Иная Служба
преподобным отцем и старцем
Оптинским
НА ВЕЧЕРНЕ
На Господи воззвах: стихиры святых на 8, глас 1:
Днесь собора преподобнаго прославление / и святаго воинства Российскаго величание. / Земля плод нетления приносит, / небо десницы благодати простирает; / людие же зряще сие сретение ужасаются, / недоумевают и Бога славят: / Великий в советех, Господи, слава Тебе.
Ныне величие славы Оптинской; / ныне торжество и радость совершенная: / старцы Божии чинно от небес исходят / и хвалу от сынов своих принимают. / Велие братство Богом созиждется, / яко несть Господь мертвых, но живых, / и Ему, Владыце и Царю нашему, / едиными устнами, братие, возопиим: / Жизнодавче Христе Боже наш, слава Тебе.
Днесь радость и печаль воинствуют, / радость же победу торжествует, / земля безгласно разверзается, небо милостивно отворяется; / лики небеснии сиянием восходят, / людие духом возвышаются; / вселенная воскресение предызображает и велиим гласом вопиет: / Благословен Грядый во имя Господне.
Ныне сретение велие празднуем, / залог воскресения грядущего торжествуем. / Ныне слезы в мире с радостию, / покаяние в объятиях с милостию; / днесь грех ко стопам праведности припадает, / ложь истину о милосердии молит; / дети главы смиренно преклоняют, / отцы длани милостивно простирают. / Торжествуй, вера православная, / в тебе единей всем примирение.
Приидите, братие, ибо время приспе. / Созиждем гробы пророческия, / украсим раки праведных и возглаголем: / О, отцы святии! / аще быхом во дни ваша, / не быхом убо общницы в распятии вашем. / Се бо и мы смерти ужасаемся, / но о Господе тако глаголати дерзаем: / Боже Отец наших, слава Тебе.
Велия благочестия тайна: / земля отдает небу предлежащее, / сыны приемлют отцов нетленными, / святость воочию зрится и руками осязается, / утвердитеся православнии, / невернии покайтеся, / пришед бо свидетельство последнее, / да веруют вси в живот вечный.
Слава, глас 4:
Возвестите славу и утешитеся, / не людьми, но Богом дарованную / подвизавшимся в пустыни Оптинской отцам преподобным. / Сии благо тайно сотворше, / воздаяние явно прияли есте, / лишения и труды на земле понесоша, / на небесех блаженства достигли есте. / О, слава наша истинная! / уничиженных хвала последняя, / гонимых едино пристанище, / поруганных честь неоскверненная. / Соборне Христа Бога молите, / да приложит на милость суд об отечестве нашем.
И ныне: Догматик
На литии стихиры, глас 8:
Восста от мертвых земля Оптинская, / яко иногда Лазарь Четверодневный: / прииде Господь по мольбам отцев преподобных / на место погребения ея / и рече: Гряди вон! / Восста пустыня чудесно / и изшед на служение пеленами обвита, / ликом воскресшим проповедь совершая, / неверных обращая, ожесточенных умиряя, / всех возставляя вопити: Господи, слава Тебе.
Видя Господь Матерь Свою, / яко вдовицу плачащу об обители умершей, / милосердова о ней и рече: Не плачи. / Приступил же и коснулся врат монастырских, / и восста пустынь и начат глаголати, / и даде ея Матери Своей в попечение. / Страх же объят вся, и славяху Бога, глаголюще: / яко посети Бог людей своих ради печали Матерней.
Се собор преподобных пришед, / паде при ногу Иисусову, / моляще же Его много о пустыни Оптинской, глаголя: / Яко дщи наша ныне умре, / да пришед возложиши на ню руце, и оживет. / Не умре бо земле, но спит, - глаголет пришедый Господь. / И изгнан бысть из нея народ молвящ, / восста обитель по глаголу Божию, / и возвратися дух ея, / и изыде весть сия по всей земли Российстей.
Ины стихиры на литии, глас 7:
Се знамение явися в Церкви Русской: / обитель в солнце облеченная, / чада же ея светло просияша / на падение и восстание многих. / Ей же самой душу оружие пройде, / да откроются от многих сердец помышления, / имже Бог дарует время на покаяние / и велию и богатую милость.
