СЛУЖБА СВЯТЫМ ЦАРСТВЕННЫМ МУЧЕНИКАМ

Память святых царственных мучеников: Царя Николая, царицы Александры, царевича Алексия, царевны Ольги, Татианы, Марии, Анастасии от безбожныя власти избиенных.

Подобен: Егда от древа тя:

          Егда на царство венчание восприял еси, помазанииче Николае, в молитве пред народом глаголя: Владыко мой и Господи, настави мя на служении сем велицем, да будет премудрость твоя со мною, да разумею, что угодно есть пред очима твоима. Тако не о славе земней попечение имел еси, но паче в славе небесней.

          Егда на Руси начася тяжкаго испытания время, тогда умолил еси Заступницу державную, стастотерпче святый Николае, да приимет власть царскую на пречистеи руце свои, кровь бо Твоя и народа Твоего вопиет ко Господу. Вкупе со страдальцы земли русския да вменит ю Христос в прощение грехов, молитвами вашими и Богородицы.

          Егда от престола поневоле уклонился еси, боговенчанный царю Николае, но не от паствы твоея, отступившия и предавшия тя, ниже от Пастыреначальника Христа. Тогда приял еси заклание кротко за Него, да спасет Он от престола славы царствия своего заблудшее стадо Твое.

Ины стихиры, глас 6.

Подобен: Всю отложивше:

          Всю отложивше на небесех надежду, сокровище некрадомо себе святии мученицы сокровищствоваша, егда отступися Русь от Бога своего, и посла Господь многи праведныя, призывая к покаянию. Но народу не послушавшу сих, попусти Господь испытание велие, яко да грешныя вразумит, верныя же прославит, являя сонм новых святых мученик, от нихже велиции бысте страстотерпцы царственнии.

          Все житие твое во Христе есть, боговенчанная мученице, святая царице Александро новая! Прешла бо еси от иноверия к православию, егоже восприяла еси всем сердцем твоим, возлюбивши молитву и храм Божий, еще же и поучения святых отец, возрастивши чада твоя к служению народу своему, и уготовляющи их к смерти за Христа, терпящи кротко клевету, сего ради молим тя, моли спастися душам нашим.

          Вси святии царевномученицы, невесты Христовы: Ольго и Татиано, Марие и Анастасие, яви вас Господь, яко ангелы во стране российстей, бысте бо чистоты и сострадания образ, любовь велию имущыя ко всем, наипаче ко страждущым, еюже послужисте, по заповеди Христове: болен бех и посетисте мене: сего ради ублажаем вас.

          Всю возложивый веру свою на Господа, возлюби силу крестную, святый мучениче царевичу Алексие, сия сила поможе тебе понести страдания неисцельного недуга, чрез все твое житие маловременное и с кротостию прияти смерть за Христа. И ныне о нас молися в бесконечной жизни, да подаст терпение и нам Господь, верою и любовию совершающым память твою.

Слава, глас 6:

          Кто труды твои не ублажит во славу Божию, о Царю мучениче Николае; кто не воспоет бездну страданий твоих; сия попусти Господь за грехи народа, да явит благочестие твое, яко новаго Иова, и да стяжати славный мученический венец на небесех сподоби, идеже ныне ликуя со ангелы, предстательствуя за ны пред Богом, Того моли, блаженне, спастися душам нашим.

          И ныне, глас тойже: Кто Тебе не ублажит, Пресвятая Дево; кто ли не воспоет Твоего Пречистаго Рождества; безлетно бо от Отца возсиявый Сын Единородный; Той же от Тебе Чистыя пройде, неизреченно воплощься, естеством Бог Сый, и естеством быв человек, нас ради, не во двою лицу разделяемый, но во двою естеству неслитно познаваемый. Того моли Чистая, Всеблаженная, помиловатися душам нашим.

Премудрости соломоновы чтение:

          Праведных души в руце Божией, и не прикоснется их мука. Непщевани быша во очию безумных умрети, и вменися озлобление исход их, и еже от нас шествие сокрушение: они же суть в мире. Ибо перед лицем человеческим аще и муку приимут, упование их безсмертия исполнено: и вмале наказани бывше, великими благодетелствовани будут, яко Бог искуси их и обрете их достойны себе: яко злато в горниле искуси их, и яко всеплодие жертвенное прият я. И во время посещения их возсияют, и яко искры по стеблию потекут: судят языком и обладают людьми, и воцарится в них Господь во веки. Надеющиися нань уразумеют истину, и вернии в любви пребудут Ему, яко благодать и милость в преподобных Его и посещение во избранных Его.

