Тропарь собору Московских святых, гл. 4.

Днесь пророчество святителя Петра/ пред очами нашими сбывается,/ сердце бо России град Москва/ свыше славу велию приемлет,/ украшаем, яко бисером честным,/ многим сонмом Божиих угодников;/ к нимже мы любовию возопиим:/ о, пречуднии святителие,/ исповедницы и мученицы новии,/ благовернии князие, преподобнии отцы,/ и премудрии юродивии,/ и вси святии, знаемии и незнаемии,/ яко благочестия столпи,/ молите Христа Бога// стране нашей в мире спастися.

Кондак, гл.3

Возвеличися ныне, граде Москво,/ велиих даров духовных сподобляющися,/ яко сокровищница пречестная/ святыням и мощем угодник Божиих/ и отечество возлюбленное многим святым,/ к их же помощи усердно прибегаем:/ о святых Московских дивный сонме,/ вашими ученьми и деяньми/ вкупе и страданьми за Христа,/ души наша просветите// и спасения нам присно будите ходатаи.

Тропарь Царственным мученикам, гл.7

Ангели земли Российския,/и воскресения ея путеводителие,/ Царю Николае и Царице Александро,/ начавшемуся богоотступлению,/ Державою благоверне правившии,/ и юныя Великия Княжны,/ в трудех и милосердии добре подвизавшияся,/ и Царевичу- страдальче Алексие,/-Царственнии страстотерпцы,/ яко агнцы незлобивии,/ от безбожных губителей Руси/ мучимии и закланнии,/ ныне же царство вечное приимшии,/ молитеся Небесному Царю Царей/ о Державе сродников ваших,/ просветитися ей верою отцев// и покаянием паки возродитися.

Кондак, гл.3

Днесь ублажаем Царственныя страстотерпцы,/ первее богоугодне России послужившия,/ труды и скорби велия понесшия,/ от богоборцев за благочестие возненавиденныя,/ и сего ради яко Православия столпи,/ слугами диавола убиенныя./ Молим вы, святии мученицы:/ Николае, Александро, Алексие,/ Ольго, Татиано, Марие, Анастасие,/ молите Христа Бога// благочестием просветити люди ваша.

Тропарь свт.Иннокентию Пензенскому (Смирнову), гл.5

От юности смиренным нареченный,/ в монашестве же чистоте тезоименный,/ духовной мудрости любитель ты явился еси,/ златовещанный благочестия учитель,/ и лживых пагубных учений обличитель,/ за Истину безумными гонимый,/ незлобие и кротость проповедавый,/ и паству Пензенскую ревностне пасый,/ святителю всечестне Иннокентие,// моли Христа нас умудрити во спасение.

Тропарь святым мученикам Инне, Пинне и Римме, гл.2

Якоже Первозваннаго ученицы/ первозвани явистеся от словен,/ и братию вашу/ светом Истины просвещающе,/ от безбожнаго свирепаго князя/ лютую кончину прияли есте,/ мразом окованни и ледом удавленни,/ на Дунае реце в Скифстей стране./ Но яко души за други положшии,/ святии Инно, Пинно и Риммо,/ и о нас всемощныя молитвы приносите,/ вся языки словенския// паки ко Христу обращающе.

Кондак, гл. той же

Велия веры исправления:/ льдом окованни, яко на воде упокоения,/ святии Инна, Пинна и Римма радовахуся,/ мучитель же несмысленно яряшеся,/ плоды их винограда тщася погубити,/ но обаче доныне от словенских язык/ святыя гроздия Христос приемлет,/ и первомученик словенских венчает венцы./ Сего ради и мы,/ взращенных вами верных отрочата,/ благодарим и молим вы, святии:/ испросите теплыми молитвами и нам// в Дусе истины по Бозе ревновати.

Тропарь Соловецким Новомученикам и Исповедникам, гл.7

Днесь отоцы Соловетстии/ паки славою от Господа венчаются,/ яко дивных страстотерпец новых лик/ тамо паче звезд просиявает,/ очищаяй ны огнем страданий их,/ люте мучимых и убиенных./ Темже крепцею любовию притекаем к вам,/ святолепное собрание святителей,/ иереи же и иноци,/ и мирян честных сословие,/ за Христа на сих отоцех пострадавшии,/ яко много дерзновение стяжавшии,/ укрепите же прилежными молитвами и нас/ в вере истинней и благочестии// стати даже и до крове.

Кондак, гл.2

Христовою любовию распаляеми, мученицы,/ и Того крест на рамо вземше,/ понесли есте, божественне претерпевающе лютость мук,/ в совершеннем смирении/ воле Божией предающе себе,/ непоколебими пребысте/ во всех мыслимых и немыслимых бедах:/ терзаеми, жегоми, стружеми,/ темже благодать Господню прияли есте/ утверждати в вере и благочестии всех,/ с любовию к вам притекающих,/ тем зовем вам:// радуйтеся, Новомученицы и Исповедницы Соловецтии.