От пустыни собор преподобных / к сонму святых русских приложися, / силам небесным радость даруя, / ликам иноческим празднество устрояя. / Темже возрасте полче божественный, / земная надежда утвердися, / яко Христос прославися во отечестве нашем.
Ныне славу ликующе воспеваем, / новыя иконы лобызаем умиленно, / лампады елеем наполняем, / свечи и паникадила радостно возжигаем; / хоругви износим и шествие торжественное совершаем; / се ныне сретение дети уготовляют отцем преподобным и слезно их молят: / приидите и посетите недостойных чад своих.
О, созвездие небосвода иноческаго! / О, дивная стая орлиная! / Многосветлое паникадило храма Богородицы, / истинная гроздь винограда Христова, / - тако речем вам, отцы преподобнии, / тако именуем и славим собор святых Оптинских.
Царь Небесный / слуг Своих в чертог огнеблещущий вводит, / во одежды белыя облачает, / имена новая, нам не ведомая, нарицает; / на престол Свой их посаждает / и венцы жизни на главы их честныя возлагает. / Слава сия верным и победившим / и дела Его до конца соблюдшим. / О, отцы святии, други Христовы! / помяните у престола Владычня / память вашу посильно совершающих.
Людие вспять возвратитеся, / о временах же утекших нам возвестите; / земли утренния ороситеся, слезы впитанныя нам покажите; / древа восклонитеся, труды с печалями сокрытыми являя; / камни восстаните, красоту древнюю зрети сподобляя. / Вся бо узрим и ужаснемся, / вся бо увидим и устыдимся. / Темже молим вас, отцы святии, / не отрините сынов недостойных, / заступлением вашим ограждающихся.
Слава, и ныне: глас 4:
Предста Царица Сыну Своему, / егда воссташе Господь судити миру; / руце пречистыя в мольбе простерши за ны, / яко голубица крыле свои за птенцы своя, / и ничтоже глаголаше, токмо слезы смиренно имуще; / и о, чудо, ангелов устрашающее, / возмутися духом вселенной Господь, / Бог Всемогущий прослезися, / силы небесныя вспять возвратишася, / суд о земли на милость приложися, / еще мир миру даровася, / яко да возвеличим Богородицу Пречудную.
На стиховне стихиры, глас 2
Подобен: Доме Евфрафов:
Старцы святии, / пророки земли Российския, / Богом Словом Вседержавным / на служение воздвигнутыя, / да возвестится истина последняя (восторжествует народ православный).
Стих: Господи, Господь наш, / яко чудно имя Твое по всей земли.
Пустынь блаженная, / из тебе бысть Христу Богу / глас вопиющий, / имже старцы умоляше / за землю и веру православную.
Стих: Святым, иже суть на земли Его, / удиви Господь вся хотения Своя в них.
Свидетелие истины / отцы преподобнии / во тьме нам спящим, / и тьма не объят вы, / светом веры мир облистающих.
Слава, глас и подобен тойже
Новая скиния Адамова / при дубраве старческой, / обитель Введенская, / восстани в духе Отеческом / в сретение Христу Богу нашему.
И ныне: глас и подобен тойже
Ангельския силы, / Богородице Марие, / с лики человеческими / удивляшася соборне / Матеродевству Твоему Божественному.
Ин Богородичен, глас 8
Подобен: О, преславнаго чудесе:
Богородице пречудная! / Пречудный наш Спасе! / Ликовствует сердце, Вас именуя, / очи слезы источают, / зря на лики Ваша. / О, Владыко со Владычицею! / не оставите люди Своя, / иже от века не имамы иныя четы (Царския) / сердцами нашими повелевающия.
Тропарь преподобным старцам Оптинским, глас 6:
Православныя веры светильницы, монашества непоколебимии столпи, земли Российския утешителие, преподобнии старцы оптинстии, любовь Христову стяжавшии и души своя за чада полагавшии, молитеся ко Господу, да утвердит земное отечество ваше в православии и благочестии и спасет души наша.
Ин тропарь, глас 4:
Введения преславнаго обитель, / Оптина пустынь достоблаженная, / присно уповающая на милость Богоматери, / наполняема рекою, текущею в живот вечный, / возрастивше чудное древо старчества, / уподобилася еси граду, сошедшему с небес, / идеже Бог обитает с человеки, / отирая с очей их всякую слезу, / темже возликуем, братие, / Христа Царя и Бога нашего воспоим / и Владычицу Мира Пречистую Деву восславим, / яко дарова нам пристанище во спасение / и наставников отцев преподобных.