Царств третиих чтение:

          Ста Соломон пред лицем олтаря Господня пред всем собором Израилевым и воздвиже руце свои на небо, и рече: Господи Боже Израилев, несть якоже Ты Бог на небеси горе и на земли низу, храняй завет и милость рабу Твоему ходящему пред Тобою всем сердцем своим, яже сохранил еси рабу Твоему Давиду Отцу моему: ибо глаголал еси усты Твоими и рукама Твоима совершил еси, якоже день сей: и ныне , Господи Боже Израилев, сохрани рабу Твоему Давиду Отцу моему, яже рекл еси Ему, глаголя: не оскудеет муж от лица моего седяй на престоле Израилеве, токмо аще сохранят чада Твоя пути своя, еже ходити предо мною, якоже ходил еси предо мною: и услышиши молитву раба Твоего и людий Твоих Израиля, о нихже помолятся на месте сем: и Ты услышиши на месте обиталища твоего на небеси, и сотвориши и помилуеши: елика, аще согрешит кийждо ко искреннему своему, и аще приимет на него клятву еже кляти его, и приидет, и исповесть пред лицем олтаря твоего в храме сем: и ты услышиши от небесе, и сотвориши суд людем Твоим Израилю: осудити беззаконнаго, дати путь его на главу его, и оправдити праведнаго, дати ему по правде его: егда падут людие твои Израиль пред враги, яко согрешат ти, и обратятся к тебе, и исповедятся имени Твоему, и помолятся и возглаголют молитву к Тебе в храме сем: и ты услышиши с небесе, и милостив будеши о согрешениих людий своих Израиля, и возвратиши я в землю, юже дал еси отцем их: яко согрешат ти, яко несть человек, иже не согрешит, и разгневаешися на ня, и предаси я пред враги, и попленят их пленящии в землю далече, или близ, и обратят сердца своя в земли, аможе преселишася, и обратятся, и помолятся Тебе в земли преселения своего, глаголюще: согрешихом, беззаконновахом, неправдовахом: и обратятся ко Тебе всем сердцем своим и всею душею своею в земли враг своих, аможе превел еси их, и помолятся к Тебе по пути земли своея, юже дал еси отцем их, и ко граду,егоже избрал еси, и ко храму, егоже создах имени Твоему: и услышиши от небесе, от готоваго жилища Твоего молитву их и моление их, и сотвориши оправдание им: да будет Господь Бог наш с нами, якоже бе со отцы нашими: да не оставит нас, ниже да отвратит нас, преклонити сердца наша к нему, еже ходити во всех путех Его и хранити вся заповеди Его и повеления Его и оправдания Его, яже заповеда отцем нашим: и рече к Соломону Господь: услышах глас молитвы твоея и моления твоего, имже молился еси предо Мною: сотворих ти по всей молитве твоей, и освятих храм сей, егоже создал еси, еже положити имя мое тамо во веки, и будут очи мои ту и сердце мое во вся дни: и ты аще пойдеши предо мною, якоже ходи Давид отец твой в преподобии сердца и в правоте, и еже творити по всем, яже заповедах ему, и повеления моя и заповеди моя сохраниши: и возставлю престол царствия твоего во Израили во веки.

Пророчества Исаина чтение:

          Дух Господень на мне, егоже ради помаза мя, благовестити нищым посла мя, изцелити сокрушенныя сердцем, проповедати пленником отпущение: нарещи лето Господне приятно и день воздаяния; помазание веселия плачущым, украшения славы вместо духа уныния: и нарекутся родове правды, насаждение Господне во славу. Да возрадуется душа моя о Господе: облече бо мя в ризу спасения и одеждею веселия одея мя: яко на жениха возложи на мя венец, и яко невесту украси мя красотою. И яко земля растящая цвет свой, и яко вертоград семена своя прозябает: тако возрастит Господь правду и веселие пред всеми языки: Сиона ради не умолчу и Иерусалима ради не попущу, дондеже изыдет яко свет правда моя и спасение мое яко светило разжжется. И узрят языцы правду Твою, и царие славу Твою, и прозовут Тя именем новым, имже Господь наименует е. И будеши венец доброты в руце Господни и диадима царствия в руце Бога твоего: и не прозовешися ктому оставлен, и земля твоя ктому не наречется пуста: тебе бо прозовется воля моя, и земля твоя вселенная, яко благоволи Господь в тебе, и земля твоя вкупе населится. И якоже живяй юноша с девою, тако поживут сынове твои с тобою: и будет якоже радуется жених о невесте, тако возрадуется Господь о тебе.

