлял еси, прилежно. И ныне. Богородичен: Ублажают Тя, Богородице, всяк возраст и всяка душа верных: / Божие бо Слово паче ума и слова родила еси, / во спасение душ наших, Пренепорочная. Песнь 8. Ирмос: Единаго Безначальнаго Царя Славы, / Егоже благословлят Небесныя силы и трепещут чины Ангельстии, / пойте священницы, людие, превозносите Его во веки. Веры Православныя поборника, / благочестия учителя, святителей украшение, / христиан наставника, нищих помощника и питателя, / недугующих сострадальца, храмов Божиих строителя премудра, / восхвалим днесь, верные, Петра достохвальнаго. Жертву Безкровную за люди принося, / весь любовию Христу сраспинался еси, / не в крове тельчей и козлей, якоже Аарон в Скинии иногда, но Кровию Христовою освящал еси люди, / святителю Петре препрославленный. Венценосец явился еси, святителю Петре, / яко уготовася тебе небесное жилище, идеже Скиния Бога с человеки, / да ходатайствуеши за нас, чад твоих, / приносяще владыке мира фимиам, молитвы благоухания. Слава: Славившу ти во всем животе твоем Троицу Трисвятую, / Несозданную, песнословля Триедино Божество. / Ныне со Ангелы и всеми святыми, поеши Той: / Слава Тебе, Боже, отверзшему земнородным Райския селения. Ныне: Богородичен: Скиние Богопрославленная, радуйся Богоневесто, радосте Ангелов и святителей красото, / радуйся, Вратарнице Небесная, радуйся верных спасение, радуйся, Пречистая, отчаянных от рова погибели похищающая. Песнь 9 . Ирмос: Паче естества Матерь / и по естеству Деву, / едину в женах Благословенную, / песньми, вернии, Богородицу величаем. Возрастив талант благодати, имже украси тя Владыка живых и мертвых, / к Нему же радостно преставился еси, / яко воевода победоносный, глаголя, Возлюбившему тя: / се принесох Ти дарование преумножено. / Темже, яко благий и верный раб, вшел еси в радость Господа своего. Зриши ныне сладкого Иисуса лицем к лицу, / Егоже прежде в зерцале гаданий зрел. / Наслаждайся убо, святе, взыграй и ликуй, / приобщаяся ныне Возлюбленнаго тобою, / и нас, почитающих тя, поминай. Радуйся ныне радостию, воистинну бесконечною и неизреченною, Петре преблаженне, / идеже селение Божественной радости; / победив бо зде временное, утешайся и веселися вечно радостным и блаженным веселием на Небесе. Слава: Рукою моею недостойною приносимое тебе, / в нищете духа, хваление, святителю Петре, / не презри, но приими и моли Творца и Владыку избавити мя вечнаго мучения, тебе верою почитающа. И ныне, Богородичен: Пощади, Боже, наследие Твое, / грехи наша вольная и невольная презрев, прости, / на сие имея молящую Тя, на земли безсеменно Тебе рождшую, Безневестную Твою Матерь. СВЕТИЛЕН: Видев Господь чистоту твоего сердца, / юже имел еси от юности твоея, / сего ради от отечества твоего, путь в стольный град Киев указует ти, Петре Богомудре, / во еже просветити и утвердити в вере православной народы наша, / во славу Его Божественных величий. / Егоже моли непрестанно о всех нас, верных чад твоих. Слава, и ныне, Праздника, или Богородичен: Свет рождшая, Чистая, / просвети очи душ наших, / да не постигнет нас глубочайшая тьма греховная, ниже глубина отчаяния покрыет нас, / но спаси нас и окорми, Богородице, / светозарному Божественному пристанищу. НА ХВАЛИТЕ СТИХИРЬ! НА 4, ГЛАС 6. Днесь красуется град Киев, / горы и холмы Днепровския взыграша о святых своих, / псаломски ликовствуют иноцы Печерскии, / страна Молдавская молитвы своя возносит, / и вся Православная Церковь верою торжествует, / совершающе святую память твою, святителю Петре, / блистанием подвига твоего людие в братолюбии утверждаются, / православно славяще Троицу Единосущную и Нераздельную. Приидите