НА УТРЕНИ
На Бог Господь: тропарь святых дважды.
Слава, и ныне; Богородичен.
Седальны зри в Общей Минее.
По 50 псалме стихира, глас 4:
Не умолчим ныне истины православия, / Христом Богом до века утвержденныя, / собором святых старцев (наших) воссиявшей / и доселе во избранных дивно сохраншейся. / Непоколебимо основание ея, / до облак ея величие, / несть бо под небом веры иной, / о ней же подобает спастися нам.
КАНОН
преподобным отцем Оптинским,
глас 2
Песнь 1
Ирмос: Грядите, людие, поим песнь Христу Богу, раздельшему море, и наставльшему люди, яже изведе из работы египетския, яко прославися.
Како восхвалим вас, преподобнии отцы Оптины Пустыни, добре подвиги совершисте, веру спасительную соблюдосте, и весь мир своим богоугодным житием удивисте.
Вземше на рамена своя благое иго Христово, подвизалися есте, отцы преблаженнии, шествовати в царство вечныя жизни тесным путем и достигли есте славы небеснаго предстояния пред Престолом Бога Вышняго.
Слава: Кто испыта труды ваша и болезни, отцы святии, кто виде слезы и поты вашего многоскорбнаго жития, имиже соделали есте души ваша сосуды многия благодати Божия?
И ныне: Мати Бога Истиннаго, приими мольбы рабов Твоих, ищущих Твоего заступления. Ты бо еси пристанище необуреваемое православных христиан.
Песнь 3
Ирмос: Утверди нас в Тебе, Господи, древом умерщвей грех, и страх Твой всади в сердца нас, поющих Тя.
Славу мира сего ни но чтоже вменив, житие чистое избрал еси, преподобне отче Льве, восприяв великую схиму, яко огнепальньй щит непрестанныя молитвы противу козней демонских, и царство вечное наследовал еси, Христу подражая всем житием твоим.
Богу содействующу, истинное жительство духовное во обители Оптине насадил еси, якоже древнии учителие монашескаго делания, блаженне отче Льве, мо лися о спасении душ наших.
В Бозе ревностию исполненный, духовное окормление подвигом старчества людем явил еси, и тем просиял еси яко первоначальник сего спасительнаго делания, преподобне отче наш Льве.
Слава: Научи нас, достоблаженне отче Льве, чтущих святую память твою, житию во Христе, имже сам угодил еси Богу, да и нас, неключимых рабов Своих, всещедрый Господь просветит светом разума и спасет души наша.
И ныне: Бога воплощаема из Тебе зряще, Дево, ужасахуся страхом и трепетом горние силы, и яко сущую Богородицу тя непрестанно величают.
Ин кондак, глас 1
Крепкаго корене монашеского жительства / отрасли благочестия явилися есте, / преподобнии отцы Оптины пустыни, / и яко многоплодный вертоград возрасли есте, / питающе дарами своея святости / алчущия и жаждущия правды Божия, / осеняюще Отечество наше православное / молитвами и предстательством / пред Престолом Бога Вышняго. / Темже прилежно взываем вам сице: / не оставите нас в скорбех и болезнех, / чающих от вас помощи / и избавления от всяких бед и напастей.
Седален, глас 4:
Житейское море воздержанием без труда преплывше, ко пристанищу мысленному безстрастия пристали есте, преподобнии отцы и богомудрии.
Слава, и ныне, Богородичен:
Девство и рождество выше естества и слова в Тебе Богородице стекостеся, яко Бога Воплотившагося родила еси, Спаса душ наших.
Песнь 4
Ирмос: Услышах, Господи, славное Твое смотрение, и прославих, Человеколюбче, непостижимую Твою силу.
Житие твое, преподобне отче Амвросие, яко солнце в сердцах верных возсия, зарю чудес являя, сего ради не забуди и нас, недостойных чад твоих, чтущих блаженную память твою, и любовию твоею просвети души наша, омраченныя грехов множеством.
Вся земля российская позна имя твое, святый отче Амвросие, осияваемая благодатию чудес твоих, и ныне притекающе к раце цельбоносных мощей твоих, просим тя, да молитвами твоими Господь спасет души наша.
