1 СЛУЖБА святому праведному болярину Феодору Ушакову, Адмиралу флота Российскаго, Непобедимому На Ма?лой вече?рни. На Го?споди воззва?х: стихиры, гла?с 1. Подо?бен: Всехва?льнии му?ченицы: От благочести?ваго ко?рене святоле?пная розга? произше?д,/ плод произнесе? любве? и пра?вды,/ преми?рно благоуха?я ве?рно от души? чту?щыя тя,/ о ни?хже со Ангелы Христу? моли?ся, Фео?доре,// дарова?ти мир и ве?лию ми?лость. Преславное твое житие/ и подвиги велии яже на мори,/ всюду предивна тя показа,/ праведников благолепие, воевод похвало:/ и яко солнце на земли лучи распростер, озарил еси верных сердца,/ совершающих божественную твою память,// всехвальне Феодоре. Благоче?стием и ве?рою све?тло укра?шен,/ яко мужествен воин, и преизряден, и преименит,/ Православнаго Отечества поборник был еси;/ от негоже ныне ублажаемь,// моли даровати нам мир и велию милость. Тирона и Стратилата храбрости подражая,/ изволил еси братися за люди Божия,/ темже и на злочестивых агарян нашед,/ невредимь пребыл еси,/ славу Отечеству твоему принося./ Ныне убо со святыми пребывая,// мирное житие у Господа испроси наследию твоему. Сла?ва, гла?с то?йже: Приидите вернии, в честную обитель Санаксарскую,/ велицыи и малии,/ восхвалим теплаго прдстателя и ходатая/ Христова воина и молитвенника// праведнаго болярина Феодора. И ны?не, Богоро?дичен, гла?с то?йже: Радуйся, Богородице Дево,/ радуйся, похвало всея вселенныя,/ радуйся, Пречистая Мати Божия, Благословенная. На стихо?вне стихи?ры, гла?с 2: Подо?бен: Доме Евфрафов: До?м добродетелей Святаго Духа/ поспешением благодати/ Феодор явися;/ темже ныне сошедшеся// тому воспоим. Сти?х: Возвеселится праведник о Господе/ и уповает на него. Радуйся воевод Русских похвало/ и воинов соблюдение,/ варваров побеждение,/ сирот и вдов заступниче// и страны нашея утверждение. Сти?х: Блажен муж бояйся Господа,/ в заповедех Его восхощет зело. Приими ныне пение/ последователей твоих, о, воине,/ и молящим ти ся у Христа/ испроси на сопостаты одоление,// да ублажаем тя присно. Сла?ва, гла?с то?йже: Пристанище тя небурное/ и стену необоримую/ стяжахом вернии,/ яко флотоводца изрядна// и военачальника предивна, Феодоре. И ны?не, Богоро?дичен, гла?с то?йже. Тайно воспеваем Тя/ Мати Божия,/ гласы православными,/ Имже Церковь блюдома есть// молитвами Твоими. Тропа?рь, гла?с 1. Держа?ве Росси?йстей архистрати?г непобеди?мый яви?лся еси?,/ ага?рянскую зло?бу нивочто?же вмени?в и разори?в;/ ни сла?вы мирски?я, ниже? бога?тства взыску?я,/ но Бо?гу и бли?жнему послужи?л еси?./ Моли? благове?рне свя?те Фео?доре/ во?инству на?шему дарова?ти на враги? одоле?ние,/ Оте?честву во благоче?стии непоколеби?му пребы?ти// и сыново?м Росси?йским спасти?ся. Сла?ва, и ны?не, Богоро?дичен: гла?с то?йже. На Вели?цей вече?рни. Блаже?н му?ж: 1-й антифо?н. На Го?споди воззва?х: стихи?ры на 8, гла?с 2. Подо?бен: Киими: Киими похвальными венцы/ венчаим праведнаго Феодора?/ людей благоверных защитника и воевод првославных похвалу,/ дивнаго в подвизех, безплотных сожителя,/ источника Божественных дарований неисчерпаемаго./ Егоже ради Христос земли Российстей// дарует мир и велию милость. Киими похвальными венцы/ увязем праведнаго Феодора?/ градов мудраго здателя и управителя,/ Храмов Божиих светлаго укра?сителя,/ врача премудраго и Богоприятна,/ исцеляюща недуги и болезни наша./ Егоже ради врагов шатания Христос низложи,// имеяй велию милость. Киими смиренными устнами,/ воспоем Феодора премудраго?/ солнца светлейша молитвенника,/ печальных утешение и порабощенных свободителя,/ похвалу народов православных,/ реку милости и больных врача безмездна,/ душу свою за други полагающа о Христе,// подающаго нам велию милость. Киими духовными песньми/ воспоем преславнаго воина?