ИЗВЕСТИЕ УЧИТЕЛЬНОЕ,

ИЗВЕСТИЕ УЧИТЕЛЬНОЕ, КАКО ДОЛЖЕНСТВУЕТ ИЕРЕЮ И ДИАКОНУ СЛУЖЕНИЕ В ЦЕРКВИ СВЯТЕЙ СОВЕРШАТИ, И ПРИУГОТОВЛЯТИСЯ К СВЯЩЕННОДЕЙСТВУ, НАИПАЧЕ ЖЕ К БОЖЕСТВЕННЕЙ ЛИТУРГИИ, И КАКОВЫЯ БЫВАЮТ БЕДСТВЕННЫЯ И НЕДОУМЕННЫЯ В СКОРОСТИ СЛУЧАИ, КАКО В ТОМ ИСПРАВЛЯТИСЯ, ПРЕДЛОЖИСЯ ВКРАТЦЕ. В БЛАГОДАТНОМ ЗАКОНЕ СПАСИТЕЛЯ НАШЕГО БОГА ИИСУСА ХРИСТА, ЦЕРКОВЬ СВЯТАЯ СЕДМЬ ТАИНСТВ СОДЕРЖИТ, СИЕСТЬ: КРЕЩЕНИЕ, МИРОПОМАЗАНИЕ, ЕВХАРИСТИЮ, СИЕСТЬ ПРИЧАЩЕНИЕ, ПОКАЯНИЕ, СВЯЩЕНСТВО, БРАК, ЕЛЕОСВЯЩЕНИЕ: ЯЖЕ ВСЯ ВО ХРАМЕ СВЯТЕМ СОВЕРШАЮТСЯ ПОСВЯЩЕННОМ ОТ АРХИЕРЕА, ВО ИЗВЕСТНОЕ СПАСЕНИЕ ВСЕХ ЧЕЛОВЕКОВ: ИНАЯ ЖЕ ТАИНСТВА ИЗ СИХ В НУЖДАХ МОГУТ И ИНДЕ ВО ХРАМИНАХ, И ГДЕЛИБО ДЕЙСТВОВАТИСЯ. СВЯЩЕНСТВА ЖЕ ТАИНСТВО И ЕВХАРИСТИА, СИЕСТЬ ПРИНОШЕНИЕ БЕЗКРОВНЫЯ ЖЕРТВЫ, ТЕЛА И КРОВЕ ГОСПОДА НАШЕГО ИИСУСА ХРИСТА, КРОМЕ ПОСВЯЩЕННАГО ХРАМА, НИГДЕЖЕ ТВОРЯТСЯ, И НЕ ПОДОБАЕТ ПОД ВЕЛИИМ ГРЕХОМ. ТЕМЖЕ, ЧТО К ТАКОВЫМ ТРЕБУЕТСЯ, ИЗВЕСТВУЕТСЯ СИЦЕ: ХРАМ СВЯТЫЙ, СИЕСТЬ ЦЕРКОВЬ, В СОБРАНИЕ БЛАГОДАРСТВЕННОЕ БОГУ ВСЕТВОРЦУ, В ТРОИЦЕ ЕДИНОМУ, И В МОЛИТВУ, И ПРОСВЕЩЕНИЕ, И ОЧИЩЕНИЕ ОТ ГРЕХОВ, ДА БУДЕТ ПОСВЯЩЕН ОТ САМАГО АРХИЕРЕА, ИЛИ В ТОЙ ПРИСЛАН АНТИМИНС ПОСВЯЩЕННЫЙ, И ПО ЧИНУ СВЯЩЕНИЕ ТОЙ ХРАМ ПРИЯВШИЙ. СВЯЩЕННИК ЧЕЛОВЕК ДА БУДЕТ ИЗБРАН ЧЕСТЕН, ВЕДУЩ СВЯЩЕННАЯ ПИСМЕНА, РУКОПОЛОЖЕН ПРАВИЛЬНЕ ОТ АРХИЕРЕА. ОДЕЯНИЯ СВЯЩЕННАЯ ИЕРЕЙ ДА ИМЕЕТ ПО УСТАВЛЕННОМУ БОГОПРЕДАННОМУ ЧИНУ: СТИХАРЬ, ЕПИТРАХИЛИЙ, НАРУКАВНИЦЫ, ПОЯС, ФЕЛОНЬ. ДИАКОН ЖЕ СТИХАРЬ, НАРУКАВНИЦЫ И ОРАРЬ, НА ЛЕВОЕ ПЛЕЧО ПОЛАГАЮЩИЙСЯ, НОСИТ. И БОЖЕСТВЕННЫЯ ЛИТУРГИИ БЕЗ СЕГО СЛУЖИТИ ИЕРЕЮ И ДИАКОНУ ОТНЮД НЕ ПОДОБАЕТ. АЩЕ ЛИ ЖЕ ИЕРЕЙ ТАКО ДЕРЗНЕТ: ТАИНСТВО УБО СОВЕРШИТ, ОБАЧЕ САМ СМЕРТНО СОГРЕШИТ, И ЗА СИЕ САНА ИЗВЕРЖЕТСЯ. ПРОЧИЯ ЖЕ ТАЙНЫ СВЯТЫЯ, МОЛЬБЫ ЖЕ И В ЦЕРКВИ ПЕНИЯ, О ОБЛАЧЕНИИ СВЯЩЕННЫХ ОДЕЖД ПО УСТАВУ ИМУТ БЫТИ, ЯКОЖЕ УКАЗАСЯ В ЧИНЕ КОЕМ. НО К ТАЙНЕ СЕЙ СВЯТЕЙ, ЕЖЕ СОВЕРШИТИ ТЕЛО И КРОВЬ ГОСПОДА НАШЕГО ИИСУСА ХРИСТА, ПЕРВЕЕ НУЖДНЫЯ ВЕЩИ ПОТРЕБНЫ СУТЬ СИЯ: ХИРОТОНИСАННЫЙ ИЕРЕЙ ОТ АРХИЕРЕА, НАМЕРЕНИЕ И ВОЛЮ СВЯЩЕННИКУ ИМЕТИ КРЕПКО К СОВЕРШЕНИЮ ТАЙНЫ ТЕЛА И КРОВЕ ГОСПОДНИ, ЕЖЕ ЧИНОВНЫМ ДЕЙСТВОМ СОВЕРШЕННО ПРЕЛОЖИТСЯ В СУЩУЮ ИИСУС ХРИСТОВУ ПЛОТЬ И КРОВЬ. ВЕЩЬ ТАЙНЕ СЕЙ ПРИЛИЧНАЯ: ПРОСФОРЫ МУКИ ЧИСТЫЯ ПШЕНИЧНЫЯ, КВАСНЫЯ, ПЯТЬ, И ВИНО ВИНОГРАДНОЕ: ИЗ ИНАГО ЖЕ ЖИТА КРОМЕ ПШЕНИЦЫ, ИЛИ ЧЕРСТВЫЯ, ИЛИ ЗАЦВЕЛЫЯ ПРОСФОРЫ ИЛИ ИЗ ИНЫХ ДРЕВ, И ЯГОДНЫХ СОКОВ ВИНО. ИЛИ ВО УКСУС ПРЕТВОРШЕЕСЯ КИСЛОСТИЮ, НИКАКОЖЕ ДА ИМАТЬ БЫТИ. К СЕМУ, СОВЕРШЕНИЕ СЕЯ ТАЙНЫ МОЛИТВОЮ, И СЛОВЕСЫ С БЛАГОСЛОВЕНИЕМ РУКИ ИЕРЕЕВЫ: И СОТВОРИ УБО ХЛЕБ СЕЙ ЧЕСТНОЕ ТЕЛО ХРИСТА ТВОЕГО, А ЕЖЕ В ЧАШИ СЕЙ, ЧЕСТНУЮ КРОВЬ, ПРЕЛОЖИВ ДУХОМ ТВОИМ СВЯТЫМ: ЯКОЖЕ МУДРСТВУЕТ И СОДЕРЖИТ СВЯТАЯ АПОСТОЛЬСКАЯ ВОСТОЧНАЯ ЦЕРКОВЬ. О СЕМ ИЗВЕСТНО ДА ВЕДЯТ ИЕРЕИ, ЯКО БЕЗ ОСВЯЩЕННАГО ХРАМА, ИЛИ СВЯЩЕННЫЯ ТРАПЕЗЫ, СИЕСТЬ БЕЗ АНТИМИНСА, И БЕЗ СВЯЩЕННЫХ ОДЕЖД, И ВЕЩЕЙ ТАКОВЫХ, АЩЕ НАМЕРЕНИЯ НЕ ИМЕЕТ О ТОМ, АЩЕ НЕЧИСТЫ ПРОСФОРЫ, И НЕ ИЗ ЧИСТЫЯ ПШЕНИЦЫ, И АЩЕ КОИМИ СЛОВЕСЫ СОВЕРШЕНИЕ БЫВАЕТ, НЕ ЗНАЕТ: АЩЕ СЛУЖИТИ КТО ДЕРЗНЕТ ТАКО ПРОСТО, ИЛИ ПОМРАЧЕН ОТ МНОГАГО ПИЯНСТВА МАЛО ЧТО ВЕСТЬ, ЕЖЕ ДЕЕТ, НЕ ТОКМО СВЯТОТАТСКИМ ГРЕХОМ СМЕРТНО СОГРЕШИТ, НО И ТАЙНА ТЕЛА И КРОВЕ ХРИСТА БОГА НАШЕГО НИКАКОЖЕ СОВЕРШИТСЯ. КАКО ПОДОБАЕТ СЛУЖИТЕЛЮ ПРЕДУГОТОВЛЯТИ СЕБЕ К ДОСТОЙНОМУ СЛУЖЕНИЮ БОЖЕСТВЕННЫЯ ЛИТУРГИИ, И ПРИЧАЩЕНИЮ БОЖЕСТВЕННЫХ ХРИСТОВЫХ ТАИН. ОТ МИРСКАГО НЕ СВЯЩЕННАГО, НО ПРОСТАГО ЧЕЛОВЕКА, ТАКОЖДЕ И ОТ КЛИРИКА, И ОТ ДИАКОНА, И ВПОДИАКОНА, КРОМЕ ПРАВИЛЬНАГО ИЕРЕА, ТАЙНА СВЯТЫЯ ЕВХАРИСТИИ НИКОГДАЖЕ ОСВЯТИТСЯ. ИБО НИЧТОЖЕ ТОГО СВЯЩЕНСТВА СОВЕРШИТ, И В ТЯЖКОЕ ОСУЖДЕНИЕ, И В ГРЕХ СВЯТОТАТСТВА ДЕРЗНУВШИЙ ВПАДЕТ. ПРАВИЛЬНЕ ЖЕ ИЕРЕЙ ПОСВЯЩЕННЫЙ, И ДИАКОН УГОТОВЛЯТИСЯ В СЛУЖЕНИЕ ДОЛЖЕН СИЦЕ: ПРЕЖДЕ ДА СОХРАНИТ СЕБЕ, И ОПАСНО ДА БЛЮДЕТ ОТ ВЕЩЕЙ, ЗАПИНАЮЩИХ ДОСТОЙНОМУ ЛИТУРГИСАНИЮ, И ПРЕЧИСТЫХ ТАИН ПРИЧАЩЕНИЮ. ЗАПЯТИЯ ЖЕ БОЛЬШАЯ СУТЬ СИЯ: АЩЕ ОН В КЛЯТВЕ, ИЛИ ВО ОТЛУЧЕНИИ, ИЛИ В ЗАПРЕЩЕНИИ ОТ АРХИЕРЕА, ИЛИ ИМАТЬ В СЕБЕ ГРЕХ СМЕРТНЫЙ. АЩЕ УБО В КЛЯТВЕ, ВО ОТЛУЧЕНИИ ЖЕ И ЗАПРЕЩЕНИИ СВЯЗАН СЫЙ ОБРЕТАЕТСЯ, ВСЯКО ДА НЕ ДЕРЗАЕТ СЛУЖИТИ ЛИТУРГИИ, ДОНДЕЖЕ ОТ СВЯЗАВШАГО ЕГО ИМУЩАГО ВЛАСТЬ ПРОЩЕН И РАЗРЕШЕН БУДЕТ СОВЕРШЕННО. ИБО КТО НЕ РАЗРЕШЕН СВЯЩЕННОДЕЙСТВОВАТИ ДЕРЗНЕТ, СВЯТОТАТСТВА ГРЕХ ИСПОЛНИТ, И С НОВЫМ, И ЗЕЛО ТЯЖКИМ ГРЕХОМ ОТ БОЖЕСТВЕННЫЯ СЛУЖБЫ ВОЗВРАТИТСЯ, И ПОВИНЕН ТЕЛУ И КРОВИ ГОСПОДНИ: БОГОУБИЙЦА БО КУПНО С НЕВЕРНЫМИ ИУДЕИ ХРИСТА УБИВШИМИ БУДЕТ, И В СУД СЕБЕ И ВО ОСУЖДЕНИЕ ПРЕЧИСТЫМ ТАЙНАМ ПРИЧАСТИТСЯ. ТАКОЖДЕ ПОД ЗАПРЕЩЕНИЕМ ОТ АРХИЕРЕА, ИЛИ ИЕРЕА, ОТЦА СВОЕГО ДУХОВНАГО, КТО И МИРСКИЙ ЧЕЛОВЕК СУЩ, ИНДЕ КАКОВОЮ СТРАСТИЮ СОДЕРЖАСЯ, И ПРЕНЕБРЕГАЯ ТОГО, И КО ИНОМУ ДУХОВНИКУ БЕЗ РАЗРЕШЕНИЯ ПРЕХОДЯ, И ДЕРЗАЯ ПРЕЧИСТЫМ ТАЙНАМ ТЕЛА И КРОВЕ ИИСУС ХРИСТОВОЙ ПРИЧАЩАТИСЯ, ТОЖДЕ ПОСТРАЖДЕТ, И ЯКО БОГОУБИЙЦА ОСУДИТСЯ. АЩЕ ЖЕ О ГРЕСЕ СМЕРТНОМ ОБЛИЧАЕТ ЕГО СОВЕСТЬ ЕГО, ДА НЕ ДЕРЗНЕТ ЛИТУРГИСАТИ, ДОНДЕЖЕ ОЧИСТИТ СЕБЕ ОТ ГРЕХА ТОГО, В НЕМЖЕ ОБРЕТАЕТСЯ, СОКРУШЕНИЕМ И БОЛЕЗНИЮ СЕРДЕЧНОЮ, И ИСПОВЕДАНИЕМ УСТНЫМ ПРЕД ДУХОВНЫМ ОТЦЕМ, И КРЕПКИМ ПРЕДЛОЖЕНИЕМ, ЕЖЕ КТОМУ НЕ ВОЗВРАТИТИСЯ КО ГРЕХУ. АЩЕ БО ДЕРЗНЕТ В ГРЕСЕ СМЕРТНОМ СЫЙ, НЕ ИСПОВЕДАВСЯ И ПОКАЯНИЕМ НЕ ПРЕДОЧИСТИВ СЕБЕ, ЛИТУРГИСАТИ, КО ГРЕХУ СМЕРТНОМУ, В НЕМЖЕ ЕСТЬ, ДРУГИЙ ГРЕХ ТЯЖЧАЙШИЙ СМЕРТНЫЙ ПРИЛОЖИТ, И БОЖЕСТВЕННЫЯ ТАЙНЫ В СУД СЕБЕ И ВО ОСУЖДЕНИЕ НЕДОСТОИНСТВА РАДИ ПРИИМЕТ. АЩЕ В САМОМ СЛУЖЕНИИ БОЖЕСТВЕННЫЯ ЛИТУРГИИ ПРИШЕД В СЕБЕ ИЕРЕЙ, ПОЗНАЕТ СЕБЕ БЫТИ В ГРЕСЕ СМЕРТНОМ, ЕЛИКО МОЖЕТ, ВЕЛИКОЮ БОЛЕЗНИЮ И ЖАЛОСТИЮ ДА УМИЛИТ СЕБЕ, И СОКРУШИТ СЕРДЦЕ СВОЕ, ПРЕДЛОЖЕНИЕ НЕПРЕМЕННОЕ ИМЕЯ, ЕЖЕ СКОРЕЕ ИСПОВЕДАТИСЯ И ДОВЛЕТВОРИТИ, И СОКРУШАТИСЯ О ГРЕСЕ СВОЕМ. ПРЕПИНАЕТ ЖЕ К ДОСТОЙНОМУ СЛУЖЕНИЮ, И ПРЕСВЯТЫХ ТАИН ПРИЧАЩЕНИЮ, И СИЕ ЗЕЛО: АЩЕ КОГО ИЕРЕЙ, ИЛИ ДИАКОН УНИЧИЖИЛ ЕСТЬ, ОСКОРБИЛ ЖЕ, ИЛИ ОНЕПРАВДОВАЛ, И ВЕСТЬ, ЯКО ТОЙ ГНЕВАЕТСЯ И СКОРБИТ НА НЕГО: ИЛИ АЩЕ САМ ИЕРЕЙ И ДИАКОН ОНЕПРАВДОВАН, ИЛИ ОСКОРБЛЕН СЫЙ ОТ КОГО, ГНЕВАЕТСЯ И СКОРБИТ, ДА НЕ ДЕРЗНЕТ ЛИТУРГИСАТИ: НО ШЕД ПРЕЖДЕ, ПО ГОСПОДНЮ ПОВЕЛЕНИЮ, ДА СМИРИТСЯ С БРАТОМ СВОИМ, И ТАКО ДА ЛИТУРГИСАЕТ. АЩЕ ЖЕ ОСКОРБЛЕННЫЙ ДАЛЕЧЕ ГДЕ, НУЖДА ЖЕ НАЛЕЖИТ СЛУЖЕНИЯ, ПОНЕ ДА ПРЕДЛОЖЕНИЕ ДОБРОЕ ИМАТЬ, ЕГДА УЗРИТСЯ С НИМ, ВСЯКО ПРИМИРИТИСЯ, И В СЕРДЦЕ СВОЕМ ДА ЖАЛЕЕТ КРЕПКО, И ПО НУЖДИ ЛИТУРГИСАЕТ. К СЕМУ ЖЕ ДОСТОЙНОМУ СЛУЖЕНИЮ, И СВЯТЫХ ТАИН ПРИЧАЩЕНИЮ, ПРЕПИНАЕТ МНОГОЯДЕНИЕ И ПИТИЕ ВЕЧЕРНЕЕ. ТЕМЖЕ ВСЯКО ВОЗДЕРЖАТИСЯ ОТ БРАШЕН И ПИТИЙ С ВЕЧЕРА ДОСТОИТ, ИЛИ ВЕЛЬМИ ЧТО МАЛО ВКУСИТИ, ОТ ПОЛУНОЩИ ЖЕ КОНЕЧНО НЕ ПОДОБАЕТ ВКУСИТИ ЧЕСОГО: АЩЕ ЖЕ И МАЛО ЧТО ВКУСИТ ОТ БРАШЕН И ПИТИЙ ПО ПОЛУНОЩИ, НИКАКОЖЕ ДА ДЕРЗНЕТ ЛИТУРГИСАТИ, ЗАНЕ ОТ ПОЛУНОЩИ ДЕНЬ ЕСТЕСТВЕННЫЙ НАЧИНАЕТСЯ. В КОНЕЦ ЖЕ, ВСЯК ИЕРЕЙ И ДИАКОН ИМЫЙ ЖЕНУ, ОТ СМЕШЕНИЯ ЕЯ ПРЕД ЛИТУРГИСАНИЕМ ВОЗДЕРЖАТИСЯ ВСЯКО ДОЛЖЕН ЕСТЬ НЕКОЛИКИЯ ДНИ, НО И ПО СЛУЖЕНИИ ДНЕ ТОГО: НЕ ВОЗДЕРЖАЙСЯ БО И СЛУЖАЙ, ТЯЖКО СОГРЕШАЕТ. СИХ УБО ПРЕПЯТИЙ, НЕ ТОЧИЮ ИЕРЕЙ, НО И ВСЯК ХРИСТИАНИН, ХОТЯЙ ДОСТОЙНО ПРИЧАСТИТИСЯ БОЖЕСТВЕННЫХ ХРИСТОВЫХ ТАИН, ВЕСЬМА БЛЮСТИСЯ ДОЛЖЕН ЕСТЬ, КРОМЕ ТОЧИЮ НЕДУЖНЫХ В СМЕРТНОЙ НУЖДЕ. СУТЬ ЖЕ К СИМ И ИНАЯ ПРЕПЯТИЯ К ДОСТОЙНОМУ СЛУЖЕНИЮ, И СВЯТЫХ ТАИН ПРИЧАЩЕНИЮ: ЯЖЕ АЩЕ И МЕНШАЯ ОТ ПРЕДРЕЧЕННЫХ СУТЬ, ОБАЧЕ ПРИЛЕЖНО ИСКОРЕНЯТИ Я, И БЛЮСТИСЯ ИХ ИЕРЕЙ, И КИЙЖДО ХРИСТИАНИН, ЕЛИКО МОЖЕТ, ДОЛЖЕН ЕСТЬ. ПЕРВОЕ УБО ЕСТЬ, ИЗЛИШНЕЕ ПОМЫСЛОВ РАЗСЕЯНИЕ, ЯЖЕ ПО СИЛЕ СОБИРАТИ ВО ЕДИНО, И ОБУЗДОВАТИ МОЖЕТ ТЕПЛОЮ МОЛИТВОЮ, И УСЕРДНЫМ РАЗМЫШЛЕНИЕМ СТРАСТЕЙ ГОСПОДНИХ. ВТОРОЕ, СМУЩЕНИЕ ВНУТРЕННЕЕ, ЕЖЕ ЕСТЬ ТОСКЛИВОСТЬ: ОТГНАТИ ЖЕ ОТ СЕБЕ ДА ТЩИТСЯ УПОВАНИЕМ ПРИЯТИЯ БЛАГОДАТИ БОЖИЯ, ЕЯЖЕ СПОДОБИТИСЯ ИМАТЬ ПРИЧАЩЕНИЕМ ПРЕЧИСТЫХ ТАИН. ТРЕТИЕ, УНЫНИЕ, ИЛИ РАЗЛЕНЕНИЕ, ЕЖЕ БОДРОСТИЮ, ТРЕЗВЕНИЕМ ЖЕ И БДЕНИЕМ, ИЛИ МАЛОСПАНИЕМ КРЕПКО ОТ СЕБЕ ДА ОТЖЕНЕТ. НАД ВСЕМИ ЖЕ СИМИ, ЧЕТВЕРТОЕ ЕСТЬ СМУЩЕНИЕ, ИЛИ ДВИЖЕНИЕ ТЕЛЕСНОЕ, ОТ ОСКВЕРНЕНИЯ ВО СНЕ БЫВАЕМАГО, ЕЖЕ АЩЕ И КРОМЕ ВСЯКИЯ ОТ НЕГО ДАННЫЯ ВИНЫ ПРИКЛЮЧИТСЯ, РАЗВЕ ВЕЛИКИЯ НУЖДЫ ЛИТУРГИСАТИ ДА НЕ ДЕРЗНЕТ. АЩЕ ЖЕ САМ ДАЛ ЕСТЬ ВИНУ ПРЕПЯТИЮ СЕМУ, ИЛИ БЕСЕДАМИ, ИЛИ ПОМЫСЛЫ СКВЕРНЫМИ С ВЕЧЕРА, ИЛИ ЯДЕНИЕМ, ПИТИЕМ ЖЕ ИЛИ СНОМ ДОВОЛЬНЫМ, ДА НИКАКОЖЕ ДЕРЗНЕТ ЛИТУРГИСАТИ, ДОНЕЛЕЖЕ ИСПОВЕСТСЯ ОТЦУ СВОЕМУ ДУХОВНОМУ, И ОТ НЕГО ЕПИТИМИЮ И РАЗРЕШЕНИЕ ПРИИМЕТ. ТЕМЖЕ ВСЯКАЯ НЕДОСТАТОЧЕСТВА ТЕПЛОЮ МОЛИТВОЮ, СЛЕЗАМИ ЖЕ, БОЛЕЗНИЮ И СОКРУШЕНИЕМ СЕРДЕЧНЫМ, И ПРЕД СЛУЖЕНИЕМ И В САМОМ СЛУЖЕНИИ, ИСКОРЕНИТИСЯ МОГУТ. В ПЕРВЫХ УБО ИЕРЕЙ, В СИЦЕВОМ К БОЖЕСТВЕННОМУ СЛУЖЕНИЮ ПРЕДУГОТОВЛЕНИИ, ОТ ПРЕПЯТИЙ ПРЕДРЕЧЕННЫХ ДОЛЖЕН ЕСТЬ ХРАНИТИСЯ. ВТОРОЕ, ПОДОБАЕТ ЕМУ ИМЕТИ БОЛЕЗНЬ СЕРДЕЧНУЮ О ГРЕСЕХ, АЩЕ И О ПРОСТИТЕЛЬНЫХ, СИЕСТЬ, ПОВСЕДНЕВНЫХ МАЛЫХ. К СЕМУ ЖЕ, АЩЕ И В МАЛОМ ЧЕСОМ ОБЛИЧАЕТ ЕГО СОВЕСТЬ ЕГО, ДА ИСПОВЕСТСЯ ДУХОВНОМУ СВОЕМУ ОТЦУ, И ОТ НЕГО ДА ПРИИМЕТ РАЗРЕШЕНИЕ. ВКРАТЦЕ ЖЕ РЕЩИ: ВСЕ, ЕЖЕ ДОСТОИТ К ЧИСТОЙ СОВЕСТИ ОТ ГРЕХОВ, ДА ТЩИТСЯ ИМЕТИ. СЕРДЦЕ ЖЕ СВОЕ ДА