Прославляюще твоя подвиги, преблаженне отче Амвросие, в сонме великих старцев Оптинских, молим тя: не остави нас, немощных и убогих, в скорбех и болезнех наших, но помози и избави нас от бед и напастей губительных.
Слава: Яко первая звезда, возсия на небеси от Оптины Пустыни твое преславное имя, преподобне отче Амвросие, возвещая грядущее торжество собора всех отцев, зде просиявших.
И ныне: Един от Святыя Троицы воплотися от Тебе, Пречистая, да спасет весь род человеческий от работы вражия и вечнаго осуждения.
Песнь 5
Ирмос: Света подателю, и веков Творче Господи, во свете Твоих повелений настави нас: разве бо Тебе иного бога не знаем.
Всего себе покорил еси Христу Жизнодавцу, преподобне отче Моисее, исполняя Божественныя заповеди Святаго Евангелия, стяжал еси Духа Святаго в сердце своем, всеусердно трудяся в пустыни, яко верный раб Христов.
Благаго единоревнителя обрел еси, отче Моисее, взирая на подвиги брата своего по плоти боголюбиваго Антония, иже вкупе с тобою пришедый спасатися в обитель Оптину.
Послушания добрый рачитель был еси, преподобне отче Антоние, вся претерпел еси скорби, болезни и лютая искушения от лукавых духов и по кончине своея земныя жизни преселился еси в чертог славы вечныя.
Слава: Добрая двоица явилася еси преподобных отцев и братий по плоти Моисее и Антоние, своими многими подвиги и труды украсивши духовный вертоград обители Оптины, имиже прославися Бог Господь, дивный во святых Своих.
И ныне: Все наше упование на Тя возложихом, Дево Марие, призри на ны, люди согрешившия, с верою чающия от Тебе заступления и спасения.
Песнь 6
Ирмос: В бездне греховней валяяся, неизледную милосердия Твоего призываю бездну: от тли, Боже, мя возведи.
Яко светильник Божия благодати явился еси, преподобие отче Макарие, далече простирая лучи своего равноангельнаго жития, имиже просвещени быша сидящие во тьме и сени смертней.
Испытуя творения богопросвещенных отцев Древния Церкве, порадел еси зело, отче Макарие, о умножении их духоносных писаний, да всяк жаждай грядет и да пиет воду живу во спасение души своея.
Многотрудным и скорбным путем шед в земном житии своем, преподобне отче Анатолие, быв достохвальный ученик богоносных старцев Макария и Амвросия, прииде к ним от калужския земли и с радостию вселися в сей обители во спасение души своея.
Слава: Сотаинник был еси, преподобне отче Иосифе, святаго старца Амвросия и восприял еси от него подвиг духовнаго окормления чад его, наипаче же обители Шамординския, не остави любовию твоею и нас, чтущих святую память твою.
И ныне: Владычице Богородице, отверзи нам двери милосердия Твоего, Ты бо еси спасение рода христианскаго.
Кондак, глас 6:
Воистину дивен Бог во святых Своих, Пустынь Оптину якоже вертоград старчества явивый, идеже богопросвещеннии отцы, тайная сердца человеческаго ведуще, народа Божия печальницы доблии явишася: сии бо на путь покаяния грехом отягощенныя наставиша, в вере колеблющияся светом Христова учения просветиша и Божией премудрости научиша, страждущим и немощным спострадаша и исцеления дароваша. Ныне же, во славе Божией пребывающе молятся непрестанно о душах наших.
Песнь 7
Ирмос: Образу златому на поле Деире служиму, трие Твои отроцы небрегоша безбожнаго веления, посреде же огня ввержени, орошаеми пояху: благословен Бог отец наших.
Тленную красоту мира сего и славу земную презрев, преподобие отче Варсонофие, стопы своя направил еси во обитель Оптину и тамо достигл еси умною молитвою и благочестием духовнаго совершенства, поя Господу: Боже, благословен еси.
Молися о нас, преподобне отче Варсонофие, да спасет Господь милосердием Своим души наша почитающих всех отцев, в Оптине подвизавшихся, да зовем вкупе с ними: Боже, благословен еси.
