МЕСЯЦА СЕНТЯБРЯ В 15-й ДЕНЬ
Попразднство Воздвижения Честнаго и Животворящаго Креста Господня.
И святаго мученика Николая протодиакона

     ВЕЧЕР

На Господи, воззвах: стихиры праздника, глас 5, три и святаго три, глас 8:
     Отче священнотаинниче Николае, прежде даже страдания твоего, предочистил если себе помыслов хранением, молитвой и скорбей терпением, последи же и мученик Христов показался еси, моли спастися нам.
     Отче исповедниче Николае, судии неправедну представ, всякое свидетельство ложное отвергл если, и Христа пред человеки исповедал еси, за Него же и смерть приял еси, моли спастися нам.
     Отче Николае блаженне, дивное житие твое безумие миру показася, многи узы и скорби претерпел еси, но любве божия никакоже разлучился еси, моли спастися нам.
Слава, святаго, глас 6:
  Отче священномучениче Николае, вне града пострадал еси якоже и сам Господь, скры земля честныя мощи твоя, идеже и телеса иных святых множества, чающих воскресения мертвых, молящихся спастися нам.
И ныне, праздника, глас тойже.

     Вход, прокимен, глас 7: Бог наш на Небеси и на земли, вся, елика восхоте, сотвори:
     Таже ектения: Рцем вси:
     На стиховне стихиры праздника, глас 6.
Слава, святаго, глас 8:

     Победы тезоименит показался еси, священномучениче всечестне Николае, житием твоим проповедав Христа Бога нашего, и пред мучители Того исповедал еси, тем же не престай моляся о мире всем, и память твою почитающих.
И ныне, праздника, глас тойже.

Тропарь, глас 1:      Отче блаженне Николае, молитвенниче и мучениче Гоподень, утешителю к тебе притекающих, моли спастися нам.
Слава, и ныне, праздника: Спаси, Господи, люди Твоя:
НА УТРЕНИ
На Бог Господь: тропарь праздника дважды.
Слава, святаго. И ныне, праздника.
По кафисмах седальны праздника.
Канон праздника, глас 8, со ирмосом на 6 и святаго на 6.

Канон святаго, глас 8:

Песнь 1
     Ирмос: Поим Господеви, проведшему люди своя сквозе чермное море, яко Един славно прославися.
     Припев: Святый священномучениче Николае, моли Бога о нас.
     Господеви поем, славно бо проставися во угоднике своем Николае священномученике.
     Прославил если Бога во всем житии твоем, отче, темже память твою святую празднуем.
     Слава: Кто подобен Тебе в бозех, Господи, кто подобен Тебе; прославлен во святых, дивен в славе творяй чудеса.
     И ныне: В скорби нас и бедах сущих посещения Божественнаго и промышления от Тебе сподоби, о Богомати Владычице.

Песнь 3
     Ирмос: Утверди мя, Господи, силою крестною, и даруй мне сердце чистое, да о Тебе хвалюся, Блаже.
     Прежде даже страдания твоего, отче, во Господе утвердися сердце твое.
     Господь, даяй молитву молящемуся, благодать пресвятаго своего Духа тебе, низпослал еси.
     Слава: Несть свят яко Господь, и несть праведен яко Бог наш, и несть свят паче Тебе.
     И ныне: Лютыми недуги и страстьми греховными обуреваемым, и вражескими нападении истязуемым, и в ров погибели впадающим, Ты нам помозй, Богородице Дево.
Кондак и икос праздника.
Седален святаго, глас 4:
     Отче Николае, священнослужителю благоговейный, нищим помошниче, скорбящим утешитель, мучениче Христов славный, помяни ныне и нас, твою память почитающих.
Слава, и ныне, праздника, глас тойже.

Песнь 4
     Ирмос: Тайно пророк предзря, от Девы тя, Слове, воплощаема, песненно вопияше: слава силе Твоей, Господи.
     Господь Бог твой, сила твоя, учинил есть нози твои на совершение благих дел своих.
     Рози в руках твоих, отче, почил еси в день скорби твоея, и на высокая тя Господь возведе.
     Слава: Изшел еси на спасение людей Твоих, Господи, и хваления Твоего исполнь земля.
     Иныне: Исцели, Чистая, душевныя наша немощи и страсти телесныя, поспеши, Госпоже, здравие подати, Врача всем рождшая, Христа.