Таже стихиры святых, глас 5:

          Радуйся, Николае царю мучениче, всех в сердце своем вместилище, алчущаго насыщение, скорбящаго утешение и страждущему сострастие, заблудшаго печальниче, осужденнаго злодея милование, веры православныя ревнителю, попечение о мире всего мира, любве ко всем пламенение, жертво всеусердная, молитвенниче теплейший, моли о душах наших.

Глас 8:

          Добродетельми просветил еси душу и ум: тем рогом елеа свыше излиянным на царский твой верх, помазует тя духом, Богоносе, Пресвященное Слово и Господь: отнюдуже приял еси скипетр и державу твоего царствия от Подающаго нам велию милость.

Глас 6:

          Еже от Бога тебе, святе, врученный скипетр со тщанием и любовию хранил еси, но взирая на предательство ближних, на Голгофу твою возшел еси и ныне предстательствуеши за Россию, да Господь не отринет ю.

Слава, глас 8:

          Ныне Сын Человеческий прославися, глаголет Господь. Сея славы крестныя сподобишася царственнии мученицы, иже Спасовым страстем подражаша. Сего ради возлюби их Христос и на небеси прослави, да молятся о душах наших.

И ныне, Богородичен, глас тойже:

          Приидите, вси вернии, и купно соборы сотворше, возопиим Державней Владычице и тако к Ней возглаголем: вси неключими есмы, и того ради припадаем к Ти и молим Тя со дерзновением и верою зовуще: не презри нас, окаянных, потщися на умоление и спаси вся православныя.

На стиховне стихиры, глас 4:

          Сострастием велиим ты, стрстотерпче святый, царю Николае, рекл еси: аще потребна есть жертва за люди, аз жертва сия да буду. Больши сея любве никтоже имать, глаголет Господь, аще кто душу свою положит за други своя: сего ради услыша тя Господь в день печали твоея и помяну жертву твою и всесожжение твое тучно есть, да даст Он ти по сердцу твоему и весь совет твой исполнит, во спасение людей твоих.

Стих: Вознесох избраннаго от людей моих.

          Не суть совети Божии, якоже совети человечестии, глаголет Господь, сего бо смиряет и сего возносит, Господь мертвит и живит, возставляет от земли убога, престол же славы дая ему. Тако уготова Господь возлюбленному угоднику Своему Николаю, воздая за благочестие ему, и по крестном пути его жива на небесех его соделав, яко да молится о спасении людей своих.

Стих: Елеем святым Моим помазах его.

          Не прикасайтеся помазанным моим, глаголет Господь Вседержитель. Нечестивии же убиша боговенчаннаго царя, глаголя: се наследник, убием и его, да будет наследие наше. Обаче не наследиши землю благих, якоже кроцыи жертвы их, но смерть бесконечную. Ты же, святый мучениче Алексие наследниче, моли Бога о нас, да наследствуим и мы с тобою царство небесное.

Слава, глас 6:

          Егда отверзе ангел печать пятую откровения, явишася избиеннии за слово, ты же, царю мучениче, во главе сонма страстотерпцев новых, с царицею, чады и верными слуги твоими, в ожидании трепетнем, чадом твоим церкве на земли воинствующия взываеши: приидите, восполним число ангельское, исповеданием веры православныя, да в правде и мире облобызаемся и да торжествуем в царствии Царя царствующих.

И ныне, Богородичен, глас тойже:

          Да открыеши нам всем множество твоея милости и благости беспредельную пучину, грехи рабов Твоих вся изглади. Имаши бо, Всенепорочная, яко Мати Божия, дерзновение пред Господем.

Тропарь, глас 5:

          Царства земнаго лишение, узы и страдания многоразличныя кротко претерпел еси, свидетельствовав о Христе даже до смерти от богоборцев, страстотерпче великий, боговенчанный царю Николае, сего ради мученическим венцем на небесех венча тя с царицею, и чады, и слуги твоими Христос Бог, Егоже моли помиловати страну Российскую, и спасти души наша.