Тропарь преподобноисповеднику Сергию (Серебрянскому), сподвижнику Великой Княгини преподобномученицы Елисаветы, гл.8

Доблий воинов Российских пастырю, / благочестия и веры крепкий адаманте,/ преподобномученицы Елисаветы бодренный сподвижниче,/ мудрый наставниче сестер обители Милосердия,/ незлобиво узы претерпевый за Христа / и велиих даров Святаго Духа сподобльшийся,/ исповедниче и равноангельне подвижниче Сергие,/ моли Христа, Емуже добре послужил еси// смирение спасительное нам даровати.

Тропарь преподобному Серафиму Вырицкому, гл. 3

Купец велик соделался еси,/ преподобне отче Серафиме,/ сый в мире, к многому богатству тленному/ ты николиже сердца прилагал еси,/ послушник истинен/ и добродетелей подвижник,/ егда же, вся оставль,/ на крест монашества восшел еси,/ дары Святаго Духа многи тебе дашася/ и яко единаго от древних тя явиша/ пророка, старца,/ чудотворца и молитвенника,/ столпа подвижником, спасения вожда./ Сего ради молим тя:// и нас премудро ко спасению управи.

Кондак, гл. тойже

Возрадуйся паки, граде святаго Петра,/ и малая весе Вырица, возвеличися,/ се бо светильник веры в тебе просиявает,/ всеисцеляющий бальзам нам источается,/ новоявленный бо великий чудотворец,/ любве и покаяния наставник,/ пророк и старец,/ новый преподобный Серафим в тебе является.

Тропарь преподобному Зосиме (Верховскому), гл.8

Отеческаго учения ревнителю,/ Сибирския пустыни всекрасное прозябение,/ деяния и созерцания бодренный подвижниче,/ безмолвия рачителю и обители невест Христовых устроителю,/ сосуде Духа, Зосимо преподобне,// моли Христа Бога, да просветит души наша.

Кондак, гл.4

Первее в Сибирстей стране/ инокиням пустынную обитель возградил еси,/ оттуду же неправедне изгоняемь,/ на Промысл Божий упование возложил еси,/ имже паче ума огражден,/ яко неврежден, путьшествие творя,/ Богоматерию Одигитриею управляемь,/ Московских пределов достигл еси,/ и зде паки руководство обителию восприим,/ Богособранную паству твою/ добре упасл еси,/ нам же образ жития твоего/ и медоточная учения оставил еси,/ преподобне Зосимо,/ моли Христа Бога// сохранитися от всякия скверны душам нашим.

Тропарь святому праведному Алексию Московскому (Мечеву), гл.3

Яко чудо Божие явился еси,/ в граде Московстем, отче Алексие,/ не в пустыни бо, но посреде молвы процвел еси,/ в годину люту богоотступления,/ обаче древним упдобился еси,/ провидец сый, молитвенник и старец,/ и страждущим утешитель и врач,/ сего ради о Российстей пастве,/ ходатай ныне буди непреложен,// молитвенниче о душах наших.

Ин тропарь, на перенесение мощей, гл.4

Наста день новаго торжества,/ град Москва радуется,/ и вся Российская страна ликовствует/ новыми пеньми духовными,/ днесь бо священное торжество/ в пренесение честных и многоцелебных мощей/ праведника и чудотворца Алексия,/ яко бо светило пресветлое,/ воссия нам благодатными лучами,/ потребляя тьму недуг и страстей/ от поющих прилежно,/ спасай нас молитвами твоими// праведне Алексие отче наш.

Тропарь священномученику протоиерею Иоанну Смирнову, гл.2

Священномучениче Иоанне,/ не всуе ты в писаниях отеческих/ прилежно поучался еси;/ от юности смирение и кростость возлюбив,/ и пред мучители Христа бесстрашно проповедал еси./ Тем же и мы, чтущии страдания твоя,/ яко теплаго заступника прилежно молим тя:/ испроси нам разума и крепости/ словесы и делы исповедати Христа// и моли спастися душам нашим.

Кондак, гл.3

Кротость и незлобие твои,/ отче Иоанне,/ и отеческим учением последование,/ яко лествица небовосходная/ возведоша тя к духовному преспеянию/ и ко иже за Христа страданию,/ и венец сугубый исходатаиша ти,/ сего ради молим тя:/ научи и нас, тя почитающих,/ крест свой взяти и за Господом идти// и моли спастися душам нашим.