/ Архистратига искуснаго и непобедимаго,/ врагом безбожным страшнаго,/ правды правило, веселие земли Российския,/ крепость Отечества нашего и забрало,/ сирот питателя, обидимых заступника,/ столпа пресветлаго, просвещающаго нас благодатей светлостьми// и подающа велию милость. Сла?ва, самогла?сен, гла?с 4: Людие и князи,/ вкупе богатии и убозии, радуйтеся,/ светлое днесь торжество прзднующе непобедимаго воеводы,/ праведнаго болярина Феодора:/ воспевайте убо, правовернии воини и простии людие,/ общаго предстателя и помощника,// и молебника о душах наших. И ны?не, Богоро?дичен гла?с тойже: Иже Тебе ради: Вхо?д. Проки?мен дне?. И чте?ния три?: Премудрости Соломоновы чтение (глава 3): Пра?ведных ду?ши в руце? Бо?жией,/ и не прико?снется и?х му?ка./ Непщева?ни бы?ша во очесе?х безу?мных умре?ти,/ и вмени?ся озлобле?ние исхо?д и?х./ И е?же от на?с ше?ствие сокру?шение,/ они? же су?ть в ми?ре.// Ибо пре?д лице?м челове?ческим а?ще и му?ку прии?мут,/ упова?ние их безсме?ртия испо?лнено./ И в ма?ле нака?зани бы?вше,/ вели?кими блгоде?тельствовани бу?дут,/ я?ко Бо?г искуси? я?./ И во вре?мя посеще?ния и?х возия?ют/ и, я?ко и?скры по сте?блию, потеку?т./ Су?дят язы?ком и облада?ют людьми?,/ и воцари?тся Госпо?дь в ни?х во ве?ки./ Наде?ющиися На?нь разуме?ют и?стину/ и ве?рнии в любви? пребу?дут Ему?,/ я?ко благода?ть и ми?лость в прподо?бных Его?/ и посеще?ние во избра?нных Его?. Премудрости Соломоновы чтение (глава 4): Пра?ведник а?ще пости?гнет сконча?тися, в поко?и бу?дет./ Ста?рость бо честна? не многоле?тна,/ ниже? в числе? ле?т исчита?ется./ Седи?на же е?сть му?дрость челове?ком,/ и во?зраст ста?рости — житие? нескве?рное./ Благоуго?ден Бо?гови бы?в, возлю?блен бы?сть/ и живы?й посреде? гре?шник преста?влен бы?сть./ Восхище?н бы?сть, да не зло?ба измени?т ра?зума его?/ или? ле?сть прельсти?т ду?шу его?./ Раче?ние бо зло?бы помрача?ет до?брая,/ и паре?ние по?хоти пременя?ет у?м незло?бив./ Сконча?вся вма?ле, испо?лни ле?та до?лга,/ уго?дна бо бе? Го?сподеви душа? его?,/ сего? ра?ди потща?ся от среды? лука?вствия./ Лю?дие же ви?девше и не разуме?вше,/ ниже? поло?жше в помышле?нии таково?е,/ я?ко благода?ть и ми?лость в преподо?бных Его?/ и посеще?ние во избра?нных Его?. Премудрости Соломоновы чтение (глава 5 и 6): Пра?ведницы во ве?ки живу?т,/ и в Го?споде мзда? и?х, и попече?ние и?х у Вы?шняго./ Сего? ра?ди прии?мут Ца?рствие благоле?пия/ и вене?ц добро?ты от руки? Госпо?дни,/ зане? десни?цею покры?ет я? и мы?шцею защити?т и?х./ Прии?мет всеору?жие рве?ние свое?/ и вооружи?т тва?рь в ме?сть враго?м./ Облече?тся в броня? пра?вды/ и возложи?т шле?м су?д нелицеме?рен./ Прии?мет щи?т непобеди?мый преподо?бие,/ поостри?т же напра?сный гне?в во ору?жие,/ спобо?рет же с ни?м ми?р на безу?мныя./ По?йдут праволу?чныя стре?лы мо?лниины/ и, я?ко от благокру?гла лу?ка облако?в, на наме?рение полетя?т./ И от каменоме?тныя я?рости испо?лнь паду?т гра?ды, вознегоду?ет на ни?х вода? морска?я,/ ре?ки же потопя?т я? на?гло./ Сопроти?в ста?нет и?м ду?х си?лы/ и, я?ко ви?хор, разве?ет и?х,/ и опустоши?т всю? зе?млю беззако?ние,/ и злоде?йство преврати?т престо?лы си?льных./ Слы?шите у?бо, ца?рие, и разуме?йте,/ навы?кните, судии? конце?в земли?,/ внуши?те, держа?щии мно?жества/ и гордя?щиися о наро?дех язы?к,/ я?ко дана? е?сть от Го?спода держа?ва ва?м/ и си?ла от Вы?шняго. На Литии? стихи?ра свята?го, гла?