Ин тропарь, глас 4:

          В подобие жертве Христове, яко агнец непорочный, волею заклан бысть за отступление народа твоего, царю мучениче Николае. Царство же в себе раздельшееся исцеляет тобою Христос. Мученичество святое твое славим, имже бо царствие православное воскрешается, во славу Царя Небеснаго и спасение душ наших.

Слава, и ныне, Богородичен, глас 5:

Радуйся, двере Господня непроходимая:

Подобен: Повеленная тайна:

          Попечение имел еси о чистоте духа православнаго, боговенчанный царю Николае, от апостол через древнюю Византию святей Руси преданнаго, ведая вся сия быти стояние Российстей земли.

Слава, и ныне, Богородичен, глас и подобен тойже:

          В поношении устен и во обдержании языком есмы, вси бо преогорчихом Царя, Сына Твоего, и Той посети ны прещением Своим, но умоли, Дево Пречистая, от Тебе рождшагося, и аще не до конца прогневался есть, да простит и помилует страну Российскую.

Подобен: Явился еси:

          Православие, самодержавие и народность исповедал еси во спасение Руси, да воспоют вси в ней воскресшей: Боже, царя храни!

Слава, и ныне, Богородичен, глас и подобен тойже:

          Востани, Владычице, и облечется Сион в крепость свою, и вода желчная от полыни будет нам яко мед, напитаемся, людие, теснотами, яже от Зиждителя суть, и восхвалим державу Твою.

Подобен: Премудрости:

          Егда богомерзтии мучителие твои заточиша тя с царицею, чады и верными слуги твоими, тогда помяну Господь Давида и всю кротость его и посла тебе, царю Николае, сокрушенному и смиренному сердцем, венец царемученический, подобно праотцу твоему Павлу страстотерпцу, за благочестие и верность твою. Моли спастися душам нашим.

Слава, и ныне, Богородичен, глас и подобен тойже:

          Вострубим трубою песней, воспоим согласно Заступнице страны нашея, Царице Богородице: радуйся, благоволением Твоим отечество наше от лет древних венчающая и благодать тому источающая. Темже и церковь российская утверждается, и Тобою хвалимся, глаголем: Твои бо есмы раби, да не постыдимся.

Прокимен, глас 4: Тебе ради Господи, умерщвляеми есмы весь день.

Стих: Вменихомся яко овцы заколения.

Всякое дыхание: Евангелие от Матфея, зачало 36:

По 8 псалме стихира, глас 6:

          Наследниче Божий, страстотерпче Христов, угодниче Господень, царю Николае! По имени твоему тако и все житие твое. Сего ради врази твои не можаху сокрыти славу твою. Кротость твоя молчаливая бе во страданиих твоих, просящи не мстити за себе. Жизнь твоя врагами Руси святой оклеветана, кончина же твоя с мученики святыми славна, моли о душах наших.

          Ирмос: Твоя победтельная десница:

          Припев: Святии царственнии мученицы, молите Бога о нас.

          Венценосче, у престола Христова, царю мучениче Николае, предстоя с мученическими лики с царицею, чады и слуги, просвещение нам даруй, озаряющее души нашея омрачение и бесчувствие, яко да восхвалим радостно вашу блаженную память.

          Обетование убогаго саровскаго старца исполняется: прославит Бог прославльшаго мя, егоже рекл есть. Ты же, преславный Николае, сомолитвенниче его, вкупе с ним преклони колена твои во еже стяжати благодать Духа Святаго людем твоим.

          Якоже устремление воды, тако сердце царево в руце Божией, глаголет Господь, юже аще восхощет обратити, тамо уклонит ю. Ты же яко истинный служитель Господень такожде рекл еси глаголя: не токмо судьба России, но и моя в руце Господней есть.

          Поругание зря и разорение земли своея от безбожных враг, плакася из глубины сердца благочестивый царь, якоже пророк Иеремия, моляся за люди согрешившыя и горько стеняше: милостиве Господи, не остави их, оставльших царя.

Богородичен:

          Ты еси крепость наша, ты еси похвала и радование, предстательница непобедимая и покров страны Российския. Пресвятая Богородице, с царем мучеником и великим сонмом новомученик моли спасти рабы Твоя.