ОЧИСТИТ ОТ ВСЯКИЯ ЛЮБВЕ ЧУВСТВЕННЫЯ, И ОТ ПОХОТЕЙ И СЛАСТЕЙ ТЕЛЕСНЫХ, ЛЮБВИ БОЖИЕЙ ПРОТИВЛЯЮЩИХСЯ, И ЧУВСТВА СВОЯ РАЗСУДНЫМ НЕКИИМ ТОМЛЕНИЕМ, АЩЕ И НЕ В ЗАПРЕЩЕННЫХ ВЕЩЕХ, ДА ОБУЗДАЕТ. ТРЕТИЕ, БЛАГОЕ ПРОИЗВОЛЕНИЕ ДА ИМАТЬ, ЕЖЕ ПОСЛУЖИТИ ГОСПОДЕВИ В ПРЕПОДОБИИ И ПРАВДЕ ВО ВСЯ ДНИ ЖИВОТА СВОЕГО, И СИЕ ПРОИЗВОЛЕНИЕ ВО СВОЕ ВРЕМЯ ДЕЛЫ БЛАГИМИ ИЗВЕСТИТИ. ЧЕТВЕРТОЕ, АЛЧБУ И ЖАЖДУ К БОЖЕСТВЕННОМУ БРАШНУ И ПИТИЮ СЕМУ, В ДУШИ И СЕРДЦЕ СВОЕМ КРЕПКО ДВОЙСТВЕННЫМ РАЗМЫШЛЕНИЕМ ДА ВОЗБУЖДАЕТ: ПЕРВЕЕ, ВЕЛИЧЕСТВОМ СЕЯ ПРЕБОЖЕСТВЕННЫЯ ТАЙНЫ: ИБО ВЕЩЕСТВЕННЕ В НЕЙ ЦАРЬ И ТВОРЕЦ ВСЕЯ ВИДИМЫЯ И НЕВИДИМЫЯ ТВАРИ, ХРИСТОС БОГ И ЧЕЛОВЕК, НЕВИДИМО ПОД ВИДИМЫМИ ХЛЕБА И ВИНА ВИДЫ, В СНЕДЬ ВЕРНЫМ ПРЕДЛЕЖИТ, И ИСТИННО ДАЕТСЯ, И ПОЛЬЗОЮ, И ПРИОБРЕТЕНИЕМ ОТ НЕЯ ПРОИСХОДЯЩИМ. ИБО ДОСТОЙНЕ СЛУЖАЙ И ПРИЧАЩАЯЙСЯ БОЖЕСТВЕННЫХ ТАИН, НЕ ТОЧИЮ ОСТАВЛЕНИЕ ГРЕХОВ ПОЛУЧАЕТ, НО И ОСВЯЩЕНИЯ И БЛАГОДАТИ ИЗРЯДНЫЯ СПОДОБЛЯЕТСЯ: ПРИОБЩАЕТСЯ БО ХРИСТУ ИЖЕ ЕСТЬ ИСТОЧНИК НЕИСЧЕРПАЕМЫЙ ОСВЯЩЕНИЯ И БЛАГОДАТИ. ВТОРОЕ, НИЩЕТЫ СВОЕЯ НЕДОСТАТОЧЕСТВОМ И ТРЕБОВАНИЕМ: ВСЯК БО, К СОКРОВИЩУ СЕМУ ПРИБЕГАЯЙ, ВОИСТИННУ БОЖЕСТВЕННЫХ ДАРОВ БОГАТСТВА ИЗОБИЛИЕ ПРИЕМЛЕТ, И ЛИШЕНИЕ ДУХОВНЫЯ СВОЕЯ НИЩЕТЫ НЕОСКУДНО ИСПОЛНИТ. К СЕМУ ЖЕ, ДА ВЕРОЮ НЕСУМНЕННОЮ К ПРИЧАСТИЮ ПРЕЧИСТЫХ И ЖИВОТВОРЯЩИХ ТЕЛА И КРОВЕ ХРИСТОВЫХ ТАИН ПРИСТУПИТ, ВО ЕЖЕ СИМИ ДУШУ ПИТАТИ: СИЦЕВО ЖЕ ПРОИЗВОЛЕНИЕ И ВЕРУ, НЕ ТОЧИЮ ИЕРЕЙ И ДИАКОН, НО И ВСЯК, ДОСТОЙНО ХОТЯЙ ПРИЧАСТИТИСЯ ВЕРНЫЙ, ДОЛЖЕН ЕСТЬ ИМЕТИ. ИЕРЕЙ ЖЕ И ДИАКОН, ЛИТУРГИСАТИ ХОТЯЙ, К СЕМУ ВСЯКО ДОЛЖЕН ЕСТЬ ОСОБНЕ И СИЕ ИМЕТИ, ЕЖЕ ИЗВОЛИТИ В ПРЕДЛОЖЕНИИ СВОЕМ В СЛАВУ БОГА, В ТРОИЦЕ СВЯТЕЙ СЛАВИМАГО, И В ЧЕСТЬ ВСЕХ СВЯТЫХ, В НЕБЕСНОМ РАИ ВЕСЕЛЯЩИХСЯ, В ПОЛЬЗУ ЖЕ И ОСТАВЛЕНИЕ ГРЕХОВ СЕБЕ И ВСЕМ ВЕРНЫМ БОЖИИМ, НА ЗЕМЛИ СУЩИМ, И В ПРАВОВЕРИИ БЛАГОЧЕСТНО УСОПШИМ, ЗА ВСЕХ ЖЕ ОСОБНЕ ЖИВЫХ И УСОПШИХ, МОЛИТВАМ ЕГО ВРУЧИВШИХСЯ, И О БЛАГОСТОЯНИИ СВЯТЫЯ СОБОРНЫЯ АПОСТОЛЬСКИЯ ВОСТОЧНЫЯ ЦЕРКВЕ ЛИТУРГИЮ БОЖЕСТВЕННУЮ ПО УСТАВУ ГОСПОДНЮ, И ОБЫЧАЮ ЦЕРКВИ СВЯТЫЯ ВОСТОЧНЫЯ, ЯКОЖЕ ТАЙНУ ОСВЯЩАЮЩУЮ, И ЯКО ЖЕРТВУ БОГА УМИЛОСТИВЛЯЮЩУЮ, И ГРЕХИ ОЧИЩАЮЩУЮ, СОВЕРШАТИ, В НЕЙЖЕ ДУХ СВЯТЫЙ УСТЫ ЕГО, ПО СЛОВЕСИ БОЖЕСТВЕННЫХ СЛОВЕС: И СОТВОРИ УБО ХЛЕБ В ТЕЛО ХРИСТОВО, И ВИНО [ВОДОЮ МАЛО РАСТВОРЕНОЕ] В КРОВЬ ЕГО БОЖЕСТВЕННУЮ, ПРЕЛОЖИВ ДУХОМ ТВОИМ СВЯТЫМ, НА ПРЕСТОЛЕ ПРЕДЛОЖЕННЫЯ ИСТИННО ПРЕСУЩЕСТВИТ. ПЯТОЕ, ВСЯКО ДА ТЩИТСЯ, ЕЖЕ С ВЕЛИКОЮ ЧЕСТИЮ, И ГЛУБОКИМ СМИРЕНИЕМ К БОЖЕСТВЕННЕЙ СЕЙ ТАЙНЕ ПРИСТУПИТИ, ПОМЫШЛЯЯ ЕГО ВЕЛИЧЕСТВО, И МИЛОСЕРДИЕ, И БЕЗМЕРНУЮ ЧИСТОТУ, СВОЮ ЖЕ ХУДОСТЬ, СКВЕРНОСТЬ И НЕМОЩЬ: ОТ СЕГО УБО РАЗМЫШЛЕНИЯ ВЕЛИЮ БЛАГОДАТЬ И РАДОСТЬ ОБРЯЩЕТ ЧЕЛОВЕК. ШЕСТОЕ, ПРИЛЕЖНО ДА ТЩИТСЯ БЛАГОГОВЕИНСТВО СЕБЕ СТЯЖАТИ, И РАЗМЫШЛЯТИ СТРАСТИ ГОСПОДНИ: ВОЗЫМЕЕТ БО ДУХОВНУЮ НАДЕЖДУ И ЛЮБОВЬ К ХРИСТОВОЙ ТАЙНЕ СЕЙ, К НЕЙЖЕ ПРИЛЕЖНАЯ МОЛИТВА СО ВНИМАНИЕМ ЗЕЛО ЕСТЬ ПОМОЩНА. СИЦЕ УБО К ДОСТОЙНОМУ СЛУЖЕНИЮ ПРЕДУГОТОВЛЯЯ СЕБЕ СЛУЖИТЕЛЬ, ИЛИ ПРИОБЩИТИСЯ ХОТЯЙ БОЖЕСТВЕННАГО ТЕЛА И КРОВЕ, ДОЛЖЕН ЕСТЬ С ВЕЧЕРА ПО ЧИНУ ЦЕРКОВНОМУ ВЕЧЕРНЮ СОВЕРШИТИ, [ИЛИ ВЫСЛУШАТИ] НА НЕЙЖЕ БЛАГОГОВЕЙНО ДА ПОУЧАЕТСЯ В МЫСЛИ СВОЕЙ, УМИЛЕННО РАЗМЫШЛЯЯ: КАКО ГОСПОДЬ И СПАС НАШ ИИСУС ХРИСТОС, ПО СПАСИТЕЛЬНЫХ СВОИХ СТРАСТЕХ В ПЯТОК ВЕЧЕРА, НА КРЕСТЕ ГРЕХ РАДИ НАШИХ ВИСЯ, СПАСЕНИЯ РАДИ НАШЕГО УМРЕ: КАКО ЕДИН ОТ ВОИНОВ КОПИЕМ РЕБРА ЕМУ ПРОБОДЕ, ИЗ НЕГОЖЕ АБИЕ ИЗЫДЕ КРОВЬ И ВОДА: КАКО ПОСЕМ ИОСИФ С НИКОДИМОМ ТЕЛО ХРИСТОВО СНЕМШЕ, ПЛАЩАНИЦЕЮ ОБВИША, И ВО ГРОБЕ ПОЛОЖИША: И КАКО МАРИА МАГДАЛИНА, С ПРЕЧИСТОЮ МАТЕРИЮ ГОСПОДНЕЮ, С ПЛАЧЕМ И ВЕЛИИМ РЫДАНИЕМ, В ГОРЕСТИ СЕРДЦА ЗРЯХУ СИЯ. ПОВЕЧЕРИЕ ЖЕ, И КО СНУ ИДЯ МОЛИТВЫ СОВЕРШАЯ, И ОПРЕДЕЛЕННЫЯ СЕБЕ КАНОНЫ, ЯКО АКАФИСТ БОГОВЛАДЫЧИЦЕ, ИЛИ ГОСПОДУ ИИСУСУ, ИЛИ СВЯТЫМ КОИМ В СЕДМИЦЕ, И АНГЕЛУ СВОЕМУ ХРАНИТЕЛЮ, ДА БЛАГОГОВЕЙНО РАЗМЫШЛЯЕТ: КАКО ПРЕСВЯТАЯ ДУША СПАСИТЕЛЕВА, БОЖЕСТВУ СОВОКУПЛЕННАЯ, ВО АД СОШЕДШИ, ДЕРЖАВНО КНЯЗЯ ТМЫ СВЯЗА, ТОГО ЦАРСТВО ПЛЕНИ, И ДУШИ ОТ ВЕКА ВСЕХ СУЩИХ ТАМО ПРАВЕДНЫХ ОТ МУЧИТЕЛЬСТВА ЕГО СВОБОДИ, С СОБОЮ ВОЗВЕДЕ, И В РАЙ ДАЖЕ ДО СВОЕГО ПРЕСЛАВНАГО ВОЗНЕСЕНИЯ ВСЕЛИ. ТЕМ БЛАГОДАРЯ ЕГО ЗА ВСЯ БЛАГОДЕЯНИЯ, ЯЖЕ СПАСИТЕЛЬНОЮ СТРАСТИЮ, И ЖИВОТВОРНОЮ СВОЕЮ СМЕРТИЮ РОДУ ЧЕЛОВЕЧЕСКОМУ СОТВОРИ, ПРИЛЕЖНО МОЛИТ, ДА И ЕГО ВСЯ СОГРЕШЕНИЯ ТЕХ РАДИ ОЧИСТИВ, ОТ ВЕЧНЫЯ МУКИ ИЗБАВИТ ЕГО И ЦАРСТВИЯ СВОЕГО СПОДОБИТ. ПРЕЧИСТУЮ ЖЕ БОГОРОДИЦУ, СООБЩНИЦУ СТРАСТЕМ И СМЕРТИ СЫНА СВОЕГО БЫВШУЮ, И СИЯ ЗРЯЩИ СБОЛЕЗНОВАВШУЮ, ПРИЛЕЖНО МОЛИТИ, ЕЖЕ В ЖИТИИ СЕМ ПРЕДСТАТЕЛЬНИЦЕЮ, И КО ВСЕМ ДОБРОДЕТЕЛЕМ ПОМОЩНИЦЕЮ БЫТИ, И В ДЕНЬ ИСХОДА ОТ ТЕЛА, ДУШУ ОТ ВСЕХ ДИАВОЛЬСКИХ НАХОЖДЕНИЙ, КРЕПКИМ СВОИМ ПРЕДСТАТЕЛЬСТВОМ ИЗБАВИВШИ, В ЦАРСТВИИ СЫНА СВОЕГО ВСЕЛИТ: ВСЯ БО ЯКО МАТИ У СЫНА СВОЕГО ВЕРНО К НЕЙ ПРИТЕКАЮЩИМ ИСПРОСИТИ МОЖЕТ. ВО УТРЕННЕЕ ЖЕ ВРЕМЯ ПЕНИЯ, ПРЕЖДЕ ОСВЕТЕНИЯ ДНЕ ПОЛУНОЩНИЦУ СОВЕРШАЯ, СИЯ БЛАГОГОВЕЙНО ДА РАЗМЫШЛЯЕТ: КАКО ГОСПОДЬ НАШ В ПОЛУНОЩИ, ИДЫЙ К ВОЛЬНЕЙ СТРАСТИ, В ВЕРТОГРАДЕ В ТАКОВОМ ПОДВИЗЕ БЕ ПРИЛЕЖНО МОЛЯСЯ, ЯКО ПОТУ ЕГО БЫТИ, ЯКО КАПЛИ КРОВЕ КАПЛЮЩИЯ НА ЗЕМЛЮ: И КАКО ТАМО ОТ ВОИНОВ ЯТ, И КО АННЕ ПЕРВЕЕ ЯКО ЗЛОДЕЙ СВЯЗАННЫЙ ВЕДЕН БЫСТЬ: И КАКОВА ТАМО ПОНОСНАЯ УНИЧИЖЕНИЯ, ОПЛЕВАНИЯ, БИЕНИЯ ЖЕ И НЕИСЧЕТНАЯ ЗЛАЯ ВОЛЕЮ ПРЕТЕРПЕ, ДА НАС ОТ УЗ ГРЕХОВНЫХ, И ОТ МУЧИТЕЛЬСТВА, И ТОМЛЕНИЯ ДИАВОЛЯ СВОБОДИТ. УТРЕНЮ ЖЕ СОВЕРШАЯ, ПРИЛЕЖНО СО УМИЛЕНИЕМ ДА РАЗМЫШЛЯЕТ: КАКО ГОСПОДЬ ВЕЛИИМ УНИЧИЖЕНИЕМ ОТ АННЫ К КАИАФЕ ВЕДЕН БЫСТЬ: И КАКОВА ТАМО ИСПЫТАНИЯ, ЛЮТАЯ ТОМЛЕНИЯ, ЗАУШЕНИЯ, ОПЛЕВАНИЯ, НАРУГАНИЯ ЖЕ И НЕМИЛОСТИВНАЯ УДАРЕНИЯ, ОТ ПОЛУНОЩИ ДАЖЕ ДО УТРА, ГРЕХ РАДИ НАШИХ ВОЛЕЮ ПРЕТЕРПЕ. ПО УТРЕНИ ЖЕ В СОВЕРШЕНИИ ПЕРВАГО ЧАСА БЛАГОГОВЕЙНО ДА РАЗМЫШЛЯЕТ: КАКО СПАСИТЕЛЬ НАШ В ПЕРВЫЙ ЧАС ДНЕ ВЕДЕН БЫСТЬ В ПРЕТОР ОТ КАИАФЫ К ПИЛАТУ, ЯКО ЗЛОДЕЙ, БЛАГОДЕТЕЛЬ, СВЯЗАННЫЙ: И КАКО ТАМО ВСЕГО МИРА СУДИЯ ОТ БЕЗЗАКОННЫХ АРХИЕРЕЕВ И СТАРЦЕВ ИУДЕЙСКИХ ОБОЛГАН, И ОТ НЕПРАВЕДНАГО СУДИИ ОСУЖДЕН БЫСТЬ. ТРЕТИЙ ЖЕ ЧАС ВО СВОЕ ВРЕМЯ БЛАГОГОВЕЙНО ВО УМИЛЕНИИ СЕРДЦА СОВЕРШАЯ, ПРИЛЕЖНО ДА РАЗМЫШЛЯЕТ: КАКО СПАСИТЕЛЬ НАШ В ТРЕТИЙ ЧАС ДНЕ, ПИЛАТОМ СУДИМЬ БЫСТЬ, И КАКОВАЯ ТАМО БЕЗЧИСЛЕННАЯ НАРУГАНИЯ, И ЗАУШЕНИЯ, ПОСЕМ ЖЕ НЕМИЛОСТИВНО У МРАМОРНАГО СТОЛПА СВЯЗАН СЫЙ, ЛЮТЫЯ РАНЫ, К СЕМУ ЖЕ ОСТРЫМ ТЕРНИЕМ ВЕНЧАНИЕ, И ИНЫЯ НЕСТЕРПИМЫЯ МУКИ [ДА НАС ОТ МУЧИТЕЛЬСТВА ДИАВОЛЯ СВОБОДИТ] ПРЕТЕРПЕ. К СЕМУ ЖЕ РАЗМЫШЛЯТИ И СИЕ ПРИЛИЧНО ЕСТЬ: КАКО ДУХ СВЯТЫЙ В ТРЕТИЙ ЧАС ДНЕ, ВО ОГНЕННЫХ ЯЗЫЦЕХ НА АПОСТОЛЫ СУЩИЯ НА МОЛИТВЕ СНИДЕ, И ТЫЯ ПРОСВЕТИ. СИЕ ЖЕ РАЗМЫШЛЯЯ, ПРИЛЕЖНО БОГУ ДА МОЛИТСЯ, ЯКО ДА ПОДАСТ И ЕМУ ДУХА СВЯТАГО, ЯКОЖЕ И СВЯТЫМ АПОСТОЛОМ, К ДУХОВНАГО РАЗУМА ПРОСВЕЩЕНИЮ, И ВО ЕЖЕ ДОСТОЙНО СОВЕРШИТИ ЕМУ ПРЕДЛЕЖАЩУЮ БОЖЕСТВЕННУЮ СЛУЖБУ. ШЕСТЫЙ ЖЕ ЧАС СОВЕРШАЯ, БЛАГОГОВЕЙНО ДА РАЗМЫШЛЯЕТ: КАКО ШЕСТАГО ЧАСА ДНЕ, СПАСИТЕЛЬ НАШ НОСЯ КРЕСТ СВОЙ, К ПРОПЯТИЮ ВЕДЕН БЫСТЬ: И КАКО НЕМИЛОСТИВНО ЧЕТЫРМЯ ГВОЗДЬМИ НА КРЕСТЕ, ЛЮТЕ ПРИГВОЖДЕН НА ГОЛГОФЕ, ПОСРЕДЕ ДВОЮ РАЗБОЙНИКОВ РАСПЯТ ВИСЯШЕ: И КАКО ВОИНИ РАЗДЕЛИША РИЗЫ ЕГО СЕБЕ: КАКО ЖЕ МИМОХОДЯЩИИ РУГАХУСЯ ЕМУ, И РАЗБОЙНИК ОШУЮЮ ЕГО ВИСЯЩ, ХУЛЯШЕ ЕГО, И КАКО ТМА БЫСТЬ ПО ВСЕЙ ЗЕМЛИ. ДЕВЯТЫЙ ЖЕ ЧАС [ЕГДА КОЕГО ВРЕМЕНЕ ПОЕТСЯ] ТАКОЖДЕ СО ВСЯКИМ БЛАГОГОВЕНИЕМ СОВЕРШАЯ, СИЕ ВНИМАТЕЛЬНЕ ДА РАЗМЫШЛЯЕТ: КАКО СПАСИТЕЛЬ НАШ, СПАСЕНИЯ РОДА ЧЕЛОВЕЧА ЖЕЛАЯ, НА КРЕСТЕ ВИСЯЙ ВОЗГЛАГОЛЯ: ЖАЖДУ, И КАКО ОЦТОМ, С ЖЕЛЧИЮ СМЕШЕННЫМ, НАПОЕН БЫСТЬ: КАКО ЖЕ ДУШУ СВОЮ ПРЕСВЯТУЮ В РУЦЕ БОГА ОТЦА ПРЕДАДЕ: И КАКО ВСЯ ОСНОВАНИЯ ЗЕМЛИ ПОТРЯСОШАСЯ, КАМЕНИЕ РАСПАДОШАСЯ, МЕРТВИИ ОТ ГРОБОВ ВОСТАША: И КАКО ЕДИН ОТ ВОИНОВ КОПИЕМ РЕБРА ЕМУ ПРОБОДЕ, И АБИЕ ИЗЫДЕ ИЗ НЕГО КРОВЬ И ВОДА. СИЯ ЖЕ ВКРАТЦЕ ПОМЯНЕННАЯ, И ИНАЯ СПАСИТЕЛЬНАЯ ГОСПОДНЯ СТРАДАНИЯ, БЛАГОГОВЕЙНО РАЗМЫШЛЯЯ В СОКРУШЕНИИ СЕРДЦА УСЕРДНО, АЩЕ ЖЕ ВОЗМОЖНО, И СО СЛЕЗАМИ, ДА СОВЕРШАЕТ ЧАСОВНЫЯ МОЛИТВЫ. НА ИЗОБРАЗИТЕЛЬНЫХ ЖЕ, [АЩЕ И ЛИТУРГИИ НЕ БУДЕТ] ДА БЛАГОДАРИТ УСЕРДНО СПАСИТЕЛЯ, СИЦЕВЫХ РАДИ ЛЮТЫХ СТРАДАНИЙ, ЯЖЕ ВОЛЕЮ НАС РАДИ ПРЕТЕРПЕ, ДА ОТ МУЧИТЕЛЬСТВА ДИАВОЛЯ НАС СВОБОДИТ: И ИЗЛИЯНИЯ РАДИ ПРЕЧИСТЫЯ ЕГО КРОВЕ, ЕЮЖЕ НАС ОТ КЛЯТВЫ ЗАКОННЫЯ ИСКУПИ, И ЖИВОТ ДАЮЩИЯ РАДИ ЕГО СМЕРТИ, ЕЮЖЕ РОД ЧЕЛОВЕЧЕСКИЙ, УМЕРШИЙ ГРЕХОМ, ОЖИВОТВОРИ, И ПРИЛЕЖНО В СМИРЕННОМ СЕРДЦЕ ДА МОЛИТСЯ, ЯКО ДА СИХ РАДИ ВСЕХ БЛАГОДЕЯНИЙ СВОИХ, ИМИЖЕ РОД ЧЕЛОВЕЧЕСКИЙ ОБЛАГОДЕТЕЛЬСТВОВА, ПОДАСТ И ЕМУ БЛАГОДАТЬ ОСТАВЛЕНИЯ ГРЕХОВ, ВО ЕЖЕ ДОСТОЙНО ПРИНЕСТИ ЕМУ БЕЗКРОВНУЮ ЖЕРТВУ, И НЕОСУЖДЕННО ПРИЧАСТИТИСЯ СВЯТЫМ ЕГО ТАЙНАМ. АЩЕ ЖЕ ИЕРЕЙ И ДИАКОН, ИЛИ КТО К ПРИЧАЩЕНИЮ ГОТОВЯСЯ, ПРЕДРЕЧЕННОЕ ПРАВИЛО ЦЕРКОВНОЕ И БОЖЕСТВЕННОМУ ПРИЧАЩЕНИЮ ПОДОБАЮЩЕЕ, САМОХОТНЕ ОТ РАЗЛЕНЕНИЯ, ИЛИ НЕБРЕЖЕНИЯ, ИЛИ ВСЕ, ИЛИ ЧАСТЬ НЕКУЮ ОСТАВИТ, СМЕРТНО СОГРЕШИТ. АЩЕ ЖЕ В НУЖДНЫХ ИЕРЕЙ ЧЕЛОВЕЧЕСКОМУ СПАСЕНИЮ ДУХОВНЫХ ВЕЩЕХ СЕБЕ УПРАЖДНЯЯ, СИЕСТЬ, СЛУШАНИЕМ ИСПОВЕДИ БОЛЬНЫХ ИЛИ ЗДРАВЫХ, ИЛИ ПРИЧАЩЕНИЕМ, ИЛИ КРЕЩЕНИЕМ БОЛЬНЫХ, ВРЕМЕНИ ЖЕ ПРИСПЕВАЮЩУ БОЖЕСТВЕННЫЯ СЛУЖБЫ, ПРАВИЛО ОСТАВИТИ ПРИНУЖДЕН БУДЕТ, НЕ СОГРЕШИТ: ТОЧИЮ ПО