с 5: Посрамил еси диавола и слуг его,/ благоверне воине Феодоре,/ богоугодными своими житием и ратными подвиги,/ Царство Небесное в себе стяжав,/ и славу Отечеству доставил еси./ Ныне молися Христу Богу нашему,// о спасении душ наших. О, Христоноснии народи,/ возопием любовию к дивному заступнику нашему:/ О, благоверне и всечестне Феодоре,/ непрестанно воздвигни руце к Богу/ и молися за святители, монахи и за вся люди,/ избавити грады и вся страны Российския/ от нашествия иноплеменник, и междоусобныя брани,/ и даровати воинству нашему на враги победы и одоление,/ и церквам благостояние мирно устрой,// и моли о душах наших. Гла?с 5: Яко корабль непотопляемь/ тя, Феодоре, обретаем заступника в бедах:/ в мори плавающии и на земли пребывающии,/ сущии далече и близ обретающиися./ Темже сошедшеся вопием: молися ко Господу,// яко да всякаго избавимся обстояния. Сла?ва, гла?с 1: Радуйся и веселися о Господе обитель Санаксарская,/ светло торжествуй и ликуй Христова Церковь,/ со священноиноки и иноки,/ имущи честное сокровище святыя мощи/ преславнаго заступника, праведнаго болярина Феодора./ Приидите, вернии, тецыте, собравшеся,/ и ликующе сице рцыте:/ радуйся, святче Феодоре,/ Отечеству нашему и обители сей утверждение,// и нам верным спасение. И ны?не, Богоро?дичен, гла?с то?йже: На стихо?вне стихи?ры, гла?с 8: Подо?бен:О, преславнаго чудесе: Праведне Богомудре Феодоре,/ чистая твоя душа,/ правоверным смыслом сияющи,/ облистает добродетелей светлостию/ и озаряет верных исполнение,/ бесов тьму отгоняющи./ Темже яко причастника невечерния благодати// тя благочестно вси почитаем, досточудне. Сти?х: Праведник яко финикс процветет, и яко кедр, иже в ливане, умножится. Имея душу милостиву,/ и чист помысл, и сердце бодрое,/ веру неблазненную/ и любовь воистину нелицемерную,/ от земли преставился еси к Небесным/ и с лики праведных водворяешися./ Темже чтем тя священными песньми/ и благочестно вси ублажаем,// святче Феодоре. Сти?х: Возвеселится праведник о Господе/ и уповает на него. О, преславнаго чудесе!/ Непреборимый воин,/ Небесным Стратигом подобен,/ нам является днесь./ Удивляются вси концы земнии,/ ужасаются варварстии полцы./ О, каковый споборник нам даровася!/ Имже,Христе, спаси души наша,// яко Един благоутробен. Сла?ва, гла?с то?йже: Богомудре Феодоре, великий воине,/ блажен еси, яко блаженство Небесное наследовал еси,/ егоже ради милосердия плоды творя,/ нищия и болящия удоволил еси,/ сирот питатель, пленных свободитель был еси./ Тем в непрестаемую радость вшел еси Господа твоего,/ Емуже со Ангелы предстоя,/ моли верою поющия тя,/ изобилие щедрот подати и грехов оставление. И ны?не, Богоро?дичен, гла?с то?йже: Безневе?стная де?во: Тропа?рь, гла?с 1. Держа?ве Росси?йстей архистрати?г непобеди?мый яви?лся еси?,/ ага?рянскую зло?бу нивочто?же вмени?в и разори?в;/ ни сла?вы мирски?я, ниже? бога?тства взыску?я,/ но Бо?гу и бли?жнему послужи?л еси?./ Моли? свя?те Фео?доре/ во?инству на?шему дарова?ти на враги? одоле?ние,/ Оте?честву во благоче?стии непоколеби?му пребы?ти// и сыново?м Росси?йским спасти?ся. * * * * * * На Утрени. На Бо?г Госпо?дь: тропа?рь свята?го два?жды. Сла?ва, и ны?не, Богоро?дичен. По 1-м стихосло?вии седа?лен, гла?с 1: Житейское море со многими подвиги и труды преплывше,/ и в пристанище мысленное покоя пристал еси,/ сосудом благочестия явися, блаженне воине Феодоре,/ требующия милости обогащай, Христа Бога моляще,/ даровати нам велию милость. Сла?ва, и ны?не, Богоро?дичен: Пажить древнюю потреби человекоубийственную,/ утроба Девича Христа рождши:/ темже вся тварь радуется ныне, Пречистая, яко оживльшися:/ и согласно воспевает Твоего Сына и Бога. По 2-м стихосло?вии седа?лен, гла?