Ирмос: Единый ведый:

          Сокрушенно и смиренно сердце соблюл еси, святе Николае, и взирая на благая Иерусалима, взывал еси: несть свят паче Тебе, Господи!

          В кротости души его наследова землю благих у престола неподвижна Царя Славы, взывая: несть свят паче Тебе, Господи!

          Алкал и жаждал еси правды, за нюже душу положи, праведне святый, обаче ею насытися в горнем, идеже пребывает правда во век, и глагола: несть свят паче Тебе, Господи.

          Врачевания и чудеса точищи всюду в людех своих, святый, верою к тебе притекающих, темже печаль нашу на радость преложи молитвами твоими, да глаголем: несть свят паче Тебе, Господи!

Богородичен:

          Прибежище, Заступницу выший покров Тя имуще, благословенная Мати Божия. Твоею помощию сохрани нас, да зовем ти: несть свята в человецех и силах небесных паче Тебе, Богородице!

Подобен: Скоро предвари:

          Множайшии от сродник наших отвратишася Божия помазанника во смутное время новое, такожде ныне и мы, яко забыли есмы слово Божие, призывающее почитати царя: сего ради прииде на вся ны гнев Божий, темже вси в покаянии зовем: прости и помилуй нас, Господи, по велицей милости Твоей, очисти беззакония наша и подаждь страждущей стране Российстей, предстательством великаго страстотерпца царя Николая, прощение, мир и велию милость.

Слава, и ныне, Богородичен, глас и подобен тойже:

          Умоли, милосердная Мати Света, Сына Твоего и Бога нашего, да утвердит в державе нашей престол православнаго царя, да сохранит ю в мире и благоденствии, да избавит ны от междоусобныя брани и да укрепит святую церковь и избавит ю от неверия, раскола и ересей.

          Ирмос: Гору тя благодатиею Божиею:

          Нищета твоего духа обогати тя, святый царю Николае, и сотвори тя достойна Господь не токмо земнаго, но паче Небеснаго Царствия.

          Горько рыдал еси, всею душею твоею слезами незримыми об ослеплении народа твоего, отрекшагося от царя своего земнаго такожде и небеснаго.

          Не обрет утешения на земли, якоже иногда Иов, страстотерпче святый, но паче сторицею приял еси на небесех, идеже ныне наслаждаешися.

          Милостивое сердце его обымаше всех и вся, дела щедрости своея утаяваше, сего ради отверзе Отец небесный двери милосердия своего, ныне воздая Ему яве.

Богородичен:

          Милосердия двери, благословенная Богородице, отверзи нам, да избавимся от бед и озлобления нашего. Темже вопием Ти непрестанно: Ты бо еси спасение рода христианскаго!

          Ирмос: Просветивый сиянием:

          Миротворец явися в души своей, Николае святый, тысящи спасая сюду и сюду, такожде и ины страны, сего ради в Божиих сынех вменился еси.

          Изгнание, поношение и гонение претерпесте, святии мученицы царственнии, и всяк глагол на вы ложный реченный. Радуйтеся бо и веселитеся, яко мзда ваша прииде!

          Сплетше венец терновный, служителе тайнаго беззакония его на тя возложиша, о священная главо, обаче дерзостная действия их, вкупе с ними, погибнут во век!

          Во временней жизни на крест и на мучение ради Христа потекли есте, о царственнии мученицы святии, сего ради увенча и прослави вас Господь в жизни бесконечней.

Богородичен:

          В тину впали есмы грехов и несть нам постояния, люте потопи ны буря прегрешений. Но, яко рождшая Спаса, на ны, рабы Твоя, призри и избави от страстей душетленных.

          Ирмос: Обыде нас последняя бездна:

          Весь еси всем православным заступник, богоизбранный Николае, усердную защиту народом словенским показуеши: яко град тверд, брат от брата помогаем.

          Ревнитель прославления святых явился еси, храмов созидания, святых обителей благоукрашения, святыя земли и святыя горы благотворения, просвещения православнаго и монашества, о сыне верный святыя церкве!

          В житии вашем по истине и по делом любве христиане быста, боговенчанная царя Николае и Александро, сице полагаста во главу угла камень Христа.