БОЖЕСТВЕННОЙ ЛИТУРГИИ ОСТАВЛЕННОЕ ВСЕ ДА СОВЕРШИТ: МОЛИТВЫ ЖЕ КО ПРИЧАЩЕНИЮ НЕОТЛОЖНО ДА ГЛАГОЛЕТ ПРЕД ЛИТУРГИЕЮ. ТЕМЖЕ И ХОТЯЩИИ ПРИЧАСТИТИСЯ ТАИНСТВА, ДОЛЖНИ СУТЬ ПЕНИЕ ЦЕРКОВНОЕ, И ПРАВИЛО К СВЯТОМУ ПРИЧАЩЕНИЮ ИСПОЛНИТИ ВСЕДУШНО, И О РАЗМЫШЛЕНИИ СТРАСТЕЙ ГОСПОДНИХ ТЩАТИСЯ. АЩЕ НЕ ВЕДЯТ ПИСАНИЯ, ТОГДА ИЕРЕЕМ, ИЛИ ДИАКОНОМ, ИЛИ ПРИЧЕТНИКОМ О ТОМ ОНЫЯ ПОУЧАТИ, ДА НА БОЛЬШЕЕ ЖЕЛАНИЕ К ЛЮБВИ ГОСПОДНЕЙ ЛЮДИ УБЕДЯТСЯ. А ИЖЕ И ПИСАНИЕ ЧЕСТИ МОГУЩИИ, И О ПРАВИЛЕ ЦЕРКОВНОМ НЕРАДЯЩИИ, И БЕЗ СОКРУШЕНИЯ СЕРДЦА, МНЕНИЕМ О СЕБЕ ПОБЕЖДЕННИИ, АЩЕ И ВЕЛИЦЫИ КОЕГОЛИБО ПОЛА БУДУТ, ДЕРЗАЮЩИИ ПРИСТУПИТИ К СТРАШНОМУ ТАИНСТВУ СЕМУ, ДА ОСТАНУТСЯ ОТ ТОГО, И ИЕРЕЙ, ЯКО ОТЕЦ ДУХОВНЫЙ, ДА ИСТЯЗУЕТ, И ОТЛУЧИТ ОТ СВЯТЫНИ ТОГДА, ДОНДЕЖЕ ИСПРАВИТСЯ КТО, И СО ВНИМАНИЕМ ДОЛЖНОЕ ВОЗДАСТ: СТРАШНО БО ВПАСТИ В РУЦЕ БОГА ЖИВА, АЩЕ В СУД ИЛИ ВО ОСУЖДЕНИЕ БУДЕТ ЯСТИ ТЕЛО, И ПИТИ КРОВЬ ГОСПОДА НАШЕГО ИИСУСА ХРИСТА. ИЕРЕЙ И ДИАКОН К СЛУЖЕНИЮ БОЖЕСТВЕННЫЯ ЛИТУРГИИ, ЯКОЖЕ ДУШЕЮ, СИЦЕ И ТЕЛОМ ДОЛЖЕН ЕСТЬ ЧИСТ БЫТИ: ИБО ЯКОЖЕ ТЕЛО ЧИСТО, ТАКО И НА СЕБЕ ЧИСТЫЯ И ЦЕЛЫЯ ОДЕЖДЫ ИМЕТИ ДОСТОИТ. АЩЕ ЖЕ БУДУТ ВЕЛЬМИ РУДНЫЯ, ИЛИ РАЗДРАНЫЯ, ИЕРЕЙ ЖЕ ДЕРЗНЕТ В НИХ СЛУЖИТИ, СМЕРТНО СОГРЕШИТ: ПОНЕЖЕ ХРИСТА БОГА УНИЧИЖАЕТ, В ПРЕЧИСТЫХ ТАЙНАХ СВОИХ ИСТИННО СУЩАГО. ТЕМЖЕ ВСЯКО ТЩАТИСЯ ДОЛЖНО СВЯЩЕННОСЛУЖИТЕЛЕМ, АЩЕ И НИЩЕТНЫ, НО БЛАГООБРАЗНЫ И ЧИСТЫ СВЯЩЕННЫЯ ОДЕЖДЫ ДА БУДУТ. К СЕМУ, ГЛАВУ УЧЕСАНУЮ, ЛИЦЕ И УСТА ИЗМОВЕНЫ, ПАЗНОКТИ ЖЕ ОБРЕЗАНЫ ДА ИМАТЬ: СИЦЕ ЧЕСТИ РАДИ БОЖЕСТВЕННЫХ ТАИН. ТАКОЖДЕ И ЛЮДИ НА НЕГО ЗРЯЩИИ, И РУКУ ЕГО ЛОБЫЗАЮЩИИ, ЧИМЛИБО ДА НЕ ОГОРЧАТСЯ. ДОБРЕ УБО ВСЯК СОТВОРИТ ПРИЧАСТИТИСЯ ХОТЯЩИЙ, АЩЕ ЗУБЫ С ВЕЧЕРА ИСЧИСТИТ, И УСТА СВОЯ ИЗМЫЕТ, ЯКО ДА НЕ ЧТО ВОУТРИЕ ОТ ВОДЫ В ГОРТАНЬ [ЕГДА ИЗМЫВАЕТ УСТА] ВПАДЕТ, И ЗАПЯТ БУДЕТ СЛУЖИТИ, ИЛИ ПРИЧАСТИТИСЯ КТО. АЩЕ ЖЕ И ВОУТРИЕ СОХРАННО УСТА ИЗМЫЕТ, ВО ЕЖЕ НИЧТОЖЕ ОТ ВОДЫ ПОГЛОТИТИ, БЕЗ УСУМНЕНИЯ ДА СЛУЖИТ. О ВРЕМЕНИ СЛУЖЕНИЯ. ВРЕМЯ СЛУЖЕНИЯ ЕСТЬ, ПО ДРЕВНЕМУ ОБЫЧАЮ ЦЕРКОВНОМУ, ТРЕТИЙ ЧАС ДНЕ: НО УБО МОЖЕТ И РАНЕЕ И ПОЗДНЕЕ НАЧАТИСЯ И СОВЕРШАТИСЯ БОЖЕСТВЕННАЯ ЛИТУРГИА, АЩЕ ПОТРЕБА СИЦЕВАЯ НАДЛЕЖАТИ БУДЕТ, ТОЧИЮ НЕ ПРЕЖДЕ СВИТАНИЯ ДНЕ, НИЖЕ ПО ПОЛУДНИ: ИБО СИЦЕ НАЧИНАЯЙ И СОВЕРШАЯЙ СОГРЕШИТ. СУТЬ УБО ДНИ ОТ ЦЕРКВЕ ОТДЕЛЕННЕ УРОЧНЫЯ, В НИХЖЕ ПО ПОЛУДНИ ПОДОБАЕТ ЛИТУРГИСАТИ, НАИПАЧЕ ЖЕ ЕГДА ЛИТУРГИА ВКУПЕ С ВЕЧЕРНЕЮ СОВЕРШАЕТСЯ, СИЕСТЬ, ПРЕЖДЕОСВЯЩЕННЫЯ, В ЧЕТЫРЕДЕСЯТНИЦЕ, В ВЕЛИКУЮ ЖЕ СУББОТУ, И В НАВЕЧЕРИИ ХРИСТОВА РОЖДЕСТВА, И БОГОЯВЛЕНИЙ, И В ДЕНЬ ПЯТЬДЕСЯТНЫЙ. ВЕЩИ ПРЕД СЛУЖЕНИЕМ И В СЛУЖЕНИИ ДОСТОИТ ИЕРЕЕМ ХРАНИТИ СИЯ: АНТИМИНС, АЩЕ БУДЕТ РАЗДРАНЫЙ, ДИРАВЫЙ, ИЛИ ИСЧЕРНЕЛЫЙ, ЯКОЖЕ ПИСМЕНАМ НА НЕМ СУЩИМ НЕ ПОЗНАВАТИСЯ, ТАКОЖДЕ, И НА ПИШЕМЕЙ БУМАГЕ, НИКАКОЖЕ НА ТАКОМ СЛУЖИТИ ДОСТОИТ: ДЕРЗАЯЙ ЖЕ НА СИЦЕВОМ СЛУЖИТИ, ЯКО УНИЧИЖИТЕЛЬ БОЖЕСТВЕННЫХ ТАИН, СМЕРТНО СОГРЕШАЕТ, И ЕПИСКОПСКОЙ КАЗНИ ПОДПАДАЕТ, СИЕСТЬ, ЗАПРЕЩЕНИЮ, ИЛИ ОТЛУЧЕНИЮ. НА ПРЕСТОЛЕ ПОДОБАЕТ БЫТИ СРАЧИЦЕ ЕДИНОЙ, ВТОРОЙ ИНДИТИИ: СИМИ БО ПРЕСТОЛ ОДЕВАЕТСЯ ДО ЗЕМЛИ, НА ВЕРХУ ЖЕ ЛИТОН ОТ ТОНКАГО И ГУСТАГО ПЛАТНА, ИЛИ ШЕЛКОВЫЙ, НА НЕМЖЕ АНТИМИНС ПРОСТИРАЕТСЯ, И МЕРОЮ ТАКОВЫЙ ЖЕ, КАКОВЫЙ АНТИМИНС. СИИ ЖЕ: СРАЧИЦА И ИНДИТИА, И ЛИТОН ДА БУДУТ ЧИСТЫ, НЕ РАЗДРАНЫ, И НЕ ДИРАВЫ, И АЩЕ ОБВЕТШАЮТ, ПРЕМЕНИТИ ПО ПОВЕЛЕННОМУ ЧИНУ С МОЛИТВОСЛОВИЕМ. В ЦЕРКВИ ЖЕ И ВО ОЛТАРЕ, И НА СВЯТЕЙ ТРАПЕЗЕ БОЖИЕЙ, ВСЯ ЧИСТА, ЦЕЛА, БЛАГООБРАЗНА, И УМЕТЕНА, И ЧЕСТНА ДА БУДУТ: ДА НЕ УНИЧИЖАЮТСЯ БОЖЕСТВЕННЫЯ ТАЙНЫ НЕРАДЕНИЕМ, И ТОГО СМОТРИТИ ПРИЛЕЖНО. АЩЕ ЦЕРКОВЬ, И ПРЕСТОЛ ЕСТЬ ОСВЯЩЕННЫЙ, НО УБО ОТ СЛУЧАЯ В КРАМОЛЕ НЕКОЕЙ ОКРОПЛЕНИЕМ ЧЕЛОВЕЧЕСКИЯ КРОВЕ, ИЛИ ОТ ОРУЖНАГО, ИЛИ РУЧНАГО, ИЛИ КАКОВАГОЛИБО БУДИ УДАРЕНИЯ, ИЛИ ОТ ТЕЛЕСНЫЯ КАКОВЫЯ НЕЧИСТОТЫ НА ПОМОСТЕ ОСКВЕРНЕНА БУДЕТ, НИКАКОЖЕ ИЕРЕЙ СЛУЖИТИ ДА ДЕРЗНЕТ, ДОНДЕЖЕ ОБЫЧНОЕ, [СО АРХИЕРЕЙСКИМ БЛАГОСЛОВЕНИЕМ] ОЧИЩЕНИЕ БУДЕТ: ПРЕНЕБРЕГИЙ БО СИЕ, СМЕРТНО СОГРЕШИТ, И АРХИЕРЕЙСКОЙ КАЗНИ БУДЕТ ПОДЛЕЖАТИ. АЩЕ СИИ СЛУЧАИ ПРИ ЗАЧАТОЙ УЖЕ ЛИТУРГИИ ПРИКЛЮЧАТСЯ, ПРЕД ВЕЛИКИМ ВХОДОМ, ДА ПРЕСТАНЕТ ИЕРЕЙ ЛИТУРГИСАТИ, И ИСТРЕБИВ ХЛЕБ И ВИНО ЯКО БЛАГОСЛОВЕННЫЯ, НО НЕ ЯКОЖЕ ТЕЛО И КРОВЬ ХРИСТОВУ, ИБО НЕ У ОСВЯЩЕНЫ БЫША, ДА СОВЛЕЧЕТСЯ СВЯЩЕННЫХ ОДЕЖД, И ДА ИЗЫДЕТ СЛУЖБЫ НЕ СОВЕРШИВ. АЩЕ ЖЕ ПО ВЕЛИКОМ ВХОДЕ СИЯ ПРИКЛЮЧАТСЯ, ДА НЕ ПРЕСТАНЕТ, НО ДА СОВЕРШИТ ЗАЧАТУЮ БОЖИЮ СЛУЖБУ. ПОСЕМ ЖЕ ДА НЕ ДЕРЗНЕТ СЛУЖИТИ ПАКИ, ДОНЕЛИЖЕ БЛАГОСЛОВЕНИЕМ ЕПИСКОПСКИМ ЧРЕЗ ОБЫЧНЫЯ СЕМУ МОЛИТВЫ ОЧИСТИТСЯ, И ОСВЯТИТ МЕСТО ОНО. АЩЕ ЦЕРКОВЬ ОТ НАХОЖДЕНИЯ ЯЗЫЧЕСКАГО, ИЛИ ОТ НАСИЛИЯ ЕРЕТИЧЕСКАГО, ИЛИ ОТСТУПНИЧЕСКАГО ОСКВЕРНЕНА БУДЕТ, ИЛИ АЩЕ ЯВНЫЙ ЕРЕТИК ТАМО ПОГРЕБЕН БУДЕТ, ИЕРЕЙ ДА НЕ ДЕРЗНЕТ ЛИТУРГИСАТИ, ДОНЕЛИЖЕ БЛАГОСЛОВЕНИЕМ ОСОБНЫМ ЕПИСКПСКИМ ОЧИСТИТ, И ОБЫЧНО ЦЕРКОВЬ ОСВЯТИТСЯ: БЕЗ БЛАГОСЛОВЕНИЯ ЖЕ СЛУЖИТИ ДЕРЗАЯЙ, СМЕРТНО СОГРЕШИТ, И КАЗНИ ЕПИСКОПСКОЙ ПОДЛЕЖАТИ БУДЕТ. СОСУДЫ СВЯЩЕННЫЯ К СЛУЖЕНИЮ ПОТРЕБНИИ СУТЬ СИИ: ПОТИР, ИЛИ ЧАША, ДИСКОС, ЗВЕЗДА И ЛОЖИЦА: К СИМ СОСУДОМ ПОТРЕБНЫ СУТЬ ТРИ ПОКРОВЦЫ: ЕДИН ПОКРОВЕНИЯ РАДИ ПОТИРЯ, ВТОРЫЙ ДИСКОСА, ТРЕТИЙ ОБОИХ РАДИ: СИИ УБО ПОКРОВЦЫ ДА БУДУТ ОТ ЧЕСТНЫЯ ВЕЩИ СОДЕЛАНЫ, ЧИСТЫ ЖЕ И ЦЕЛЫ. ЧЕТЫРЕ ЖЕ СИИ СОСУДЫ ДА БУДУТ ЗЛАТЫ, ИЛИ СРЕБРЯНЫ, ИЛИ УЖЕ ОЛОВЯННЫ: ДА НЕ БУДУТ ЖЕ ИЗ КАКОВЫЯЛИБО МЕДИ, ЖЕЛЕЗНЫ, НИЖЕ ДЕРЕВЯННЫ, В СИЦЕВЫХ БО СЛУЖАЙ СОГРЕШАЕТ, И НАКАЗАНИЮ ЕПИСКОПСКОМУ ПОДЛЕЖИТ. КНИГА СЛУЖЕБНИК ВСЯКО ЕСТЬ ПОТРЕБНА К СЛУЖЕНИЮ, НА ПАМЯТЬ ЖЕ МОЛИТВ ДА НЕ ГЛАГОЛЕТ: ИБО АЩЕ ИЕРЕЙ СЛУЖИТИ БУДЕТ ПАМЯТНЕ, БЕЗ КНИГИ, СМЕРТНО СОГРЕШИТ: ЗАНЕ МНОГИЯ СПОНЫ, ЗАБВЕНИЕ ЖЕ И ЗАПНОСТИ ТОГДА СЛУЧАЮТСЯ, И НЕ ИМАТЬ ПОЗНАТИ, ЧТО ДЕЕТ, ИЛИ ГЛАГОЛЕТ, И ВО УСУМНЕНИЕ ЛЮДЕЙ ВВЕДЕТ, И ЯВЛЕННЫЙ ПОРОК ЗАБЫВСЯ СОТВОРИТ. К СЕМУ СВЕЩИ ГОРЯЩИЯ, ПОНЕ ЧЕТЫРЕ, ИЛИ ТРИ, ДА БУДУТ ПРИ ЛИТУРГИИ БОЖЕСТВЕННОЙ НА ПРЕСТОЛЕ, НА ЖЕРТВЕННИКЕ, ПРЕД ИКОНАМИ ДВЕ, НА ИСХОЖДЕНИЕ. В ВЕЛИЦЕЙ ЖЕ НУЖДЕ ДВЕ, ИЛИ ЕДИНА: ИБО АЩЕ КРОМЕ СВЕЩ ЛИТУРГИСАТИ ДЕРЗНЕТ ИЕРЕЙ, СМЕРТНО СОГРЕШИТ. В КОНЕЦ ЖЕ, ПОСЛУЖИТЕЛЬ ВО ОЛТАРЕ ВСЯКО МУЖЕСКИЙ ПОЛ ДА БУДЕТ: АЩЕ БО СВЯЩЕННИК САМ СЕБЕ ВО ОЛТАРЕ, НАИПАЧЕ ЖЕ В БОЖЕСТВЕННЕЙ ЛИТУРГИИ СПОМОГАТИ БУДЕТ, БОЖЕСТВЕННЫЯ ТАЙНЫ УНИЧИЖИТ, И САМАГО ХРИСТА В НИХ СУЩАГО, НЕВЕСТУ ЖЕ ЕГО ЦЕРКОВЬ, ЕЯЖЕ ОБРАЗ В ЧАС ОНЫЙ НА СЕБЕ НОСИТ, В НИЧТО ВМЕНИТ, И СИЦЕ СМЕРТНО СОГРЕШИТ. ВО ВСЕМ СЛУЖЕНИИ БОЖЕСТВЕННЫЯ ЛИТУРГИИ ИЕРЕЙ ДОЛЖЕН БЫТИ КРОТОК, ТИХ ПРИМИРЕН, И БЛАГОГОВЕИН, УМНЫМА ОЧИМА ВЗИРАЯ НА СВОЕГО ВЛАДЫКУ, ПРЕД НИМЖЕ СТОИТ, ЕМУЖЕ СЛУЖИТ, И ЕГОЖЕ ОБРАЗ НА СЕБЕ НОСИТ. МОЛИТВЫ СО ВСЯКИМ БЛАГОГОВЕНИЕМ БЛАГОЧЕСТНО, И ВЕЛИИМ ВНИМАНИЕМ, ПРИЛЕЖНО И ВСЕЦЕЛО, НИЧТОЖЕ ОСТАВЛЯЯ ДА ЧТЕТ, ИЗВЕСТНО ВЕДЫЙ, ЯКО БОГ ОТ УСТ ЕГО, ЯКОЖЕ НЕКИЯ МНОГОЦЕННЫЯ БИСЕРЫ, СИЯ ПРИЕМЛЕТ. СЛУЖИТИ ЖЕ СО СТРАХОМ И ТРЕПЕТОМ ИЕРЕЙ ДОЛЖЕН ЕСТЬ, СМИРЕННЫМ ЖЕ ЗРЕНИЕМ ОЧЕС, И БЛАГОГОВЕЙНЫМ ПОДНЕСЕНИЕМ РУК, И ВСЕМ ДЕЙСТВОМ, БЛАГОЧЕСТНЫМ ЖЕ СТОЯНИЕМ, И ВСЕЮ ПОСТАВОЮ ВНЕШНЕЮ, ИЗОБРАЗИТИ ИМАТЬ ВНУТРЕННЮЮ СВОЮ ВЕРУ, ЕЮЖЕ КРЕПКО ИЗВЕСТВУЕТСЯ, ЯКО ПРЕСТОЛ ЕСТЬ СЕДАЛИЩЕ ЦАРЯ НЕБЕСНАГО, СУДИИ ЖИВЫХ И МЕРТВЫХ НА НЕМЖЕ ИСТИННО ОН СЕДИТ, И ТМЫ АНГЕЛ ОКРЕСТ ЕГО СО СТРАХОМ НЕВИДИМО ПРЕДСТОЯТ. О ВЕЩИ ТАЙНЫ САМАГО ТЕЛА ХРИСТОВА. ВЕЩЬ ТАЙНЫ ТЕЛА ГОСПОДА НАШЕГО ИИСУСА ХРИСТА, ЕСТЬ ХЛЕБ ОТ ЧИСТЫЯ ПШЕНИЧНЫЯ МУКИ, ВОДОЮ ПРОСТОЮ ЕСТЕСТВЕННОЮ СМЕШАНЫЙ, И ДОБРЕ ИСПЕЧЕНЫЙ, КВАСНЫЙ, НЕПРЕСОЛЕНЫЙ, СВЕЖИЙ И ЧИСТЫЙ: ВКУС, СИЕСТЬ, СМАК СВОЙСТВЕННЫЙ ИМЕЯЙ, И К ЯДЕНИЮ БЛАГОПРИЯТНЫЙ И СПОСОБНЫЙ. ПРЕСНЫЙ БО ХЛЕБ АЩЕ И ПШЕНИЧНЫЙ БУДЕТ, В ЦЕРКВИ СВЯТОЙ ВОСТОЧНОЙ ПРАВОСЛАВНОКАФОЛИЧЕСКОЙ, МАТЕРИЕЮ, СИЕСТЬ, САМОЮ ВЕЩИЮ ТЕЛА ХРИСТОВА НИКАКОЖЕ БЫТИ МОЖЕТ: ТЕМЖЕ НИКТОЖЕ НАД ТАКОВЫМ ДА СЛУЖИТ. ИНЫЙ ЖЕ ХЛЕБ, КРОМЕ САМЫЯ ПШЕНИЦЫ, КВАСНЫЙ, ИЗ ВСЯКАГО ЖИТА СЕМЕН, ВЕЩИЮ ТЕЛА ХРИСТОВА БЫТИ НЕ МОЖЕТ. ДЕРЗНУВЫЙ ЖЕ ИЕРЕЙ НАД КАКОВЫМ ХЛЕБОМ ИЗ ИНЫХ СЕМЕН СЛУЖИТИ: ИЛИ И ИЗ ПШЕНИЧНЫЯ МУКИ, И ЕСТЕСТВЕННЫЯ ВОДЫ, И КВАСНЫЙ, НО МЛЕКОМ ИЛИ МАСЛОМ, ИЛИ ЯИЦЫ ПОМАЗАННЫЙ, ЗАЦВЕЛЫЙ ЖЕ, СПЛЕСНЕЛЫЙ, ИЛИ ИЗГОРЧАЛ, ИЛИ ЧЕРСТВ, ИЛИ РАСТЛЕН, ЗЕЛО ТЯЖКО СОГРЕШИТ, И ИЗВЕРЖЕНИЮ ПОДПАДЕТ, ЯКО ТАИНСТВО НА ТАКОВЫХ ВИДАХ НЕ СОВЕРШИТСЯ. О ВЕЩИ КРОВЕ ХРИСТОВЫ. ВЕЩЕСТВО КРОВЕ ХРИСТОВЫ ЕСТЬ ВИНО ОТ ПЛОДА ЛОЗНАГО, СИЕСТЬ, ИЗ ГРОЗДОВ ВИННЫЯ ЛОЗЫ ИСТОЧЕННОЕ: ПОДОБАЕТ СЕМУ ВИНУ СВОЙСТВЕННЫЙ ИМЕТИ ВКУС, И ОБОНЯНИЕ, И К ПИТИЮ ПРИЕМНОЕ, И ЧИСТОЕ БЫТИ, НЕСМЕШЕНОЕ С КАКОВЫМ ЛИБО ИНЫМ ПИТИЕМ, КРОМЕ ЕЖЕ ИЗ ГРОЗДИЯ: В ПРОСКОМИДИИ ЖЕ ВЛИЯТИ МАЛО В ВИНО ВОДЫ, И ПО ОСВЯЩЕНИИ ТАИН ТЕПЛЫЯ ВОДЫ, ЯКОЖЕ ЧИН ИМАТЬ. ВИНОМ ЖЕ НЕ СУТЬ, И БЫТИ НЕ МОГУТ ВСЯ СОКИ ОТ РАЗЛИЧНЫХ ОВОЩЕЙ И ЯГОД ИСТОЧЕНЫ, СИЕСТЬ, ЯБЛОЧНЫЙ, ГРУШЕВЫЙ, ВИШНЕВЫЙ, ТЕРНОВЫЙ, МАЛИНОВЫЙ, И ИНЫЯ СИМ ПОДОБНЫЯ. АЩЕ ЖЕ КТО ДЕРЗНЕТ КРОМЕ САМАГО ВИНОГРАДНАГО ВИНА, НА ИНЫХ ВИДАХ И СОКАХ, ИЛИ ВИНО КИСЛОСТИЮ ВО ОЦЕТ ПРЕТВОРИТСЯ, ИЛИ С ЧИМ СМЕШАНОЕ БУДЕТ, НИКАКОЖЕ ТАИНСТВА СОВЕРШИТ: НО СОГРЕШИТ ИЕРЕЙ ТЯЖКО СМЕРТНО, И ИЗВЕРЖЕНИЮ ОТ СВЯЩЕНСТВА ПОДПАДЕТ. ЕГДА ЖЕ И В ПРОСКОМИДИИ ИЕРЕЙ, ГЛАГОЛЯ СЛОВЕСА СИЯ: АБИЕ ИЗЫДЕ КРОВЬ И ВОДА, ВОДЫ МАЛО НЕ ВЛИЕТ, ЕЩЕ ЖЕ ПО ОСВЯЩЕНИИ СВЯТЫХ ТАИН ВО СВОЕ ВРЕМЯ, ЕГДА ВЛАГАЕТ ВО СВЯТЫЙ ПОТИРЬ ЧАСТЬ СВЯТАГО АГНЦА, НЕ ВЛИЕТ МАЛО ТЕПЛЫЯ ВОДЫ, ИЛИ ВМЕСТО ТЕПЛЫЯ ХЛАДНУЮ ВЛИЕТ ВОДУ, СМЕРТНО, ЯКО ПРЕСТУПНИК ЦЕРКОВНАГО ПРЕДАНИЯ, СОГРЕШИТ. ВЛИВАТИ ЖЕ ВОДУ В ПРОСКОМИДИИ, ИЛИ ПО СОВЕРШЕНИИ В ПОТИРЬ, ДОЛЖНО С ВЕЛИИМ ТЩАНИЕМ СМОТРЕТИ, ЕЖЕ БЫ ВИНУ СВОЙСТВЕННАГО ВКУСА НЕ ИЗМЕНИТИ В ВОДНЫЙ: ИБО ТАЙНА В СИЦЕВОМ ВИНЕ, ЕЖЕ ВО ВКУС ВОДНЫЙ ИЗМЕНИТСЯ, НЕ СОВЕРШИТСЯ, И СЛУЖАЙ ТЯЖКО СМЕРТНО СОГРЕШИТ. О СЛУЧАЯХ В СЛУЖЕНИИ ЛИТУРГИИ, ПРИКЛЮЧИТИСЯ МОГУЩИХ В ВЕЩЕХ, В СОВЕРШЕНИИ, И В СЛУЖИТЕЛЕХ. В ВЕЩИ ТЕЛА ХРИСТОВА, СИЕСТЬ, ХЛЕБА, СЛУЧИТИСЯ МОГУТ СИЯ: АЩЕ ИЕРЕЙ СЛУЖАЙ, ПРЕД ОСВЯЩЕНИЕМ ПОЗНАЕТ ХЛЕБ НА ПРЕСТОЛЕ, НА ДИСКОСЕ КО ОСВЯЩЕНИЮ ПРЕДЛОЖЕННЫЙ, БЫТИ РАСТЛЕННЫЙ, ИЛИ ЖИТНЫХ СЕМЕН КАКОВЫХ, ИЛИ МАЛО ПРИЦВЕЛЫЙ, ИЛИ ПРЕСНЫЙ, АБИЕ ДА ОТЛОЖИТ СЕЙ, ДА ВОЗМЕТ ЖЕ ИНЫЙ СВЕЖИЙ, И ЧИСТЫЙ ПШЕНИЧНЫЙ, И ГЛАГОЛЕТ НАД НИМ ТИХО: В ВОСПОМИНАНИЕ ГОСПОДА БОГА: И ВСЯ ПРОЧАЯ ПРОСКОМИДИЙНАЯ, ЯЖЕ НАД АГНЦЕМ, ДА ИЗЫМАЕТ АГНЕЦ ОБЫЧНО, И ПОЛОЖИВ ЕГО НА СВЯТОМ ДИСКОСЕ, ДА ЖРЕТ И ПРОБОДАЕТ. И ТАКО ОТ КОЕГО МЕСТА ПРЕД ОСВЯЩЕНИЕМ ПРЕСТА, ДА НАЧНЕТ И ОСВЯТИТ, И ОБЫЧНО СЛУЖБУ СОВЕРШИТ. АЩЕ ЖЕ ПРЕД ИЗРЕЧЕНИЕМ САМЫХ БОЖЕСТВЕННЫХ СЛОВЕС, ПОЗНАНИЕ СИЕ БУДЕТ, ДА НАЧНЕТ ОТ МОЛИТВЫ: С СИМИ И МЫ БЛАЖЕННЫМИ СИЛАМИ: ПОВТОРЯЯ Ю, И ТАКО ВСЯ ПО РЯДУ ДА СОВЕРШИТ. СИЦЕ УБО ТВОРИТ ПО ВСЕМУ, АЩЕ ПО ПРОСКОМИДИИ ПРЕД ВЕЛИКИМ ВХОДОМ, ИЛИ ПО ВХОДЕ, КАКОВЫМ ЛИБО БУДИ ОБРАЗОМ НЕ ОБРЯЩЕТСЯ АГНЕЦ НА ДИСКОСЕ, СИЕСТЬ ИЛИ ЧУДОВНЕ, ИЛИ ОТ МЫШИ ВЗЯТ, ИЛИ ОТПАЛ БУДЕТ, И НИКАКОЖЕ ОБРЕСТИСЯ ВОЗМОЖЕТ. АЩЕ ЖЕ ПО ОСВЯЩЕНИИ ПОЗНАНИЕ СИЦЕВО БУДЕТ, ТАКОЖДЕ ПО ПРЕДУКАЗАННОМУ ДА ТВОРИТ: ВЗЕМ ПРОСФОРУ ИНУЮ ПШЕНИЧНУЮ СВЕЖУЮ, И ВСЯ ПРОСКОМИДИЙНАЯ НАД НЕЮ ИЗГЛАГОЛАВ, ДА ИЗМЕТ АГНЕЦ, И ОТ МОЛИТВЫ: С СИМИ БЛАЖЕННЫМИ СИЛАМИ, ДА НАЧНЕТ, И ОБЫЧНО ОСВЯТИТ, И СЛУЖБУ СОВЕРШИТ. ПЕРВЫЙ ЖЕ АГНЕЦ ПО ПРИЧАЩЕНИИ БОЖЕСТВЕННАГО ТЕЛА И КРОВЕ, ИЛИ НА ЖЕРТВЕННИЦЕ СО ОСТАНКИ БОЖЕСТВЕННЫХ ТАИН, ПО ОТНЕСЕНИИ ТАМО ДА ПОТРЕБИТ. АЩЕ ЖЕ В САМОМ ПРИЧАЩЕНИИ ПОТРЕБИВ ЧАСТЬ, СИЕ ПОЗНАЕТ, ДА ТВОРИТ ПО ПРЕДПИСАННОМУ: СИЕСТЬ, ВЗЕМ СВЕЖУЮ ПШЕНИЧНУЮ ПРОСФОРУ, И ПРОЧИТАВ НАД НЕЮ, И СОТВОРИВ ВСЯ ПРОСКОМИДИЙНАЯ, ДА ИЗМЕТ АГНЕЦ, ЗАКАЛАЕТ ЖЕ И ПРОБОДАЕТ, И ОТ СЕГО МЕСТА НАЧНЕТ: В НОЩЬ, В НЮЖЕ ПРЕДАН БЫВАШЕ: И СЛОВЕСА ГОСПОДНЯ ЯЖЕ НАД ХЛЕБОМ ТОКМО ГЛАГОЛАТИ [НАД ЧАШЕЮ ЖЕ НИЧТОЖЕ ГЛАГОЛЯ, ДА ПРЕМИНЕТ, ПОНЕЖЕ ВСЯ ИЗРЕЧЕНА БЫША], ЧТЯ ЖЕ МОЛИТВУ: ПОМИНАЮЩЕ УБО: И ТВОЯ ОТ ТВОИХ: ДА ПОДНЕСЕТ ТОЧИЮ ДИСКОС С БОЖЕСТВЕННЫМ АГНЦЕМ, ТАЖЕ ЧТЯ МОЛИТВУ: ЕЩЕ ПРИНОСИМ ТЕБЕ: И, ГОСПОДИ, ИЖЕ ПРЕСВЯТАГО ТВОЕГО ДУХА: СО СТИХАМИ, НАД АГНЦЕМ ДА ГЛАГОЛЕТ, В СОВЕРШЕНИЕ ОСВЯЩЕНИЯ: И СОТВОРИ УБО ХЛЕБ СЕЙ ЧЕСТНОЕ ТЕЛО ХРИСТА ТВОЕГО, ПРЕЛОЖИВ ЕГО ДУХОМ ТВОИМ СВЯТЫМ. ДА ЧТЕТ ЖЕ И МОЛИТВУ: ЯКОЖЕ БЫТИ ПРИЧАЩАЮЩИМСЯ: ВСЯ ЖЕ СИЯ ТАЙНО ДА ГЛАГОЛЕТ, НИЧТОЖЕ ВТОРОЕ ВОЗГЛАШАЯ. И ТАКО ДА ПРИЧАСТИТСЯ БОЖЕСТВЕННАГО ТЕЛА И КРОВЕ ХРИСТОВЫ, И ПОРЯДУ ДА СОВЕРШИТ БОЖЕСТВЕННУЮ СЛУЖБУ. АЩЕ ЖЕ УБО ПРЕД ОСВЯЩЕНИЕМ ПОЗНАЕТ, ЯКОЖЕ ПРЕДРЕЧЕСЯ, ХЛЕБ НЕ БЫТИ ПРИЛИЧНЫЙ К СОВЕРШЕНИЮ В НЕМ ТАЙНЫ ТЕЛА ХРИСТОВА, ИНАГО ЖЕ ХЛЕБА СПОСОБНАГО ТОГДА ПРИОБРЕСТИ НЕ ВОЗМОЖЕТ, АБИЕ ДА ПРЕСТАНЕТ СЛУЖИТИ. АЩЕ ПО ОСВЯЩЕНИИ СИЕ ПОЗНАЕТ, И НЕ БУДЕТ ИНАГО ХЛЕБА, ДА НЕ ПРЕСТАНЕТ СЛУЖИТИ, НО ДА СОВЕРШИТ. ТЕМЖЕ ХОТЯЙ ИЗБЕГНУТИ ВСЕХ СИХ СЛУЧАЕВ [ПАЧЕ ЖЕ В НИХ СМЕРТНАГО ГРЕХА] ИЕРЕЙ У ПЕКУЩИХ ПРОСФОРЫ ДА НАДСМОТРЯЕТ, ЧТОБЫ ПЕКЛИ ПРОСФОРЫ ИЗ ЧИСТЫЯ И ДОБРЫЯ МУКИ ПШЕНИЧНЫЯ, А НЕ ИЗ ЗАТХЛЫЯ И СМЕРДЯЩИЯ, И КАКОВЫЯ ЛИБО НЕСПОСОБНЫЯ, И ИЗЛИШНЮЮ ПРОСФОРУ СЕГО РАДИ ДА ВЗИМАЕТ. К СЕМУ, ПРОСФОРОЮ ЧЕРСТВОЮ, ВЕЛЬМИ МНОГОДЕННОЮ, НИКОГДА ДА ДЕРЗНЕТ КТО СЛУЖИТИ. И ЕЩЕ НЕ НАЧИНАЯ ПРОСКОМИДИИ, ИЕРЕЙ ВЗЕМ В РУЦЕ ПРОСФОРУ ДА ИСКУСИТ, КАКОВАГО ОНАЯ СОСТОЯНИЯ, И К ЛУЧШЕМУ ПОЗНАНИЮ ЕДИНУ ДА ПРЕЛОМИТ: УВЕДЕВ ЖЕ ПОТРЕБНУ БЫТИ ХЛЕБУ, БЕЗ ВСЯКАГО СМУЩЕНИЯ И УСУМНЕНИЯ, ЧИСТОЮ И МИРНОЮ СОВЕСТИЮ ЛИТУРГИСАТИ ИМАТЬ. О ПРИКЛЮЧЕНИИ О ВЕЩИ КРОВЕ ХРИСТОВЫ. АЩЕ ИЕРЕЙ ПРЕД ОСВЯЩЕНИЕМ КРОВЕ, ПО ОСВЯЩЕНИИ ТЕЛА ПОЗНАЕТ, ЯКО ВИНА В ЧАШИ НЕСТЬ, ТОЧИЮ ВОДА, ДА ИЗЛИЕТ ОНУЮ ВОДУ В НЕКИЙ ЧИСТЫЙ И ЧЕСТНЫЙ СОСУД, И АБИЕ ВЛИЕТ ВИНО И МАЛО ОТ ВОДЫ, ГЛАГОЛЯ И: ЕДИН ОТ ВОИН КОПИЕМ РЕБРА ЕМУ ПРОБОДЕ: ПОСЕМ ЖЕ ДА НАЧИНАЕТ ОТ ОНЫХ СЛОВЕС: ТАКОЖДЕ И ЧАШУ ПО ВЕЧЕРИ ГЛАГОЛЯ: И ПРОЧАЯ. АЩЕ ЖЕ ПО ИЗРЕЧЕНИИ СЛОВЕС ПОЗНАЕТ, ЯКО НЕСТЬ ВИНА ВО СВЯТОЙ ЧАШИ, ТОЧИЮ ВОДА, ТАКОЖДЕ ТВОРИТ И ГЛАГОЛЕТ, ЯКОЖЕ РЕЧЕСЯ. АЩЕ ЖЕ В САМОМ ПРИЧАЩЕНИИ ПОЗНАЕТ СИЕ, ДА ИЗЛИЕТ ВОДУ ВО ИНЫЙ СОСУД, В ЧАШУ ЖЕ ДА ВЛИЕТ ВИНО, И МАЛО ВОДЫ, ГЛАГОЛЯ И: ЕДИН ОТ ВОИН КОПИЕМ: И ПРОЧАЯ, И ОТ СЛОВЕС НАЧИНАЕТ: ТАКОЖДЕ И ЧАШУ ПО ВЕЧЕРИ, ГЛАГОЛЯ: ПИЙТЕ ОТ НЕЯ ВСИ: [СИЯ ЖЕ ВСЯ ГЛАГОЛЕТ ТИХО]. ТАЖЕ МОЛИТВУ: ПОМИНАЮЩЕ УБО: И ПОДНОСЯ ЧАШУ ГЛАГОЛЕТ: ТВОЯ ОТ ТВОИХ: И МОЛИТВУ: ЕЩЕ ПРИНОСИМ ТЕБЕ: И В СОВЕРШЕНИЕ МОЛИТСЯ: ГОСПОДИ, ИЖЕ ПРЕСВЯТАГО ТВОЕГО ДУХА: МИНУВ ЖЕ ЯЖЕ НАД СВЯТЫМ ХЛЕБОМ, ГЛАГОЛЕТ: [БЛАГОСЛОВИ ВЛАДЫКО. АЩЕ ДИАКОН ЕСТЬ]: А ЕЖЕ В ЧАШИ СЕЙ: И БЛАГОСЛОВЛЯЯ ТОЧИЮ ЧАШУ, ДА ГЛАГОЛЕТ: ПРЕЛОЖИВ Е ДУХОМ ТВОИМ СВЯТЫМ, И ПРОЧИЯ ВСЯ МОЛИТВЫ ДО ПРИЧАЩЕНИЯ. И ТАКО ПРИЧАСТИВСЯ, СОВЕРШИТ ОБЫЧНО СЛУЖБУ БОЖЕСТВЕННУЮ. ВОДУ ЖЕ ОНУЮ ПО СОВЕРШЕНИИ БОЖЕСТВЕННЫЯ СЛУЖБЫ, И ПО ПОТРЕБЛЕНИИ ОСТАНКОВ БОЖЕСТВЕННЫХ ТАИН, ВО СВЯТУЮ ЧАШУ, ВМЕСТО ОЧИЩЕНИЯ ДА ВЛИЕТ И ПОТРЕБИТ. АЩЕ ЖЕ В ПРОСКОМИДИИ ЗАБУДЕТ ИЕРЕЙ ВЛИТИ ВОДУ К ВИНУ ВО СВЯТУЮ ЧАШУ, ВОСПОМЯНЕТ ЖЕ СИЕ ПРЕД ОСВЯЩЕНИЕМ СВЯТЫЯ ЧАШИ, ДА ВЛИЕТ АБИЕ МАЛО ВОДЫ, ГЛАГОЛЯ: ЕДИН ОТ ВОИН КОПИЕМ РЕБРА ЕМУ ПРОБОДЕ, И АБИЕ ИЗЫДЕ КРОВЬ И ВОДА, И ВИДЕВЫЙ: АЩЕ БО НЕ ВЛИЕТ, ВОСПОМЯНУВ, ЯКО НЕ ВЛИЯ, СМЕРТНО СОГРЕШИТ. ПО ОСВЯЩЕНИИ ЖЕ АЩЕ СИЕ ВОСПОМЯНЕТ, ДА НЕ ВЛИВАЕТ, ТОЧИЮ ОБЫЧНУЮ ТЕПЛОТУ ВО СВОЕ ВРЕМЯ. ТЕМЖЕ ДОЛЖНО ИЕРЕЮ И ДИАКОНУ, ЕГДА ХОЩЕТ ВЛИВАТИ ВИНО, ОПАСНО ВСЕХ СИХ СЛУЧАЕВ СМОТРЕТИ, ДА НЕ ПОГРЕШИТ НЕРАДЕНИЕМ СМЕРТНО, ЕЖЕ БЫ ВИНО НЕ ОЦЕТНО, НЕ ЗАПЛЕСНЕЛО, НЕ ЗАГНИЛО, И ЧИМ ЛИБО НЕ МЕРЗСКО БЫЛО. ИБО АЩЕ НЕСПОСОБНОЕ УЗРИШИ, СЛУЖИТИ НЕ ДЕРЗАЙ: НО ПРИСНО О ЛУЧШЕМ ВО УГОЖДЕНИЕ ГОСПОДУ БОГУ ПРОМЫШЛЯТИ, И ВСЕМ ХРИСТИАНОМ ДОЛЖНО: СО СТРАХОМ, РЕЧЕ, СПАСЕНИЕ СВОЕ СОДЕВАЙТЕ: ПРЕНЕБРЕГАЮЩИИ БО СТРАШНОЕ СИЕ СЛУЖЕНИЕ, И О БЛАГОИСКУССТВЕ НЕ ТЩАЩИИСЯ ЛЮТО ПОСТРАЖДУТ. О СЛУЧАИ ОСВЯЩЕНИЯ И СОВЕРШЕНИЯ СВЯТЫХ ДАРОВ. ПОДОБАЕТ УБО, АЩЕ СЛУЖАТ ИЕРЕИ МНОГИЯ, ЯКОЖЕ СЛОВЕСА ГОСПОДНЯ: ПРИИМИТЕ И ЯДИТЕ: И ПИЙТЕ ОТ НЕЯ ВСИ: И ТВОЯ ОТ ТВОИХ: ТАКО, И СОТВОРИ УБО ХЛЕБ СЕЙ: А ЕЖЕ В ЧАШИ СЕЙ: ПРЕЛОЖИВ ДУХОМ ТВОИМ СВЯТЫМ: КУПНО ГЛАГОЛАТИ, А НЕ ПРЕДВАРЯТИ КОМУЖДО СЕБЕ ГЛАГОЛАТИ ОСОБЬ. АЩЕ ЖЕ ИЕРЕЙ СЛУЖАЙ ЗАБЫЛ БЫ, ЯКО ИЗГЛАСИ ГОСПОДНЯ СЛОВЕСА НАД ХЛЕБОМ И ВИНОМ, ИЛИ МОЛИТВЫ: ГОСПОДИ, ИЖЕ ПРЕСВЯТАГО ТВОЕГО ДУХА: ТАКОЖДЕ СЛОВЕСА СОВЕРШЕНИЯ: И СОТВОРИ УБО ХЛЕБ СЕЙ: А ЕЖЕ В ЧАШИ СЕЙ: ПРЕЛОЖИВ ДУХОМ ТВОИМ СВЯТЫМ: И В НЕДОУМЕНИИ, СИЕСТЬ, В СМУЩЕНИИ О ОСВЯЩЕНИИ ТАЙНЫ БЫЛ БЫ, ИЗЛИШЕ ДА НЕ СМУЩАЕТСЯ: НО ПОТИХУ ВО УМЕ СВОЕМ ПОМЫСЛ СИЦЕВЫЙ ДА ВОЗЫМАТЬ, АЩЕ НЕ ОСВЯЩЕНЫ СУТЬ СИЯ ПРЕДЛЕЖАЩИЯ ДАРЫ, ХЛЕБ И ВИНО, НЫНЕ ОСВЯЩАЮТСЯ, ДА ГЛАГОЛЕТ НАД НИМИ ГОСПОДНЯ СЛОВЕСА, НАЧЕН ОТ СЕГО МЕСТА: В НОЩЬ, В НЮЖЕ ПРЕДАН БЫВАШЕ, ПРИИМ ХЛЕБ: И ПРОЧАЯ, И О КОИХ СЛОВЕСАХ УСУМНИТСЯ, АЩЕ НЕ ГЛАГОЛА, И МОЛИТВЫ ДАЖЕ ДО КОНЦА СОВЕРШИТ. О ПРИЛУЧАЯХ НЕДОСТАТОЧЕСТВА СЛУЖАЩАГО СВЯЩЕННИКА. АЩЕ ИЕРЕЙ ЛИТУРГИСАЯЙ, ПРЕЖДЕ ОСВЯЩЕНИЯ ТЕЛА И КРОВЕ ГОСПОДНИ, ТЯЖКО РАЗБОЛИТСЯ, ЯКО ОТНЮД ЕМУ НЕ МОЩИ ДЕЙСТВОВАТИ, ИЛИ ВСКОРЕ УМРЕТ, СЛУЖБА ОСТАВЛЯЕТСЯ, И ПРЕСТАЕТ. АЩЕ ЖЕ ПО ОСВЯЩЕНИИ И СОВЕРШЕНИИ СИЕ ПРИКЛЮЧИТСЯ: ИНЫЙ СВЯЩЕННИК, АЩЕ ТАМО БУДЕТ СЛУШАЯ ЛИТУРГИЮ, ДА СОВЕРШИТ БОЖЕСТВЕННУЮ ЛИТУРГИЮ НАЧЕН ОТ МЕСТА, ЕГОЖЕ ПЕРВЫЙ ПРЕСТА. АЩЕ ЖЕ РАЗБОЛЕВЫЙСЯ ИЕРЕЙ НЕ УМРЕ, НО ЖИВ ЕСТЬ, И МОЖЕТ БОЖЕСТВЕННЫЯ ТАЙНЫ ПРИЯТИ, В ЕГО МЕСТО СЛУЖАЙ ДА ОТЛОМИТ МАЛУЮ ЧАСТЬ СВЯТАГО АГНЦА, И ЛЖИЦЕЮ БОЖЕСТВЕННЫЯ КРОВЕ ПОЧЕРП ДА ПРИЧАСТИТ ЕГО, САМ ЖЕ ПО ЧИНУ ДА ПРИЧАСТИТСЯ, И СОВЕРШИТ СЛУЖБУ ОБЫЧНО. АЩЕ ТОГДА ИНАГО ИЕРЕА НЕ БУДЕТ ЕЖЕ СОВЕРШИТИ СЛУЖБУ, И ПОТРЕБИТИ СВЯТАЯ, ОТ БЛАГОГОВЕЙНЫХ И ЧИСТЫХ МУЖЕЙ КТО, ВЗЕМ ПОКРОВЕЦ НЕ ПРИКАСАЯСЯ НАГОЮ РУКОЮ, ДА ПОКРЫЕТ ДОБРЕ СВЯТАЯ, ЕЖЕ НИЧЕСОМУЖЕ МОЩИ ВНИТИ НА ДИСКОС, ИЛИ В СВЯТУЮ ЧАШУ, ДОНДЕЖЕ ИНЫЙ СВЯЩЕННИК ПРИИДЕТ: ИЖЕ ПРИШЕД ДА СОВЕРШИТ БОЖЕСТВЕННУЮ СЛУЖБУ СОВЕРШЕННО, ВО ИН ДЕНЬ ИЛИ НА ИНОМ ПРЕСТОЛЕ, И ТОГО ДНЕ НАЧЕН ОТ ПРОСКОМИДИИ, И НОВЫЙ АГНЕЦ ИЗЪЕМ, ОБЫЧНО В СЛУЖЕНИИ ДА ОСВЯТИТ, ЗАНЕЖЕ НЕ БЕ ОН В СЛУШАНИИ ЛИТУРГИИ. ПО ПОТРЕБЛЕНИИ ЖЕ НОВАГО ОСВЯЩЕННАГО АГНЦА, ДА ПОТРЕБИТ И ПРЕЖНИЙ АГНЕЦ, И КРОВЬ БОЖЕСТВЕННУЮ ДА ИСПИЕТ, ИЛИ ВСЫПАВ В СВЯТУЮ ЧАШУ, ВСЯ ВКУПЕ НА ЖЕРТВЕННИЦЕ ДА ПОТРЕБИТ. АЩЕ ЖЕ ПРЕД ОСВЯЩЕНИЕМ СВЯТЫХ ДАРОВ СИЕ ПРИКЛЮЧИТСЯ, ИНЫЙ, ИЛИ И ТОЙЖЕ ИЕРЕЙ, ТАКОЖДЕ ЛИТУРГИСАВ СОВЕРШЕННО, ПО ОТНЕСЕНИИ НА ЖЕРТВЕННИК БОЖЕСТВЕННЫХ ТАИН И ПО ПОТРЕБЛЕНИИ ИХ, ДА ПОТРЕБИТ И ОСТАВШИЙ ХЛЕБ И ВИНО: НО НЕ ЯКОЖЕ ТЕЛО И КРОВЬ ХРИСТОВУ. НО ЯКОЖЕ БЛАГОСЛОВЕННЫЙ ХЛЕБ И ВИНО. АЩЕ ИЕРЕЙ НАЧНЕТ ЛИТУРГИСАТИ, И В ПРОСКОМИДИИ БУДЕТ ДЕЙСТВЕ, ИЛИ УЖЕ В ЛИТУРГИИ ДО ВХОДА ВЕЛИКАГО ПОЗОВЕТСЯ СМЕРТНЫЯ РАДИ КАКОВЫЯ ПРИКЛЮЧАЕМЫЯ НУЖДЫ, АЩЕ КРЕСТИТИ, ИЛИ ИСПОВЕДАТИ, А НЕ В ДАЛЬНЕМ РАЗСТОЯНИИ, ДА ОСТАВИТ НА ТОМ МЕСТЕ СЛУЖЕНИЕ, И ИДЕТ БОРЗО ТАМО, И СОТВОРИВ БОЛЕЗНЕННОМУ В САМОЙ СМЕРТИ НАДЕЖНО СПАСЕНИЕ, И ВОЗВРАТИВСЯ ДОКОНЧАЕТ БОЖЕСТВЕННУЮ СЛУЖБУ: В ЦЕРКВИ ЖЕ ВЕЛИТ ЧТЕНИЕМ АПОСТОЛА ИЛИ ПСАЛМОВ ИЛИ КАНОНОВ, ИЛИ ПОУЧЕНИЕМ КО СПАСЕНИЮ ПОЛЕЗНЫМ, ПРИШЕДШИЯ ЛЮДИ ПОЛЬЗОВАТИ В ТОЕ ВРЕМЯ. АЩЕ ЛИ ЖЕ УКОСНЕЕТ ТАМО ЗА СЛУЧАЕМ НУЖДНЫМ, И ОПОЗДАЕТ, А ТОЧИЮ ПО САМОЙ ПРОСКОМИДИИ, ДА ОСТАВИТ ЛИТУРГИСАТИ, И ВО УТРИЕ ДА ЛИТУРГИСАЕТ ВНОВЬ ВСЕ, И ПО ПРИЯТИИ, И ТОЕ ОСОБЬ ПОТРЕБИТ, ЯКОЖЕ И ВЫШЕ РЕЧЕСЯ. ПО ВЕЛИКОМ ЖЕ ВХОДЕ, И ПО ОСВЯЩЕНИИ ДАРОВ ДА НЕ ОСТАВЛЯЕТ СОВЕРШАТИ ЛИТУРГИИ, В ВОЛЮ БОЖИЮ О БОЛЕЗНЕННОМ ПОЛАГАЯСЯ. АЩЕ ЖЕ НА ДОЛЗЕ СВЯТЫЯ ДАРЫ, ИЛИ ОСВЯЩЕНЫ, ИЛИ НЕ ОСВЯЩЕНЫ, ПО СИЦЕВОМ СЛУЧАИ, НЕ СУЩУ СВЯЩЕННИКУ, РАСТЛЕЮТСЯ, СИЕСТЬ, СПЛЕСНЕЮТ, И ХЛЕБ И ВИНО ОЦЕТНО БУДЕТ, ЯКО НЕ МОЩИ ИМ К ПОТРЕБЛЕНИЮ ПРИЕМНЫМ БЫТИ, СВЯЩЕННИК СИЯ ВЗЕМ, В ТЕКУЩУЮ РЕКУ ДА ВСЫПЛЕТ. АЩЕ КОТОРЫЙ ИЕРЕЙ КРОМЕ СИЦЕВАГО СЛУЧАЯ ЛИТУРГИСАВ НЕ ПРИЧАСТИТСЯ БОЖЕСТВЕННЫХ ТАИН, ТЯЖКО СМЕРТНО ВЕЛЬМИ СОГРЕШИТ, И ИЗВЕРЖЕНИЯ ВИНЕ ПОДЛЕЖИТ. АЩЕ ПРЕД ОСВЯЩЕНИЕМ СВЯТЫХ ДАРОВ МУХА ВПАДЕТ ВО СВЯТУЮ ЧАШУ, ДА ИЗМЕТСЯ, И В БУМАГУ ОБВИТА ДА СОЖЖЕНА БУДЕТ. АЩЕ ЖЕ ПАУК, ИЛИ ИНО ЧТО ЯДОВИТОЕ, ДА ИЗЛИЯНО БУДЕТ ВИНО ИЗ СВЯТЫЯ ЧАШИ, ВО ИНЫЙ ЧЕСТНЫЙ СОСУД, ВО СВЯТУЮ ЖЕ ЧАШУ ИНОЕ ВИНО И МАЛО ВОДЫ ДА ВЛИЕТСЯ ОТ ИЕРЕА, ГЛАГОЛЯ СИЯ СЛОВЕСА: ЕДИН ОТ ВОИН КОПИЕМ РЕБРА ЕМУ ПРОБОДЕ, И АБИЕ: И ТАКО ДА СОВЕРШИТ ЛИТУРГИЮ ОБЫЧНО, ПО СОВЕРШЕНИИ ЖЕ СЛУЖБЫ ВИНО ОНОЕ ДА ИЗЛИЕТ В ТЕКУЩУЮ РЕКУ. АЩЕ ПО ОСВЯЩЕНИИ СИЕ БУДЕТ, И СТРАШНО ИЛИ МЕРЗСКО БУДЕТ ИЕРЕЮ ВПАДШЕЕ С БОЖЕСТВЕННОЮ КРОВИЮ ПОГЛОТИТИ, ТОГДА СОХРАННО СО ВСЯКИМ БЛЮДЕНИЕМ ДА ИЗМЕТ ВПАДШЕЕ, ЕЖЕ НЕ УКАНУТИ НИГДЕЖЕ НИЧТОЖЕ ОТ БОЖЕСТВЕННЫЯ КРОВЕ, НАД ИНЫМ ЖЕ ПОТИРЕМ, ИЛИ ЧЕСТНЫМ СОСУДОМ, ВИНОМ ТРИЖДЫ ДОБРЕ ДА ИЗМЫЕТ ИЗЪЯТОЕ, ВИНО ЖЕ ДА СОБЛЮДЕТ: ИЗЪЯТОЕ ЖЕ ДА СВИЕТ В БУМАГУ, ИЛИ В НЕКОЕ ЧИСТОЕ ПОЛОТЕНЦО: И ПО СОВЕРШЕНИИ ЛИТУРГИИ ЖИВОТНОЕ ОНОЕ С БУМАГОЮ ИЛИ ПОЛОТЕНЦОМ НА ПЛИНФЕ, ИЛИ НА ЧИСТОМ КАМЕНИ ДА СОЖЖЕТ, ПЕПЕЛ ЖЕ ПОД СВЯТОЮ ТРАПЕЗОЮ ДА ВКОПАЕТ, ИЛИ ИДЕЖЕ УМОВЕНИЕ РУК БЫВАЕТ ДА ВСЫПЛЕТ: ВИНО ЖЕ ОНОЕ, ИМЖЕ ЖИВОТНО ИЗЪЯТОЕ ИЗМОВЕНО БЫСТЬ, В ТЕКУЩУЮ РЕКУ ДА ИЗЛИЕТ. АЩЕ РЕКА ДАЛЕЧЕ БУДЕТ, ПОД ПРЕСТОЛ ЯМУ ИСКОПАВ, ИДЕЖЕ НОГАМИ ПОПИРАЕМА НЕ БЫВАЕТ, ДА ВЛИЕТ И ЗАКРЫЕТ. АЩЕ В ЗИМЕ КРОВЬ БОЖЕСТВЕННАЯ В ЧАШИ ЗАМЕРЗНЕТ, ИЕРЕЙ ИЛИ ДИАКОН СОГРЕВАЯ ПОКРОВЦЫ НАД ОГНЕМ, ДА ОБВИВАЕТ ИМИ СВЯТУЮ ЧАШУ, ДОНДЕЖЕ ОТМЕРЗНЕТ, ИЛИ В КИПЯЩИЙ УКРОП ВПУСТИВ СВЯТУЮ ЧАШУ, ДА ДЕРЖИТ СОХРАННО, ЕЖЕ НЕ ВЛИЯТИСЯ В НЮ ОТ УКРОПА ЧТО, ДОНДЕЖЕ ОТМЕРЗНЕТ. АЩЕ ЧТО ОТ БОЖЕСТВЕННЫЯ КРОВЕ НЕРАДЕНИЕМ СЛУЖАЩАГО ИЕРЕА УКАНЕТ, СМЕРТНО СОГРЕШИТ. АЩЕ НА ДСКУ УКАНЕТ [И АЩЕ ВОЗМОЖНО БУДЕТ ЕМУ СКЛОНИТИСЯ И ДОСТИГНУТИ], ЯЗЫКОМ ДА ИЗЛИЖЕТ. АЩЕ ЖЕ НЕВОЗМОЖНО, ГУБОЮ ДОБРЕ ДА ИСТРЕТ, ПОСЕМ ЖЕ ДОСКУ ОСТРУГАВ, И ОСТРУЖИНЫ НА ПЛИНФЕ, ИЛИ НА ЧИСТОМ КАМЕНИ ДА СОЖЖЕТ, ПЕПЕЛ ЖЕ ПОД ПРЕСТОЛ ДА ВКОПАЕТ. АЩЕ ЖЕ НА ЗЕМЛИ ГОЛОЙ УКАНЕТ, ДА ОСТРУЖЕНО БУДЕТ МЕСТО, НА НЕМЖЕ УКАНУ, ОСТРУЖИНЫ ЖЕ ДА СОЖГУТСЯ, И ПОД ПРЕСТОЛ ДА СОКРЫЮТСЯ. АЩЕ ЖЕ НА КАМЕНИ, ТАКОЖДЕ АЩЕ ВОЗМОЖНО ДА ИЗЛИЗАНО БУДЕТ, ИЛИ ГУБОЮ ДОБРЕ ИСТИРАНО, И ИЗМОВЕНО ВОДОЮ ЧИСТОЮ, ВОДА ЖЕ ГУБОЮ СОБРАНА, И ПОД ПРЕСТОЛ ИСЦЕЖЕНА ДА БУДЕТ. АЩЕ НА ИНДИТИЯХ ПРЕСТОЛЬНЫХ УКАНЕТ БОЖЕСТВЕННАЯ КРОВЬ, ИЛИ НА АНТИМИНСЕ, УСТЫ ПЕРВЕЕ ДА ОСМОКЧЕТ, ПОСЕМ ЖЕ АНТИМИНСНОЮ ГУБОЮ ДОБРЕ ДА ОТРЕТ: ПО СОВЕРШЕНИИ ЖЕ ЛИТУРГИИ ИНДИТИИ С СВЯТЫЯ ТРАПЕЗЫ СНЕМ, МЕСТО ТОЧИЮ, НА НЕМЖЕ УКАНУ КРОВЬ ВЛАДЫЧНЯ, ПОДЛОЖИВ СВЯТУЮ ЧАШУ, ИЛИ АНТИДОРНОЕ БЛЮДО, ТРИЖДЫ ЧИСТОЮ ВОДОЮ САМ ИЕРЕЙ ДА ИЗМЫЕТ, ВОДУ ЖЕ ОНУ В ТЕКУЩУЮ РЕКУ, ИЛИ ЯМУ ПОД СВЯТОЮ ТРАПЕЗОЮ ИСКОПАВ ДА ИЗЛИЕТ, ИНДИТИИ ЖЕ ИЗСУШИВ, ПАКИ ДА ОБЛЕЧЕТ ИМИ СВЯТУЮ ТРАПЕЗУ. АЩЕ НА ПОКРОВЕЦ, ИЛИ НА СВЯТУЮ ОДЕЖДУ КРОВЬ СВЯТАЯ УКАНЕТ: ПЕРВЕЕ УСТЫ ДА ОСМОКЧЕТ ДОБРЕ, ПОТОМ ЖЕ ГУБОЮ ДА ОТРЕТ: ПО СОВЕРШЕНИИ ЖЕ СЛУЖБЫ ТРИЖДЫ ДА ИЗМЫЕТ ВОДОЮ ДОБРЕ НАД АНТИДОРНЫМ БЛЮДОМ, ИЗМОВЕНИЕ ЖЕ ПОД ПРЕСТОЛ, ЯМУ ИСКОПАВ, ДА ИЗЛИЕТ. АЩЕ НА ПОДНОЖНОМ ПОСТЛАНОМ СУКНЕ, ИЛИ КОВРЕ УКАНЕТ БОЖЕСТВЕННАЯ КРОВЬ, ГУБОЮ ПРЕЖДЕ, ЕЮЖЕ ОТИРАЕТСЯ СВЯТАЯ ЧАША, МОКРОТА ДА ОТРЕТСЯ, ПОСЕМ ДА ИЗМЫЕТСЯ ДОБРЕ МЕСТО, НА НЕЖЕ УКАНУ, НАД АНТИДОРНЫМ БЛЮДОМ, И ДА ОТРЕЗАН БУДЕТ ПЛАТ ОН МОКРЫЙ, И НА КАМЕНИ СОЖЖЕН: ПЕПЕЛ ЖЕ, И ВОДА, ЕЮЖЕ ИЗМЫСЯ, ДА ИЗСЫПЛЮТСЯ В ЗЕМЛЮ ПОД ПРЕСТОЛОМ, И ЗЕМЛЕЮ ДА ПОКРЫЮТСЯ. АЩЕ СЛУЧАЕМ КОИМ ПРИКЛЮЧИТСЯ ВСЕЙ БОЖЕСТВЕННЕЙ КРОВИ ПО ОСВЯЩЕНИИ ИЗЛИЯТИСЯ, АЩЕ МАЛО ЧТО ОСТАНЕТ ВО СВЯТОЙ ЧАШИ, СЕЮ ДА ПРИЧАСТИТСЯ, И СОВЕРШИТ СЛУЖБУ: ПРОЛИТЫЯ ЖЕ БОЖЕСТВЕННЫЯ КРОВЕ СОБРАНИЕ, СТЕРТИЕ И ОМЫТИЕ ДА БУДЕТ ПО ВСЕМУ, ЯКОЖЕ ПРЕДУКАЗАСЯ. АЩЕ ЖЕ НИЧТОЖЕ ОСТАНЕТ ВО СВЯТЕЙ ЧАШИ, ДА ВЛИЕТ ПАКИ ВИНО, И МАЛО ВОДЫ В НЮ, ГЛАГОЛЯ СЛОВЕСА ПРОСКОМИДИЙНАЯ: И АБИЕ ИЗЫДЕ КРОВЬ И ВОДА: И ДА ОСВЯТИТ, НАЧЕН ОТ МЕСТА ОНАГО. ТАКОЖДЕ И ЧАШУ ПО ВЕЧЕРИ, ГЛАГОЛЯ: ПИЙТЕ ОТ НЕЯ ВСИ: И ПРОЧАЯ, И МОЛИТВЫ: ПОМИНАЮЩЕ УБО: И ТВОЯ ОТ ТВОИХ: ГЛАГОЛЯ, ЕДИНУ ЧАШУ ПОДНОСИТ: И ЕЩЕ ПРИНОСИМ ТЕБЕ: И ГОСПОДИ, ИЖЕ ПРЕСВЯТАГО ТВОЕГО ДУХА: СО СТИХИ, И ТОКМО НА ЕДИНУ ЧАШУ ГЛАГОЛЕТ БЛАГОСЛОВЛЯЯ: А ЕЖЕ В ЧАШИ СЕЙ: И ПРЕЛОЖИВ Е ДУХОМ: И МОЛИТВУ: ЯКО БЫТИ ПРИЧАЩАЮЩИМСЯ: И ВСЕ ДО КОНЦА, И ТАКО ДА ПРИЧАСТИТСЯ. ВСЯ ЖЕ СИЯ МОЛИТВЫ И ВОЗГЛАСЫ ТАЙНО ДА ГЛАГОЛЕТ: В ЦЕРКВИ ЖЕ ДА ПОЮТ В ТО ВРЕМЯ ПРИЛИЧНЫЯ СТИХИ, ДОНЕЛЕЖЕ ИСПРАВИТСЯ ИЕРЕЙ В ТАКОВЫХ ПРИКЛЮЧАЕМЫХ СЛУЧАЯХ, ЧТОБЫ СТОЯЩИИ В ЦЕРКВИ ЛЮДИ НЕУНЫВНО РАДИ МЕДЛЕНИЯ В ТОМ ДЕЙСТВЕ НУЖДНОМ СТОЯЛИ. КРЕПЦЕ ЖЕ СМОТРИТИ ПОДОБАЕТ, И ЗАЗИРАТИ СЕБЕ, ЕГДА ТАКОВОЕ ПРИКЛЮЧИТСЯ СТРАШНОЕ ДЕЛО В КАКОВОМ ЛИ ПРЕНЕБРЕЖЕСТВЕ, И УСЕРДНО ПЛАКАТИ ТАКОВАГО РАДИ СЛУЧАЯ. АЩЕ ПО ПРИЧАЩЕНИИ СВЯТЫХ ТАИН, АБИЕ ПРИКЛЮЧИТСЯ ИЕРЕЮ ИЗБЛЕВАТИ, БЛЕВОТИНЫ ДА СБЕРУТСЯ В ЛЬНЯНЫЯ СГРЕБИЯ, И В ЧИСТЫЙ СОСУД ДА ВЛОЖАТСЯ, И СОХРАНЯТСЯ, ДОНДЕЖЕ ДОБРЕ ИЗСОХНУТ, И ТОГДА В ТЕКУЩУЮ РЕКУ ДА ИЗМЕЩУТСЯ, ИЛИ НА ПЛИНФЕ, ИЛИ ЧИСТОМ КАМЕНИ ДА СОЖГУТСЯ. ТАКОЖДЕ И ЗЕМЛЯ, НА НЕЙЖЕ ПАДОША, ДА ОСТРУГАНА И СОЖЖЕНА БУДЕТ, ПЕПЕЛ ЖЕ ПОД ПРЕСТОЛ ДА ВКОПАЕТСЯ, ИЛИ В РЕКУ ДА ИЗМЕЩЕТСЯ. АЩЕ НЕКАЯ ЧАСТКА ОТ БОЖЕСТВЕННАГО ТЕЛА НА ЗЕМЛИ ПАДНЕТ, ЧЕСТНО ВЗЕМЛЕМА, И НА ДИСКОСЕ ПОЛОЖЕНА ДА БУДЕТ, ЗЕМЛЯ ЖЕ, НА НЕЙЖЕ ПАДЕ, ДА ОСТРУЖЕТСЯ ДОБРЕ, И СТРУЖИНЫ ОНЫЯ В РЕКУ ТЕКУЩУЮ ДА ИЗМЕЩУТСЯ, ИЛИ ДА СОЖГУТСЯ, ПЕПЕЛ ЖЕ ПОД СВЯТОЮ ТРАПЕЗОЮ ДА ВКОПАЕТСЯ. АЩЕ СВЯЩЕННИК ИМЕЯЙ КОСМАТЫ УСЫ, ОТ НЕРАДЕНИЯ ОМОЧИТ ТЫЯ В БОЖЕСТВЕННОЙ КРОВИ, СОГРЕШАЕТ, НО УБО УСТЫ СВОИМИ ДОБРЕ ДА ОСМОКТАЕТ ОНЫЯ ПРЕЖДЕ, ПОТОМ ЖЕ ПОКРОВЦЕМ ДА ОТРЕТ: ПАЧЕ ЖЕ ПРЕЖДЕ ДОБРЕ ТЫЯ ДА УПРАВИТ, И ГРЕХА СЕГО ВОЗМОЖЕТ УБЕЖАТИ. ЕГДА ИЕРЕЙ СЛУЖАЙ, НА ДЛАНЬ СВОЕЯ ДЕСНИЦЫ БОЖЕСТВЕННОЕ ТЕЛО ВОЗЛАГАЕТ, ИЛИ В СОБОРЕ ОТ НАЧАЛЬСТВУЮЩАГО ПРИЕМЛЕТ, НИКАКОЖЕ ДЕСНИЦЕЮ ДА СТЕСНЯЕТ, НО МАЛО ЧТО СОГНУВ [АЩЕ ОТ НАЧАЛЬНИКА ПРИЕМЛЕТ] ШУЙЦЕЮ ДА ПОДДЕРЖИТ, И НЕ НАД ГЛАВОЮ, НО НАД ПРЕСТОЛОМ ДА ДЕРЖИТ: И ПРЕКЛОНЬ ГЛАВУ БЛАГОГОВЕЙНО И К ДЛАНИ БОЖЕСТВЕННОМУ ТЕЛУ СО СТРАХОМ И ВЕРОЮ ВЗИРАЯ, ОБЫЧНЫЯ МОЛИТВЫ ДА ГЛАГОЛЕТ, И ПРИЧАСТИТСЯ. ПО ПРИЧАЩЕНИИ ЖЕ ДОБРЕ ДА СОГЛЯДИТ НА ДЛАНЬ СВОЕЯ ДЕСНИЦЫ, И АЩЕ КРУПИЦА КАЯ ОТ МЕНЬШИХ ОСТА, И СИЮ ЯЗЫКОМ ВО УСТА ДА ВОЗМЕТ, И ДОБРЕ ДА ИЗЛИЖЕТ ДЛАНЬ, ВО ЕЖЕ НИЧЕСОМУ ОСТАТИСЯ НА НЕЙ. ПОСЕМ ЖЕ ВЗЕМ АНТИМИНСНУЮ ГУБУ, ДА ОТРЕТ ДЛАНЬ ДОБРЕ НАД ДИСКОСОМ, ТАКОЖДЕ И О ЛИТОН. ОТ СВЯТЫЯ ЖЕ ЧАШИ БОЖЕСТВЕННЫЯ КРОВЕ ПРИЧАСТИВСЯ, УСТА СВОЯ ДОБРЕ ИЕРЕЙ ДА ИЗССЕТ, И ЯЗЫКОМ ИЗЛИЖЕТ, ПОСЕМ ЖЕ И ГУБОЮ АНТИМИНСНОЮ ДА ОТРЕТ. ПИЯЙ ЖЕ ДОБРЕ КРАЙ СВЯТЫЯ ЧАШИ ДА ИЗССЕТ, ДА НЕ ОСТАНЕТСЯ НА БРЕЗЕ КРОВЕ БОЖЕСТВЕННЫЯ, ПОСЕМ ЖЕ ГУБОЮ ДА ОТРЕТ КРАЙ. АЩЕ СВЯТЫЙ АГНЕЦ НА ДИСКОСЕ СИЦЕ ЗАМЕРЗНЕТ, ЯКО НЕ ВОЗМОЩИ ИЕРЕЮ ВО СВОЕ ЕМУ ВРЕМЯ ПРЕЛОМИТИ ЕГО, НАД УГЛИЕМ В СКУДЕЛИ НА ПРЕСТОЛЕ ЗВЕЗДОЮ И ПОКРОВЦЕМ ПОКРЫВ СВЯТЫЙ ДИСКОС, С БОЖЕСТВЕННЫМ АГНЦЕМ ДА ПОЛОЖИТ И ПРИДЕРЖИТ, ДОНДЕЖЕ РАЗМЕРЗНЕТ. АЩЕ СЛУЖАЩУ ИЕРЕЮ НАПАДУТ ВРАЗИ, ИЛИ ИНОПЛЕМЕННИЦЫ, ЕРЕТИЦЫ, ИЛИ ПОГАНИИ, И УБИЙЦЫ, И НИКАКОЖЕ СЛУЖБА СОВЕРШИТИСЯ ВОЗМОЖЕТ, ДА ПОТРЕБИТ СВЯТАЯ, ВО ЕЖЕ НЕ ОСТАТИСЯ В ПОРУГАНИЕ И ПОПРАНИЕ СКВЕРНЫМ УБИЙЦАМ: САМ ЖЕ ДА ИЗБЕГНЕТ, АЩЕ МОЖЕТ. АЩЕ ЖЕ НЕ ОТСТУПИТ, ЛУЧШЕ СОТВОРИТ: ИБО АЩЕ УБИЕН БУДЕТ, МУЧЕНИЧЕСКИЙ ВЕНЕЦ ПРИИМЕТ. АЩЕ ЖЕ КТО ВОСХОЩЕТ, УНИЧИЖАЯ ВЕРУ СВЯТУЮ ПРАВОСЛАВНУЮ, ИЕРЕА СЛУЖАЩАГО УБИТИ, ДОЛЖЕН ЕСТЬ ИЕРЕЙ НИКАКОЖЕ СЛУЖЕНИЯ ОТСТУПИТИ, НО СОВЕРШИТИ, АЩЕ И УБИЙСТВО ПРЕТЕРПЕТИ ЕМУ ПРИИДЕТ: АЩЕ БО УБИЕН БУДЕТ ТОГДА, С МУЧЕНИКИ ПРИЧТЕН БУДЕТ. АЩЕ СЛУЖАЩУ ИЕРЕЮ БОЖЕСТВЕННУЮ СЛУЖБУ, ЦЕРКОВЬ ВОЗГОРИТСЯ, ИЛИ ОТ БУРИ, ИЛИ ИНЫЯ РАДИ ВИНЫ ВЕРХ ПАСТИСЯ НАЧНЕТ, СОХРАННО СО АНТИМИНСОМ ДА ВОЗМЕТ СВЯТАЯ, И ДА ИЗЫДЕТ ИЗ ЦЕРКВЕ, И НА ИНОМ МЕСТЕ ЧЕСТНОМ, НА ТОМЖЕ АНТИМИНСЕ ДА СОВЕРШИТ БОЖЕСТВЕННУЮ СЛУЖБУ, НАЧЕН ОТ МЕСТА, ЕГОЖЕ ИСХОДЯ ПРЕСТА. АЩЕ ПО ОСВЯЩЕНИИ ХЛЕБА ИЛИ ВИНА ПОКАЖЕТСЯ ЧУДО, СИЕСТЬ, ВИД ХЛЕБА В ВИДЕ ПЛОТИ, ИЛИ ОТРОЧАТЕ, ВИНО ЖЕ В ВИДЕ КРОВЕ, И АЩЕ ВКРАТЦЕ НЕ ПРЕМЕНИТСЯ СЕЙ ВИД, СИЕСТЬ, АЩЕ НЕ ПАКИ ЯВИТСЯ ВИД ХЛЕБА, ИЛИ ВИНА, НО СИЦЕ НЕПРЕМЕННО ПРЕБУДЕТ, НИКАКОЖЕ ИЕРЕЙ ДА ПРИЧАСТИТСЯ: ИБО НЕ СУТЬ СИЯ ТЕЛО И КРОВЬ ХРИСТОВА, НО ТОЧИЮ ЧУДО ОТ БОГА, НЕВЕРСТВА ИЛИ ИНЫЯ РАДИ ВИНЫ ЯВЛЕНО. ДА ВОЗМЕТ ЖЕ ИЕРЕЙ ИНУЮ ПРОСФОРУ [АЩЕ ТОЧИЮ ВИД ХЛЕБА ПРЕМЕНИСЯ] И ЯКОЖЕ ПРЕДУКАЗАСЯ, ПРОСКОМИДИЙНАЯ НАД АГНЦЕМ ДА ТВОРИТ И ГЛАГОЛЕТ, И ДА ИЗМЕТ СВЯТЫЙ АГНЕЦ, И ОТЛОЖИВ В ЧУДО ПРЕТВОРЕННЫЙ, И ЧЕСТНО СОХРАНИВ, ДА НАЧНЕТ ОТ МОЛИТВЫ: С СИМИ И МЫ БЛАЖЕННЫМИ СИЛАМИ: И ВСЯ ПО РЯДУ ДА СОВЕРШИТ, НАД ЧАШЕЮ ЖЕ НИЧТОЖЕ ДА ПОВТОРЯЕТ. АЩЕ ЖЕ И В ЧАШИ ВИННЫЙ ВИД В КРОВЬ ПРЕМЕНИТСЯ, ВО ИНУЮ ЧЕСТНУЮ ЧАШУ, ИЛИ В СОСУД ИЗЛИЯВ, ДА ВЛИЕТ ПАКИ ВИНО, ПРОСКОМИДИЙНАЯ НАД НИМ ГЛАГОЛЯ. И ТАКО ОБЫЧНО ПО РЯДУ И СИЕ ДА ОСВЯТИТ, И ВО ВРЕМЯ ПРИЧАЩЕНИЯ ДА ПРИЧАСТИТСЯ ОБЫЧНО, И СЛУЖБУ ДА СОВЕРШИТ. АЩЕ ВСКОРЕ ПАКИ, ИЖЕ ПОКАЗАСЯ МЯСОМ, ИЛИ ОТРОЧАТЕМ, ВИД ХЛЕБНЫЙ ЗРИМЬ БУДЕТ, ИЛИ В ЧАШИ, ИЖЕ ЗРИМЬ БЫСТЬ КРОВИЮ, АБИЕ ПАКИ ВИННЫЙ ПОКАЖЕТСЯ, ДА НЕ ЗАКАЛАЕТ ИНАГО АГНЦА, НИЖЕ ИНАГО ВИНА В ЧАШУ ДА ВЛИЕТ, НО СИМИ ДА ПРИЧАСТИТСЯ, И СЛУЖБУ СОВЕРШИТ: ИБО ИСТИННЫМ ТЕЛОМ И КРОВИЮ ХРИСТОВОЮ СУТЬ. В КОНЕЦ ЖЕ ДА ВЕСТЬ ПРИХОДСКИЙ ИЕРЕЙ, ЯКО В КИЙЖДО ВЕЛИКИЙ ПРАЗДНИК И НЕДЕЛЮ, К СИМ ЖЕ И В КУЮЖДО СУББОТУ ДОЛЖЕН ЕСТЬ ЛИТУРГИСАТИ, ПОД СМЕРТНЫМ ГРЕХОМ: ИБО АЩЕ ЛИТУРГИСАТИ НЕ БУДЕТ, МНОГИМ ОТ СЛУШАНИЯ БОЖЕСТВЕННЫЯ СЛУЖБЫ ЗАПНЕТ, ЮЖЕ ОТ БОЖИЯГО И ЦЕРКОВНАГО ПОВЕЛЕНИЯ, КИЙЖДО ХРИСТИАНИН, В КИЙЖДО СВЯТЫЙ ДЕНЬ СЛУШАТИ ДОЛЖЕН ЕСТЬ. К СЕМУ ДА ВЕСТЬ И СИЕ, ЯКО ЕДИНУ ТОЧИЮ НА ДЕНЬ ЛИТУРГИЮ, НА ЕДИНОМ ПРЕСТОЛЕ ДОЛЖЕН ЕСТЬ ИЕРЕЙ СОВЕРШИТИ: СИЯ БО ЕДИНОСТЬ СВЯТЫЯ ЖЕРТВЫ ЗНАМЕНУЕТ ЕДИНУ СМЕРТЬ ХРИСТОВУ, ЮЖЕ ЕДИНОЮ НАС РАДИ ПОДЪЯТ, И ЕДИНУ СТРАСТЬ ЕГО, ЮЖЕ ЕДИНОЮ О НАС ПРЕТЕРПЕ. ПО СОВЕРШЕНИИ БОЖЕСТВЕННЫЯ ЛИТУРГИИ ДОЛЖЕН ЕСТЬ ИЕРЕЙ ТВОРИТИ СИЦЕ: АБИЕ ПО ПРИЧАСТИИ БОЖЕСТВЕННЫХ ТАИН, ДОЛЖЕН ЕСТЬ ИЕРЕЙ ИЛИ ДИАКОН ОСТАНОК БОЖЕСТВЕННАГО ТЕЛА ОТ ДИСКОСА В СВЯТУЮ ЧАШУ ВСЫПАТИ СО ВСЯКИМ ВНИМАНИЕМ, ЯКО ДА НИГДЕ ЧТО-ЛИБО АЩЕ И ОТ МЕНЬШИХ КРУПИЦ УПАДЕТ, ИЛИ ОСТАНЕТСЯ. И СЕГО РАДИ ДОБРЕ ГУБОЮ АНТИМИНСНОЮ ДИСКОС ДА ОТРЕТ НАД СВЯТОЮ ЧАШЕЮ, ДОБРЕ СОГЛЯДАЯ, ДА НЕ ОСТАНЕТСЯ НА НЕМ ЧТО. ТАКОЖДЕ И НА АНТИМИНСЕ, ИЛИ ЛИТОНЕ ГУБОЮ, АЩЕ ЧТО ЕСТЬ, СОБРАВ ВКУПЕ НА ДИСКОСЕ ДА ВСЫПЛЕТ В СВЯТУЮ ЧАШУ: И ТАКОЖДЕ ДОБРЕ ДА СОГЛЯДАЕТ, ЕЖЕ НИЧЕМУЖЕ ОСТАТИСЯ НА НЕМ. СИЦЕ УБО ДОЛЖЕН ЕСТЬ ИЕРЕЙ ВСЕГДА НА ВСЯКОЙ ЛИТУРГИИ ТВОРИТИ, И ПОД СМЕРТНЫМ ГРЕХОМ И ИЗВЕРЖЕНИЕМ, НИКОГДАЖЕ АНТИМИНС ИЛИ ЛИТОН НАД ОГНЕМ ИСТРЯСАТИ, ИЛИ НАД ВОДОЮ. ИБО НА НЕМ НИЧТОЖЕ ИНО, РАЗВЕ ОТ БОЖЕСТВЕННАГО ТЕЛА КРУПИЦЫ ОТ НЕРАДЕНИЯ ИЕРЕЙСКАГО ОСТАЮТСЯ. И СЕГО РАДИ, ЯКОЖЕ РЕЧЕСЯ, ОПАСНО НА ДИСКОСЕ СОБРАНЫ, И В СВЯТУЮ ЧАШУ ВСЫПАНЫ ДА БУДУТ, И НА ЖЕРТВЕННИЦЕ ОТ НЕГО, ИЛИ ОТ ДИАКОНА ПОТРЕБЛЕНЫ. ПО СОВЕРШЕНИИ ЖЕ БОЖЕСТВЕННЫЯ СЛУЖБЫ, В ПОТРЕБЛЕНИИ ОСТАНКОВ СВЯТЫХ ТАИН НА ЖЕРТВЕННИЦЕ, ВСЯКОЕ ОПАСЕНИЕ ИМЕТИ ПОДОБАЕТ ИЕРЕЮ, ЕЖЕ НИЧЕСОМУ, АЩЕ И ОТ МЕНЬШИХ КРУПИЦ, ИЛИ КАПЛЕЙ ОСТАТИСЯ ВО СВЯТЕЙ ЧАШИ. СЕГО УБО РАДИ НЕ ЕДИНОЩИ ТОЧИЮ, НО И ВТОРИЦЕЮ И ТРЕТИЦЕЮ ЧАШУ ИСПОЛОСКАВ ДА ИСПИЕТ, ПОТОМ ЖЕ ГУБОЮ, ИЛИ ПЛАТОМ, НА СИЕ УСТРОЕНЫМ ОТРЕТ, ГУБУ ЖЕ ИЛИ ТОЙ ПЛАТ ВО СВЯТЕЙ ЧАШЕ ДА ОСТАВИТ. НА ЖЕРТВЕННИЦЕ ЖЕ, ЕГДА БОЖЕСТВЕННЫЯ ТАЙНЫ ПРИНЕСЕНЫ СТОЯТ, СВЕЩА ЗАЖЖЕНА ДА БУДЕТ. ДОНДЕЖЕ ПОТРЕБЯТСЯ СВЯТАЯ. ПОНОМАРЬ ЖЕ ДА НАУЧЕН БУДЕТ ОТ ИЕРЕА, И ВСИ ВО ОЛТАРЕ СЛУЖАЩИИ, ЕЖЕ СО СТРАХОМ И ТРЕПЕТОМ И БЛАГОГОВЕНИЕМ ХОДИТИ ОКОЛО ЖЕРТВЕННИКА, ЯКОЖЕ И ОКОЛО СВЯТЫЯ ТРАПЕЗЫ, ЕГДА НА НИХ СУТЬ БОЖЕСТВЕННЫЯ ТАЙНЫ, И БЛАГОЛЕПНОЕ ПОКЛОНЕНИЕ МИМО ИДУЩЕ, ИЛИ ПРИБЛИЖАЮЩЕСЯ, ДА ТВОРЯТ. ГУБУ СИЦЕ ЛИТОННУЮ, ЯКОЖЕ И ИСТИРАЛЬНУЮ, ИЛИ ПЛАТ, ЕГДА УЧЕРНИТСЯ И УПЫЛИТСЯ, САМ ИЕРЕЙ, ИЛИ ДИАКОН ДА ИЗМЫВАЕТ СВОИМА РУКАМА ДОБРЕ, НАД УМЫВАЛЬНИЦЕЮ ОЛТАРНОЮ: СИЕ ЖЕ ИЗМОВЕНИЕ ЧАСТО ДА БУДЕТ, ВО ЕЖЕ ВСЕГДА ЧИСТЫМ СИМ БЫТИ. СОСУДЫ СВЯЩЕННЫЯ, СИЕСТЬ, ЧАША, ДИСКОС, ЗВЕЗДА, И ЛЖИЦА, ЧАСТО ИСТИРАНЫ ОТ ПРАХА ДА БУДУТ, ТАКОЖДЕ И ОТ МОКРОТЫ, ВО ЕЖЕ НЕ ПАСТИ НА НИХ РЖЕ. В КОНЕЦ ЖЕ, ПО СОВЕРШЕНИИ БОЖЕСТВЕННЫЯ ЛИТУРГИИ, И ПО ПОТРЕБЛЕНИИ БОЖЕСТВЕННЫХ ТАИН, АБИЕ ПРЕЖДЕ СОВЛЕЧЕНИЯ СВЯЩЕННЫХ ОДЕЖД, ИЛИ ПО СОВЛЕЧЕНИИ, ИЗ ОЛТАРЯ НЕ ИСХОДЯ, ИЕРЕЙ ДОЛЖЕН ЕСТЬ ЧЕСТИ СО ВСЯКИМ УМИЛЕНИЕМ, БЛАГОДАРНЫМ СЕРДЦЕМ МОЛИТВЫ БЛАГОДАРНЫЯ ПО СВЯТОМ ПРИЧАЩЕНИИ. ИЗ ЦЕРКВЕ ЖЕ ИЗШЕД, ДА НЕ АБИЕ ОБРАТИТСЯ КО ИНОМУ КОЕМУ ДЕЛУ, НО ВРЕМЯ НЕКОЕ ДА ПРЕБУДЕТ В МОЛИТВАХ И РАЗМЫШЛЕНИИ ТОЛИКАГО ДАРА СПОДОБИВСЯ ВО СВЯТЕЙ ЛИТУРГИИ, И БЛАГОДАРЯ БОГА, ДА ПРОСИТ, ЕЖЕ ВО ВСЯ ДНИ ЖИЗНИ ЕГО СИЦЕВАГО ДАРА ДОСТОЙНО ПРИЯТИ СПОДОБИТ ЕГО. В СИЙ УБО ДЕНЬ ДА СОХРАНИТСЯ ОТ ИЗЛИШНЯГО ЯДЕНИЯ, ПИТИЯ И СНА, НАИПАЧЕ ЖЕ ИМЕЯЙ СУПРУЖНИЦУ, ОТ ТЕЛЕСНАГО СОВОКУПЛЕНИЯ, И ОТ ВСЯКИЯ ПЛОТСКИЯ ЛЮБВЕ, РАДИ ЛЮБВЕ И ЧЕСТИ НЕБЕСНАГО ЦАРЯ, ЕГОЖЕ В ХРАМ И ОБИТАЛИЩЕ ДУШИ СВОЕЯ ПРИЯТ. КАКО ХРАНИТИ БОЖЕСТВЕННЫЯ ТАЙНЫ БОЛЬНЫХ РАДИ. ПРЕЖДЕ ВСЕГО ПРИХОДСКИЙ ИЕРЕЙ, [ИЛИ И В МОНАСТЫРЕХ] ДОЛЖЕН ТЩАНИЕ ИМЕТИ ЕЖЕ БЫ СОСУДЫ БЫЛИ, СИЕСТЬ, ПОТИРЬ, ДИСКОС, ЗВЕЗДА, ЛЖИЦА, КИВОТ ИЛИ ГРОБНИЦА ЗЛАТЫЯ ИЛИ СРЕБРЯНЫЯ, В ВЕЛИЕЙ ЖЕ НУЖДИ ОЛОВЯНЫЯ, ПРИЛИЧНО УСТРОЕНЫ К СЛУЖЕНИЮ И ХРАНЕНИЮ БОЖЕСТВЕННАГО И ЖИВОТВОРЯЩАГО ТЕЛА ИИСУС ХРИСТОВА, В НИХЖЕ СТРАШНОЕ ТАИНСТВО СОВЕРШАЕТСЯ, И САМ ГОСПОДЬ ИИСУС ВИДНЕ ПРЕБЫВАЕТ. И ВСЯ УБО ВЕЩИ ЦЕРКОВНЫЯ В ЛЕПОТУ ТВОРЯТСЯ, ЯКО ОДЕЖДЫ СВЯЩЕННЫЯ, КРЕСТЫ СВЯТЫЯ, ЕВАНГЕЛИЯ ДРАГО УКРАШЕНАЯ: НО ПО ТЕХ ИСПОЛНЕНИИ ДА БУДУТ. АЩЕ УБО НЕВОЗМОЖНО ГДЕ ЗА СКУДОСТИЮ БЫТИ ЗЛАТЫМ, И СРЕБРЯНЫМ СИМ СОСУДОМ, ПОТИРЮ, ДИСКОСУ, ЗВЕЗДЕ, ЛЖИЦЕ, И КИВОТУ ИЛИ ГРОБНИЦЕ НА СОХРАНЕНИЕ БОЛЬНЫМ, ВСЯЧЕСКИ ОЛОВЯНЫЯ ДА БУДУТ, ПОД ПРАВИЛЬНОЮ КАЗНИЮ, И АРХИЕРЕЙСКИМ ЗАПРЕЩЕНИЕМ. КИВОТ, В НЕМЖЕ ИМУТ ХРАНИТИСЯ СВЯТЫЯ ТАЙНЫ, ТЕЛО ГОСПОДНЕ, ПОКРОВЕН ДА БУДЕТ, И НА ВЕРХУ КРЕСТ, И ВСЕГДА С БОЖЕСТВЕННЫМИ ТАЙНЫ НА ПРЕСТОЛЕ ДА СТОИТ, А НЕ НА ИНОМ ГДЕ МЕСТЕ. НЕСВЯЩЕННАЯ РУКА НИКОГДАЖЕ СЕГО ДА КОСНЕТСЯ, ПОД СМЕРТНЫМ ГРЕХОМ, И ПОД ВЕЛИКОЮ ЕПИТИМИЕЮ, РАЗВЕ ВЕЛИКИЯ КАКОВЫЯЛИБО НУЖДЫ. БОЖЕСТВЕННЫЯ ТАЙНЫ, НЕ ТОЧИЮ В ВЕЛИКИЙ ЧЕТВЕРТОК, НО И ВО ИНЫЯ ДНИ, МНОГИХ РАДИ ВИН, ПО ЧИНУ ВЕЛИКАГО ЧЕТВЕРТКА НАПИСАННОМУ ОСВЯЩЕНЫ, СУШЕНЫ И ХРАНИМЫ БЫТИ МОГУТ. АЩЕ КИВОТ ЗЛАТ, ИЛИ СРЕБРЯН ВНУТРЬ ПОЗЛАЩЕН, СУШЕНЫЯ ТАЙНЫ СВЯТЫЯ, И БЕЗ ПОДЛОЖЕННЫЯ БУМАГИ ДА ВОЗЛАГАЮТСЯ. АЩЕ СРЕБРЯН НЕ ПОЗЛАЩЕН, ИЛИ ОЛОВЯН, КОНЕЧНО ДА ПОДСТЕЛЕТСЯ В НЕМ ЧИСТАЯ БУМАГА, И НА ТОЙ БОЖЕСТВЕННЫЯ ТАЙНЫ ПОЛОЖАТСЯ. БОЖЕСТВЕННЫЯ ТАЙНЫ, В КИВОТЕ ХРАНИМЫЯ, ЧАСТО СО ВСЯКОЮ ДОСТОДОЛЖНОЮ ЧЕСТИЮ, ОТКРОВЕННОЮ ГЛАВОЮ ПОКЛОНЕНИЕ СОТВОРИВ, РУЦЕ ЖЕ ИЗМОВЕНЫ ИМЕЯ, НА ВСЯК ДЕНЬ ПОСЕЩАЙ: АЩЕ ЖЕ НЕВОЗМОЖНО НА ВСЯК ДЕНЬ, ПОНЕ ВО ВТОРЫЙ ИЛИ ТРЕТИЙ ДЕНЬ ОТКРЫВ СОСУД ПРИЗИРАЙ, ДА НЕ КАКО НЕРАДЕНИЯ И НЕПРИЗИРАНИЯ РАДИ ТВОЕГО, СПЛЕСНЕЮТ, ИЛИ РАСТЛЕЮТ ОТ МОКРОТЫ. И СЕГО РАДИ ЯКО УНИЧИЖИТЕЛЬ БОЖЕСТВЕННЫХ ТАИН, И ТЯЖКО СМЕРТНО СОГРЕШИШИ, И ИЗВЕРЖЕНИЯ ВИНЕ ПОДЛЕЖАТИ БУДЕШИ. АЩЕ УБО УЗРИШИ, ЯКО К МОКРОТЕ ПРЕКЛОНИШАСЯ, РАЗВЕЙ АНТИМИНС НА СВЯТОМ ПРЕСТОЛЕ, И СО ВСЯКИМ ОПАСЕНИЕМ ОТ КИВОТА НА СВЯТЫЙ ДИСКОС ВЛОЖИ, И ОКНА ОТВЕРЗ ПРОСУШИ, САМ БЛЮДЫЙ, ДОНДЕЖЕ ИЗСОХНУТ, ДА МУХА ИЛИ ИНО ЧТО ОТ СИЦЕВЫХ НЕ КОСНЕТСЯ ИМ, И ТАКО ТЯЖКО СМЕРТНО СОГРЕШИШИ. АЩЕ ЖЕ ОТ НЕБРЕЖЕНИЯ, БОЖИЯ ТАЙНЫ СУША, ПРИПАЛИШИ, ИЛИ КАКОЛИБО ОТ МОКРОТЫ ИЛИ ЛЕНОСТИ, ИЛИ РАСТЛИТИСЯ ОСТАВИШИ, СМЕРТНО ТЯЖКО СОГРЕШИШИ, И ИЗВЕРЖЕНИЯ ВИНЕ ПОДЛЕЖАТИ БУДЕШИ. АЩЕ УБО СИЦЕВЫЙ СЛУЧАЙ, [ЕЖЕ НЕ БУДИ] КОГДА ПРИКЛЮЧИТСЯ, НИКАКОЖЕ НИКОГОЖЕ ДА ДЕРЗНЕШИ ПРИЧАСТИТИ СИЦЕВЫМИ ТАЙНАМИ: НО ИНЫЙ АГНЕЦ ПО УСТАВУ НИЖЕНАПИСАННОМУ, НИЧТОЖЕ ОТЛАГАЯ, К СЛУЖЕНИЮ СЕБЕ ПРИУГОТОВАВ, ВО УТРИЙ ДЕНЬ ПО ОЩУТЕНИИ СЕГО, ЛИТУРГИЮ БОЖЕСТВЕННУЮ НАЧЕН, ИЗМИ, ОСВЯТИ, И ИЗСУШИВ СОХРАНИ, И СИМ БОЛЬНЫЯ И ТРЕБУЮЩИЯ ПРИЧАСТИ. СПЛЕСНЕЛЫЯ ЖЕ ИЛИ РАСТЛЕННЫЯ ТАЙНЫ, НА ТОЙЖЕ ЛИТУРГИИ НА ЖЕРТВЕННИЦЕ СО ОСТАНКИ БОЖЕСТВЕННЫХ ТАИН В ПОТИРЬ ВСЫПАВ ПОТРЕБИ. ЕГДА УБО СВЯТЫЯ ТАЙНЫ ИМАШИ ПРИУГОТОВЛЯТИ РАДИ НУЖДНЫХ ПОТРЕБ, О ИЕРЕЮ, В ЧЕТВЕРТОК ВЕЛИКИЙ, ИЛИ ВО ИНО ВРЕМЯ: ТОГДА АГНЕЦ ВТОРЫЙ ИЗМИ, И ПО ЧИНУ ЯКОЖЕ В ВЕЛИКИЙ ПОСТ КО ПРЕЖДЕОСВЯЩЕННОЙ ЛИТУРГИИ СОТВОРИ, НАПАЯЙ ЖЕ СВЯТЫЙ АГНЕЦ ЖИВОТВОРЯЩЕЮ КРОВИЮ НАД СВЯТОЮ ЧАШЕЮ ПОМАЛУ ЛЖИЦЕЮ, С ВЕЛИКИМ ОПАСЕНИЕМ И ИСКУССТВОМ, ЕЖЕ БЫ НЕ ПРЕМОЧИТИ ЕГО, И НЕ УКАНУТИ ГДЕ ОТ ИЗЛИШЕСТВА. СУШИТИ ЖЕ ПОДОБАЕТ НАПОЕННЫЙ АГНЕЦ НА СВЯТЕМ ПРЕСТОЛЕ СИЦЕ: ПРЕЖДЕ РАЗВЕЙ АНТИМИНС, И ОТ КИВОТА ИЗЪЕМ НА ДИСКОСЕ ПОЛОЖИ, И ПОКАДИ ОКРЕСТ: ТАЖЕ ЛЕПОТНОЕ ПОКЛОНЕНИЕ СОТВОРИВ, РАЗДРОБИ СВЯТЫМ КОПИЕМ НА ЧАСТИЦЫ МАЛЫ, СО ВСЯКИМ БЛАГОГОВЕНИЕМ. ПО РАЗДРОБЛЕНИИ ЖЕ ПОЛОЖИ ПЛИТЯНЫЙ КАМЕНЬ, ИЛИ ПЛИНФУ, СИЕСТЬ КИРПИЧЬ, ПРИ КРАИ АНТИМИНСА, ОТ ДЕСНЫЯ СЕБЕ СТРАНЫ, И ВЕРХУ КАМЕНЕ СКУДЕЛЬ НОВЫЙ, ИЛИ ГОРШЕК ЖЕЛЕЗНЫЙ, ИЛИ МЕДНЫЙ, ЧИСТ, СО УГЛИЕМ ГОРЯЩИМ, И ПОКЛОНИВСЯ ДОСТОДОЛЖНО, ВОЗМИ СВЯТЫЙ ДИСКОС С БОЖЕСТВЕННЫМИ ТАЙНАМИ, РАЗДРОБЛЕННЫМИ С ВЕЛИИМ ВНИМАНИЕМ, И ВОЗЛОЖИ ЕГО ВЕРХУ СКУДЕЛЬНИКА, ОПАСНО БЛЮДЫЙ, ДА ПОМАЛУ ИЗСОХНУТ БОЖЕСТВЕННЫЯ ТАЙНЫ, ПРЕВРАЩАЯ ТЫЯ СВЯТЫМ КОПИЕМ, ДА НЕ КАКО ПРИГОРЯТ. ЕГДА ЖЕ ДОБРЕ СОГРЕЕТСЯ СВЯТЫЙ ДИСКОС, СНИМАЙ ЕГО, И ПОЛАГАЙ НА СВЯТОМ АНТИМИНСЕ, ИЛИ НА ПОКРОВЦЕ, ДА НЕ ВЕЛЬМИ РАЗГОРЕВСЯ, ИСПАЛИТ СВЯТЫЯ ТАЙНЫ: ЕГДА ЖЕ УСТУДИТСЯ МАЛО, ПАКИ ВОЗЛАГАЙ ЕГО ВЕРХУ ГОРШКА, ИЛИ НА ТО СОСУДА УСТРОЕННАГО. СИЕ ЖЕ ТВОРИ И МНОГАЖДЫ, ДОНДЕЖЕ ИЗСОХНУТ. СУХИЯ ЖЕ СО ВСЯКИМ ВНИМАНИЕМ ВЛОЖИ ВО СВЯТЫЙ КИВОТ, И ПОКРЫВ ПОЛОЖИ НА СВОЕМ МЕСТЕ, И ДОСТОДОЛЖНОЕ ПОКЛОНЕНИЕ СОТВОРИВ, СВЕЙ ПАКИ АНТИМИНС. А ИДЕЖЕ ПО ВСЯ ДНИ СЛУЖБА БОЖЕСТВЕННАЯ СОВЕРШАЕТСЯ, ЯКОЖЕ ВО ГРАДЕХ ВЕЛИКИХ БЫВАЕТ, ИЛИ В МОНАСТЫРЕХ И КРОМЕ ВСЯКАГО СУШЕНИЯ БОЖЕСТВЕННЫЯ ТАЙНЫ БЫТИ МОГУТ, СИЦЕВЫМ ОБРАЗОМ: НЕ ДВА АГНЦА ЗАКАЛАЯ, НО ТОГОЖДЕ ЕДИНАГО ЧАСТЬ ВЗЕМ, НАПОИВ КРОВИЮ БОЖЕСТВЕННОЮ, ЯКОЖЕ ПРИУКАЗАСЯ, ДО УТРИЯ, СЛУЧАЯ РАДИ КОЕГО СМЕРТНАГО, ХРАНИТИ. И ТАКО НА ВСЯК ДЕНЬ ТВОРЯ, НЕ ТРЕБЕ БУДЕТ СУШЕНИЯ, И ВСЯКИХ СЛУЧАЕВ БЕДСТВЕННЫХ ИЗБЕГНЕТ. О ПОДАЯНИИ, ПРИЯТИИ, ХРАНЕНИИ ЖЕ И ПОКЛОНЕНИИ БОЖЕСТВЕННЫХ ТАИН. ВСИ УБО СВЯЩЕННОСЛУЖИТЕЛИ ДОЛЖНИ СУТЬ С ПОДОБАЮЩЕЮ ЧЕСТИЮ СОВЕРШАТИ ВО ХРАМЕ ГОСПОДНИ СЛУЖЕНИЕ СВОЕ, И ТАЙНАМ БОЖИИМ ТВОРИТИ ПОКЛОНЕНИЕ СВЯТОЛЕПНОЕ, И ЧАСТО О ПРИЯТИИ ТАКОВАГО ДАРА ТЩАТИСЯ. ПРИХОДСТИИ ЖЕ ИЕРЕИ, И ПРИХОЖАН СВОИХ О ТОМ ДА ПОУЧАЮТ: ЕЖЕ БЫ В ЧИСТОЙ СОВЕСТИ ВСЯКИЙ ПОЛ АЩЕ ВОЗМОЖНО В ПРАЗДНИКИ, АЩЕ ЛИ ЖЕ НИ, ВСЯЧЕСКИ БЫ В ЧЕТЫРЕ ПОСТЫ В ЛЕТЕ ПРИУГОТОВЛЯЛИСЯ НА ТО: ДОЛЖНИ УБО СУТЬ СМИРЕННЫМ И ЧИСТЫМ ТЕЛА УСТРОЕНИЕМ ПРИСТУПАТИ К СИЦЕВЫМ ТАЙНАМ БОЖЕСТВЕННЫМ. АЩЕ УБО КРОМЕ ПОСТОВ ЧЕТЫРЕХ ОБЫЧНЫХ ПРИСТУПИТИ К СВЯТОМУ ПРИЧАЩЕНИЮ ВОСХОТЯТ: СЕДМЬ ДНЕЙ ПРЕЖДЕ ДА ПОСТЯТСЯ, В МОЛИТВАХ ЦЕРКОВНЫХ И ДОМАШНИХ ПРЕБЫВАЮЩЕ [СИЕ ЖЕ НЕ В НУЖДЕ: В НУЖДЕ БО ТРИ ДНИ, ИЛИ ЕДИН ДЕНЬ ДА ПОСТЯТСЯ ТОЧИЮ] И ПРЕДУГОТОВЛЯЮЩЕ СЕБЕ К ЧИННОМУ ИСПОВЕДАНИЮ ГРЕХОВ СВОИХ. СУЩИИ ЖЕ В СУПРУЖЕСТВЕ, ОТ СУПРУЖЕСКАГО СОВОКУПЛЕНИЯ В ТЫЯ ДНИ ДА ВОЗДЕРЖАТСЯ ВСЯКО. ПРЕД ОСМЫМ ЖЕ ДНЕМ ДА ИСПОВЕДЯТ ПРЕД ИЕРЕЕМ ВСЯ ГРЕХИ СВОЯ, И С ВЕЧЕРА НИЧТОЖЕ ДА ВКУСЯТ: НЕ МОГУЩИИ ЖЕ ЮНОСТИ ИЛИ ПРЕСТАРЕЛОСТИ РАДИ, ВСЯКО С ВЕЧЕРА ВОЗДЕРЖАТИСЯ НИЧТОЖЕ ЯДШЕ, МАЛО ЧТО ДА ВКУСЯТ: ОТ ПОЛУНОЩИ ЖЕ ВСЯКО ВСИ ДА ВОЗДЕРЖАТСЯ, В МОЛИТВАХ ЖЕ, ПОКЛОНАХ, И ДУХОВНЫХ РАЗМЫШЛЕНИИХ ДА УПРАЗДНЯТСЯ, ЕЛИКО МОЩНО, ГОТОВЯЩИИСЯ: А НЕ УМЕЮЩИМ ПИСАНИЯ, И В РАЗСТОЯНИИ ОТ ЦЕРКВЕ ДАЛЬНЕМ, ИЕРЕЙ ПРАВИЛО И В ДОМЕ ИМ, КАКО КОМУ, ДА ЗАВЕЩАЕТ. ПО УТРЕННИХ ЖЕ ОБЫЧНЫХ МОЛИТВАХ ЦЕРКОВНЫХ, ВСИ ПРИЧАЩАТИСЯ ИМУЩИИ, НЕ УМЕЮЩИИ ЖЕ ЧЕСТИ, ДА ОСТАНУТСЯ В ЦЕРКВИ, ВО ЕЖЕ СЛУШАТИ ОТ ИЕРЕА ЧТОМОЕ К СВЯТОМУ ПРИЧАЩЕНИЮ ПРАВИЛО, И ОБЫЧНЫЯ ЧАСЫ: УМЕЮЩИИ ЖЕ ЧЕСТИ, И САМИ ВО СВОИХ ДОМАХ СИЯ ПРОЧЕСТИ СЕБЕ МОГУТ. В НАЧАЛЕ СВЯТЫЯ ЛИТУРГИИ ДА СОБЕРУТСЯ ВСИ В ЦЕРКОВЬ, И ВСЕЯ СВЯТЫЯ СЛУЖБЫ СО СТРАХОМ И БЛАГОГОВЕНИЕМ СТОЯЩЕ ДА МОЛЯТСЯ, И СЛУШАЮТ. ВО ВРЕМЯ ЖЕ ПРИЧАЩЕНИЯ ДА ПРИСТУПЯТ ЧИННО, В ГЛУБОКОМ СМИРЕНИИ, И ХРИСТУ ИСТИННО В ТАЙНАХ СУЩЕМУ ПОД ВИДОМ ХЛЕБА И ВИНА ДО ЗЕМЛИ КИЙЖДО ДА ПОКЛОНИТСЯ ЕДИНОЩИ, РУЦЕ К ПЕРСЕМ КРЕСТООБРАЗНО СОГБЕННЕ ИМУЩЕ, И ХРИСТА РАСПЯТАГО ИСПОВЕДАЮЩЕ, И ЛЮБОВЬ К НЕМУ ИМУТ. ПРИЕМШЕ ЖЕ ЧЕСТНО ДА ПОГЛОТЯТ, И ПО УТЕРТИИ УСТ ПОКРОВЦЕМ РУКОЮ СВЯЩЕННИЧЕСКОЮ, ЛОБЫЗАЮТ КРАЙ СВЯТЫЯ ЧАШИ, ЯКОЖЕ САМОЕ ХРИСТОВО РЕБРО, ИЗ НЕГОЖЕ ИСТЕЧЕ КРОВЬ И ВОДА, И ОТСТУПИВШЕ МАЛО КЛАНЯЮТСЯ НЕ ДО ЗЕМЛИ, РАДИ ОХРАНЕНИЯ ПРИЯТЫХ ТАИН, И СТОЯТ НА СВОИХ МЕСТЕХ, НЕ ГЛАГОЛЮЩЕ ДРУГ СО ДРУГОМ, НИЖЕ ДА ПЛЮЮТ, ДОНДЕЖЕ АНТИДОР И ВИНО СО УКРОПОМ ПОДАСТСЯ ИМ: И ДО СКОНЧАНИЯ СВЯТЫЯ ЛИТУРГИИ ДА ЖДУТ НЕИСХОДНО И МОЛИТВЫ БЛАГОДАРСТВЕННЫЯ ПО СВЯТОМ ПРИЧАЩЕНИИ ДА СОВЕРШАТ. ВЕСТНО ТЕБЕ БУДИ, О ИЕРЕЮ, ЯКО АЩЕ МНОЗИ БУДУТ ПРИЧАСТНИЦЫ, НИКАКОЖЕ ДА ДЕРЗНЕШИ, [НЕДОСТАВАЮЩУ В СВЯТОЙ ЧАШИ БОЖЕСТВЕННЫЯ КРОВЕ, ИЛИ ТЕЛА] ПРИЛИТИ ВИНО, ИЛИ ХЛЕБ ПРОСТЫЙ ВСЫПАТИ: СМЕРТНО БО ТЯЖКО СОГРЕШИШИ, И ИЗВЕРЖЕНИЯ КАЗНИ ПОДПАДЕШИ. В ТАКОВОМ УБО СЛУЧАИ, ДО УТРИЯ ПОВЕЛИ ИНЫМ ПОЖДАТИ, И СЛУЖИВ ПРИЧАСТИ ТЫЯ, ИЛИ ОТ КИВОТА ХРАНИМЫЯ БОЛЬНЫХ РАДИ БОЖЕСТВЕННЫЯ ТАЙНЫ, ВСЫПЛИ ВО СВЯТУЮ ЧАШУ, И ПРИЧАСТИ ТЫЯ ПО ОБЫЧАЮ. К СЕМУ ВХОДЯЩЕ В ХРАМ БОЖИЙ СВЯТЫЙ, И ЗРЯЩЕ КО СВЯТОМУ ОЛТАРЮ, СО СТРАХОМ ДОСТОДОЛЖНОЕ ПОКЛОНЕНИЕ СОТВОРЯЮТ СВЯЩЕННОСЛУЖИТЕЛИ И ВСИ ЛЮДИЕ: ВО ХРАМЕ БО СТОЯЩИИ, МНЕТИ НА НЕБЕСИ ПРЕД САМЫМ БОГОМ СТОЯТИ: И МОЛИТВЫ ПРИНОШАЙ БОГУ, ЯКО ТУ СУЩЕМУ ОБЕЩАННЕ. ВО ОЛТАРЬ ЖЕ ВХОДЯ, ВСЕГДА ПРЕЖДЕ ГЛАВУ ОТКРЫВ, И ПОКЛОНЕНИЕ СОТВОРИВ, ВНИДИ, И К БОЖЕСТВЕННОМУ ПРЕСТОЛУ ПРИСТУПИВ, НИЖАЙШЕЕ СОТВОРИ ПОКЛОНЕНИЕ, И ВСЕ ЕЖЕ АЩЕ ВО ОЛТАРИ ДЕЕШИ, СО ВСЯКИМ СМИРЕНИЕМ И БЛАГОГОВЕНИЕМ, ЯКО ПРЕД ЛИЦЕМ БОГА ТУ СУЩАГО ДЕЙСТВУЙ: ИСХОДЯ ЖЕ, ТАКОЖДЕ ПЕРВЕЕ БОЖЕСТВЕННЫМ ТАЙНАМ НИЗКО ПОКЛОНИВСЯ, ИЗЫДИ. ЕГДА ЕКТЕНИЮ ПРЕД СВЯТЫМИ ЦАРСКИМИ ВРАТЫ ГЛАГОЛЕШИ, ВСЕГДА ПЕРВЕЕ БЛАГОГОВЕЙНО ГЛАВУ ОТКРЫВ, ПОКЛОНИСЯ, И ТОГДА НАЧИНАЙ: ТАКОЖДЕ СКОНЧАВ ПОКЛОНИСЯ, И ОТИДИ. СИМ ЖЕ ОБРАЗОМ, И ЕГДА ПРИКЛЮЧАЕТСЯ МИМО СВЯТЫХ ЦАРСКИХ ДВЕРЕЙ ИТИ, НИКОГДАЖЕ МИМО ИДИ НЕ ПОКЛОНИВСЯ. НАКОНЕЦ ЖЕ, СОВЕРШИВ ВСЯК СВЯЩЕННОСЛУЖИТЕЛЬ И ПРИЧЕТНИК ЦЕРКВЕ В СВОЕМ ЧИНЕ, НОЩНОЕ, УТРЕННЕЕ ИЛИ ДНЕВНОЕ, ИЛИ ВЕЧЕРНЕЕ ЦЕРКОВНОЕ СЛУЖЕНИЕ, ВОЗДАЖДЬ ГОСПОДУ БОГУ ПОКЛОНЕНИЕ БЛАГОГОВЕЙНО, ЯКО ЕМУ СИЕ ОТ ТЕБЕ, И ОТ ЛЮДЕЙ ВСЕХ ПРИЯТНО ЕСТЬ. ИБО ТАКОВАГО РАДИ СВЯТЫМ БОЖЕСТВЕННЫМ ТАЙНАМ ПОКЛОНЕНИЯ, И ВО ОПАССТВЕ ХОЖДЕНИЯ, ОСОБНУЮ И ИЗОБИЛЬНУЮ БЛАГОДАТЬ ОТ ХРИСТА БОГА ПОЛУЧИТ КИЙЖДО. ОЛТАРЮ СЛУЖАЩИЯ, СИЕСТЬ, ПОНОМАРИ, ДОЛЖЕН ИЕРЕЙ ЗЕЛО УЧИТИ, ЯКО ДА ВЕЛИИМ СТРАХОМ И ТРЕПЕТОМ, И ВСЯКИМ БЛАГОГОВЕНИЕМ ВХОДЯТ ВО СВЯТЫЙ БОЖИЙ ОЛТАРЬ, И СВОЕ ИМ НАЛЕЖАЩЕЕ ДЕЛО СОТВОРЯЮТ, ВЕДУЩЕ, ЯКО ТАМО ПРИСУТСТВЕННЕ ХРИСТОС БОГ НАШ НА ПРЕСТОЛЕ: ВХОДЯЩЕ ЖЕ И ИСХОДЯЩЕ, НИЗКО ДА ПОКЛАНЯЮТСЯ. ПРЕСТОЛА ЖЕ БОЖЕСТВЕННАГО, ПАЧЕ ЖЕ САМЫХ БОЖЕСТВЕННЫХ НА НЕМ СУЩИХ ТАИН, ТАКОЖДЕ СОСУДОВ СЛУЖЕБНЫХ, И ИНЫХ СВЯЩЕННЫХ ВЕЩЕЙ, НИКАКОЖЕ ПРИКОСНУТИСЯ ДА ДЕРЗНУТ, ДА НЕ В ГРЕХ ВПАДНУТ: РАЗВЕ СВЕТИЛЬНИКОВ И СВЕЩ, КАДИЛЬНИЦЫ ЖЕ И ИНЫХ МЕНЬШИХ СВЯЩЕННЫХ ВЕЩЕЙ. ЧЕСТИ РАДИ БОЖЕСТВЕННЫХ ТАИН, НИКТОЖЕ ОТ НЕСВЯЩЕННЫХ ВО СВЯТЫЙ ОЛТАРЬ ДА ВХОДИТ: ЖЕНЫ ЖЕ НИКОГДА. ПОНОМАРИ, ЧАСТО ИСПОВЕДАЮЩИИСЯ, И БОЖЕСТВЕННЫМ ТАЙНАМ ПРИЧАЩАЮЩИИСЯ, ТРЕЗВЕННО ЖЕ И БЛАГОЧЕСТНО В ДОБРОДЕТЕЛЕХ ПРЕБЫВАЮЩИИ, СИИ ПОНОМАРИ ДОЛЖНИ СУТЬ, ПРОСФОРЫ, ВИНО, ВОДУ, ФИМИАМ, И ОГНЬ ВО ОЛТАРЬ ВНЕСТИ, СВЕЩИ ЖЕ ВЖИГАТИ И УГАШАТИ, КАДИЛЬНИЦУ ЖЕ И ТЕПЛОТУ ПРИУГОТОВЛЯТИ, И ИЕРЕЮ ПОДАВАТИ, ОЛТАРЬ ВЕСЬ ЧИННО И ЧАСТО УМЕСТИ И ОЧИЩАТИ: СИЦЕ ЗЕМЛЮ ОТ ВСЯКИХ УМЕТИЙ, ЯКОЖЕ И СТЕНЫ, И ВЕРХ КРОВНЫЙ ОТ ПРАХА И ПАУЧИНЫ. ПРЕСТОЛ ЖЕ И ЖЕРТВЕННИК ИЕРЕЮ ТОЧИЮ, И ДИАКОНУ, ИЛИ ВПОДИАКОНУ ОЧИЩАТИ И ИСТИРАТИ, ВО ЕЖЕ НИКОЛИЖЕ ОБРЕСТИСЯ НА НИХ ПРАХУ, ИЛИ УМЕТИЮ КОЕМУ: ДА НЕ КОСНЕТСЯ СО ГРЕХОМ СВЯЩЕННЫХ НЕСВЯЩЕННАЯ РУКА. В ЦЕРКВИ ЖЕ И ПАПЕРТИ, ПОНОМАРИ, ТАКОЖДЕ ОБРАЗЫ, СТЕНЫ, ПОТОЛОК, КРОВЛИ ОТ ПРАХА И ПАУЧИНЫ, ЗЕМЛЮ ЖЕ ОТ УМЕТИЙ ЧАСТО ОЧИЩАТИ ДОЛЖНИ. УМЕТИЯ ЖЕ ОЛТАРНАЯ И ЦЕРКОВНАЯ НЕ ДОСТОИТ НА МЕСТА НЕПОТРЕБНАЯ ИЗМЕТАТИ, НО ИЛИ В РЕКУ, ИЛИ В НЕХОДНОМ И НЕПОПИРАЕМОМ МЕСТЕ. К СЕМУ НЕ ТОЧИЮ ИЕРЕИ И ОЛТАРНИИ СВЯЩЕННОСЛУЖИТЕЛИ, НО И ВСИ БЛАГОЧЕСТИВИИ ХРИСТИАНЕ, АЩЕ В ЦЕРКВИ, АЩЕ К БОЛЬНЫМ НЕСОМЫ БОЖЕСТВЕННЫЯ ТАЙНЫ УЗРЯТ, БОГОЛЕПНЫМ ПОКЛОНЕНИЕМ ДА ПОЧИТАЮТ. ТАКОЖДЕ И В ХРАМ СВЯТЫЙ ПРИШЕДШЕ, ВО ВСЯКОМ ПЕНИИ ПО ЧИНУ ИЛИ УСТАВУ ЦЕРКВЕ, КЛАНЯТИСЯ ГОСПОДУ БОГУ В МОЛИТВАХ КОГДА, КОЛИКО И КАКО ВСИ ТЩАТЕЛЬНО ДА СОТВОРЯЮТ, И НАЧАТКИ УСЕРДИЯ ТРУДОВ СВОИХ, МОЛЬБЫ, МОЛЕНИЯ, И БЛАГОДАРЕНИЯ ДА ПРИНОШАЮТ: ПЕНИЯ ЖЕ И ЧТЕНИЯ ЦЕРКОВНАГО ВО ИЗВЕСТИИ ДА СЛУШАЮТ, ВРАЗУМЛЯЮЩЕСЯ ПО АПОСТОЛУ, ВО ПСАЛМЕХ И ПЕНИИХ И ПЕСНЕХ ДУХОВНЫХ, И ВО ЧТЕНИИ СВЯЩЕННАГО ПИСАНИЯ, И УЧИТЕЛЕЙ СВЯТЫХ ЦЕРКОВНЫХ, И ПОЮЩЕ ГОСПОДА БОГА В СЕРДЦАХ СВОИХ НЕПРЕСТАННО. И СЕГО ПОДОБАЕТ ИЕРЕЮ ПРИХОЖАН И ДЕТЕЙ СВОИХ ДУХОВНЫХ ВСЕГДА НАУЧАТИ, ДА ВЕДЯТ ВОЛЮ В ТОМ БОЖИЮ И ПОВЕЛЕНИЕ МАТЕРЕ СВОЕЯ ЦЕРКВЕ. ВЕДАТИ ЖЕ И СИЕ ИЕРЕЕМ ПОДОБАЕТ: ЯКО ВСИ ХРИСТИАНЕ ЕДИНЫЯ ВЕРЫ, ЕДИНЫЯ ЦЕРКВЕ НАШЕЯ, ОТЛУЧЕНИЯ И КЛЯТВЫ НЕ ИМЕЮЩИИ НА СЕБЕ, И ПОКАЯНИЕ ИСПОВЕДИЮ ЧИСТО ПРИНОСЯЩИИ, ЖИВУЩИИ БЛАГОЧЕСТНО, И ОТ ДУХОВНИКА НЕ ИМУЩИИ ЗАПРЕЩЕНИЯ НА ВРЕМЯ, ТЕЛА ХРИСТОВА И КРОВЕ ЕГО С ПОДОБАЮЩЕЮ ЧЕСТИЮ ДА ПРИЧАСТЯТСЯ. ТАКОЖДЕ И ПОДРОСЛЫЯ ОТРОКИ, ИМЖЕ ПРИЯТНА ИСПОВЕДЬ, И МАЛЫЯ МЛАДЕНЦЫ, ПО ОБЫЧАЮ ЦЕРКВЕ ПОДОБАЕТ ЗА ВЕРУ ПРИНОСЯЩИХ, ТЫЯ СПОДОБЛЯТИ СВЯТЫХ ТАИН, В ОСВЯЩЕНИЕ ДУШ И ТЕЛЕС ИХ, И В ПРИЯТИЕ БЛАГОДАТИ ГОСПОДНИ. НЕДОСТОЙНИИ ЖЕ, ВСЯЧЕСКИ ОТ ТАКОВАГО ТАИНСТВА ОТЛУЧЕНИ ДА БУДУТ, ИЖЕ КЛЯТВУ НА СЕБЕ ОТ ЕПИСКОПА, ИЛИ ЗАПРЕЩЕНИЕ ОТЦА ДУХОВНАГО, И ОТЛУЧЕНИЕ КОЕ ИМУЩИИ, И ЯВНИИ ГРЕШНИЦЫ, БЛУДНИКИ И БЛУДНИЦЫ, НАЛОЖНИЦ ИМЕЮЩИИ, И САМЫЯ ТЫЯ НАЛОЖНИЦЫ, ПРЕЛЮБОДЕИ, ЛИХОИМЦЫ, ЧАРОДЕИ, ВОРОЖБИТЫ ВСЯКИЯ, СВЯТОТАТЦЫ, КАРТОВНИКИ, ЗЕРНЩИКИ, ХУЛЬНИКИ, СРАМОСЛОВЦЫ, И ВСЯКОЕ БЕЗЧИНСТВО, ЗАЗОР ЖЕ И УКОР ТВОРЯЩИИ, И ИНИИ СИМ ПОДОБНИИ: И СИИ ДОНЕЛЕЖЕ ИСТИННО НЕ ПОКАЮТСЯ, И ПЛОДЫ ДОСТОЙНЫ ПОКАЯНИЯ НЕ СОТВОРЯТ, И СОБЛАЗНЫ, ИХЖЕ ЯВЕ СОДЕЯША, И СОДЕЛОВАЮТ, ПОКАЯНИЕМ СВОИМ ЯВЛЕННО НЕ ПОТРЕБЯТ, ПРИЧАСТИЯ СВЯТЫХ ТАИНСТВ НИКАКОЖЕ ДА СПОДОБЯТСЯ. СОКРОВЕННЫХ ЖЕ ГРЕШНИКОВ, ТАКО ИСПОВЕДАЮЩИХСЯ, ИСПРАВЛЯЙ БЛАГОРАЗУМНО, ЕЖЕ БЫ НЕ ИЗРАСЛ КИЙ СОБЛАЗН ИНЫМ ЛЮДЕМ, ОТ ТАКОВАГО ПРЕЗОРСТВА, И ТОЕ БЫ ЛИЦЕ В ПОДОЗРЕНИИ НЕ СОСТОЯЛОСЯ, И В ДЕРЗОСТЬ НА ПРИЯТИЕ НЕ БЫЛО ПРИЧАЩАЯСЯ, ИЛИ ОТЛУЧАЯСЯ. ИЗУМЛЕННЫМ, ИЛИ ОБМЕРШИМ, БОЖЕСТВЕННЫЯ ТАЙНЫ ПОДАВАТИ НИКАКОЖЕ ДОСТОИТ, ТОЧИЮ ЕГДА В СЕБЕ ПРИХОДЯТ, И УМНЫ, И В СОЧУВСТВИИ ОТ ОБУМЕРТВИЯ БЫВАЮТ, И ЕГДА В СОКРУШЕНИИ СЕРДЕЧНОМ ИСПОВЕДАНИЕ ГРЕХОВ СВОИХ ТВОРЯТ, К ЦЕРКВИ ПРИХОДЯТ, БОГУ МОЛЯТСЯ, И ЦЕРКОВНЫХ МОЛИТВ СЛУШАЮТ: ИЗРЯДНЕЕ ЖЕ АЩЕ НИ ЕДИНА БЕДА НЕДОСТОИНСТВА В НИХ ОБРЕТАЕТСЯ, ДА ПРИЧАСТЯТСЯ ТОГДА. ЗА ИСТИННОЕ УБО БЛАГОЧИННОЕ И ПРАВИЛЬНОЕ СМОТРИТЕЛЬСТВО, ЕЖЕ БЛАГОУГОЖДАТИ ГОСПОДУ БОГУ ВСЯКИМ ТЩАНИЕМ, И ХРАНИТИ ЦЕРКОВНОЕ ПРЕДАНИЕ В ЧИСТОТУ ТЕЛЕСНУЮ И ДУШЕВНУЮ, ПОВСЮДУ ЛЮДЕМ СВОИМ ДАСТ ГОСПОДЬ МИР И МИЛОСТЬ, И БЛАГОДЕНСТВО ВСЕМ БЛАГОЧЕСТНО ЖИВУЩИМ НА ЗЕМЛИ: ПОСЕМ И НАСЛЕДИЕ В НЕБЕСЕХ ВСЕРАДОСТНЫХ ВЕЧНЫХ КРАСОТ ПОДАРСТВИТ. ЕЖЕ И БУДИ ПОЛУЧИТИ ХРИСТИАНСКИМ ПРАВОСЛАВНЫМ ДУШАМ БЛАГОДАТИЮ ИИСУС ХРИСТОВОЮ, И ПРЕДСТАТЕЛЬСТВОМ ВСЕСЛАВНЫЯ ПРЕЧИСТЫЯ ДЕВЫ БОГОРОДИЦЫ МАРИИ, И МОЛИТВАМИ ВСЕХ СВЯТЫХ АМИНЬ. ПРАВИЛО ГОТОВЯЩИМСЯ СЛУЖИТИ, И ХОТЯЩИМ ПРИЧАСТИТИСЯ СВЯТЫХ БОЖЕСТВЕННЫХ ТАИНСТВ ТЕЛА И КРОВЕ ГОСПОДА ИИСУСА ХРИСТА, ИМЕТИ ПОДОБАЕТ СИЦЕ: ПО ЦЕРКОВНОМ ПОВЕЧЕРИИ ГЛАГОЛАТИ КАНОН ИИСУСУ ХРИСТУ, И БОГОРОДИЦЕ АКАФИСТ, КАНОН АНГЕЛУ ХРАНИТЕЛЮ, И КАНОН ДНЕ, КОТОРЫЙ ПРИЛУЧИТСЯ [ИНИИ ЖЕ И МОЛИТВЫ НА СОН ГРЯДУЩИХ], ПОТОМ, ДОСТОЙНО ЕСТЬ: СВЯТЫЙ БОЖЕ: И ПО ОТЧЕ НАШ, ТРОПАРИ: ПОМИЛУЙ НАС ГОСПОДИ: ИНОГДА ЖЕ КОНДАК ПРАЗДНИКА ГЛАГОЛЮТ, И МОЛИТВУ: НЕСКВЕРНАЯ, НЕБЛАЗНАЯ: И ОТПУСТ. И НЕНАВИДЯЩИХ И ОБИДЯЩИХ НАС: ВОУТРИЕ ЖЕ ЛИТУРГИСУЮЩИМ ДОЛЖНО ГЛАГОЛАТИ ЧАСЫ, 3-Й И 6-Й: И ПО МОЛИТВЕ, БОЖЕ И ГОСПОДИ СИЛ: КО СВЯТОМУ ПРИЧАЩЕНИЮ КАНОН, И МОЛИТВЫ. ПО ПРОЧТЕНИИ ЖЕ МОЛИТВ СОТВОРИТИ ОТПУСТ ЧАСОВ. ХОТЯЩИИ ЖЕ ПРИЧАСТИТИСЯ, ЧАСЫ СЛУШАЮТ, И В ЦЕРКВИ ПРЕД ЛИТУРГИЕЮ. И ЕГДА КТО ПРИЧАСТИТСЯ ЖИВОТВОРЯЩИХ СВЯТЫХ ТАИНСТВ, МОЛИТВЫ ПО ПРИЧАЩЕНИИ, И ОТПУСТ СОТВОРИТ. В ПРОЧИЯ ЖЕ ДНИ, В ВЕЧЕР НЕДЕЛИ, КАНОН ИИСУСУ, БОГОРОДИЦЕ ПАРАКЛИСИС, ЕМУЖЕ ИРМОС: ВОДУ ПРОШЕД: ТРОПАРЬ ЖЕ: МНОГИМИ СОДЕРЖИМЬ НАПАСТЬМИ: КАНОН АРХАНГЕЛОМ, И АЩЕ ХОЩЕТ КТО, АНГЕЛУ ХРАНИТЕЛЮ. ВОУТРИЕ ПО ВЫШЕПИСАННОМУ ДА СОТВОРЯЕТ [ИНИИ ЖЕ И МОЛИТВЫ УТРЕННИЯ ГЛАГОЛЮТ]. В ВЕЧЕР ПОНЕДЕЛЬНИКА, КАНОН ГОСПОДУ ИИСУСУ, И ПАРАКЛИСИС БОГОРОДИЦЕ, ПРЕДТЕЧИ СВЯТОМУ ИОАННУ, И АНГЕЛУ ХРАНИТЕЛЮ. ВО ВТОРНИК ВЕЧЕРА, КАНОН ИИСУСУ, БОГОРОДИЦЕ КАНОН ОДИГИТРИЮ, ИЛИ ИН КОТОРЫЙ, И АНГЕЛУ ХРАНИТЕЛЮ. В СРЕДУ ВЕЧЕРА, КАНОН ГОСПОДУ ИИСУСУ, ПАРАКЛИСИС БОГОРОДИЦЕ, АНГЕЛУ ХРАНИТЕЛЮ, СВЯТЫМ АПОСТОЛОМ [И АЩЕ КТО ИЗВОЛИТ, И СВЯТОМУ НИКОЛАЮ]. В ЧЕТВЕРТОК ВЕЧЕРА, КАНОН ЖИВОТВОРЯЩЕМУ КРЕСТУ, ПАРАКЛИСИС БОГОРОДИЦЕ, АНГЕЛУ ХРАНИТЕЛЮ. В ПЯТОК ВЕЧЕРА, КАНОН ИИСУСУ СЛАДЧАЙШЕМУ, АКАФИСТ БОГОРОДИЦЕ НЕОТЛОЖНО, АНГЕЛУ ХРАНИТЕЛЮ, И ВСЕМ СВЯТЫМ. В СУББОТУ ВЕЧЕРА, КАНОН ГОСПОДУ ИИСУСУ, ПАРАКЛИСИС БОГОРОДИЦЕ, АНГЕЛУ ХРАНИТЕЛЮ. ИНИИ ЖЕ АКАФИСТ БОГОРОДИЦЕ [С РАЗМЫШЛЕНИЕМ ТАИН БОЖЕСТВЕННЫХ, КАКО СОДЕЯСЯ] И ПО ВСЯ ДНИ ЧИТАЮТ, НО И ТОГДА, АЩЕ ВОСХОЩЕТ КТО, ДА ГЛАГОЛЕТ ПАРАКЛИСИС БОГОРОДИЦЕ: АЩЕ ЛИ НИ, ДА ОСТАВИТ. БОГОБОЯЗНИВИИ ЖЕ ЛЮДИ, И К СЕМУ НЕ ВДАВАЮЩЕСЯ В СУЕТНАЯ ПОМЫШЛЕНИЯ, И УМ СВОЙ ВОЗДЕРЖАВАЮЩЕ, УПРАЖНЯЮТСЯ В ЧИТАНИИ ПСАЛТИРИ, С МОЛИТВАМИ, ПО ОПРЕДЕЛЕНИЮ И КНИГ ЗАКОНА ГОСПОДНЯ, И УЧИТЕЛЕЙ СВЯТЫХ. СИЦЕВОЕ ЖЕ ПРАВИЛО И МОНАШЕСТВУЮЩИИ ВО ОБИТЕЛЕХ СВЯТЫХ, ТАКОЖДЕ СВЯЩЕННИЦЫ, ДИАКОНИ, И ПРИЧЕТНИЦЫ ЦЕРКОВНИИ, И ГРАММАТЕ УМЕЮЩИИ ВСЯКАГО ЧИНА И ПОЛА? ТВОРИТИ ПОВСЕДНЕВНО ДОЛЖНИ СУТЬ, КРОМЕ ПРИУГОТОВЛЕНИЯ КО ПРИЧАЩЕНИЮ ЧАСОВ, КАНОНА И МОЛИТВ. И НАЧИНАТИ СИЦЕ [АЩЕ ПОВЕЧЕРИЕ СЛУША КТО В ЦЕРКВИ]: НАЕДИНЕ, В ВЕЧЕР ИЛИ ПОРАНУ, ЯКО ИНИИ РАЗДЕЛЯЮЩЕ КАНОНЫ ГЛАГОЛЮТ ПО НАЧАЛЕ: БЛАГОСЛОВЕН БОГ НАШ: ИЛИ МОЛИТВАМИ СВЯТЫХ ОТЕЦ НАШИХ: ЦАРЮ НЕБЕСНЫЙ: ПО ПРИИДИТЕ ПОКЛОНИМСЯ: ПСАЛОМ 50. И ВЕРУЮ ВО ЕДИНАГО БОГА: И КАНОНЫ, ПОТОМ, ДОСТОЙНО ЕСТЬ: СЛАВА, И НЫНЕ: ОТПУСТ, И МОЛИТВА, НЕНАВИДЯЩИХ, И ОБИДЯЩИХ НАС: И ПОКЛОНОВ 15, С МОЛИТВАМИ. ИНИИ ЖЕ 12 ПСАЛМОВ, ПО ОПРЕДЕЛЕННОМУ ЧИНУ В ПРАВИЛО СЕБЕ ЧИТАЮТ. НЕ ОСТАВЛЯТИ БО ЦЕРКОВНАГО СОБРАНИЯ АПОСТОЛ ЗАВЕЩА: УБО И МОЛИТВ ЦЕРКОВНЫХ, И ОПРЕДЕЛЕННАГО СЕБЕ ПРАВИЛА ОСОБЬ ОСТАВЛЯТИ НЕ ПОДОБАЕТ КОМУЖДО: ПОНЕЖЕ В ЛЮБОВЬ БОЖИЮ ПРОСТИРАТИСЯ ВСЯКОМУ ЧЕЛОВЕКУ ПОТРЕБНО, ЯКОЖЕ ПИСАНО ЕСТЬ: ВОЗЛЮБИШИ ГОСПОДА БОГА ТВОЕГО ВСЕМ СЕРДЦЕМ ТВОИМ, ВСЕЮ ДУШЕЮ ТВОЕЮ, ВСЕЮ КРЕПОСТИЮ ТВОЕЮ, И ВСЕМ ПОМЫШЛЕНИЕМ ТВОИМ. ЛЮБОВЬ ЖЕ ИМЕТИ, СОТВОРЯТИ МОЛИТВЫ ПРИЛЕЖНЫЯ ПОДОБАЕТ К БОГУ ТРИИПОСТАСНОМУ, И К ПРЕЧИСТЕЙ ДЕВЕ БОГОРОДИЦЕ МАРИИ, И КО ВСЕМ СВЯТЫМ: И УГОТОВАННАЯ БЛАГАЯ В НЕБЕСЕХ ПОЛУЧИШИ СО ВСЕМИ СВЯТЫМИ, БЛАГОУГОДИВШИМИ В НЕКОНЧАЕМЫЯ ВЕКИ, АМИНЬ. НАЧАТИ ЖЕ КОМУЖДО ПРАВИЛО КЛАНЯЯСЯ, И ПО ПРЕДЕЛУ ПОКЛОНЫ ТВОРИТИ, СИЦЕ ГЛАГОЛАТИ ДОЛЖНО: БОЖЕ, МИЛОСТИВ БУДИ МНЕ ГРЕШНОМУ, ИЛИ ГРЕШНЕЙ. БОЖЕ, ОЧИСТИ ГРЕХИ МОЯ, И ПОМИЛУЙ МЯ. СОЗДАВЫЙ МЯ ГОСПОДИ, ПОМИЛУЙ. БЕЗ ЧИСЛА СОГРЕШИХ, ГОСПОДИ, ПРОСТИ МЯ. И БОГОРОДИЦЕ ВЛАДЫЧИЦЕ ДЕВО, СПАСИ МЯ. СИЕ И ЗА КАНОНЫ ЕЯ КОЛИКИМ ЧИСЛОМ ГЛАГОЛАТИ, ИЛИ ОСОБНО РАДИ УСЕРДИЯ К НЕЙ ПО 100 КРАТ НЕ УМЕЮЩИИ ДА ВЕЩАЮТ. ТАКОЖДЕ И АНГЕЛУ ХРАНИТЕЛЮ, И СВЯТЫМ ГЛАГОЛАТИ: АНГЕЛЕ ХРАНИТЕЛЮ МОЙ СВЯТЫЙ, ОТ ВСЯКАГО ЗЛА СОХРАНИ МЯ. СВЯТЫЙ АПОСТОЛЕ, ИЛИ МУЧЕНИЧЕ, ИМЯРЕК, ИЛИ ОТЧЕ ВАСИЛИЕ, ИЛИ, ПРЕПОДОБНЕ ОТЧЕ, МОЛИ БОГА О МНЕ. ПРЕЖДЕ ЖЕ СЕГО ПРАВИЛО МОНАШЕСТВУЮЩИМ, И КОМУЖДО ЧЕЛОВЕКУ ОНОЕ ИМЕТИ ХОТЯЩЕМУ, И В МИРЕ ЖИВУЩУ, НАПЕЧАТАНО НА ВСЯКИЙ ДЕНЬ ГРАММАТЕ УМЕЮЩИМ. ПОВЕЧЕРИЕ, И КОТОРЫЯ ОПРЕДЕЛЕННЫЯ КАНОНЫ, И 4 КАФИСМЫ, С ТРОПАРИ И МОЛИТВАМИ, И ПЕСНИ ПРОРОЧЕСКИЯ: ТРИ СТА ПОКЛОНОВ, ШЕСТЬ СОТ МОЛИТВ ИИСУСОВЫХ: СЕДМОЕ СТО БОГОРОДИЦЕ, С МОЛИТВОЮ: ВЛАДЫЧИЦЕ МОЯ ПРЕСВЯТАЯ БОГОРОДИЦЕ, СПАСИ МЯ ГРЕШНАГО. И ТАКО ВО ВСЮ СЕДМИЦУ ВСЮ ПСАЛТИРЬ СОВЕРШАЮТ, И ПРАВИЛО ТВОРЯТ. ИНИИ ЖЕ НОВОНАЧАЛЬНИИ МОНАСИ, И МАЛОМОЩНИИ, ЧИТАХУ ПО 3 КАФИСМЫ, И ТВОРЯХУ СТО ПОКЛОНОВ, И ТРИ СТА МОЛИТВ ИИСУСОВЫХ И БОГОРОДИЦЕ СТО. АЩЕ ЖЕ КОТОРЫЯ ЛЮДИ ГРАММАТЕ НЕ УМЕЮТ, МУЖЕСКА И ЖЕНСКА ПОЛА, А ЦЕРКОВНАГО ПЕНИЯ ЗА КАКОВЫМИ СЛУЧАИ, РАДИ ДАЛЬНОСТИ, ЯКО В СЕЛАХ И ДЕРЕВНЯХ, ИЛИ И ВО ГРАДЕХ ЗА НЕУДОБСТВОМ ХОЖДЕНИЯ СЛУШАТИ НЕ ВОЗМОГАЮТ, И ПРАВИЛА САМИ НЕ ВЕДЯТ ОПРЕДЕЛИТИ, ЖЕЛАНИЕ ЖЕ ИМЕЮТ БЛАГОУГОЖДАТИ БОГУ, И ОЧИЩАТИ МЫСЛИ СЕРДЦА СВОЕГО МОЛИТВОЮ И ПОСТОМ, И ЧИМ БЫ ВОЗМОГЛА КАЯ ХРИСТИАНСКАЯ ДУША РАДОСТЬ И СЛАДОСТЬ, РАДИ МОЛИТВЕННАГО ЧИНА И ПРАВИЛЬНАГО СЕБЕ ПРЕДЕЛА ПОЛУЧИТИ, СИЦЕ ТВОРИТИ, ХОТЯ ПОМАЛУ, ДОЛЖНИ: ЗА ВЕЧЕРНЕЕ УБО ПЕНИЕ, МОЛИТВ ИИСУСОВЫХ: ГОСПОДИ ИИСУСЕ ХРИСТЕ СЫНЕ БОЖИЙ, ПОМИЛУЙ МЯ ГРЕШНАГО. СТО, И ПОКЛОНОВ 25. ЗА ПОВЕЧЕРИЕ, МОЛИТВ 50, ПОКЛОНОВ 12. ЗА КАНОН БОГОРОДИЦЫ АКАФИСТОВ, МОЛИТВ ДВА СТА, И ПОКЛОНОВ 29. ЗА КАНОН ПАРАКЛИСИС БОГОРОДИЦЕ, МОЛИТВ 70, И ПОКЛОНОВ 12. ЗА КАНОН АНГЕЛУ ХРАНИТЕЛЮ, МОЛИТВ 50, И ПОКЛОНОВ 7. ЗА КАНОН СЕДМИЧНЫЙ, МОЛИТВ 30, И ПОКЛОНОВ 5. ЗА ПОЛУНОЩНИЦУ, МОЛИТВ СТО, И ПОКЛОНОВ 25. ЗА УТРЕНЮ, МОЛИТВ ТРИ СТА, И ПОКЛОНОВ 50. ЗА 1-Й ЧАС, МОЛИТВ 50, И ПОКЛОНОВ 7. ЗА 3-Й, ЗА 6-Й, И ЗА 9-Й ЧАС, МОЛИТВ ПО 50, ТАКОЖДЕ И ПОКЛОНОВ ПО 7. ЗА ИЗОБРАЗИТЕЛЬНАЯ, МОЛИТВ СТО, ПОКЛОНОВ 10. И ТАКО ПО БЛАГОДАТИ БОЖИЕЙ КТО УПРАВИВСЯ, И В БОЛЬШЕЕ ПОДВИГНЕТСЯ МОЛИТВОСЛОВИЕ, ПО ЗАВЕЩАНИЮ АПОСТОЛОВУ: НЕПРЕСТАННО МОЛИТЕСЯ, О ВСЕМ НА ВСЯКО ВРЕМЯ БЛАГОДАРИТЕ ГОСПОДА. И НИКТОЖЕ БЕЗ МОЛИТВ, И ВО ВРЕМЯ ЦЕРКОВНАГО ПЕНИЯ ДА ПРЕБЫВАЕТ, ГДЕЛИБО В ПРИКЛЮЧЕНИИ НА МЕСТЕ БЫТИ СЛУЧИТСЯ КОМУ В ДОМУ, ИЛИ НА ПУТИ: НО ПО СИЛЕ СВОЕЙ ДА СОВЕРШАЕТ, И НЕ УНЫВАЕТ НЕРАДЕНИЕМ, И ВОВСЕ СУЕТНЫМИ ПОПЕЧЕНЬМИ ДА НЕ ОТЯГОЩАЕТСЯ. И МАЛОЕ УБО ОПРЕДЕЛЕННОЕ, И ВО ВРЕМЕНИ СОВЕРШАЕМОЕ ПРАВИЛО, В ВЕЛИКОЕ ВМЕНИТСЯ ОТ ХРИСТА ГОСПОДА, ЯКО НА НЕГО УПОВАЕТ КТО, И НЕ ЗАБЫВАЕТ ЕГО. САМ БО ГОСПОДЬ РЕЧЕ: НЕ ЯВИШИСЯ ПРЕДО МНОЮ ТОЩ, И, НЕ БЕЗПЛОДНИ БЫВАЙТЕ. ЯКОЖЕ КОМУ ПОДАСТ ГОСПОДЬ, АЩЕ КТО СЛУЖИТ, ЯКО ОТ КРЕПОСТИ, ТАКО ДА ТЩИТСЯ, ТАКО ДА ТЕЧЕТ, И ХОЩУ, РЕЧЕ АПОСТОЛ СВЯТЫЙ ПАВЕЛ, УМОМ МОИМ ГЛАГОЛАТИ ПЯТЬ СЛОВЕС. СО ВНИМАНИЕМ БО И ГОРЯЩИМ СЕРДЦЕМ И МАЛОЕ В ВЕЛИКОЕ ВМЕНИТСЯ. СЕГО РАДИ, НИКТОЖЕ О СЕМ МАЛОМ ПРЕДЕЛЕ ПРАВИЛА НЕ УМЕЮЩИМ ЧЕСТИ КНИГ, СУМНИСЯ. АЩЕ УБО МОЖЕТ КОГО КТО НАУЧИТИ, И В БОЛЬШЕЕ ПРАВИЛО, И В МОЛИТВУ УПРАВЛЯЙ БЛАГОРАЗУМИЕМ СВОИМ: НИКТОЖЕ УБО СЕГО ВОЗБРАНИТИ ИМАТЬ, НО И ПОХВАЛУ, ПАЧЕ ЖЕ МЗДУ ОТ ХРИСТА ГОСПОДА ВОЗЫМЕЕТ, ТОЧИЮ ДАЖДЬ ВСЯК СЛАВУ БОГУ, ГЛАГОЛЯ И ТВОРЯ ЛУЧШЕЕ И ПОЛЕЗНОЕ, И БОГУ УГОДНОЕ. ИБО ВЫНУ ИМАТЬ СОВЕРШАЮЩИЙ ПРАВИЛО СВОЕ, АЩЕ И НЕКНИЖЕН СЫЙ, ВЕСЕЛИТИСЯ, ПО РЕЧЕННОМУ: ПОМЯНУХ БОГА, И ВОЗВЕСЕЛИХСЯ. СОВЕРШЕННО УБО ВОЗРАДУЕТСЯ, И ВОЗВЕСЕЛИТСЯ: ЯКО МЗДА ДЕЛАЮЩИМ БЛАГОЕ МНОГА НА НЕБЕСЕХ. АМИНЬ. НЕУМЕЮЩИМ ГРАММАТЕ ПРАВИЛО НАПИСАНО ПРЕЖДЕ СИЦЕ: ЗА ВЕСЬ ПСАЛТИРЬ #6 МОЛИТВ ИИСУСОВЫХ. ЗА КАФИСМУ ЕДИНУ ТРИ СТА МОЛИТВ: ЗА СЛАВУ СТО. ЗА ПОЛУНОЩНИЦУ 6 СОТ. ЗА УТРЕНЮ 1500. ЗА ЧАСЫ БЕЗ МЕЖДОЧАСИЯ 1000, С МЕЖДОЧАСИЕМ ЖЕ 1500. ЗА ВЕЧЕРНЮ 6 СОТ. ЗА ВЕЛИКОЕ ПОВЕЧЕРИЕ 7 СОТ. ЗА МАЛОЕ ПОВЕЧЕРИЕ 4 СТА. ЗА КАНОН АКАФИСТОВ БОГОРОДИЦЕ, С КОНДАКИ И ИКОСЫ, ТРИ СТА ПОКЛОНОВ. ВСЕКОНЕЧНО УБО ПОДОБАЕТ И НУЖНО УМЕТИ ВСЯКАГО ВОЗРАСТА И ПОЛА ЧЕЛОВЕКУ МОЛИТВУ: ОТЧЕ НАШ: БОГОРОДИЦЕ ДЕВО, РАДУЙСЯ: И ВЕРУЮ ВО ЕДИНАГО БОГА ОТЦА: И ЧИТАТИ ПО КОЛИКУ КРАТ НА ВСЯК ДЕНЬ. СТИХИ: ЧЕЛОВЕКОМ ВСЕМ ПРАВИЛО НАЛЕЖИТ, КОМУ ЧТО ТРЕБНО, ВСЯК ТО ДА ДЕРЖИТ: ГОСПОДУ СЛАВУ ВСЕГДА ВОЗСЫЛАЯ, ЯКО ТВАРЬ ТВОРЦА СВОЕГО В ВЕК ЗНАЯ. КОНЕЦ, И БОГУ СЛАВА.