Узрел еси ты, преподобне отче Анатолие, исполнение пророческих глаголов старца Варсонофия о грядущих бедах России и сам претерпел еси скорби и бурю искушений, с упованием неся крест свой, зовя: Боже, благословен еси.
Слава: Изрядный ученик великаго учителя монашества преподобнаго Амвросия был еси, блаженне отче Нектарие, многосветлыми добродетелями просияв, в последок жития своего претерпел еси изгнание и в Бозе скончал еси земное странствование, поя: Боже благословен еси.
И ныне: Простри руце Своя, Преблагословенная Дево, к Сыну Твоему, Христу Богу нашему, молящи усердно, да помилует нас, грешных, по велицей Своей милости.
Песнь 8
Ирмос: В купине Моисею Девы чудо, на Синайстей горе, прообразившаго иногда, пойте, благословите и превозносите во вся веки.
Венцы нетленныя прияли есте, богоноснии отцы Иларионе, Исаакие и прочия старцы Оптинстии, исполнивше в житии своем закон Христов, и наследовали есте горнии обители Отца нашего Небеснаго, зовуще: благословите, вся дела Господня, Господа.
В смирении претерпели есте вся злострадания, отцы святии Никоне и Исаакие, крест взявше на рамо, яко исповедницы и мученицы Христови, добропобедно житие свое скончали есте, и тако внидосте в радость Господа своего, воспевая: благословите, вся дела Господня, Господа.
Вера ваша приведе вас ко Христу, преподобнии отцы, надеждою на Его всеблагую волю укрепляемии: добрыя плоды любве принесли есте Богу Небесному, зовуще: благословите, вся дела Господня, Господа.
Слава: Прославляющего днесь собор Оптинских старцев, небесным облаком сих свидетелей правды Божия осеняемии, воспоим, вернии людие, песнь Богу, взывающе: благословите, вся дела Господня, Господа.
И ныне: Неусыпаемую в молитвах Заступницу обрете Тя, Непорочная Дево, человеческий род. Темже радующеся, поем: благословите, вся дела Господня, Господа.
Песнь 9
Ирмос: От Бога Бога Слова, неизреченною мудростию, пришедшаго обновити Адама, ядию в тление падшаго лютее, от Святыя Девы неизреченно воплотившагося нас ради, верни единомудренно песньми величаем.
Се отверзеся вам, отцы святии, Царство Небесное, скончавшим доброе житие на земли, и ныне зрите Славу Божию, якоже ангельское воинство, непрестанно славословяще Триипостасное Божество.
Вознесите, преподобнии отцы, молитвы ваша горе, яко кадило благоуханное, о всех чтущих вашу святую память, споспешествующе нам в скорбных обстояниих благоугодити Богу и сподобитися наследовати жизнь вечную.
Множество монахов ныне во святей Оптине обители торжествует, величая собор Богоносных старцев, Богом дивно прославленных, принесем и мы хвалу Христу Спасителю нашему, прославляющему прославлыших Его.
Слава: Воспоим, братие, песнь нову Господу Иисусу, прославльшему днесь велий сонм старцев Оптинских, и с верою поклонимся ему, да не отринет от Лица Своего и нас грешных рабов Своих, чающих себе спасения их молитвами.
И ныне: Родила еси безлетнаго Сына, Пречистая, плоть нашу приимшаго, Кровию Своею на Кресте омывшаго от грехов падшаго Адама, умоли убо Спаса нашего избавити нас от вечныя смерти.
Светилен:
Процвели есте, яко финикс, давидски, и обители явистеся Духа Пресвятаго: и славнии вселенней показашеся. О нас непрестанно молите, почитающих верою пречестную память вашу, преподобнии.
Слава, и ныне:
Тя песньми немолчными ублажаем Дево. Яко от Троицы Единаго родила еси, Богородице, и носиши на Божественную руку Пребогатое Слово, непременно и неизменно.
На хвалитех стихиры на 4, глас 8:
Радуйся, земле Оптинская, / Заиорданье Российское! / Ангелом место возлюбленное, / человеком страна светлая. / Дивны красоты твоя, / велия слава твоя, / чудны обетования твоя! / Красуйся, благословенная, и ликуй, / яко Господь Бог с тобою.