          Двоице царская с чады и слуги, в годину гонения за Христа сохрани любовь и верность Вседержителю, друг другу тяготы носящи и тако исполняше Его закон, сего ради с Ним царствуеши во веки.

Богородичен:

          К тебе прибегаем, Царице Державней, верных покрову, на Тя надежду возлагаем спасения нашего, Пресвятая Владычице Богородице, не презри нас.

Кондак, глас 4. Подобен: Два днесь.

          Мирликийскому предстателю, благоверный царю, подражатель показался еси, Христово бо евангелие исполнив. Положил еси душу твою за люди твоя и спасл еси повинныя, паче же от неповинныя смерти, сих ради мученическою кровию освятился еси, яко великомученик церкве Христовы.

Икос:

          Славою и богатством благочестия, и багряницею многоценною украшен, и диадимою и венцем увязен, милостию же и правдою паче сих просияв, истинен же беззлобив и добродетелию украшен яко воистинну, и благодатию сияя, темже тя ублажаем тако:

          Радуйся, правило веры. Радуйся, образе кротости и смирения. Радуйся, долготерпение необоримое. Радуйся, безстрастие непоколебимое. Радуйся, любовию к Богу просиявый. Радуйся, к людем своим любовь преизобильная. Радуйся, Сербстей страны защитниче крепкий. Радуйся, за Российскую землю жертво усердная. Радуйся, образе мученическия кончины верным показавый. Радуйся, подвигоположнику Христу подражавый. Радуйся, образе царем православным. Радуйся, прославленный Царем Небесным. Радуйся, святе Николае, боговенчанный царю и великомучениче церкве Христовы.

          Стихи: Аще кто не чтит царя, не чтит Помазавшаго его. Возвесилится о спасении Господнем, мы же возрадуемся зело.

          Сия отрасль благочестиваго корене Николай воспитан бе царствующею четою во благоговении и страсе Божием. Егда скончася родитель его Александр, именуемый миротворец, венчася сей избранный сосуд благоверия на царство с верною царицею Александрою. В царствовании своем кроток бе и смирен сердцем, любя церковь Христову, прилежа молитве, служению и благотворению, по заповедем Господним. Воспита такожде отраслей пять: Ольгу, Татиану, Марию, Анастасию и наследника своего Алексия во усердных трудех милосердия и просвещения народа своего, по слову Господню: Сын Человеческий не прииде, да послужат Ему, но послужити и дати душу свою за избавление многих. Спасение содела стране Сербстей, сего ради доныне почитаем сим народом православным. Егда видя нестроения во Отечестве: отступление от прародительския веры православныя, предательство присных, Христоподобный сей самодержец святый восходит на Голгофу свою вкупе с царицею, чады и верными слуги своими принести себе в жертву за клятвопреступление подданных и прочия грехи народа своего, вопия с Божественным Павлом: ныне радуюся во страданиих моих о вас, яко исполняю лишение скорбей Христовых во плоти моей, за Тело Его, еже есть церковь. Убиен бе от рук безбожник в дому Ипатиевом, сиречь высоком, еже есть на распутии, нарицаемом Вознесенским в честь преславнаго Вознесения Господа нашего Иисуса Христа от земли на небо, избрание же перваго царя из роду Романовых Михаила бе в монастыре, такожде именуемом Ипатиевым, прообразуя высокое служение православных помазанников и высоту жертвы кротчайшаго царя нашего Николая. Ныне вси царственнии мученицы предстательствуют за землю Русскую во главе всех святых мучеников и исповедников российских перед престолом Царя Царствующих во утверждение на Руси престола православнаго царя, спасение людей своих и во славу единосущныя и нераздельныя Троицы Отца, и Сына, и Святаго Духа.

          Святых царственных страстотерпцев молитвами, Боже, помилуй нас. Аминь.

          Ирмос: Тебе умную, Богородице, пещь:

          Яко отец и мати чадолюбивая, посещасте недужных воинов ваших, с любовию их утешали есте, места же их упокоения слезами вашими обливали есте.

          Цветниче духовный, седмерице совершенная и иконо семьи православныя, вы есте образ нам добродетелей и слава русския земли.

          На краю лествицы стоя славы человеческия, видел еси над тобою небо, царю Николае, аможе устремися душа твоя святая.

          Устремився к славе небесней, и тяготився славою земною, возжелел еси предати себе в чину ангельстем на служение едину токмо Богу.

          Всевышний Всецарю Вседержителю, жизнь умири во стране Российстей молитвами тобою венчаннаго царя, на варвары и враги твоя поборствуя.

Богородичен:

          Умерщвленный страстьми многими, Всесвятая Владычице, оживи ум наш, и богоугодная творити укрепи ны, да величаем Тя яко Заступницу рода христианскаго.

          Ирмос: В пещи отроцы Израилевы:

          Егда угодницы Божии указаша вам мученический путь, якоже пророк Агав Павлу, вы, царственнии мученицы, не уклонистеся ни одесную, ни ошуюю, но безбоязненно шествовасте до конца, взирающе на совншителя веры Христа.

          Лютыми страданьми мучими, страстотерпцы святии, не отвергостеся пути, истины и живота, Христа Бога нашего, ни богоборцев устрашистеся, но шествовасте в терпении до конца, царским путем в жизнь вечную.

          Увы нам, от верности обету царскому роду, Духом Святым утвержденному, отступившым, темже отчую любовь поправшым и пути Божия отлучившымся. Покаяния нашего ради заступите, да избавит нас Господь от бед, находящих на ны.

          Врази твои на колесницах и сии на конех падоша: мы же востахом от грехов наших и именем Господним исправихомся, темже в покаянии зовем ти: спаси ны, Господи, и услыши ны воньже аще день призовем святаго Царя мученика нашего.

Богородичен:

          Святейшая Херувим и вышшая Серафим, воистинну, Богородице, Ты еси. Вемы Тя Заступницу нашу, Ты же непестанно о нас молящи, во еже нам покаятися и исправлятися, Державо и Прибежище душам нашим.

          Ирмос: Образ чистаго Рождества Твоего:

          Веруем, Господи, и исповемы, яко Ты еси воистинну Царь Славы, пришедый в мир грешныя спасти: сего ради утвердил еси церковь святую и самодержавие православное во спасение людей Твоих.

          Да воскреснет Русь святая молитвами святых Твоих, Господи, и да расточатся вси врази ея вскоре, и от лица ея да бежат вси ненавидящии ю отныне, пред вторым славным пришествием Твоим.

          Яко достойное приимите пение, святии страстотерпцы, и малое моление сие, якоже Христос прият вдовы две лепте, не возгнушайтеся окаянных, страстьми обуреваемых чтителей ваших и убогих служителей.

          Державный царь наш возложи вся упования на Господа и умоляше Его, сего ради да воздвигнет Господь Вседержитель престол православных царей, молитвами Богородицы, да воспоем вси и да поем силы Его отныне и до века.

Богородичен:

          Державным Твоим покровом от врагов навета ны, Чистая, Твоя рабы, сохрани вся невредимы: Тя бо едину имамы прибежище в нуждах, утешение в скорбех и победу во бранех наших.

Светилен. Подобен: Жены услышите:

          Свету невечернему предстояще, страстотерпцы святии царственнии, с мученическими лики, не оставляйте ны во испытаниих наших молитвами вашими.

Слава, и ныне, подобен тойже:

          Незаходимаго света носило, Приснодево, просвещшаго седящих во тме неведения и прелести, озари и нас грешных светом Сына Твоего.

Подобен: О преславнаго чудесе:

          О царю боговенчанный Николае, славный служителю святыя церкве, строителю и защитителю ея, избранный Богом покровителю, другий великий Иустиниане, вонми гласу моления нашего, прости, защити и укрепи заблудших чад твоих, да верою и любовию прославим прославльшаго тя.

          О преславнаго чудесе! Святая мученице Александро, в горцем заточении от богоборцев бывши и чающи смерть за Христа, вкупе с четверицею дев мудрых твоих глаголя: се, Жених грядет! Уготовим светильники своя, да внидем в чертог Его. Душ наших свещи запалите нас научаеши, да одеждимся вси одеждою светлою, срести Жениха Христа.

          О Алексие, царевичу страстотерпче, от младых ногтей, в дусе смиреннаго и простаго сердца глагола: егда имам быти царь, да не обрящутся нищии и обездоленнии. Тако сострадал еси другим, страдальче юный, и всех обнимал еси душею твоею чистою, желая всем внити в радость Господа, внюдуже возшел еси крестным путем всего жития твоего и мученическою кончиною твоею.

