5 (18) февраля
- икона Божией Матери «ВЗЫСКАНИЕ ПОГИБШИХ»
- молятся при головной и зубной боли, лихорадке, болезни глаз, о вразумлении отпавших от веры православной, погибающих детях, о благодатном браке и от пристрастия к винопитию.

Тропарь, глас 4:

Взыщи нас, погибающих Пресвятая Дево,/ не по грехом бо нашим наказуеши нас,/ но по человеколюбию милуеши:/ избави нас от ада, болезни и нужды/ и спаси нас.

Молитва

О, Пресвятая и Преблагословенная Дево, Владычице Богородице, Споручнице грешных и Взыскание погибших! Призри милостивым Твоим оком на нас, предстоящих пред святою иконою Твоею и со умилением молящихся Тебе: воздвигни нас из глубины греховныя, просвети ум наш омраченный страстьми, и уврачуй язвы душ и телес наших. Не имамы иныя помощи, не имамы иныя надежды, разве Тебе, Владычице: Ты веси вся немощи и согрешения наша, к Тебе прибегаем и вопием: не остави нас Твоею небесною помощию, но предстани нам присно, и Твоим неизреченным милосердием и щедротами спаси и помилуй нас погибающих. Даруй нам исправление греховныя жизни нашея и избави нас от скорбей, бед и болезней, от напрасныя смерти, ада и вечныя муки. Ты бо, Царице и Владычице, скорая помощница и заступница всем притекающим к Тебе, и крепкое прибежище грешников кающихся. Подаждь убо нам, преблагая и всенепорочная Дево, христианский конец живота нашего мирен и непостыден и сподоби нас Твоим ходатайством вселитися в обителех небесных, идеже непрестанный глас празднующих радостию славит Пресвятую Троицу, Отца и Сына и Святаго Духа, ныне и присно и во веки веков. Аминь.