Восклонитеся, вернии, / воздвигните главы ваша, / зане облак свидетелей Христовых облек землю нашу. / О, высоте и слава Российская, / покров веры нетленный. / Яко радуга подвигов ваших сияние, / яко дождь животворный милосердие ваше велие; / пророчества ваша яко гром небесный, / силы ваша яко молнии огненныя. / Древле земное в небесное претворивше, / ныне светом преображенным сияете нам, / зряще Солнце Правды Христа Бога нашего.
Радуйся, Кана Галилейская, / начало чудесем положившая. / Радуйся, пустынь Оптинская, наследие чудотворства приявшая. / Яко Господь избирает тя и ублажает, / купно Мати Его и ученики Его, / темже приимите людие радость совершенную, / утешение познайте, истиной подаваемое, / и источник ликования превечнаго.
Возрадуйтеся, други и недруги, / ныне всем ликование подобает, / надлежит всем пение сладкогласное: / ничтоже может любви Божией противостати, / вся радостию побеждаются, / вся веселием преклоняются. / Темже Бог наш Всесилен и Чуден, / даруя святым Своим честь и славу / и недостойным Его Свою велию милость.
Слава, глас 6:
Лики ваша лучезарнии, о, отцы святии, / церквам Российским свет невечерний, / мощи ваша - благоухание жизни вечной, / писания ваша - хлеб и питие истинные. / Вас, отцы преподобнии, радуяся именуем, / вас и печалуяся призываем, / темже Церковь небесная от клира земнаго пополняется.
И ныне, глас тойже:
Имуще чреду священную, / на земле Русской по долгу пребываеши, Богородице всепетая, / но по любви Матерней слезы проливаеши / и молишися о всех непрестанно. / Темже не остави, Владычице, люди Твоя / и милостию обогати от щедрот Твоих.
На Литургии
служба преподобным.
МОЛИТВА
преподобным отцем и старцем,
в Оптиной пустыни просиявшим
О велицыи угодницы Божии, столпи и светильницы Земли Российстей, преподобнии и богоноснии отцы наши Оптинстии, Льве, Макарие, Моисее, Антоние, Иларионе, Амвросие, Анатолие, Исаакие и Иосифе, Варсонофие, Анатолие, Нектарие, Никоне и Исаакие, по закону евангельскому Господа Бога всем сердцем и всею душею и всем разумением возлюбившии и всему народу Божию во спасение бывшии; сего ради под покров Пресвятыя Владычицы нашея Богородицы во обитель Оптину, покаявшимся разбойником основанную, притекшии, путем тесным и прискорбным смирения и самоукорения до конца дней ваших ходившии, темже убо благодатныя дары Святаго Духа преизобильно стяжавшии; старых и младых, знатных и препростых, мудрых века сего и худоумных, никогоже от грядущих к вам ижденувшии, николиже тща и неутешна отпустившии, но светом истины Христовы всех просветившии и духовно воскресившии, ближних ваших, яко себе самех, возлюбившии и тех в сердце своем вместившии, по словеси апостола, пророчествующе и назидающе, увещающе и утешающе. Умолите Милосердаго Господа, во обитель райскую разбойника благоразумнаго с Собою вземшаго, даровати нам, недостойным, яко работником единонадесятаго часа, дух сокрушения, сердца очищение, уст хранение, правоту деяний, мудрование смиренное, слезы покаяния, веру непостыдную, любовь нелицемерную, мир душевный и здравие телесное, да предстательством вашим сподобит нас Господь добраго ответа на Страшнем Судищи Своем, вечных мук избавляя, и Царствия Небеснаго купно с вами да удостоит во веки веков. Аминь.


Последования, вошедшие в "иную" службу преподобным отцам Оптинским, были составлены в России; сама Служба еще не одобрена Синодальной Богослужебной комиссией, за исключением тропаря, кондака и молитвы, утвержденных комиссией 30 мая 1996 г. Тексты канона и светильна воспроизводятся по изданию Свято-Успенского подворья Оптины Пустыни в Санкт-Петербурге (2002 г.). Стихиры, вошедшие в состав Службы, а также иные тропарь и кондак в разное время были записаны автором, новосвященномучеником иеромонахом Василием (Росляковым), в его дневнике, а затем соединены им в настоящем виде (см. Иеромонах Василий. Я создан Божественным Словом. М.: Изд-во Сретенского монастыря, 2002).