Слава, глас и подобен тойже:

          О помазанниче Божий Николае! Христиан еси ты похвала и Христа слава, Отца имеяй в себе тя помазующаго, Сына помазаннаго, и Духа Святаго, имже помазася, сего ради рцем: кто царя не чтит, не чтит Помазавшаго его. Но в сокрушении вси глаголем: царю мучениче, прими покаяние наше и моли спастися стране Российстей.

И ныне, глас и подобен тойже:

          О преславнаго чудесе! Небесе и земли Царице, от святых сродников наших умоляемая, доныне землю русскую покрывает и Лика Своего изображеньми милостивно обогащает. О Владычице Державная, не престани и на будущее время во утверждение на Руси православия милости и чудеса изливати до века. Аминь.

          На литургии: Блаженна песнь 3-я и 6-я на 8. Прокимен глас 4: Тебе ради, Господи, умерщвляеми есмы весь день. Стих: Вменихомся яко овцы заколения. Апостол к римляном, зачало 99. Аллилуиа, глас 1. Стих: Бог нам прибежище и сила, помощник в скорбех обретших ны зело. Стих: Господи, спаси царя и услыши ны, воньже аще день призовем тя. Евангелие от Иоанна, зачало 52. Причастен: Радуйтеся, праведнии, о Господе, правым подобает похвала.

          Аще настоятель изволит: до еще молимся о плодоносящих диакон чтет:

          Еще молимся об оставлении грехов наших и обновлении иссякшия любве в сердцах наших.

          Еще молимся об искоренении в нас ненависти, зависти, клеветы, ожесточения же и рвения и всех прочих страстей, братолюбие разрушающих, еще же о всеянии нелицемерныя любве Духом Твоим Святым.

          Еще молимся о сознании и оставлении роду нашему и нам греха отступления от православнаго царя, образа небеснаго, и о еже милостивно возставити престол на земли во избавление нас от всякаго прельщения и злаго бостояния.

          Еще молимся Тебе Господи об указании нам избраннаго помазанника Твоего, царю Давиду подобно, мужа благоверна по сердцу Твоему.

          Еще молимся о снабдении его верою пламенеющей, умом глубоким, волею непоколебимою и всякими дары духовными.

          Еще молимся о еже соблюстися нам в правоверии непозыблемо, во страсе Божии и почтении к царю и во всех прочих заповедех, от душетленных же страстей избавитися и невредимо сохранитися нам.

          По возгласе: яко милостив, диакон: Господу помолимся! И чтем молитву о даровании православнаго царства.

          Господи Боже наш, со умилением и воздыханием и с тугою сердечною приступаем к Тебе и припадаем Ти и в болезни духа вопием: согрешихом, беззаконновахом, неправдовахом пред Тобою, дары Твоя: церкве благолепие, плодов изобилие, воздухов благорастворение, земли многоплодие, ихже святей Руси даровал еси царством самодержавным, в небрежении прияхом и благодарения Тебе, Владыце и Щедродателю нашему, не воздахом, паче же отрекохомся владычества Твоего, егоже чрез помазанника Твоего и царство православное утвердил еси. Возлюбихом земная паче небесных и временная паче вечных, и обою лишихомся. Возлюбихом волю свою паче Твоея творити и тем врагу Твоему поработихомся. Исповедуем же, яко истиною и судом навел еси вся сия на ны грех ради наших. Помяни, Господи, и речения пророк Твоих новых, ихже в земли русской прославил еси в последняя времена сия, яко даруеши людем твоим на малое время последнее паки оплот крепок и стену недвижиму, царя самодержавна, помазанника Твоего благословеннаго. Сия же паки вемы, яко несть дар сей от человек, ниже от многомятежных похотений их даруется, но могуществом Твоим и волею и благим промышлением Твоим устрояется. Темже и вопием Ти со слезами: воздвигни нам вожди духовныя, мужы в силе Илии и Еноха, да воля Твоя от них возвещаема непреложно совершится, нашу же волю падшую и греховную отлагаем зде пред Тобою. И аще благоволиши милостивно призрети на ны, недостойныя рабы Твоя, сам, Владыко, укажи нам избраннаго Твоего самодержца, помазанием же Божественным на служение царское всеми дарами духовными снабди его. Аминь.

источник:www.rusk.ru
Москва, изд. "Лествица", 1999г.