ныне, благоименитии соборы, / псаломски воскликнем Господу, Богу нашему, / призри с небесе, Боже и виждь, / и утверди Святую Православную Церковь, / о ней же святитель благоверный Петр, молит Тя: / “Незыблемо основание Церкви Твоей положивый, Христе Царю, и еже адовыми враты не одолетися Ей, неложно обещавый, / от нынешних еретических бед избави Ю, / со слезами многими молим Тя, / Юже искупил еси честною Твоею Кровию”. Якоже маслину изрядно плодовитую, / Светодавец Христос яви тя учителя народу нашему, / и чашу премудрости в уста твоя вложи, / просветителю и Святаго Православия поборниче, Петре, / от неяже питие разума духовного источающего; / имже, бояре и вельмози, иноцы и Боголюбивые люди напояхуся, / и все народы златоглавый Киев посещающия, / чудодейственно, миром глав мироточащих исцеляющеся, / едиными усты и единым сердцем Бога прославяху, / союзом любви Христовой связуемы, / порфирою братолюбия украшахуся. Слава, глас 8. Троицы поборниче преславный, / защитниче Святаго Православия непобедимый, / державы же бесовския низложителю, / помози нам мечем веры вооружитися, / и надеждою несумненною, / отчаяния губительнаго избавитися; / молитвами твоими и Креста силою, / развергшиися хлябе адова — козни блудоверов победити, / верою чистою, яко светильником путеводным, / совершенства любви достигнута, / тебе бо дадеся благодать / спасати от бед души наша, / святителю Петре, отче наш! И ныне, праздника, или Богородичен, глас той же: Владычице, прими молитвы раб Твоих / и избави нас / от всякия нужды и печали. СЛАВОСЛОВИЕ ВЕЛИКОЕ, И ОТПУСТ. НА ЛИТУРГИИ Блаженны от канона песни 3-я Праздника и святаго 6-я. Прокимен, глас 7: Честна пред Господем смерть преподобных Его. Стих: Что воздам Господеви о всех, яже воздате ми? Апостол ко Евреем, зачало 335. Аллилуия, глас 4: Воззваша правднии, и Господь услыша их. Стих: Многи скорби праведным: Причастен: В память вечную будет праведник: МОЛИТВА СВЯТИТЕЛЮ ПЕТРУ. О великий и преславный угодниче Божий, Святителю Петре, отче наш! К тебе, яко чада ко отцу Боголюбивому, с верою и любовию припадающе, молимся прилежно: яви нам, смиренным и грешным, твое святое заступление, в дни страшнаго обуревания Святой Единой, Соборной и Апостольской Церкви Православныя, и умилостиви Всемилосерднаго Господа, да укрепит нас, Своею Божественной Десницею, в единомыслии веры и непоколебимом стоянии, даже до смерти, во всеусердном послушании Его Святой Церкви. Юже многостраждущую, да соблюдет незыблемо от неверия, суеверия, ересей и расколов, обуреваемую ныне всеми силами ада, во еже истребити Ю. Еще испроси, святый угодниче Божий, властем предержащим в страсе Божиим творити суд и правду в державе нашей, народу же нашему даровати мир и безмятежие, благоразумие и целомудрие, и от пагубнаго пленения избавление. Пастырям нашим, да подаст Господь пламенную ревность о спасении пасомых, мужество и одоление отчаяния и нерадения, в подвиге своего пастырского крестоношения. Наипаче же, отеческое попечение о воспитании юных сердец в целомудрию в любви ко Господу, и послушание родителям своим, в сем бо грядущее Божие благоволение к роду нашему. И во еже помиловати нас, предстоящих зде и за благословенного вино отшедших отец и братии наших, и весь мир в братолюбии утвердити, междоусобия и братского кровопролития избавити, да присно славим, поем и величаем пречестное и великолепое Имя Отца, и Сына, и Святаго Духа, во веки веков. Аминь. Конец и Богу слава! Святитель Петр Могила был прославлен в лике местночтимых киевских святых 6 декабря 1996 г. определением Священного Синода Украинской Православной Церкви (Московского Патриархата).