с 2. Огня свирепство видимых врагов и невидимых,/ восстающих на наследие твое,/ богоприятных твоих молитв, Феодоре победоносче, залей водами,/ да, спасшеся от них, прославим Бога дивнаго в чудесех. Сла?ва, и ны?не, Богоро?дичен: Смири Владычице, врагов вознесенную выю велеречующих,/ советы и злонравия,/ и сердца поучающихся злым на ны по вся дни:/ крепость же и победу подаждь призывающым Тя, Мати Божия,/ радость скорую подающи. По полиеле?и седа?лен, гла?с 8: Радуйся Российская похвало; радуйся, Церкве Божия украшение; радуйся, славо и заступниче Русския земли; радуйся, сирым прибежище; радуйся, Богомудре болярине Феодоре; радуйся, жителю рая; радуйся, верным забрало; радуйся, доме и жилище Святыя Троицы; Юже моли о почитающих всечестную память твою. Сла?ва, и ны?не, Богоро?дичен: О Тебе радуется, Благодатная, всякая тварь,/ Ангельский Собор и человеческий род,/ освященный Храме и Раю словесный,/ девственная Похвало,/ из Неяже Бог воплотися, и Младенец бысть, прежде век Сый Бог наш:/ ложесна бо Твоя престол сотвори/ и чрево Твое пространнее Небес содела./ О Тебе радуется, Благодатная, всякая тварь, слава Тебе. Степе?нна, 1-й антифо?н 4-го гла?са. Проки?мен, гла?с 4-й: Праведник яко финикс процветет, и яко кедр, иже в ливане, умножится. Сти?х: Возвеселится праведник о Господе/ и уповает на него. Ева?нгелие от Матфе?я, зача?ло: По 50-м псалме? стихи?ра, гла?с 6. Оружием твоих молитв,/ праведне Феодоре,/ охраняй и ныне Отечество наше/ и людей православных от всяких бед и напастей. Кано?н. Глас 1. Пе?снь 1. Ирмос: Поим Господеви песнь новую,/ непроходимое бо оземленив, чермное,/ пешешествовати сотвори сыном Израилевым,/ и сопротивныя враги покры море. Просвети ми ум и озари моя чувства, согрешений мрак души моея отгнав, Христе Боже, да чистою совестию возмогу песнь составити и возвеличити Твоего угодника, праведнаго болярина Феодора. Архистратиже непобедимый Российския земли, якоже второе солнце, деянми сияя, всех нас поминай, совершающих память твою, Феодоре многославне. Воистину в мори путие твои, победоносче Феодоре, и стези твоя безбожным агаряном на разорение в водах многих, и следы твоя, архистратиже земли Русския, врагам не познаются. Богоро?дичен: Законов кроме естественных Дево, родила еси Законодавца Бога, Человека бывша. Того, яко Бога, моли, Всенепорочная, наша беззакония презрети. Ин Кано?н. Глас 1. Ирмос: Тойже. Всесвятая Троице, Боже и содетелю всего мира, поспеши и направи сердце, ум и уста наша достойно воспети велию славу добляго воина Твоего благоверного адмирала флота Российского Феодора Непобедимого. Помянем, братия, како Божией благодатию благоверный болярин Феодор во граде Херсонстем душу свою за ближних своих полагает и от смертоносныя болезни многих спасает и любовь ко злым и благим делом являет. Яко волны морския на нас воссташа беззакония наша, яко кораблец в пучине вси мы обуреваемся от прегрешений многих, но в тихое пристанище настави нас , Господи, покаянием и предстательством благоверного воина Феодора и спаси нас. Богоро?дичен: Спаси нас, Мати Истины, обуреваемых люте от страстей и от сатрапов мысленных и часто погружаемых, и исправи нас, Чистая, ко спасения благоутишному пристанищу. Пе?снь 3. Ирмо?с: Да утвердится сердце мое в воли Твоей Христе Боже,/ Иже над водами небо утверждей второе,/ и основавый на водах землю, Всесильне. Предстояще Господу со безплотными силами, неизреченною славою блистающе, праведне Феодоре, за ны молися, творящия честную и преславную память твою. Милование стяжал еси Христоподражательно(е), раздавал еси богатство требующим, Небесное богатство ходатайствующее тебе, еже и получил еси, Феодоре. Ни молва мирская, ни чинов и наград вручение, ни слава тленная твоея еже по Бозе простоты уставиша, Феодоре, но благоволил еси воистину Божественными деянии. Избавляеши обитель твою от лютых обстояний и чтущия тя от потопления в водах, яко предстатель верен и молитвенник изряден, Феодоре преславне. Богоро?дичен: Яко воистину Господь воцарися в Царствие неотпадающее и облечеся псаломски из Тебе, Богомати, в красное благолепие, плоть святую, еюже смерть прият и разруши ея царство. ин кано?н: Ирмос: Тойже. Да постыдятся и смятутся вси врази земли Русския, се бо Бог благоверного болярина Феодора яко оружие Свое, очищает и уготовляет, и яко фиал ярости Своея соделовает и супротив агарян нечестивых направляет. О, воине Феодоре, Моисею подобяся, пса Магомета проповедников со всеми кораблями в пучине морстей, яко войско древняго фараона иногда, потопляеши. Воспрянем от сна уныния, братие, и помолимся ко благоверному воину Феодору Непобедимому да испросит душам нашим от Господа мужество во бранех, долготерпение и велию милость. Богоро?дичен: Устави душ наших свирепые бури, Боже всех щедрый, мольбами рождшия Тя Богородицы, благоверного воина Феодора и всех святых Твоих. Седа?лен; гла?с 3. Буди скорый в бедах утешителю, во бранех предстателю, во градех и странах вся люди неисчетною милостию покрывая, праведне болярине Феодоре, молися Христу Богу о чтущих святую память твою. Сла?ва, и ны?не, Богоро?дичен: Слове Бо?жий, иже рождейся от Девы Богоотроковицы, Тоя ходатайсятвы священными, и праведнаго Феодора твоего Спасе, всякаго обстояния и всякия нужды избави души наша. Пе?снь 4. Ирмо?с: Разумех Всесильне, Твое смотрение, и со страхом прославих Тя, Спасе. Господи, услышахом дивная, яже сотворил еси велиим Феодором и ужасохомся. Восхваляем благость Твою, Господи, еюже исполнил праведнаго Феодора, разумеем, Всесильне, смотрение Твое и ублажаем Феодора предивнаго. Твою поминаем, Боже, милость, юже явил еси в Феодоре человеколюбном, и славословим Тя, милосердый Боже. Богоро?дичен: Кто изочтет силы Твоя, Чистая, но пощади нас, изми из глубины греховныя и настави на благое покаяние безвозвратно. ин кано?н: Ирмос: Тойже. Помяни, диаволе, огнь имже сожжена бысть Капудания, и глубину морскую, в нейже изгибло ополчение твое, и вострепещи, окаянный, езера огненного и жупельного, тебе уготованного на День Судный. О, султан юродивый, флота твоего несть ктому, се бо воин Феодор яко дух бурен не фарсийские, обаче магометанские корабли на Понте Эвксинском сокрушает и могущество нечестивых в ничто обращает. О, селения исмаилитска, о агаряне зломудреннии, восплачьте и возрыдайте и познайте суетство веры магометовой и преклонитеся пред Сотворшим видимое и невидимое и Сыном Его Иисус Христом и Духом Его Святым. Богоро?дичен: Страстей волнение смущает нас и сластьми погружает, Дево Пренепорочная, кормчию Христа рождшая, руку нам помощи простри и спаси нас. Пе?снь 5. Ирмо?с: Яко просвещение наше сый Христе, просвети нас Защитителю жизни нашея, сохрани ны надеющияся на Тя. Просвети твое житие всю вселенную, святе Феодоре, правоверными делесы (делы) сияющее яко солнце, Триличнаго Божества зарею просвещаемь. Иже на мори быв флотоводец искусен и непреборим, испроси наследию твоему мужество и веру непоколебиму, отгоняя присно врагов шатания. Завистию и злобою одержими лжесоюзницы, козни деяху тебе, ты же из глубины сердца вопиял еси; сохрани мя надеющагося на Тя. В жизни временней никаяже рана коснуся телеси твоему, обаче по преставлении поругание многое от злых человек потерпеша честныя мощи твоя, умножая тебе, Феодоре, славу на Небесех. Богоро?дичен: Воспойте вся земля, пойте же Возсиявшему из чрева боголепно Неискусобрачныя, и Сию верным показавшему тверду надежду и похвалу. ин кано?н: Ирмос: Тойже. О како неложный Боже, на островах Керкирских оружием благоволения венчаеши болярина Феодора, да низложит безбожие галльское, да не пребудут беззаконницы пред очима Твоима во веки. Положу на мори руку Его и на реках десницу Его, се бо, Господи Иисусе Христе, от лица верного раба Твоего благоверного воина Феодора иссекаеши вся враги его и ненавидящие его во Адриатстей пучине потопляеши. Господи, днесь на западе солнца врази Твои паки возшумеша и ненавидящии Тя паки воздвигоша главу, на люди Твоя лукавноваша, на Тя завет с диаволом завещаша. Богоро?дичен: Пречистая Владычице, рождшая человеком кормчию Господа, страстей наших непостоянное и лютое утоли смущение, и тишину подаждь сердцам нашим. Пе?снь 6. Ирмо?с: Обыде нас последняя бездна, несть избавляяй, вменихомся яко овцы заколения. Спаси людм Твоя Боже наш, Ты бо крепость немощствующих и исправление. Православную страну Российскую благомилосердо пощади, и милостивно утверди, Боже наш, и мир, и любовь, и здравие со всеми сотвори, Феодора молитвенника имея ходатая о нас. Укроти, воеводо святый Феодоре, находы злотворных человек и из рук их исхити, гонящих и расхищающих немилостивно. Молитвами предваряя к Богу, и Тому предстоя со Ангелы, за весь мир молися, брань неприязненную всю потребити, и победу известну дати на сопостаты воинству нашему. Богоро?дичен: На Небеси Архангели и Ангели, Херувимы и Серафими славят, на земли же вси людие раболепно покланяются Рождеству Твоему, сего ради молим Тя, Владычице: спаси души наша. ин кано?н: Ирмос: Тойже. Господи Иисусе, верный раб Твой адмирал Феодор Непобедимый помощью Твоею вся оплоты галльстии разоряет и вся твердыя их в страх и поношение окрестным языком полагает и безбожие их в конец уничтожает. Радуйся нищих и сирых питатель и покровитель, радуйся вдов защитниче, радуйся юности наставниче, болящих утешение, плененных отрадо и нам всем молитвенниче предивный. О, воине Феодоре! Услыши ны, во истине тя призывающих и прииди от Горних селений к нам во грехах утопающих, якоже Христос сквозе ветр дыхающ и мраз и тму нощную ко учеником Своим и помози нам. Богоро?дичен: Яже от источник источившая воду оставления, Пренепорочная, сердца наши напой, изсохшия всякими преступленьми. Конда?к, гла?с 2. Архистрати?же Росси?йский,/ служи?телю наро?да Бо?жияго,/ ни?щих и угнете?нных свободи?телю,/ нечести?вых наказа?телю,/ поле?зное нам проси? и ве?лию ми?лость,// я?ко спобо?рник наш пра?ведне боля?рине Фео?доре. Икос: Всечестную память почтим угодника Христова, великаго болярина Феодора, храбраго воина на сопостаты и кормчаго благоутишна, и радостныя глаголы от сердца воззовем к нему, сице вопиюще: Радуйся, яко делы благия со тщанием творивый, Радуйся, управителю мудрый и терпеливый; Радуйся, врачу усердный и милостивый, Радуйся, молитвенниче теплый и неутомимый; Радуйся, воеводо праведный и непобедимый, Радуйся, рабе Божий кроткий и человеколюбивый; Радуйся, яко враги злочестивыя смиряяй и устрашаяй, Радуйся, и ныне со Ангелы и всеми святыми за ны молися (молящийся). Радуйся, воине Феодоре, Архистратиже Державы Российския. Пе?снь 7. Ирмо?с: По множеству милости Твоея Человеколюбче, сотвори с нами, да Тебе верно вси воспевающе поим, якоже отроцы: благословен еси Боже отец наших. Велия подвиги совершил еси, несумненную веру имея, споспешествуемый молитвами сродника твоего преподобнаго Феодора, взывающаго: благословен еси Боже отец наших. Кротостию и простотою душевною к себе привлекая, и царицу сим удивил еси, и дары от нея почтен, взывал еси: благословен еси Боже отец наших. Скорбьми утесняемь отовсюду, терпел еси вся, и на Человеколюбца надежду возложив, вопиял еси: благословен еси Боже отец наших. Богоро?дичен: Надеждо всем, Госпоже Богородице, разгони, Владычице, враги души моея и направи на стезю праву. Пощади, Помощнице и надеждо христианская, Сыну Своему зовущи: благословен еси Боже отец наших. ин кано?н: Ирмос: Тойже. О чудесе! Яко же древле Давид пред сенным ковчегом, тако и ты, воине Феодоре пред мощами дивнаго во святых святителя Спиридона Тримифунтскаго главу свою преклоняеши и крестным ходом истинное правоверие на Керкире паки утверждаеши. О камение и горы, падите на мя и покрыйте мя,- рече ересиарх латинский услыша слух о воях твоих, о Феодоре, в Рим ветхий входящия и супротив галлов зловредных, якоже Гедеон супротив Амалика иногда, храбро ополчающиеся. Кто возможет сказати о милосердии твоем, о благоверный воине Феодоре, блажен еси ты, разумеваяй на нища и убога, воистину в день лют избави и сохрани тя Господь. Богоро?дичен: Вод источник молитвенный, Тя Богородительницу ведуще вси, источающ верным струи душам и телом: темже Тя непрестанно славим. Пе?снь 8. Ирмо?с: Песнь Тебе приносим безплотных, якоже отроцы в пещи, и поюще глаголем: благословиите вся дела Господня Господа. Пищи безсмертныя, Тела и Крови Христовы, сподобился еси причаститися, Богомудре, душу твою Небесному Царю и Владыце предал еси, взывая: благословите вся дела Господня Господа. Украшен мудростию и разумом просвещен, смирением сердца лепотствуя, к мысленным прешел еси двором идеже воспеваеши: благословите вся дела Господня Господа. Тобою, праведне Феодоре, земля Темниковская вельми хвалится: в ней бо последния дни благочестно пожив, спасение соделав, Бога Всещедраго и Милостиваго чтити научил еси, зовый: благословите вся дела Господня Господа. Богоро?дичен: Егоже родила еси, Владычице, присно моли работы избавити мя страстей и осуждения, и одержащаго мя лютаго отчаяния, и оскорбляющих мя удержания, Чистая Богорадованная. ин кано?н: Ирмос: Тойже. Под конец жизни твоея во окрестностях обители Санаксарской водворяешися, зде, речеши, покой мой, зде тихое пристанище, зде вселюся во век века. Течение твое скончал еси, веру соблюл еси, сего ради Бог жизнь твою близ мощей преподобного Феодора Санаксарского сродника твоего скончавает и сосуд тя избранный для Царства Небесного приуготовляет. Ущедрил еси Твое создание, Владыко, очистил еси Твоим благоутробием, душе его вожделенное Отечество даровал еси, тело же многотрудное в Санаксарских стенах упокоил еси. Богоро?дичен: Водами животочными, Дево, напой истаявшие душы наши зноем греховным, яко да класы плодоносны возрастим, Чистая, Божественного умиления. Пе?снь 9. Ирмо?с: Радуйся Пресвятая Богоприемная Марие, радуйся Пречистая, падших основание: в Тебе бо явися днесь Владыка, О, чудесе! Обновляяй истлевшыя, и к свету возводя невечернему Отроковице. День празднственный и пользы ходатайственный честный твой совершаем: ты бо Господень угодник и Того заповедей делатель явился еси неослабен, досточудне Феодоре. Зарею Трисолнечныя благодати сияя, светле твой праздник творящих озари и страстнаго омрачения демонскаго избави, Феодоре преславне. Святителие и монаси, священницы и простии, воини и людие, светло предъиграйте и память святаго сына России в песнех возвелич(ай)те. Богоро?дичен: Света приятелище утроба Твоя бысть, просвещающаго мир, Богорадованная. Темже молим Тя: светлу зарю подаждь нам, Богоневесто, мольбами Феодора доблемудраго. ин кано?н: Ирмос: Тойже. О, воине Феодоре! Ты днесь Престолу Божию предстоиши и Славу Его откровенным лицем созерцаеши и тайны сокровенные и страшные Дня Судного разумеваеши. О, воине Феодоре! Помози нам молитвами своими и укрепи на брань супротив зверя, из моря исходяща, силу змея древняго имуща и престол сатаны содержаща и область велию, да не поклонимся ему, ниже послужим. Не отчаивайтеся,- рекл еси, о, Феодоре: Сии бури грозные обратятся ко славе России,- и ныне помози стране и людем нашим предстательством всемощным, да вера и любовь ко Отечеству восторжествуют, да воссияет слава новая Боголюбезного царства Русского. Богоро?дичен: Приими, Владычице, моления Твоих раб и Сына Твоего умоли, с праведным болярином Феодором, подати нам грехов прощение. Свети?лен: Слышана бысть во всех странах превеликая слава твоя, и тогда жены Агарянския страшаху чада своя грозным твоим именем. И ныне, праведне, враги наша невидимо устрашай, ополчающихся на Христолюбивое твое воинство. Сла?ва, и ны?не, Богоро?дичен: Приими, Пресвятая Богородице, молитвы угодника Твоего, праведнаго болярина Феодора, вкупе и наша, и избави, Владычице, от ухищрений злобнаго врага стадо Твое. На хвали?тех стихи?ры, гла?с 4. Подо?бен: Дал еси знамение: Дал еси, Христе Боже, Российстей земли/ заступника преславна, Феодора праведнаго,/ всем в бедах скорого помощника,/ вдов и сирот заступника,/ пленных свободителя/ и нищих питателя,/ и люди своя от всяких бед избавляющаго,/ егоже молитвами даруй градом и обителям нашим утверждение// и людем Твоим велию милость. Дал еси, Христе Боже,/ православней стране Российстей/ крепкаго защитника Феодора непобедимаго,/ вождем похвалу и утверждение,/ врагов преславнаго победителя,/ Отечество свое неотступно храняща,/ егоже молитвами/ даруй на враги победу,// и людем Твоим низпосли велию милость. Дал еси, Христе Боже,/ всем православным людем Твоим, утешителя премилосердаго,/ всехвальнаго болярина Феодора,/ скорбным всем предстателя,/ болящим врача предивнаго,/ крепкое целомудрия забрало,/ отчаянным непостыдную надежду,/ егоже молитвами вся вражия разруши шатания// и людем Твоим даруй велию милость. Сла?ва: гла?с 8, самогла?сен: Приидите Российстии вси православнии людие,/ богатии и убозии,/ честным мощем дивнаго Феодора поклонимся,/ той нас избавит от рук неверных язык и злотворных человек,// и из рук ненавидящих нас молитвами его свободимся. И ны?не, Богоро?дичен, гла?с то?йже: Владычице приими: Моли?тва праведному болярину Фео?дору, Адмиралу Флота Российскаго, Непобедимому. Приникни, праведне воине Феодоре, с горних селений на притекающих к тебе, и вонми молению их: умоли Господа Бога, даровати всем нам, еже ко спасению нашему мы просим от Него при святем твоем предстательстве. Ты великое, возложенное на тя служение тщательно проходил еси, и нас твоею помощию пребывати коегождо, в неже призван есть, настави. Ты, победив супостатов множества, и на нас ополчающихся всех видимых и невидимых врагов низложи. Испроси у Всемилостиваго Бога: страждущую страну Российскую от лютых безбожник и власти их да свободит, и да восставит престол православных царей. Умоли Господа Бога даровати крепкий и ненарушимый мир, и земли плодоносие, пастырем святыню, законом правду и силу, военачальником мудрость и доблесть непобедимую, градоначальником суд, флоту твоему Российскому и всему воинству нашему преданность вере и Отечеству, и неодолимое мужество, всем же православным христианом здравие и благочестие. Сохраняй страну нашу Российскую и обитель сию святую от всех наветов вражиих, да словом и делом прославляется в них всесвятое имя Отца, и Сына, и Святаго Духа, ныне, и присно, и во веки веков. Ами?нь.