Песнь 5
     Ирмос: Утренююще к Тебе, Человеколюбцу, воспеваем Тя, Христе Боже, даруй нам милости Твоя.
     От нощи жития сего утреневал еси к Богу духом твоим, в скорби и веселии поминал еси Его, и Той приуготовал есть путь твой к Нему.
     Господь Бог наш стяжа тя, земля же покры тя, отче, яко скоровище некое многоценное
     Слава: Возгласи древле пророк, предзря второе славное паки пришествие Твое, Господи: воскреснут мертвии и востанут иже во гробех, и возрадуются иже на земли.
     И ныне: Избави нас от бед, Богородице Чистая, вечное рождши Избавление и мир, всяк ум превосходящий.

Песнь 6
     Ирмос: Отвергл мя еси во глубины сердца морского, и видех чудеса твоя, Господи.
     Оскудеша любовь, оставлена бысть милость в людех, сего ради бездна последняя обыде нас, твако пред судищем мученик Христов глаголал еси.
     Из темницы, якоже из чрева адова, со гласом хваления и исповедания ко Господу Богу Твоему взывал еси.
     Слава: Внегда скончаватися от мене души моей, Господа помянух, и да приидет к тебе молитва моя ко храму святому твоему.
     И ныне: Заступницу Тя жизни вемы и твердую Хранительницу, Дево, и искушений тучи разсеявающую, и бесов нападения отгоняющую, и молимся всегда: от гибельных страстей наших избави нас.

Кондак святаго, глас 3:

     Взем крест твой за Христом шел еси, и Царствя Его достигл еси, темже поминай и нас зовущих ти: радуйся, отче Николае, молитвенниче и мучениче блаженне.
Икос:
     Ангельское служение на земли совершил если, последи же и мученик Христов явился если, отче, темже зовем ти таковая:
     радуйся, от юности путь праведного жития избравый,
     радуйся, Церкве Христовы диаконе благоговейный,
     радуйся, благий советниче к тебе приходящих,
     радуйся, нуждным присный помошниче,
     радуйся, во дни смуты не смутивыйся,
     радуйся, Христа пред богоборцы исповедавый,
     радуйся, молитвенниче неустанный,
     радуйся, даровании духовными украшенный,
     радуйся, многи поношения и скорби за Христа претерпевый,
     радуйся, даже до смерти за Него пострадавый,
     радуйся, земли нашея безценное сокровище,
     радуйся, Царствия Христова прекрасный жителю,
     радуйся, отче Николае, молитвеннче и мучениче блаженне.

Песнь 7
     Ирмос: В пещи огненней отроки спасый, Благословен еси во веки Господи, Боже отец наших.
     Преда Господь землю нашу в руки беззаконник, они же тя, отче, в темницу, якоже в пещь, ввергоша.
     Судии неправедну представ, всякое свидетельство неправедное отвергл еси.
     Слава: Благословен Еси, Господи, Боже отец наших, хвально и прославлено имя твое во веки.
     И ныне: Телесныя слабости и душевныя недуги, Богородительнице, любовию приступающим к Тебе, Дево, исцелити сподоби, Спаса Христа нам рождшая.

Песнь 8
     Ирмос: Преподобнии Твои отроцы, в пещь ввержени пояху: благословите дела господня Господа.
     В преподобии и смирении сердца пел еси Господа, за вся благословил Его.
     Студ и мраз в темнице претерпевая исповедал еси Господа, яко той есть Благ, якро в век милость Его.
     Благословим: Безначального Твоего Отца, и Тебе, Христе Боже, и Пресвятаго Твоего Духа, херувимски славословити дерзающе глаголем: Свят, Свят, Свят Еси Боже Наш, Богородицею помилуй нас.
     И ныне: Напастей Ты прилоги отгонявши и страстей нападения, Дево, темже Тя поем во вся веки.

Песнь 9
     Ирмос: Тайно пророк предзря, от Девы тя, Слове, воплощаема, песненно вопияше: слава силе Твоей, Господи.
     В самый день воздвижения Честнаго Креста Господня на смерть ведоша тя, на него же со упованием взирал еси.
     Скры земля честное тело твое, отче, но воскресит тя Христос Господь, егда приидет паки во царствии своем.
     Слава: Благословен Господь Бог Израилев, яко посети и сотвори избавление людем своим.
     И ныне: Пристанище и предстательство к Тебе прибегающих буди, Дево, и стена нерушимая, прибежище же, и покров, и веселие.

Светилен, глас 3:
     Свет Христов просвети тя, отче Николае, от него же ныне и нам облистал еси.
Слава, и ныне, Креста.

На стиховне стихиры праздника, глас 2.
Слава, святаго, глас 6:
     Днесь Христова Церковь, мученики яко цветы украшаема, в песнех вопиет ти, Христе Боже, во святых Дивен Сый, спаси нас.
И ныне, праздника, глас тойже.